1. Kouman nou pouvé pasé tan ké Jéova ?

 NOU kontan pasé tan ké moun nou kontan. Sa-ya ki maryé é ki kontan yé konpanyen bokou, ka pran plézi pasé tan yé toulédé. Jennjan-yan ka pran plézi pasé tan ké yé bon zanmi. É nou tout ka pran plézi pasé tan ké nou frè ké sò-ya. Mé, pi enpòrtan-an, nou kontan pasé tan ké nou Bondjé. Nou ka fè sa lò nou ka priyè l’, lò nou ka li so Paròl, é lò nou ka pran tan réfléchi asou so projè ké bèl kalité i gen. Tan-an nou ka pasé ké Jéova gen bokou valò ! (Ps. 139:17).

2. Ki problèm nou ka jwenn ?

² Menm si nou kontan pasé tan ké Jéova, a pa tout tan sa fasil. Kou nou gen bokou bagaj pou fè, détan, sa pouvé rèd pou nou trapé tan pou nou adoré l’. Nou travay, nou fanmi, ké ròt bagaj nou bézwen fè, ka pran patché tan. É détan, nou pouvé santi ki nou pa gen tan ankò pou priyè, étidyé, ouben réfléchi asou sa nou ka étidyé-a.

3. Ki ròt bagaj pouvé pran tout nou tan ?

³ I gen rounòt bagaj ki pouvé manjé nou tan. Si nou pa ka panga, nou pouvé lésé sèrten bagaj ki pa mové, vòlò tan-an nou té ké pouvé sèrvi pou vin pi pròch ké Jéova. Parèkzanp, annou palé di anmizman-an. Nou tout  bézwen pran tan pou pozé, chanjé nou lidé. Sa nou ka désidé fè pou pozé pouvé bon, mé si nou ka pasé tròp tan annan sa bagaj-a, nou pa ké gen bokou tan ankò pou adoré Jéova. Nou divèt sonjé ki anmizé, a pa sa ki pi enpòrtan-an (Prov. 25:27 ; 1 Tim. 4:8).

4. Kisa nou ké wè aprézan ?

⁴ Annan sa artik-a, nou ké wè poukisa nou divèt désidé sa ki pi enpòrtan annan nou lavi. Nou ké wè osi kouman nou pouvé byen profité di tan-an nou ka pasé ké Jéova é ki bénédiksyon nou pouvé jwenn.

5. Kouman konsèy nou ka jwenn annan Éphésiens 5:15-17 pouvé idé roun jennjan chwazi pi bèl lavi i ké pouvé gen ?

⁵ Chwazi pi bèl lavi i pouvé gen. Jenn-yan souvan ka doumandé yé kò kisa yé ké fè annan yé lavi. Yé profésèr ké yé fanmi ki pa Témwen pouvé ankourajé yé alé linivèrsité pou yé gen roun bon travay, é pou yé ganyen roun patché soumaké. Si yé ka pran sa chimen-an, sa ké pran bokou annan yé tan. Yé fanmi ké yé zanmi annan asanblé-a yé menm pitèt ka ankourajé yé sèrvi yé lavi pou adoré Jéova. Kisa ki pouvé idé roun jennjan ki kontan Jéova pran pi bon désizyon-an ? A roun bon bagaj si i ka li Éphésiens 5:15-17 é si i ka réfléchi asou sa vèrsé-ya (li). Lò i fin li sa vèrsé-ya, roun jennjan pouvé doumandé so kò : « A kisa ki “volonté Jéova”-a ? Ki désizyon ké fè li plézi ? Ki désizyon ké idé mo byen sèrvi tan mo gen-an ? ». Pa bliyé ki « jou-ya mové », é ki sa sistèm Satan ka dirijé-a, ké fini titalò. Miyò nou sèrvi nou lavi pou fè bagaj pou Jéova kontan nou.

