1. Annan ki kalité fanmi Jak lévé ?

 JAK, frè Jézi b, lévé annan roun fanmi ki té fò èspirityèlman. So papa ké so manman, Mari ké Jozèf, té kontan Jéova bokou é yé fè tousa yé té pouvé pou adoré l’. Mé anplis di sa, so gran frè té ké divini Mési-a. Fè parti di sa fanmi-a, a té roun bèl lònò pou Jak !

2. Kisa ki té pou fè Jak pran èkzanp asou so pi gran frè ?

² Jak té gen roun patché rézon pou pran èkzanp asou so gran frè (Mat. 13:55). Parèkzanp, Jézi té konnèt Ékritir-ya tèlman byen ki lò i té gen douzan, i fè sa-ya ki té ka ansényé Jérizalèm rété èstébékwé (Luc 2:46, 47). Anplis di sa, Jak pitèt travay kou charpantyé ansanm ké Jézi. Si a sa i fè, i té divèt byen konnèt so frè. Frè Nathan Knorr c té ka di souvan : « To ka anprann konnèt bokou bagaj asou roun moun lò to ka travay ansanm ké li. » Jak dèt wè osi ki « Jézi té ka kontinyé gen plizanplis sajès é i té ka kontinyé grandi, é pi i té ka grandi, ni Bondjé ni moun-yan té kontan l’ » (Luc 2:52). Akoz di sa, pitèt nou té ké pouvé pansé ki Jak té ké annan prémyé disip Jézi-ya. Mé a pa sa ki rivé.

3. Kouman Jak réyaji lò Jézi préché ?

³ Lò Jézi té asou latè-a, Jak pa divini so disip (Jean 7:3-5). Anfèt, pitèt Jak té annan sa ki té ka di ki Jézi té  « vin fou » (Marc 3:21). É anyen pa ka di nou ki Jak té la ké so manman Mari lò yé tchwé Jézi asou poto-a (Jean 19:25-27).

4. Di kisa nou ké palé annan sa artik-a ?

⁴ Pita, Jak vin gen lafwa annan Jézi, é i divini roun ansyen yé té ka rèspèkté annan asanblé krétyen-an. Annan sa artik-a, nou ké wè dé bagaj nou ka anprann ké Jak : 1) poukisa nou divèt kontinyé gen imilité é 2) kouman nou pouvé divini pi vayan annan zafè ansényé-a.

5. Kouman Jak réyaji lò Jézi parèt douvan li apré so rézirèksyon ?

⁵ Kitan Jak divini roun disip Jézi ? Apré Jéova résisité l’, Jézi « parèt douvan Jak, épi apré sa douvan tout apot-ya » (1 Cor. 15:7). Apré sa réinyon-an ké Jézi, Jak divini roun di so disip. I té la lò apot-ya té Jérizalèm ka antann rousouvwè lèspri sen annan roun lasal laro kaz roun moun (Actes 1:13, 14). Pita, a ké tchò kontan Jak sèrvi annan kolèj santral-a annan prémyé syèk-a (Actes 15:6, 13-22 ; Gal. 2:9). É roun ti moso tan anvan lannen 62 di nou lépòk, Jéova fè li ékri roun lèt pou krétyen wen-yan. Sa lèt-a ka idé nou jòdla, ki nou gen èspwar viv annan syèl-a ouben asou latè-a (Jacq. 1:1). Dapré Flavius Josèphe, roun istoryen ki té ka viv annan prémyé syèk-a, gran prèt Ann (ouben Anan) le Jeune, fè yé tchwé Jak. Jak rété fidèl jistan i fini so lavi asou latè-a.

6. Kisa ki té ka fè ki Jak té diféran di chèf rélijyé-ya annan so lépòk ?

⁶ Jak té gen imilité. Poukisa nou pouvé di sa ? Gadé diférans i gen ant fason Jak réyaji ké fason roun patché chèf rélijyé réyaji. Lò Jak wè prèv ki té ka byen montré ki Jézi té sa Pitit Bondjé-a, a ké imilité i asèpté sa prèv-ya. Mé a pa sa chèf prèt-ya ki té Jérizalèm fé. Parèkzanp, yé pa té pouvé di ki Jézi pa té résisité Lazar, mé pasé yé asèpté ki Jézi té ka réprézanté Jéova, yé éséyé tchwé ni Jézi, ni Lazar (Jean 11:53 ; 12:9-11). Pita, lò Jézi li menm résisité, yé chaché roun mwayen pou pyès moun pa savé sa (Mat. 28:11-15). A pas yé té plen ké òrgèy chèf rélijyé-ya pa asèpté ki Jézi té sa Mési-a.

