1. Annan ki sitiasyon ki té rèd menm David trouvé so kò ?

 DAVID ka kouri pou sové so lavi paské Sayil, rwa Israyèl-a ki gen bokou pouvwar, ka chaché tchwé l’. Kou i pa gen anyen pou manjé ankò, David ka arété annan roun vil yé té ka aplé Nòb koté i ka doumandé moun-yan bay li senk dipen rounso (1 Sam. 21:1, 3). Pita, li ké wonm-yan ki ka maché ké li-a, ka alé séré annan roun gròt (1 Sam. 22:1). Mé kouman David fè rivé annan sa sitiasyon-an ?

2. Kouman Sayil mété so lavi an danjé ? (1 Samuel 23:16, 17).

² A pa ti jalou Sayil jalou David paské roun patché moun kontan l’ é yé ka chanté pou li pas i ka ganyen roun patché lagèr. Anplis di sa, i savé ki, kou i dézobéyi, Jéova pa lé i rété rwa Israyèl-a ankò, i chwazi David pou i divini rwa an so plas (li 1 Samuel 23:16, 17). Mé, a li ki rwa toujou, é i gen roun gran larmé ké roun patché moun ki ka idé l’. Donk David blijé chapé pou sové so lavi. Mé kisa Sayil gen annan so lidé ? És i ka pansé i pouvé vréman anpéché Bondjé fè David divini rwa ? (Is. 55:11). Labib-a pa ka di nou sa. Mé i gen roun bagaj nou pouvé sir : Sayil té ka mété so kò an danjé. Sa-ya ki ka briga ké Bondjé, toujou ka pédi.

3. Kisa David rousanti magré so sitiasyon ?

 ³ David pa té ka chaché gran bagaj pou so kò. A pa li ki té chwazi divini rwa Israyèl, a té Jéova ki té désidé fè l’ divini rwa (1 Sam. 16:1, 12, 13). Mé Sayil koumansé rayi David. Mé David pa di ki, si so lavi té an danjé, a té fot Jéova. É i pa plenn so kò non plis pas i pa té gen bokou manjé, ni pas i té divèt séré annan roun gròt. A pitèt lò i té ka séré annan sa gròt-a ki i fè sa bèl louwanj-a pou Bondjé koté nou ka trouvé nou tèks pou sa lannen-an : « Sa-ya ki ka chaché Jéova pa ké manké anyen ki bon » (Ps. 34:10).

4. Ki késyon enpòrtan nou ké réponn annan sa artik-a ?

⁴ Jòdla, roun patché sèrvitèr Jéova pa gen asé manjé pou yé manjé, ké ròt bagaj yé bézwen pou viv *. A sa ki rivé roun patché sèrvitèr Jéova, èspésyalman pannan pandémi Covid-19-a. É ké « gran tribilasyon »-an ki ka rivé, nou savé ki bagaj-ya ké vin plizanpli mové (Mat. 24:21). Donk, a pou nou réponn sa kat késyon-yan : Poukisa nou pouvé di ki David pa « manké anyen ki bon » ? Poukisa nou divèt anprann kontan ké sa nou gen ? Poukisa nou pouvé sir ki Jéova ké pran swen di nou ? É kouman nou pouvé préparé nou kò dipi jòdla pou sa ki ka vin dimen ?

5-6. Kouman Psaume 23 ka idé nou konprann kisa David té lé di lò i di ki sèrvitèr Bondjé-ya ‘pa ka manké anyen ki bon’ ?

⁵ Kisa David té lé di lò i di ki sèrvitèr Jéova-ya pa té ké « manké anyen ki bon » ? Lò David ékri Psaume 23, i sèrvi menm kalité mo-ya. Donk, sa Psaume-an pouvé idé nou konprann sa i té lé di (li Psaume 23:1-6). David ka koumansé sa Psaume-an konsa : « Jéova sa mo Bèrjé. Mo pa ké manké anyen. » Annan larèstan Psaume-an, David ka palé di bagaj ki  gen bokou valò : bèl bénédiksyon Jéova ka bay li paské i asèpté l’ kou so Bèrjé. I ka èspliké ki Jéova ka mennen li « asou chimen lajistis » é ki i ka soutni li, ki lépòk-a bon, ki lépòk-a mové. I ka rékonnèt ki a pa paské i ka viv annan « savann koté i gen bokou zèrb » ki i pa ké gen problèm. I savé ki détan i pouvé « maché annan soukou dou », sa lé di ki i pouvé dékourajé épi i pouvé gen lèlmi. Mé ké Jéova ki sa so Bèrjé, i sir ki i pa gen pou ‘pè pyès mové bagaj rivé li’.

