1-2. Ki éprèv sèrvitèr Jéova-ya pouvé jwenn ?

 MALÒ pouvé tonbé asou nou rounsèl kou épi chanjé nou lavi nèt. Parèkzanp, yé wè ki Luis a té gen roun kansèr ki té grav. So dòktèr di li ki i pa té gen bokou tan pou i viv ankò. Monika ké so mari té ka fè bokou bagaj annan sèrvis pou Jéova-a. Mé roun jou, Monika vin anprann ki so mari, ki té sa roun ansyen, té ka fè mové bagaj dèyè so do dipi plizyèr lannen. Olivia, ki pa maryé, té oblijé lésé so kaz pas roun ouragan té ka vini. Lò i rouvin, kaz-a té krazé nèt. Annan roun ti moman, lavi sa frè ké sò-ya chanjé nèt. Ès to ja viv roun bagaj konsa ? Ès roun malò tonbé asou to rounsèl kou épi chanjé to lavi ?

² Kou tout moun, nou ka tonbé malad é nou gen problèm. Anplis di sa, kou nou ka adoré Jéova, détan moun ki ka rayi Témwen Jéova-ya ka éséyé baré nou chimen ouben ka pèrsékité nou. Jéova pa ka anpéché sa kalité éprèv-ya tonbé asou nou. Mé i ka promèt idé nou (Is. 41:10). Gras a li, nou pouvé kontinyé gen lajwa, pran bon désizyon épi rété fidèl ké li, menm si nou gen roun patché éprèv. Annan sa artik-a, nou ké wè kat fason Jéova ka idé nou lò nou gen malò. Nou ké wè osi sa nou menm nou divèt fè pou i idé nou.

JÉOVA KÉ PROTÉJÉ TO

3. Lò roun malò ka tonbé anlè nou, kisa ki pouvé rèd pou nou fè ?

³ Problèm-an : Lò roun malò ka tonbé asou nou, sa pouvé rèd pou nou byen réfléchi épi pran roun désizyon.  Poukisa ? Paské nou tchò ka fè nou mal ouben nou pa ka rivé arété enkyété nou kò. Nou pouvé krè ki a kousidiré nou annan soukou é nou pa ka wè ki koté pou nou alé. Annou wè sa dé sò-ya nou palé anvan rousanti lò malò tonbé anlè yé. Olivia ka di : « Lò mo wè ki ouragan-an té krazé mo kaz, mo té boulvèrsé é mo pa té savé sa pou mo té fè. » Men sa Monika ka di asou sa i rousanti lò i vin savé ki so mari té trayi l’ : « Mo té yèg menm. A pa ti soufri mo té ka soufri, mo tchò té krazé nèt. Mo pa menm té ka rivé fè bagaj mo té gen labitid fè touléjou. Mo pa té janmen pansé ki roun bagaj konsa té ké rivé mo. » Kisa Jéova ka promèt fè pou nou lò nou boulvèrsé ?

4. Annan Philippiens 4:6, 7, kisa Jéova ka promèt nou ?

⁴ Sa Jéova ka fè : I ka promèt nou bay nou sa Labib-a ka aplé « lapè Bondjé » (li Philippiens 4:6, 7). Sa kalité lapè-a, a lò to ka santi ki to byen paské to pròch di Jéova. Sa lapè-a ka « dépasé tousa nou pouvé konprann » ; i pi bèl pasé sa nou pouvé imajiné. Ès to ja santi sa kalité lapè-a lò to fin priyè Jéova ? A sa yé ka aplé « lapè Bondjé ».