7. Poukisa nou pa divèt fè ròklò ?

⁷ Sa sa ka anprann nou : pa fè ròklò é kontinyé lésé Jéova ansényé to. Menm  fason roun maladi pouvé bay roun moun mal tchò, òrgèy-a pouvé anpéché nou obéyi Jéova. Farizyen-yan té ka krè yé kò tèlman, ki yé pa asèpté krè prèv-ya ki té ka byen montré ki Jézi té gen lèspri sen Bondjé é ki i té sa Pitit Bondjé-a (Jean 12:37-40). Yé fyèrté té mové pou yé paské sa anpéché yé gen lavi pou tout-tan (Mat. 23:13, 33). Sa enpòrtan toubonnman pou nou kontinyé lésé Paròl Bondjé-a ké so lèspri sen chanjé nou konpòrtman, aji asou fason nou ka pansé, é asou désizyon nou ka pran ! (Jacq. 3:17). Paské Jak té gen imilité, i lésé Jéova ansényé li, é kou nou ké wè l’, a paské i té gen imilité ki i divini roun moun ki té vayan annan zafè ansényé.

8. Kisa ki ké idé nou divini vayan annan zafè ansényé ?

⁸ Jak pa té fè gran lékòl. Chèf rélijyé-ya annan so lépòk té ka pansé ki i té sa roun moun ki « pa té fè gran lékòl, [roun] moun kou tout moun », kou apot Pyèr ké Jan (Actes 4:13). Mé Jak divini roun bon ansényan. A sa nou ka byen wè lò nou ka li liv-a ki ka poté so non annan Labib-a. Kou Jak, pitèt nou pa fè gran lékòl nou menm non plis. Magré sa, gras a lèspri sen Jéova, ké sa so òrganizasyon ka fè pou idé nou, nou pouvé divini vayan pou ansényé. Annou wè èkzanp Jak ka bay nou annan zafè ansényé, é annou wè kisa sa pouvé anprann nou.

9. Kouman Jak té ka ansényé ?

⁹ Jak pa té ka di bagaj ouben bay èsplikasyon ki té rèd pou konprann. Donk, so frè ké sò-ya té ka konprann lanmenm sa yé té divèt fè, é kouman yé té divèt fè l’. Parèkzanp, annou wè fason Jak ansényé ki krétyen-yan divèt sipòrté méchansté moun ka fè yé san yé pa tchenbé pyès moun asou yé tchò. Men sa i ékri : « Nou ka di ki sa-ya ki tchenbé, yé tchò kontan. Zòt tandé kouman Jòb tchenbé é zòt wè sa Jéova fè pou li lò tout bagaj té fini, é zòt wè ki Jéova gen bokou lanmou pou  nou é i plen ké mizérikòrd » (Jacq. 5:11). To pouvé wè ki Jak apiyé sa i té ka ansényé-a asou Labib-a : i sèrvi Paròl Bondjé-a pou idé sa-ya ki té ka kouté li konprann ki Jéova toujou ka rékonpansé sa-ya ki ka rété fidèl kou Jòb. Jak sèrvi mo ki té senp ké lojik pou ansényé sa. Konsa, i mété Jéova douvan pasé i mété so pròp kò douvan.

10. Kouman nou pouvé imité Jak lò nou ka ansényé ?

¹⁰ Sa sa ka anprann nou : ansényé roun fason ki senp é apiyé to kò asou sa Labib-a ka di. Lò nou ka ansényé ròt-ya, nou pa divèt éséyé montré yé ki kantité konésans nou gen, mé nou lé montré yé ki kantité konésans Jéova gen, é nou lé montré yé ki i kontan yé (Rom. 11:33). Nou pouvé rivé fè sa si nou ka apiyé nou kò asou sa Labib-a ka di. Parèkzanp, pasé nou di étidyan-yan sa nou té ké fè a yé plas, nou divèt idé yé réfléchi asou èkzanp Labib-a ka bay, é idé yé wè sa Jéova ka pansé é sa i ka rousanti. A konsa yé ké anvi fè Jéova plézi pasé yé fè nou plézi.

