1-3. Ki sitiasyon ki rèd pouvé fè nou pléré ?

 DÈRNYÉ kou to pléré, a té kitan ? Détan, sa ka rivé nou pléré paské nou kontan. Mé souvan, nou ka pléré paské nou tchò gro. Parèkzanp nou ka pléré lò nou pédi roun moun nou kontan. Roun sò yé ka aplé Lorilei * ki ka rété Ozétazini, ékri : « Lò mo pédi mo tifi, détan mo té ka soufri tèlman ki anyen pa té ka soulajé mo. Mo té ka doumandé mo kò kouman mo tchò ki té tèlman krazé té ka rivé bat toujou. »

² I gen ròt bagaj ankò ki pouvé fè nou pléré. Hiromi, roun sò pyonyé ki ka rété o Japon, di : « Tanzantan, mo gen lapenn paské moun mo ka palé ké yé-a, pa entérésé é yé pa lé kouté mésaj Labib-a. Alòr mo ka priyè Jéova ké dlo an mo wéy, pou doumandé l’ idé mo trouvé roun moun ki ka chaché lavérité-a. »

³ Ès to ja rousanti menm bagaj-ya ki sa sò-ya ? Roun patché moun ka rousanti menm bagaj-a (1 Pierre 5:9). Nou lé « adoré Jéova ké tchò kontan », mé sa pouvé rivé ki nou ka pléré paské roun moun nou kontan mouri, paské nou dékourajé ouben paské nou gen roun patché problèm é sa rèd pou nou rété fidèl (Ps. 6:6 ; 100:2). Kisa nou pouvé fè lò nou ka rousanti sa kalité bagaj-ya ?

4. Kisa nou ké wè annan sa artik-a ?

 ⁴ Nou pouvé anprann roun patché bagaj ké èkzanp Jézi. Détan i viv bagaj ki fè ‘dlo soti annan so wéy’ (Jean 11:35 ; Luc 19:41 ; 22:44 ; Héb. 5:7). Annou palé di sa sitiasyon-yan. Nou ké wè kisa yé ka anprann nou, é nou ké wè osi sa nou pouvé fè lò nou annan sitiasyon ki ka fè nou pléré.

5. Kisa sa ki marké annan Jean 11:32-36 ka anprann nou asou Jézi ?

⁵ Annan lannen 32 di nou lépòk, Lazar, roun bon zanmi Jézi, tonbé malad é i mouri (Jean 11:3, 14). I té gen dé sò, Mari ké Mart. É Jézi té kontan sa fanmi-a toubonnman. Mari ké Mart té krazé nèt paské yé frè té mouri. Apré lanmò Lazar, Jézi alé Bétani, koté yé té ka rété. Lò Mart vin savé ki Jézi té ka vini, i kouri soti pou jwenn li. Imajiné kouman i té gen chagren lò i di : « Sényèr, si to té la sa jou-a, mo frè pa té ké mouri » (Jean 11:21). Roun ti moman apré sa, lò Jézi wè Mari ké ròt-ya pléré, ‘dlo soti annan so wéy’ (li Jean 11:32-36).

6. Poukisa Jézi pléré apré lanmò Lazar ?

⁶ Poukisa Jézi pléré sa jou-a ? Liv Étude perspicace des Écritures * ka réponn : « Lò i wè kouman lanmò Lazar mennen chagren pou so dé sò-ya, Jézi ‘jémi é dlo koumansé soti annan so wéy.’ » Pitèt Jézi sonjé kouman Lazar soufri lò i té malad épi sa so zanmi rousanti lò i konprann ki i té ké mouri. Asiré pa pitèt, sa fè Jézi pléré lò i wè chagren Mari ké Mart té gen lò yé frè mouri. Si to pédi roun bon zanmi ouben roun moun annan to fanmi to divèt ka konprann sa Jézi, Mari ké Mart rousanti. Gadé trwa bagaj sa sitiasyon-an pouvé anprann to.

7. Kisa dlo ki soti annan wéy Jézi lò Lazar mouri ka anprann nou asou Jéova ?

 ⁷ Jéova ka konprann sa to ka rousanti. Jézi sa « vré pòrtrè » so Papa (Héb. 1:3). Donk, lò Jézi pléré i montré sa Jéova ka rousanti (Jean 14:9). Si to ka soufri paské to pédi roun moun to kontan, to pouvé sir ki Jéova ka wè to chagren é i vréman tris pou to, i lé géri to tchò ki krazé (Ps. 34:18 ; 147:3).

8. Poukisa nou pouvé sir ki Jézi ké résisité moun nou kontan ki mouri ?

⁸ Jézi lé résisité moun to kontan ki mouri. Roun ti moman anvan i pléré, men sa Jézi promèt Mart : « To frè ké résisité. » É Mart krè Jézi (Jean 11:23-27). Kou Mart té ka adoré Jéova i té dèt savé ki tan-lontan profèt Éli ké Élizé té résisité moun ki té mouri (1 Rois 17:17-24 ; 2 Rois 4:32-37). É i té dèt tandé osi ki Jézi té ja résisité moun (Luc 7:11-15 ; 8:41, 42, 49-56). To menm osi to pouvé sir ki to ké rouwè moun to kontan ki mouri. Paské Jézi pléré lò i té ka konsolé so zanmi ki té gen chagren, sa ka montré nou ki i présé résisité sa-ya ki mouri !

