ARTIK POU ÉTIDYÉ 4
Poukisa nou ka alé annan Mémoryal-a ?
« Kontinyé fè sa pou sonjé mo » (LUC 22:19).
KANTIK 20 Tu as donné ton Fils bien-aimé
KOUTWÉY ASOU SA NOU KÉ WÈ *
1-2. a) Kitan èspésyalman nou ka sonjé roun moun nou kontan ki mouri ? b) Kisa Jézi fè lannwit anvan i mouri ?
MENM SI roun moun nou kontan mouri dipi lontan, nou pa ka bliyé li. Nou ka sonjé li èspésyalman lò a jou anivèrsèr so lanmò.
2 Chak lannen, kou milyon moun asou tout latè-a, nou ka rasanblé pou anivèrsèr lanmò roun moun nou kontan bokou : Jézi (1 Pierre 1:8). Nou ka fè sa pou sonjé sa-la ki bay so lavi kou ranson pou sové nou di péché-a ké lanmò-a (Mat. 20:28). A Jézi ki doumandé so disip-ya sonjé so lanmò. Lannwit anvan i mouri, i fè roun répa èspésyal é i doumandé yé : « Kontinyé fè sa pou sonjé mo » (Luc 22:19).
3. Kisa nou ké wè annan sa artik-a ?
3 Annan sa ki ka vini annan Mémoryal-a, i pa gen bokou moun ki gen èspwar viv annan syèl-a. Mé milyon moun ki gen èspwar viv asou latè-a ka vini osi. Annan sa artik-a, nou ké wè poukisa sa dé group-ya présé vini annan Mémoryal-a chak lannen. Nou ké wè osi ki bénédiksyon nou ka jwenn lò nou ka vini annan Mémoryal-a. Annou wè poukisa wen-yan ka vini annan sa lafèt-a.
POUKISA WEN-YAN KA VINI ANNAN MÉMORYAL-A
4. Poukisa wen-yan ka manjé dipen-an é ka bwè diven-an pannan Mémoryal-a ?
4 Chak lannen, wen-yan présé vini annan Mémoryal-a é yé ka manjé dipen-an é ka bwè diven-an. Poukisa ? Pou nou réponn sa késyon-an, annou wè sa ki rivé dèrnyé lannwit Jézi fè asou latè-a. Apré répa Lapak-a, Jézi fè sa nou ka aplé jòdla Répa Sényèr-a. I fè dipen-an ké diven-an pasé pou so 11 apot fidèl-ya é i di yé manjé ké bwè. Jézi palé yé osi di dé alyans, sa lé di dé kontra : nouvo alyans-a ké alyans pou roun rwayonm * (Luc 22:19, 20, 28-30). Sa dé alyans-ya té ké louvri chimen-an pou apot-ya ké roun ti moso moun ankò, pou yé divini rwa ké prèt annan syèl-a (Rév. 5:10 ; 14:1). A wen-yan rounso ki annan sa alyans-a, é a yé rounso ki pouvé manjé dipen-an ké bwè diven-an.
5. Kisa krétyen wen-yan savé asou èspwar yé gen-an ?
5 I gen rounòt rézon ki ka fè ki wen-yan présé alé annan Mémoryal-a : sa ka bay yé lokazyon réfléchi asou èspwar yé gen-an. Jéova bay yé roun èspwar ki bèl toubonnman. Yé ké viv annan syèl-a ké roun kò ki pa ké janmen pouri ni mouri, pou dirijé ansanm ké Jézi ki résisité ké larèstan 144 000-ya, é pi enpòrtan-an, yé ké òbò Jéova menm (1 Cor. 15:51-53 ; 1 Jean 3:2). Krétyen wen-yan ka rékonnèt ki a envité yé envité yé sèrvi Jéova annan syèl-a. Mé pou Jéova asèpté yé annan syèl-a, yé divèt rété fidèl jouktan yé mouri (2 Tim. 4:7, 8). Lò wen-yan ka réfléchi asou èspwar viv annan syèl-a, sa ka fè yé tchò kontan (Tite 2:13). Mé, é pou « ròt brébi-ya » ? (Jean 10:16). Poukisa yé ka alé annan Mémoryal-a ?