11. a) Ki kalité défo sèrten krétyen té vin gen ? b) Dapré Jacques 5:13-15, ki konsèy Jak bay so frè ké so-ya ?

¹¹ Jak té ka wè bagaj-ya kou yé té fika. Lò nou ka li so lèt, nou ka byen wè ki Jak té byen konnèt ki problèm so frè ké sò-ya té ka jwenn é i bay yé konsèy ki té klè pou yé té rivé réglé sa problèm-yan. Parèkzanp, roun ran krétyen té ka pran tan pou apliké konsèy yé té ka rousouvwè (Jacq. 1:22). Ròt té ka aji pi byen ké sa-ya ki té gen soumaké (Jacq. 2:1-3). Ròt ankò pa té ka rivé « kontrolé » yé lang (Jacq. 3:8-10). Sa krétyen-yan té gen problèm séryé, mé Jak té sir ki so frè ké sò-ya té pouvé chanjé. I té janti lò i té ka bay yé konsèy, mé i té ka di sa i té gen pou di yé. É i ankourajé sa-ya ki té bézwen moun idé yé, alé wè ansyen-yan pou idé yé chanjé (li Jacques 5:13-15).

12. Kouman nou pouvé rété pozitif lò nou ka idé sa-ya ki ka étidyé Labib-a ké nou ?

¹² Sa sa ka anprann nou : a pou nou wè bagaj-ya kou yé fika, mé a pou nou rété pozitif. Sa rèd pou roun patché moun ki ka étidyé Labib-a ké nou, apliké konsèy Labib-a ka bay yé (Jacq. 4:1-4). Détan yé bézwen tan pou yé raché mové labitid yé gen é pou ranplasé yé ké bèl kalité krétyen-yan. Kou Jak, nou divèt pran kouraj pou di nou étidyan sa yé gen pou chanjé. Mé nou divèt rété pozitif osi é fè Jéova konfyans pou i fè sa-ya ki ka fè yé kò toupiti vini òbò li é bay yé fòrs yé bézwen pou fè chanjman annan yé lavi (Jacq. 4:10).

13. Kou nou ka wè l’ annan Jacques 3:2, kisa Jak té ka rékonnèt ?

¹³ Jak pa té ka krè i té pi bon pasé ròt-ya. Jak pa té ka pansé ki i té pi enpòrtan pasé ròt krétyen-yan paské i té sa frè Jézi ouben paské i té gen bokou rèsponsabilité annan asanblé-a. I té ka aplé ròt krétyen-yan « mo frè-ya, zòt mo kontan-an » (Jacq. 1:16, 19 ; 2:5). I pa éséyé fè ròt-ya krè ki i té parfè. Nou ka wè sa lò i ékri : « Nou tout ka tonbé souvan » (li Jacques 3:2 ké prémyé nòt-a).

14. Poukisa nou divèt rékonnèt ki nou ka fè bagaj ki pa bon ?

¹⁴ Sa sa ka anprann nou : sonjé ki nou tout ka péché. Nou pa divèt pansé ki nou pi fò pasé sa-ya ki ka étidyé Labib-a ké nou. Poukisa ? Si nou ka fè étidyan-yan krè ki nou pa gen pyès défo, yé ka  riské pansé ki yé pa ké janmen rivé fè sa Jéova ka doumandé yé fè. Mé lò nou ka rékonnèt ki a pa tout tan sa fasil pou nou swiv prensip-ya ki annan Labib-a, é lò nou ka èspliké yé kouman Jéova idé nou fè chanjman annan nou lavi, nou ka idé sa-ya ki ka étidyé Labib-a ké nou, wè ki yé menm osi pouvé adoré Jéova.