6. Kisa Mari désidé fè, é poukisa a té roun bon désizyon ?

⁶ Désidé sa ki pi enpòrtan-an. Détan, lò nou lé byen sèrvi tan nou gen-an, nou divèt chwazi ant dé bagaj ki pa mové. Nou ka wè sa lò nou ka gadé sa ki rivé lò Jézi alé wè Mari ké Mart. Mart té tèlman kontan rousouvwè Jézi annan so kaz, ki i fè roun patché manjé pou li. Mé so sò Mari profité pou asiz òbò so Sényèr, épi kouté sa i té ka di. Sa Mart té ka fè pa té mové, mé Jézi di ki Mari té « chwazi pi bon moso-a » (Luc 10:38-42). Ké tan-an, i dèt bliyé ki manjé yé manjé sa jou-a. Mé nou pouvé sir ki i pa jen bliyé sa Jézi anprann li sa jou-a. Menm fason a té roun plézi pou Mari pasé sa ti moso tan-an ké Jézi, a roun plézi pou nou pasé tan ké Jéova. Alòr, kouman nou pouvé byen sèrvi tan nou gen-an ?

7. Poukisa sa enpòrtan pou nou pran tan priyè, étidyé ké médité ?

⁷ Pa bliyé ki lò to ka priyè, lò to ka étidyé, é lò to ka réfléchi asou sa to étidyé-a, to ka adoré Jéova. Lò nou ka priyè, a palé nou ka palé ké nou Papa ki annan syèl-a, ki kontan nou bokou (Ps. 5:7). Lò nou ka étidyé Labib-a, nou ka rousouvwè « konésans Bondjé »-a, ki sa Sours sajès-a (Prov. 2:1-5). Lò nou ka médité, nou ka pran tan réfléchi asou bèl kalité Jéova gen, ké so projè pou nou, é asou plas nou gen annan sa projè-a. A pi bon fason i gen pou nou byen  sèrvi nou tan ! Mé kisa ki pouvé idé nou fè sa ?

8. Kisa fason Jézi sèrvi so tan lò i té annan dézèr-a ka anprann nou ?

⁸ Si sa posib, chwazi roun koté ki kalm. Annou wè èkzanp Jézi. Anvan i koumansé préché asou latè-a, i fè 40 jou annan dézèr-a (Luc 4:1, 2). Annan sa koté-a ki té kalm, Jézi té pouvé priyè Jéova ké médité asou volonté so Papa pou li. Sa idé Jézi préparé so kò pou tout éprèv i té ké jwenn. Kisa èkzanp Jézi ka anprann to ? Si to annan roun gran fanmi, détan pitèt sa pa fasil pou to trapé roun koté ki kalm annan to kaz. Si to annan sa sitiasyon-an, pitèt to pouvé soti di to kaz. A sa Julie ka fè lò i lé pran tan pou priyè Jéova. Li ké so mari ka rété annan roun ti kaz, Lafrans. É sa pa fasil pou i rété li rounso san pyès moun pa déranjé l’. Julie ka di : « Touléjou, mo ka soti dèrò pou alé maché annan roun park. Annan sa koté-a, mo pouvé rété mo rounso, épi pran tan palé ké Jéova ké tout mo tchò. »

9. Menm si so program té charjé, kouman Jézi montré ki so lanmityé ké Jéova té enpòrtan pou li ?

⁹ Jézi té gen vréman bokou bagaj pou fè. Lo i té asou latè-a, moun-yan té ka swiv li tout koté, é yé tout té ka doumandé li pran tan pou yé. Roun jou, « tout moun annan vil-a té rasanblé jis douvan lapòt kaz-a » pou wè li. Magré sa, i toujou trapé tan pou pran swen di so pròp lanmityé ké Jéova. Anvan solèy-a lévé, i alé annan roun « koté i pa té gen pyès moun », pou i té pouvé rété li rounso ké so Papa (Marc 1:32-35).

10-11. Dapré Matthieu 26:40, 41, ki konsèy Jézi bay so disip-ya annan jarden Jètsémani-a, mé kisa ki rivé ?

¹⁰ Dèrnyé lannwit i fè asou latè-a, Jézi chaché roun koté kalm pou i té pouvé priyè ké médité. I chwazi jarden Jètsémani-a (Mat. 26:36). Sa jou-a, Jézi di so disip roun bagaj enpòrtan asou lapriyè.