POUKISA RÒT BRÉBI-YA KA ALÉ ANNAN MÉMORYAL-A
6. Poukisa ròt brébi-ya ka alé annan Mémoryal-a chak lannen ?
6 Ròt brébi-ya ka alé annan Mémoryal-a, yé pa ka manjé dipen-an é yé pa ka bwè diven-an mé yé kontan la. A an 1938 yé envité èspésyalman sa-ya ki gen èspwar viv asou latè-a vini annan Mémoryal-a. La Tour de Garde 1é avril 1938 té ka di : « Sa té ké nòrmal é sa té ké bon ki [krétyen-yan ki gen èspwar viv asou latè-a la pou sa réinyon-an] ; yé ké pouvé gadé sa ki ka pasé […]. Pou yé osi, a roun lokazyon pou yé tchò kontan. » Menm fason moun yé envité pou roun maryaj kontan gadé sérémoni-a, sa krétyen-yan kontan la pou gadé sa ki ka pasé pannan Mémoryal-a.
7. Poukisa ròt brébi-ya présé tandé diskour Mémoryal-a ?
7 Kou krétyen wen-yan, ròt brébi-ya ka réfléchi asou èspwar yé gen-an. Donk yé présé tandé diskour Mémoryal-a, paské i ka palé èspésyalman di sa Jézi ké 144 000-ya ké fè pou sa-ya ki ké rété fidèl pannan 1000 lannen-yan. Anba dominasyon Jézi, yé rwa, 144 000-ya ké bay roun lanmen pou fè latè-a divini roun paradi é pou idé moun-yan vin parfè. Sa-ya ki ka vini annan Mémoryal-a divèt tou kontan imajiné kouman profési-ya ké fèt, kou sa-ya nou ka trouvé annan Isaïe 35:5, 6 ; 65:21-23 ké Révélation 21:3, 4. Lò yé ka pran tan wè yé kò annan paradi-a ké sa-ya yé kontan, yé ka fè yé èspwar vin pi fò é yé ankò pi désidé pa janmen arété adoré Jéova (Mat. 24:13 ; Gal. 6:9).
8. Pou ki ròt rézon ròt brébi-ya ka vini annan Mémoryal-a ?
8 Pou ki ròt rézon ròt brébi-ya présé vini annan Mémoryal-a ? Yé lé montré ki yé kontan é ki yé lé idé wen-yan. Plizyèr profési annan Labib-a té di ki wen-yan ké sa-ya ki gen èspwar viv asou latè-a té ké pròch. Annou wè déztrwa annan sa profési-ya.
9. Dapré profési-a nou ka jwenn annan Zacharie 8:23, kouman ròt brébi-ya ka wè sa-ya ki wen ?
9 (Li Zacharie 8:23.) Sa bèl profési-a ka montré kouman ròt brébi-ya ka wè yé frè ké sò-ya ki wen. Annan sa vèrsé-a, lò yé ka di « roun Jwif » ké « zòt » a menm group-a, sa-ya ki wen é ki asou latè-a toujou (Rom. 2:28, 29). ‘Dis wonm-yan ki ka palé lang tout nasyon-yan’ ka réprézanté ròt brébi-ya. Yé ka di nou ki yé ka « tchenbé lenj roun Jwif byen fò ». Sa lé di yé ka montré wen-yan ki yé fidèl lò yé ka vin adoré Bondjé ansanm ké yé. Donk lò yé ka alé annan Mémoryal-a, ròt brébi-ya ka montré wen-yan ki yé kontan yé é ki yé lé idé yé.
10. Kisa Jéova fè pou profési-a nou ka jwenn annan Ézéchiel 37:15-19, 24, 25 fèt ?
10 (Li Ézéchiel 37:15-19, 24, 25.) Pou sa profési-a fèt, Jéova fè ròt brébi-ya ké wen-yan travay ansanm ansanm. Annan sa profési-a, yé ka palé di dé moso bwa *. Krétyen-yan ki gen èspwar viv annan syèl-a kou moso bwa « pou Jida »-a (nasyon koté Bondjé té ka chwazi rwa Israyèl-ya). Krétyen-yan ki gen èspwar viv asou latè-a yé menm, kou moso bwa « Éfrayim »-an. Jéova té ké rasanblé sa dé group-ya pou yé fè rounsèl moso bwa. Sa lé di ki yé té ké adoré rounsèl rwa, Jézi, yé tout ansanm. Chak lannen, wen-yan ké ròt brébi-ya ka alé annan Mémoryal-a, pa kousidiré a té dé group diféran, mé kou « rounsèl troupo » anba « rounsèl bèrjé » (Jean 10:16).
