DÉTAN, mouché-ya ki ékri Labib ka répété èkzaktéman menm bagaj-ya. Poukisa ? Annou wè trwa bagaj ki pouvé èspliké sa.

Lépòk yé ékri l’. Annan lépòk Israyèl, i pa té gen bokou sèrvitèr Bondjé ki té gen yépa kopi di Lalwa-a. Donk, a kouté yé té ka kouté yé li Lalwa-a, èspésyalman lò tout nasyon-an té ka rasanblé annan tabèrnak-a, épi pita annan Tanp-a (Deut. 31:10-12). Lò yé té ka rasanblé konsa, yé té divèt rété dibout pannan lontan an mitan roun patché ròt moun. Donk, sa pa té divèt fasil pou yé rivé byen kouté (Néh. 8:2, 3, 7). A pou sa, lò yé té ka répété sa ki té enpòrtan, sa té ka pèrmèt moun-yan sonjé sa Ékritir-ya té ka di pi fasilman pou apliké yé. É lò yé té ka répété sèrten mo, sa té ka idé yé sonjé sèrten bagaj prési annan Lalwa Jéova té bay yé (Lév. 18:4-22 ; Deut. 5:1).

Tèks-a. Sèrten parti annan Labib, a chanté, kou Psaumes-yan, Chant de Salomon ké Lamentations. Annan sèrten di sa chanté-ya, i gen roun réfren, sa lé di plizyèr fraz yé ka répété ki ka byen montré tèm chanté-a é ki ka idé sa-ya ki ka kouté tchenbé paròl chanté-a. Parèkzanp, gadé Psaume 115:9-11 : « O Israyèl, fè Jéova konfyans — i ka sové yé é i sa yé boukliyé. O zòt, fanmi Aaron, a pou zòt fè Jéova konfyans — i ka sové yé é i sa yé boukliyé. Zòt ki gen lakrent pou Jéova, a pou zòt fè Jéova konfyans — i ka sové yé é i sa yé boukliyé. » Lò yé té ka répété sa paròl-ya, sa-ya ki té ka chanté té ka tchenbé plizyèr vérité ki té enpòrtan annan yé tchò ké yé lèspri.

Pou montré sa ki enpòrtan. Détan, mouché-ya ki ékri Labib répété sèrten bagaj paské sa té enpòrtan. Parèkzanp, lò Jéova défann Israyélit-ya manjé disan, i fè Moyiz répété plizyèr fwa poukisa i té bay yé sa lòrd-a. I té lé byen montré ki lavi lachè-a, a annan disan-an i fika, sa lé di ki disan-an ka réprézanté lavi-a (Lév. 17:11, 14). Lontan apré sa, lò apot-ya ké ansyen-yan ki té Jérizalèm ékri sa Jéova pa kontan, sa kou-a ankò yé répété ki nou pa divèt pran disan (Actes 15:20, 29).

Mé sa pa lé di ki Jéova lé nou répété sèrten bagaj ki annan Labib san nou pa réfléchi. Jézi di : « Lò zòt ka priyè, pa toujou répété menm bagaj-ya » (Mat. 6:7). Apré sa, i montré nou pou ki kalité bagaj nou pouvé priyè (Mat. 6:9-13). Donk, menm si, lò nou ka priyè, nou pa ka répété menm mo-ya, nou pouvé rouvini asou menm bagaj-ya plizyèr fwa (Mat. 7:7-11).

Donk, lò Paròl Bondjé-a ka répété sèrten mo ouben sèrten bagaj, a pa pou anyen. A roun fason pou nou Gran Ansényan ansényé nou pou nou byen (Is. 48:17, 18).