9. Kou Jézi, kouman nou pouvé idé roun moun ki pédi roun moun i kontan ? Bay roun èkzanp.

⁹ To pouvé soutni sa-ya ki pédi roun moun yé kontan. Jézi pléré ké Mart ké Mari, mé i pran tan osi kouté yé é konsolé yé. Nou pouvé fè menm bagaj-a pou sa-ya ki an dèy. Roun ansyen yé ka aplé Dan ki ka rété an Òstrali, ka di : « Lò mo pédi mo madanm, mo té bézwen yé idé mo. Plizyèr frè ké yé madanm té toujou paré, lannwit kou jou, pou kouté mo. Yé té ka lésé mo palé di mo chagren é yé pa té jennen lò mo té ka pléré. Yé idé mo fè plizyèr bagaj osi, parèkzanp yé lavé mo loto pou mo, yé fè komisyon pou mo é yé préparé manjé pou mo lò mo pa té gen fòrs pou fè l’ ankò. É yé té ka priyè souvan ké mo. Yé montré ki yé té sa vréman dé vré zanmi, dé frè ké sò ki ‘fèt pou jou malò-ya’. » (Prov. 17:17).

10. Di sa ki rivé annan Luc 19:36-40 ké sa ki pasé apré.

¹⁰ Jézi ka alé Jérizalèm, jou 9 nizan 33 di nou lépòk. Kou i ka rivé òbò vil-a, roun patché moun ka sanblé é yé ka mété yé lenj asou larout-a douvan li pou montré ki yé ka asèpté li kou yé rwa. Tout moun té divèt kontan (li Luc 19:36-40). Donk pitèt so disip volé lò yé wè sa ki rivé apré sa : « Lò [Jézi] rivé bò d’ Jérizalèm, i gadé vil-a é i pléré pou li ». Ké dlo annan so wéy, Jézi anonsé malò ki té ké tonbé asou moun Jérizalèm (Luc 19:41-44).

11. Poukisa Jézi pléré pou moun Jérizalèm ?

¹¹ Jézi té gen lapenn paské menm si yé té ka byen rousouvwè l’, i té savé ki près tout Jwif-ya pa té ké asèpté sa i té ka di. A pou sa, Bondjé té ké krazé Jérizalèm é Jwif-ya ki té ké rété vivan, yé té ké mennen yé prizonyé (Luc 21:20-24). Malérèzman, ki di ki fèt, près tout moun annan so lépòk réfizé kouté li. É annan to koté, kouman moun-yan ka rousouvwè mésaj Rwayonm-an ? Si i pa gen bokou moun ki lé tandé vérité-ya ki annan Labib-a, kisa dlo ki soti annan wéy Jézi pouvé anprann to ? Annou wè trwa ròt lidé enpòrtan.

12. Kisa dlo ki soti annan wéy Jézi lò i sonjé moun Jérizalèm, ka anprann nou asou Jéova ?

 ¹² Jéova ka gadé pou tout moun. Paské Jézi pléré, sa ka fè nou sonjé ki Jéova ka vréman gadé pou tout moun. « I pa lé rounsèl moun mouri mé i lé yé tout répanti » (2 Pierre 3:9). Jòdla, nou ka montré nou kontan moun-yan lò nou toujou ka éséyé idé yé konnèt bon nouvèl Rwayonm-an (Mat. 22:39).

13-14. a) Kouman Jézi montré ki i té gen konpasyon pou moun-yan ? b) Kouman nou pouvé fè kou li ?

¹³ Jézi travay rèd annan prédikasyon-an. I montré i té kontan moun-yan paské i kontinyé ansényé yé, chak fwa i té pouvé (Luc 19:47, 48). Poukisa i fè sa ? Jézi té gen konpasyon pou yé. Détan, tèlman i té gen moun ki té lé kouté Jézi palé, ki li ké so disip « pa menm té pouvé manjé » (Marc 3:20). É roun jou, lò Nikodèm doumandé li pou palé ké li lannwit, Jézi asèpté (Jean 3:1, 2). Près tout moun ki kouté Jézi o koumansman pa divini so disip. Mé tout sa ki tandé l’, rousouvwè roun témwanyaj ki té konplè. Nou menm osi, nou lé bay tout moun lokazyon konnèt bon nouvèl-a (Actes 10:42). Pou fè sa, nou divèt paré chanjé fason nou ka préché.