11. Kouman ròt brébi-ya yé ka palé annan Matthieu 25:31-36, 40 ka soutni frè Kris-ya ?
11 (Li Matthieu 25:31-36, 40.) Brébi-ya annan sa èkzanp-a ka réprézanté sa-ya ki jis annan lépòk lafen-an é ki gen èspwar viv asou latè-a, a yé ki ròt brébi-ya jòdla. Yé ka soutni frè Kris-ya ki asou latè-a toujou, lò yé ka bay roun lanmen annan gran travay prédikasyon-an ké ansèyman-an ki ka fèt asou tout latè-a (Mat. 24:14 ; 28:19, 20).
12-13. Ki ròt bagaj ròt brébi-ya ka fè pou idé frè Kris-ya ?
12 Chak lannen, plizyèr simenn anvan Mémoryal-a, ròt brébi-ya ka montré ki yé ka soutni wen-yan lò yé ka partisipé ké tout yé tchò annan kanpagn envitasyon-an nou ka fè asou tout latè-a pou envité moun-yan (gadé ti karé-a « Kisa to pouvé désidé fè pannan lépòk Mémoryal-a ? »). Yé ka idé yé osi pran tout dispozisyon ki fo pou Mémoryal-a fèt annan tout asanblé-ya asou tout latè-a, menm si i pa gen pyès moun annan sa asanblé-ya ki wen. Ròt brébi-ya kontan fè sa pou soutni wen-yan. Yé savé ki Jézi ka wè sa yé ka fè pou so frè-ya ki wen kousidiré a té pou li menm yé té ka fè l’ (Mat. 25:37-40).
13 Annou wè aprézan pou ki ròt rézon nou tout ka vini annan Mémoryal-a, ki nou gen èspwar viv annan syèl-a ouben asou latè-a.
POUKISA NOU TOUT KA ALÉ ANNAN MÉMORYAL-A
14. Kouman Jéova ké Jézi montré nou ki yé kontan nou bokou ?
14 Nou lé di Jéova ké Jézi mèrsi pou lanmou yé montré nou-a. Jéova fè roun patché bagaj pou montré nou so lanmou. Mé pi bèl bagaj i fè pou montré nou so lanmou, a lò i voyé so Pitit i kontan-an soufri é mouri pou nou (Jean 3:16). É Jézi osi montré nou ki i kontan nou bokou lò i asèpté bay so lavi pou nou (Jean 15:13). Nou pa ké janmen fè asé bagaj pou roumèrsyé Jéova ké Jézi pou lanmou yé montré nou-a. Mé nou pouvé montré nou rékonésans asou fason nou ka viv-a (Col. 3:15). É nou ka alé annan Mémoryal-a paské nou lé sonjé lanmou yé gen pou nou é osi montré yé ki nou kontan yé.
15. Poukisa ni krétyen wen-yan ni ròt brébi-ya ka bay ranson-an bokou valò ?
15 Nou gen bokou rékonésans pou ranson-an (Mat. 20:28). Ranson-an gen bokou valò pou krétyen wen-yan paské a gras a sa yé pouvé gen èspwar viv annan syèl-a. Paské yé gen lafwa annan sakrifis Jézi-a, yé sa dé moun ki jis douvan Jéova é i adòpté yé kou so timoun (Rom. 5:1 ; 8:15-17, 23). Ròt brébi-ya osi kontan profité di ranson-an. Paské yé gen lafwa annan sakrifis Jézi-a, Jéova ka wè yé kou dé moun ki pròp, yé pouvé adoré l’ é yé gen èspwar janbé « gran tribilasyon-an » (Rév. 7:13-15). Lò yé ka vini annan Mémoryal-a chak lannen, ni ròt brébi-ya ni krétyen wen-yan pouvé montré yé rékonésans pou ranson-an.