⁶ Donk, nou pouvé réponn prémyé késyon-an : Poukisa nou pouvé di ki David pa manké anyen ki bon ? I té gen tousa i té bézwen pou i té rété pròch ké Jéova. I pa té bézwen bokou bagaj pou so tchò té kontan : i té kontan ké sa Jéova té ka bay li. Sa ki té pi enpòrtan pou li, a té ki so Bondjé béni li ké protéjé li.

7. Dapré Luc 21:20-24, ki sitiasyon rèd menm, prémyé krétyen-yan ki té ka rété Jidé jwenn ?

⁷ Dapré sa David di, nou ka wè ki sa enpòrtan ki sa nou gen pa divini tro enpòrtan pou nou. Nou pouvé pran plézi ké tout bagaj nou gen, mé a pa sa ki divèt pi enpòrtan annan nou lavi. Krétyen-yan ki té ka rété Jidé annan 1^é syèk-a, montré ki yé té konprann sa lidé enpòrtan-an (li Luc 21:20-24). Jézi té avèrti yé ki roun jou « larmé-ya té ké baré Jérizalèm ». Lò sa té ké rivé, yé té ké divèt « kouri alé séré pa bò d’ montangn-yan ». Si yé té ka chapé, yé té ké sové. Mé yé té ké divèt lésé roun patché bagaj dèyè yé. I gen déztrwa lannen, men sa La Tour de Garde * di : « Yé lésé yé bati ké yé kaz, yé pa menm pran bagaj yé té gen annan yé kaz. Kou yé té sir ki Jéova té ké protéjé ké soutni yé, yé mété yé ladorasyon pou Jéova douvan tout bagaj ki té pouvé parèt enpòrtan. »

8. Ki léson enpòrtan nou ka anprann di sa ki rivé prémyé krétyen-yan ki té ka rété Jidé ?

⁸ Ki léson enpòrtan nou ka anprann di sa ki rivé prémyé krétyen-yan ki té ka rété Jidé ? La Tour de Garde nou fin palé anvan-an ka di ankò : « Pitèt nou ké gen pou montré kouman nou ka wè bagaj nou gen : ès a sa ki pi enpòrtan pou nou, ouben ès sa ki pi enpòrtan pou nou, a sa Jéova ké fè pou sové nou paské nou ké rété fidèl douvan li ? Wi, lò lafen-an ké vini pitèt nou ké gen pou tchenbé annan sitiasyon ki rèd é nou ké gen pou fè sakrifis. Nou ké divèt paré fè tousa nou divèt fè kou prémyé krétyen-yan ki lésé vil Jidé-a. »

9. Kouman konsèy Pòl bay Ébré-ya ka ankourajé to ?

⁹ A pa ti rèd sa té divèt rèd pou sa krétyen-yan pou lésé près tousa yé té gen épi roukoumansé rounòt lavi ! Yé té divèt gen lafwa pou konté asou Jéova pou i bay yé tousa yé té bézwen pou viv. Mé roun bagaj té pouvé idé yé. Senk lannen anvan Romen-yan baré Jérizalèm, apot Pòl té bay Ébré-ya roun bon konsèy : « A pa pou zòt lésé zafè kontan soumaké gidé zòt annan fason zòt ka viv ; a pou zòt kontan ké sa zòt gen. Paské i di : “Mo pa ké jen lésé to, é mo pa ké jen lagé to.” Konsa, plen ké kouraj, nou pouvé di : “Jéova ké sové mo ; mo pa ké pè. Kisa roun moun pouvé fè mo ?” » (Héb. 13:5, 6). Asiré pa pitèt, sa té pi fasil pou sa-ya ki té swiv konsèy Pòl, rivé kontan ké sa yé té gen annan yé nouvo kaz. Yé té sir ki Jéova té ké pran swen di yé é té ké bay yé sa yé té bézwen pou viv. Sa Pòl di ka  fè nou sir ki Jéova ké bay nou osi tousa nou bézwen pou viv.