5. Kouman lapè Bondjé ka protéjé nou tchò ké nou lèspri ?

⁵ Vèrsé-a ka di ki lapè Bondjé ‘ké protéjé nou tchò ké nou lèspri’. Annan sa vèrsé-a, lò yé ka di « protéjé », a sa mo-a yé té ka sèrvi annan larmé pou palé di sòlda-ya ki té ka protéjé roun vil pou pyès moun pa ataké l’. Moun-yan ki té annan vil-a té ka byen dronmi paské yé té savé ki sòlda-ya té ka véyé lapòt-ya. Menm fason-an, lò lapè Bondjé ka protéjé nou tchò ké nou lèspri, nou tchò trankil paské nou savé ki nou an sékirité (Ps. 4:8). Kou sa ki rivé Ann, menm si nou sitiasyon pa ka chanjé, lanmenm nou ka santi nou byen (1 Sam. 1:16-18). É souvan, lò nou tchò trankil, nou ka rivé réfléchi pi byen é nou pouvé pran bon désizyon.

6. Kisa nou divèt fè pou nou gen lapè Bondjé ? (gadé zimaj-a osi).

⁶ Sa nou divèt fè : Lò to anba dlo, sipliyé Jéova pou i protéjé to. Kouman to pouvé fè sa ? Priyè jiktan to rousanti so lapè (Luc 11:9 ; 1 Thess. 5:17). Luis, nou ja palé anvan, èspliké kouman li ké so madanm, Ana, réyaji lò yé anprann ki i pa té ka rété lontan pou i viv. I di : « Annan sa kalité sitiasyon-an, sa rèd  pou pran roun désizyon, ki a pou bagaj pou to lasanté, ki a pou nenpòrt ki ròt bagaj. Mé gras a lapriyè, nou rivé pa enkyété nou kò. » Luis ké Ana di ki yé priyè bokou épi ké tout yé fòrs pou doumandé Jéova bay yé lapè annan yé tchò, bay yé roun tchò kalm épi pèrmèt yé gen sajès yé té bézwen-an pou pran bon désizyon. É yé santi ki Bondjé té ka soutni yé vré. Si to annan roun éprèv, kontinyé priyè é to ké wè kouman lapè Jéova ka protéjé to tchò ké to lèspri (Rom. 12:12).

JÉHOVA KÉ FÈ TO RÉTÉ BYEN DIBOUT

7. Kisa nou pouvé rousanti lò nou annan roun éprèv ?

⁷ Problèm-an : Byen souvan, fason nou ka réfléchi lò tout bagaj k’alé byen ké fason nou ka réfléchi lò nou annan roun éprèv, a pa menm bagaj-a. A sa ka fèt osi ké sa nou ka rousanti épi ké fason nou ka aji. Nou pouvé santi ki nou gen tròp bagaj annan nou tchò ké annan nou tèt. Ana di ki, lò Luis mouri, i vin gen tout kalité santiman. I di : « Détan, lò mo té anba dlo menm, mo té ka plenn mo kò é mo té ka faché osi paské i pa té la ankò. » Épi i té gen jou Ana té ka santi i té tousèl ké so kò é kou i té gen pou fè bagaj Luis té ka fè anvan, sa té ka nèrvé l’. Détan, i té ka santi kousidiré i té an mitan roun tanpèt. Kouman Jéova ka idé nou lò nou boulvèrsé konsa ?

8. Kisa Jéova ka promèt nou annan 1 Pierre 5:10 ?

⁸ Sa Jéova ka fè : I ka promèt nou fè nou rété byen dibout (li 1 Pierre 5:10). Lò roun bato an mitan roun tanpèt, van-an ké dlo-a ka soukouyé l’ tèlman ki i pouvé chalviré. Pou anpéché bato-a balansé tròp, yé ka mété dé najwar anba bato-a. Gras a sa, bato-a gen mwens chans chalviré é moun-yan ki asou l’ pi alèz pou vwayajé. Mé souvan, sa sistèm-an ka maché pi byen lò bato-a ka kontinyé vansé. Menm fason-an, si nou ka kontinyé sèrvi Jéova ké fidélité menm lò nou gen éprèv, Jéova ké fè nou rété byen dibout.