¹¹ Men sa ki rivé : Lò yé rivé annan jarden Jètsémani-a, i té ja ta. Pitèt i té pasé minwi. Jézi doumandé so apot-ya « véyé », é i pati pi lwen, pou priyè (Mat. 26:37-39). Mé toupannan i té ka priyè, so disip pran somèy. Lò i wè yé té ka dronmi, Jézi doumandé yé ankò « véyé épi priyè toulong » (li Matthieu 26:40, 41). I randé so kò kont ki roun patché bagaj té boulvèrsé yé, é yé té las. Ké bokou konpasyon, Jézi rékonnèt ki ‘lachè-a fèb’. Pourtan, Jézi alé priyè dé  kou ankò. É lò i rouvini, i wè so disip-ya té ka dronmi, pasé yé té ka priyè (Mat. 26:42-45).

12. Kisa nou pouvé fè si détan nou ka santi nou kò pa bon, ouben nou tro las pou nou priyè ?

¹² Chwazi bon moman-an. Détan nou pouvé santi ki nou kò pa bon, ouben nou tro las pou nou priyè. Si sa ja rivé to, a pa to rounso. Kisa to pouvé fè ? Roun ran ki té abitchwé priyè Jéova lò lajournen-an té fini, ka di ki sa ka idé yé lò yé ka priyè pi bònò aswè, lò yé roun tibi mwen las. Ròt ka di ki fason yé ka mété yé kò pou priyè, ka idé yé. É si to ka santi ki to tèt pa la, ouben to tro dékourajé pou to priyè ? Di Jéova sa to ka rousanti. To pouvé sir ki nou Papa ki plen ké mizérikòrd ké konprann to (Ps. 139:4).

13. Kouman aparèy élèktronik-ya pouvé anpéché nou byen profité di tan-an nou ka pasé ké Jéova ?

¹³ Rété konsantré lò to ka étidyé. A pa lapriyè-a rounso ki ka idé nou vin pi pròch ké Jéova. Étidyé Labib-a, alé annan réinyon-yan pouvé idé nou osi vin pi pròch ké li. Kisa to pouvé fè pou to byen sèrvi tan-an to ka pasé ka étidyé, ouben tan-an to ka pasé annan réinyon-yan ? Doumandé to kò : « Kisa ki pouvé anpéché mo konsantré mo kò pannan réinyon-yan, ouben lò mo ka éséyé étidyé ? » Si roun moun ka aplé mo, ka voyé mo roun imél, roun mésaj asou mo pòrtab, ouben rounòt aparèy, ès sa pouvé anpéché mo gardé mo lidé asou sa mo ka fè ? Jòdla, roun patché moun ka sèrvi sa aparèy-ya. Sèrten èspésyalis ka di ki, lò nou ka éséyé konsantré nou kò, dipi nou gen nou pòrtab òbò nou, sa pouvé anpéché nou fè sa. Roun profèsèr ka di : « To pa ka mété to tèt asou sa to ka fè. To lidé pa la *. » Anvan réinyon-yan ké gran asanblé-ya, yé ka doumandé nou souvan mété nou pòrtab ké ròt aparèy nou gen-an roun fason pou yé pa déranjé ròt-ya. Ès nou pouvé fè menm bagaj-a lò nou nou rounso, pou yé pa déranjé nou, é pou yé pa déranjé nou lò nou ka pasé tan ké Jéova ?

14. Dapré Philippiens 4:6, 7, kouman Jéova ké idé nou konsantré nou kò ?

 ¹⁴ Doumandé Jéova idé to konsantré to kò. Si to ka wè ki to lidé pa la lò to ka étidyé Labib-a ouben pannan réinyon-yan, doumandé Jéova idé to. Si to enkyèt, ouben angwasé, pitèt sa pa fasil pou to pa sonjé sa ki ka trakasé to pou to konsantré asou Paròl Bondjé-a. Mé sa enpòrtan pou to fè sa. Priyè pou to rousouvwè lapè ki ké protéjé ni to tchò ni ‘to lèspri’ (li Philippiens 4:6, 7, nòt).

15. Ki bénédiksyon nou ka jwenn lò nou ka pasé tan ké Jéova ?

¹⁵ Si to ka pran tan pou palé ké Jéova, pou kouté li ké sonjé li, to ké jwenn bénédiksyon. Kilès ? Prémyèrman, to ké pran pi bon désizyon. Labib-a ka di nou ki « moun-an ki ka maché ké moun ki saj ké gen sajès » (Prov. 13:20). Donk, pi to ké pasé tan ké Sours sajès-a, Jéova, pi to ké vin saj. To ké konprann pi byen kouman to pouvé fè li plézi, é kouman to pouvé évité fè bagaj ki ka fè li lapenn.