¹⁴ A pou to paré pou chanjé to program. Si nou toujou ka préché menm lèr-ya, pitèt nou pa ké jwenn moun-yan ki té ké byen lé anprann bon nouvèl-a. Roun pyonyé yé ka aplé Matilda ka di : « Mo ké mo mari, nou ka éséyé alé préché diféran lèr. Bònò bonmanten, nou ka préché annan téritwar koté i gen magazen ké biro. Bò d’ midi, lò moun-yan annan lari-a, nou ka sèrvi prézantwar-ya. Lò lajournen-an fini, nou k’alé di kaz an kaz paské a la nou ka trouvé moun annan yé kaz. » Pasé nou kontinyé préché lò sa bon pou nou, nou divèt paré chanjé nou program pou préché lò nou gen plis chans jwenn moun. Si nou ka fè sa, nou pouvé sir ki Jéova ké kontan.

15. Dapré Luc 22:39-44, kisa ki pasé lannwit anvan Jézi mouri ?

¹⁵ Jou 14 nizan 33, an mitan lannwit, Jézi alé annan jarden Jètsémani-a. A la i vidé so tchò pou Jéova (li Luc 22:39-44). É a sa moman-an i « sipliyé l’ […] ké patché rélé ké pléré » (Héb. 5:7). Kisa Jézi doumandé li ? I doumandé li bay li fòrs pou i té rété fidèl é fè so volonté. Jéova santi kouman so Pitit té angwasé é i voyé roun zanj pou bay li fòrs.

16. Poukisa Jézi pléré lò i priyè annan jarden Jètsémani-a ?

¹⁶ Poukisa Jézi pléré lò i priyè annan jarden Jètsémani-a ? I té divèt enkyèt paské moun-yan té ké wè li kou roun moun ki pa té ka rèspèkté non Bondjé. Anplis di sa, i té savé ki i té gen roun gro rèsponsabilité : i té divèt lavé non so Papa é, pou fè sa, i té divèt rété fidèl. Si to annan roun sitiasyon ki pouvé fè to pédi to fidélité douvan Jéova, kisa to pouvé anprann paské Jézi pléré ? Annou wè trwa ròt lidé enpòrtan.

17. Kisa fason Jéova réponn lapriyè Jézi fè ké tout so tchò, pouvé anprann nou asou li ?

¹⁷ Jéova ka kouté lò to ka sipliyé l’. Jéova kouté Jézi ki priyè ké tout so tchò, poukisa ? Paské sa ki té pi enpòrtan pou Jézi, a té rété fidèl douvan so Papa é lavé so non. Si a sa nou lé osi, Jéova ké réponn nou lò nou ké doumandé li idé nou (Ps. 145:18, 19).

18. Poukisa nou pouvé di ki Jézi sa roun bon zanmi ki ka konprann nou ?

¹⁸ Jézi ka konprann sa to ka rousanti. Lò nou dékourajé, sa ka fè nou plézi lò roun bon zanmi ka vini konsolé nou. Èspésyalman lò sa zanmi-a ja pasé menm problèm ki nou pa. Jézi sa sa kalité zanmi-a. I savé sa sa ka fè lò to ka santi to fèb é to bézwen yé idé to. I ka konprann kouman nou fèt é i ké fè nou jwenn sa nou bézwen « jiskont lò nou bézwen » (Héb. 4:15, 16). Menm fason Jézi asèpté roun zanj idé l’ annan jarden Jètsémani-a, nou divèt paré asèpté Jéova  idé nou. Pitèt a ké roun piblikasyon, roun vidéyo, roun diskour, roun ansyen ouben roun zanmi ka vini wè nou pou ankourajé nou.

19. Kisa èkzanp Lous ka anprann nou ?

¹⁹ Jéova ké bay to so lapè. Kouman Jéova ké bay nou fòrs ? Lò nou ké priyè li, i ké bay nou so lapè « ki ka dépasé tousa nou pouvé konprann » (Phil. 4:6, 7). « Lapè Bondjé » ka fè nou rété kalm é ka idé nou gardé nou lidé byen klè. A sa ki rivé Lous. I ka di : « Souvan mo ka santi mo tousèl ké mo kò. Détan, mo jis ka pansé ki Jéova pa kontan mo. Mé lò a konsa, lanmenm mo ka di li sa mo ka rousanti. Lapriyè ka idé mo santi mo kò pi byen. » Kou èkzanp Lous ka montré nou, lapriyè pouvé fè nou trapé lapè.

20. Kisa dlo ki soti annan wéy Jézi anprann nou ?

²⁰ Men bèl bagaj dlo ki soti annan wéy Jézi ka anprann nou ! Nou divèt idé nou zanmi ki pédi roun moun yé kontan é nou divèt sir ki Jéova ké Jézi ké idé nou si nou ka pédi roun moun nou kontan. Lò nou ka préché ké ansényé, nou divèt aji ké konpasyon kou Jéova ké Jézi. É sa ka konsolé nou lò nou ka sonjé ki yé ka konprann sa nou ka rousanti, ki yé savé kouman nou fèt é ki yé lé idé nou tchenbé. A pou sa, annou kontinyé swiv sa nou anprann jouktan Jéova fè so bèl promès fèt : « swiyé tout dlo di [nou] wéy » (Rév. 21:4).