10. Ki « sigré » Pòl bay nou ?

¹⁰ Pòl bay Timoté menm kalité konsèy-a é sa konsèy-a bon pou nou osi. I ékri : « Donk, si nou gen manjé pou manjé ké lenj pou mété, nou ké kontan ké sa bagaj-ya » (1 Tim. 6:8). Ès sa lé di ki nou pa pouvé pran plézi manjé roun bon manjé, gen roun bèl kaz pou rété ouben achté lenj tanzantan ? A pa sa Pòl té lé di. Pòl té lé di ki nou divèt kontan ké sa nou gen, kèlkéswa nou sitiasyon. A di sa « sigré »-a i palé annan Philippiens 4:12. Sa ki gen plis valò pou nou, a nou lanmityé ké Jéova, a pa bagaj nou gen (Hab. 3:17, 18).

11. Kisa sa Moyiz di Israyélit-ya ka anprann nou asou zafè kontan ké sa nou gen ?

¹¹ Détan nou ka pansé nou bézwen roun bagaj, mé a pa konsa Jéova ka wè l’. Gadé sa Moyiz di Israyélit-ya apré yé fè 40 lannen annan dézèr-a : « Jéova zòt Bondjé béni zòt annan tousa zòt fè. I byen savé zòt maché annan sa gran dézèr-a. Pannan sa 40 lannen-yan, Jéova zòt Bondjé té la ké zòt é zòt pa manké anyen » (Deut. 2:7). Pannan sa 40 lannen-yan, Jéova té bay Israyélit-ya lamann pou yé té manjé. I té fè sa ki fo pou lenj yé té gen lò yé soti Éjip pa janmen izé (Deut. 8:3, 4). Menm si roun ran pitèt pansé ki sa yé té gen pa té asé, Moyiz fè Israyélit-ya sonjé ki yé té gen tousa yé té bézwen. Sa ké fè Jéova plézi si  nou ka anprann kontan ké sa nou gen, sa lé di si nou kontan menm ti bagaj i ka bay nou, si nou ka wè yé kou roun kado i ka bay nou, é si nou ka montré li nou rékonésans.

12. Kisa ki ka montré ki David té ka fè Jéova konfyans pasé i fè so pròp kò konfyans ?

¹² David té savé ki Jéova fidèl é ki i ka pran swen di sa-ya ki kontan li. Menm si so lavi té an danjé lò i ékri Psaume 34-a, a ké lafwa David wè ‘zanj Jéova-a protéjé li’ (Ps. 34:7). Pitèt David té ka konparé zanj Jéova-a ké roun sòlda ki la koté yé ka fè lagèr é ki pa janmen ka arété djété si i gen roun lèlmi ka rivé. Menm si David té sa roun sòlda plen ké kouraj, é ki Jéova té promèt li ki i té ké divini rwa, i pa konté asou zafè i té konnèt voyé ròch ouben sèrvi roun zépé pou ganyen so lèlmi (1 Sam. 16:13 ; 24:12). I té ka fè Jéova konfyans, paské i té sir ki so zanj ka « délivré » « tousa ki gen lakrent » pou li. Bon, jòdla nou pa ka antann Jéova fè roun mirak pou protéjé nou. Mé nou savé ki tout sa ki ka fè Jéova konfyans ké rousouvwè lavi pou tout-tan, menm si lanmò baré yé jòdla.

13. Lò Gòg ki soti Magòg ké ataké, poukisa nou ké sanblé moun ki pa pouvé défann yé kò, mé poukisa nou pa ké bézwen pè ? (gadé zimaj-a anlè prémyé paj-a).