15. Ki kalité zimaj Jak té ka itilizé ? (Jacques 3:2-6, 10-12).

¹⁵ Jak sèrvi zimaj ki té ka touché tchò moun-yan. A vré, lèspri sen idé li, mé i anprann roun patché bagaj osi lò i byen réfléchi asou èkzanp so gran frè té pran lò li menm té ka ansényé. Zimaj Jak itilizé annan so lèt, senp, é léson-an klè (li Jacques 3:2-6, 10-12).

16. Poukisa nou divèt sèrvi èkzanp ki ka byen maché ?

¹⁶ Sa sa ka anprann nou : itilizé èkzanp ki ké byen maché. Lò to ka sèrvi èkzanp ki ka byen maché, sa-ya ki ka étidyé ké to pa ka yenki tandé sa yé gen pou fè, yé ka wè osi sa yé gen pou fè. To ka idé yé imajiné sa to ka anprann yé-a. Sa èkzanp-ya ké idé yé sonjé sa ki enpòrtan annan Labib-a. Jézi té chèf annan sa zafè-a, é so frè Jak swiv so èkzanp. Annou wè aprézan roun èkzanp Jak pran, é annou wè poukisa i ka byen maché.

17. Poukisa èkzanp nou ka jwenn annan Jacques 1:22-25 ka byen maché ?

¹⁷ (Li Jacques 1:22-25.) Poukisa èkzanp mirwè-a Jak pran-an ka byen maché ? Jak té lé ansényé moun-yan roun bagaj èspésyal : si to lé profité di sa Paròl Bondjé-a ka di, to divèt fè plis ki li l’ ; to divèt apliké sa to ka li. Jak chwazi roun èkzanp moun-yan té pouvé konprann vitman. Roun mouché ki ka gadé so kò annan roun mirwè. Kisa i té lé di ? Sa pa gen sans si roun mouché ka gadé so kò annan roun mirwè, ka wè roun bagaj ki pa k’alé, é i pa ka fè anyen pou sa. Menm fason-an, sa pa gen sans si nou ka li Paròl Bondjé-a, nou ka wè roun bagaj nou bézwen chanjé annan fason nou ka fè, é nou pa ka fè anyen pou sa.

18. I gen trwa bagaj to pouvé fè lò to ka itilizé roun èkzanp, kilès ?

¹⁸ Lò to ka sèrvi roun èkzanp to pouvé fè trwa bagaj pou imité Jak : 1) Èkzanp  nou ka pran-an divèt alé ké sa nou lé anprann moun-an. 2) I divèt fasil pou konprann. 3) Nou divèt byen èspliké moun-an sa èkzanp-a lé di. Si to ka trouvé sa rèd pou to jwenn bon èkzanp, alé annan l’Index des publications des Témoins de Jéhovah. Annan parti « Exemples », to ké jwenn roun patché èkzanp to pouvé sèrvi. Mé pa bliyé ki roun èkzanp, a kou roun mikro : menm fason mikro-a ka pèrmèt moun tandé to vwa pi fò, roun èkzanp ka pèrmèt to apiyé asou roun lidé. Donk panga. Si to ka sèrvi tròp èkzanp, moun-yan ké pédi. Donk miyò to sèrvi èkzanp sèlman pou bagaj enpòrtan to lé ansényé-a. Si nou lé vin pi vayan annan fason nou ka ansényé-a, a pa paské nou lé mété nou kò douvan, mé a paské nou lé idé roun patché moun vini annan fanmi Jéova-a.

19. Kouman nou pouvé montré ki nou kontan nou frè ké sò-ya ?

¹⁹ Nou pyès pa lévé ké roun frè ki té parfè, nou pa gen sa lònò-a. Mé, nou gen rounòt lònò. Nou ka sèrvi Jéova ansanm ké roun patché frè ké sò. Nou pouvé montré yé ki nou kontan yé lò nou ka pasé tan ké yé, lò nou ka anprann sa yé gen pou anprann nou, é lò nou ka kontinyé bay annan travay prédikasyon-an ké ansèyman-an ansanm ké yé. Annou imité mantalité Jak té gen, fason i té ka aji, ké fason i té ka ansényé-a. A konsa nou ké bay nou Papa ki annan syèl-a é ki kontan nou, lònò. É nou ké idé moun-yan ki sensèr vini òbò li !