16. Poukisa pasé tan ké Jéova ka pèrmèt nou vin pi vayan pou ansényé ?

¹⁶ Dézyèmman, to ké divini roun pi bon ansényan. Lò nou ka étidyé Labib-a ké roun moun, sa nou lé, a idé moun-an vin pi pròch ké Jéova. Pi nou ka palé ké nou Papa ki annan syèl-a, pi nou lanmou pou li ka vin fò, é pi nou ka vin vayan pou anprann moun-yan ki ka étidyé Labib-a ké nou, kontan li. Sonjé èkzanp Jézi. Afòrs i palé di so Papa ké bokou lanmou, so disip té blijé kontan Jéova yé menm osi (Jean 17:25, 26).

17. Poukisa priyè ké étidyé ka idé nou fè nou lafwa vin pi fò ?

¹⁷ Trwazyèmman, to lafwa ké vin pi fò. Réfléchi asou sa ki ka pasé lò to ka doumandé Bondjé gidé to, konsolé to, ouben idé to. Chak kou i ka réponn to lapriyè, to lafwa ka vin pi fò (1 Jean 5:15). Mé ki ròt bagaj pouvé idé to fè to lafwa vin pi fò ? Étidyé Labib-a to rounso. Sonjé ki « nou pouvé gen lafwa gras a sa nou ka tandé » (Rom. 10:17). Mé, pou nou gen roun lafwa ki fò, nou bézwen fè plis ki anprann sèrten bagaj. Ki ròt bagaj nou bézwen fè ?

18. Bay roun èkzanp pou montré poukisa nou bézwen médité.

¹⁸ Nou bézwen réfléchi asou sa nou ka anprann. Annou palé di sa ki rivé moun-an ki ékri Psaume 77-a. I té dékourajé paské i té ka santi ki, li ké so frè Israyélit-ya,  yé té pédi favèr Jéova-a. I pa té ka rivé arété sonjé sa, lannwit kou jou (vèrsé 2-8). Atò, kisa i fè ? I di Jéova : « Mo ké pran tan réfléchi asou tousa to fè é mo lé réfléchi asou fason to ka aji » (vèrsé 12). I té byen savé sa Jéova té fè pou so pèp anvan, mé kou i té enkyèt, i doumandé so kò : « Ès Bondjé bliyé bay nou so favèr, ouben ès so kòlè fè so mizérikòrd disparèt ? » (vèrsé 9). I pran tan réfléchi asou sa Jéova té fè, é asou fason i té aji ké mizérikòrd ké konpasyon tan-lontan (vèrsé 11). Kisa sa bay ? I vin sir ki Jéova pa té ké lésé so pèp (vèrsé 15). Menm fason-an, to lafwa pouvé vin pi fò, si to ka pran tan réfléchi asou sa Jéova ja fè pou so pèp, é asou sa i ja fè pou to menm.

19. Ki ròt bénédiksyon nou ké jwenn si nou ka pasé tan ké Jéova ?

¹⁹ Katriyèm bagaj-a, é pi enpòrtan-an, to lanmou pou Jéova ké vin pi fò. A lanmou-a, pasé tout rot kalité-ya, ki ké fè to obéyi Jéova, fè sakrifis pou fè li plézi, é tchenbé anba nenpòrt ki problèm (Mat. 22:37-39 ; 1 Cor. 13:4, 7 ; 1 Jean 5:3). I pa gen anyen ki gen plis valò pasé nou bèl lanmityé ké Jéova ! (Ps. 63:1-8).

20. Kisa to ké fè pou anyen pa anpéché to pasé tan ké Jéova ?

²⁰ Sonjé ki priyè, étidyé, ké médité, ka fè parti di ladorasyon nou ka bay Jéova. Kou Jézi, chaché koté ki kalm, pou to pasé tan ké Jéova. Mété bagaj ki ka anpéché to konsantré to kò asou koté. Lò to ka fè roun bagaj pou Jéova, doumandé li idé to mété to lidé asou sa to ka fè. Si to ka fè tousa to pouvé pou byen sèrvi to tan aprézan, Jéova ké rékonpansé to, i ké bay to lavi pou tout-tan-an annan monn nouvo-a (Marc 4:24).