¹³ Titalò, nou ké gen pou montré ki nou sir ki Jéova pouvé protéjé nou. Lò Gòg ki soti Magòg, sa lé di plizyèr nasyon ki ké mété yé kò ansanm, ké ataké pèp Bondjé-a, nou ké pitèt krè ki yé ké tchwé nou. Nou ké divèt sir ki Jéova pouvé sové nou é ki i ké sové nou. Pou nasyon-yan, nou ké sanblé moun ki pa pouvé défann yé kò, kou ti-mouton ki pa gen pyès moun pou protéjé yé (Ézéch. 38:10-12). Nou pa ké gen pyès zarm é nou pa ké gen pyès èspéryans annan zafè briga. Nasyon-yan ké krè ki sa ké fasil pou yé ataké nou. Yé pa ké wè sa nou menm nou ké wè ké wéy lafwa-a : roun gran larmé zanj dibout alantou pèp Bondjé-a paré pou défann li. Nasyon-yan pa ké wè yé, yé pa gen lafwa annan Bondjé. Yé ké rété èstébékwé lò larmé zanj-ya ké briga pou nou ! (Rév. 19:11, 14, 15).

14. Kisa nou pouvé fè pou préparé nou kò pou sa ki ka vin dimen ?

¹⁴ Kisa nou pouvé fè aprézan pou préparé nou kò pou sa ki ka vin dimen ? Pou koumansé, nou pa divèt krè ki a sa nou gen ki pi enpòrtan, paské roun jou nou ké divèt lésé sa bagaj-ya dèyè nou. Nou divèt kontan osi ké sa nou gen épi kontan osi paské nou gen roun bèl lanmityé ké Jéova. Pi nou ké anprann konnèt nou Bondjé, pi nou ké sir ki i ké pouvé protéjé nou lò Gòg ki soti Magòg ké ataké nou.

15. Kisa ki rivé David lò i té jenn é ki pèrmèt li sir ki Jéova té ké toujou idé li ?

¹⁵ Annou palé di rounòt bagaj ki idé David fè Jéova konfyans é ki pouvé idé nou préparé nou kò pou sa ki ka vin dimen. Men sa David ékri : « Vini gouté épi zòt ké wè ki Jéova bon ; moun-an ki ka kouri séré òbò l’, so tchò kontan ! » (Ps. 34:8). Sa David di ka èspliké poukisa i té savé ki i té pouvé konté asou Jéova pou i idé l’. David konté asou Jéova souvan, é i pa trapé pyès désèpsyon ké so  Bondjé. Lò i té jenn, David té alé briga ké roun jéyan, roun filisten yé té ka aplé Goliyat, é men sa i té di sa sòlda-a ki té fò : « Jòdla menm, Jéova ké fè to tonbé annan mo lanmen » (1 Sam. 17:46). Pita, i travay pou Sayil ki éséyé tchwé l’ plizyèr fwa. Mé « a ké David » Jéova té fika (1 Sam. 18:12). Paské David té wè Jéova idé l’, i té savé ki i té pouvé konté asou li annan problèm i té ka jwenn aprézan.

16. Kouman nou pouvé « gouté » pou wè ki Jéova bon ?

¹⁶ Pi nou ka konté asou Jéova pou i gidé nou jòdla, pi nou ké sir ki i ké pouvé sové nou dimen. Nou bézwen gen lafwa é nou divèt konté asou Jéova pou doumandé nou patron roun konjé pou nou alé annan roun gran asanblé ouben pou doumandé li chanjé nou lèr travay pou nou pouvé alé annan tout nou réinyon épi préché plis. Mé si nou patron pa lé bay nou sa nou ka doumandé li-a é nou ka pédi nou travay, ès nou ké sir ki Jéova pa ké janmen lésé nou ouben anbandonnen nou é ki i ké toujou bay nou sa nou bézwen pou viv ? (Héb. 13:5). Roun patché frè ké sò ki annan sèrvis a plen tan-an pouvé rakonté sa ki rivé yé é ki ka montré kouman Jéova idé yé lò yé té plis bézwen. Jéova fidèl.

17. Ki tèks nou gen pou lannen 2022-a, é poukisa yé byen chwazi l’ ?

¹⁷ Ké Jéova òbò nou, nou pa bézwen pè sa ki ké rivé dimen. Si nou ka kontinyé mété so volonté an prémyé annan nou lavi, nou Bondjé pa ké lagé nou. Pou idé nou sonjé ki nou bézwen préparé nou kò pou problèm ki ka vin dimen, é pou idé nou sir ki Jéova pa ké janmen lésé nou, Kolèj santral-a chwazi Psaume 34:10 kou tèks pou lannen 2022-a : « Sa-ya ki ka chaché Jéova pa ké manké anyen ki bon. »