16. Pou ki ròt rézon nou ka alé annan Mémoryal-a ?
16 Nou ka alé annan Mémoryal-a osi paské nou lé obéyi Jézi. Ki nou gen èspwar viv annan syèl-a ki nou gen èspwar viv asou latè-a, nou chak nou lé obéyi lòrd Jézi bay lannwit i fè Mémoryal-a : « Kontinyé fè sa pou sonjé mo » (1 Cor. 11:23, 24).
BÉNÉDIKSYON NOU TOUT KA JWENN LÒ NOU KA ALÉ ANNAN MÉMORYAL-A
17. Kouman Mémoryal-a ka idé nou vin pi pròch ké Jéova ?
17 Nou ka vin pi pròch ké Jéova (Jacq. 4:8). Kou nou wè l’, Mémoryal-a ka bay nou posibilité sonjé èspwar Jéova bay nou-a é réfléchi asou lanmou i montré nou-a (Jér. 29:11 ; 1 Jean 4:8-10). Sa ka fè nou lanmou ké nou lanmityé pou Jéova vin pi fò (Rom. 8:38, 39).
18. Lò nou ka réfléchi asou èkzanp Jézi, kisa sa ka pousé nou fè ?
18 Sa ka pousé nou imité èkzanp Jézi (1 Pierre 2:21). Plizyèr jou anvan Mémoryal-a, nou ka pran tan rouwè sa Labib-a ka di asou dèrnyé simenn Jézi fè asou latè-a, so lanmò ké so rézirèksyon. Apré sa, jou Mémoryal-a, diskour-a ka fè nou sonjé lanmou Jézi gen pou nou (Éph. 5:2 ; 1 Jean 3:16). Lò nou ka réfléchi asou fason Jézi sèrvi so lavi pou idé ròt-ya, sa ka pousé nou « kontinyé viv menm fason Jézi viv » (1 Jean 2:6).
19. Kouman nou pouvé rété annan lanmou Bondjé-a ?
19 Nou ankò pi désidé rété annan lanmou Bondjé-a (Jude 20, 21). Nou ka rété annan lanmou Bondjé-a lò nou ka fè tousa nou pouvé pou obéyi li, pou sanktifyé so non é pou fè li plézi (Prov. 27:11 ; Mat. 6:9 ; 1 Jean 5:3). Mémoryal-a ka pousé nou ankò pi désidé viv chak jou roun fason kousidiré nou té ka di li : « Mo lé rété annan to lanmou pou tout-tan ! »
20. Ki bon rézon nou tout gen pou vini annan Mémoryal-a ?
20 Ki nou gen èspwar viv annan syèl-a, ki nou gen èspwar viv asou latè-a, nou tout gen bon rézon pou alé annan Mémoryal-a. Chak lannen, lò nou tout ka rasanblé sa jou-a, nou ka sonjé lanmò Jézi. Mé pi enpòrtan-an, nou ka sonjé pi bèl bagaj pyès moun pa janmen fè pou montré nou i kontan nou, lanmou Jéova montré nou lò i bay so Pitit pou ranson. Sa lannen-an, jou anivèrsèr lanmò Jézi ka tonbé vandrédi 15 avril 2022 aswè. Pou nou ki kontan Jéova ké so Pitit, i pa ké gen anyen ki ké pi enpòrtan pou nou sa jou-a pasé vini annan Mémoryal-a !
KANTIK 16 Louez Jéhovah et son Fils, l’Oint
^ Ki nou gen èspwar viv annan syèl-a, ki nou gen èspwar viv asou latè-a, chak lannen nou ka antann jou Mémoryal-a rivé. Annan sa artik-a, nou ké wè ki bon rézon nou ka jwenn annan Labib-a pou nou alé annan Mémoryal-a, é ki bénédiksyon nou ka jwenn lò nou ka fè sa.
^ Pou gen plis enfòrmasyon asou nouvo alyans-a ké alyans pou roun rwayonm, gadé artik-a « Vous deviendrez “un royaume de prêtres” », annan La Tour de Garde 15 òktòb 2014, p. 15-17.
^ Pou jwenn plis enfòrmasyon asou profési-a asou dé moso bwa-ya nou ka trouvé annan Ézéchiel chapit 37, gadé liv Le culte pur de Jéhovah enfin rétabli !, p. 130-135, § 3-17.