9. Kouman nou zouti pou fè réchèrch pouvé idé nou rété byen dibout ? (gadé zimaj-a osi).

⁹ Sa nou divèt fè : Si to ka santi ki to pa pouvé ankò paské to tchò ka fè to mal ouben paské to pa ka las enkyété to kò, fè tousa to pouvé pou kontinyé  priyè, alé annan réinyon-yan épi préché. A vré, pitèt to pa ké fè bokou bagaj kou anvan, mé sonjé ki Jéova pa ka doumandé to fè plis pasé sa to pouvé fè (gadé Luc 21:1-4). Annan sa to divèt fè, pa bliyé étidyé Labib-a to rounso épi pran tan réfléchi asou sa to ka li. Jéova ka bay to artik ké vidéyo ki pouvé idé to rété byen dibout. Pou to jwenn sa to bézwen, itilizé zouti pou fè réchèrch, kou aplikasyon JW Library^®, Index des publications des Témoins de Jéhovah ké Guide de recherche pour les Témoins de Jéhovah. A sa Monika nou ja palé anvan-an, fè lanmenm : chak fwa i té ka koumansé santi ki i pa té pouvé ankò, i té ka sèrvi sa zouti-ya pou jwenn konsèy. Parèkzanp, i té ka fè réchèrch asou « kòlè », « trayizon » ouben « fidélité ». Apré sa, i té ka li artik-ya jiktan i té ka santi ki i té byen. Men sa i ka di : « Lò mo té ka koumansé fè réchèrch, mo pa té byen menm, mé pi mo té ka li, pi mo té ka santi kousidiré Jéova té ka kroké mo. Mo té ka wè ki i té ka konprann tousa mo té ka rousanti é ki i té la òbò mo. » To menm osi, Jéova pouvé idé to rété byen dibout jiktan tanpèt-a fini (Ps. 119:143, 144).

JÉOVA KÉ SOUTNI TO

10. Kisa nou pouvé rousanti lò malò ka tonbé asou nou ?

¹⁰ Problèm-an : Lò malò-a ka tonbé asou nou, détan, nou pouvé santi ki nou pa gen pyès fòrs ankò. A sa moman-an, nou ka sanblé ké roun moun ki ka fè bokou èspòr é ki té gen labitid kouri vit, mé ki aprézan ka bwété paské i blésé. Bagaj nou té ka fè fasilman anvan divini rèd aprézan, é i gen bagaj nou té kontan fè ki nou pa anvi fè ankò. Nou pa ka menm rivé soti di nou kabann. Kou sa rivé Éli, sèl bagaj nou ka wè a dronmi (1 Rois 19:5-7). Kisa Jéova ka promèt fè pou idé nou lò nou fèb ?

11. Ki ròt bagaj Jéova ka fè pou idé nou ? (Psaume 94:18).

¹¹ Sa Jéova ka fè : I ka promèt nou soutni nou (li Psaume 94:18). Menm fason roun moun ki kontan fè bokou èspòr mé ki blésé bézwen roun moun  ouben roun bagaj pou idé l’ vansé, pitèt nou ké bézwen roun moun idé nou pou nou kontinyé travay annan nou sèrvis pou Jéova. Lò a sa, men sa Jéova ka promèt fè : « Mo, Jéova to Bondjé, mo ka pran to lanmen drèt, mo menm, sa-la ki ka di to : “Pa bézwen pè. Mo ké idé to” » (Is. 41:13). A sa ki rivé rwa David ki jwenn roun patché éprèv é ki briga ké bokou lèlmi. I di Jéova : « To ka soutni mo ké to lanmen drèt » (Ps. 18:35). Mé kouman Jéova ka soutni nou ?

12. Kimoun Jéova ka sèrvi pou soutni nou lò nou fèb ?

¹² Byen souvan, Jéova ka fè ròt-ya idé nou. A konsa i ka soutni nou. Parèkzanp, roun jou David té ka santi i té fèb, so zanmi Jonatan vin bay li fòrs épi ankourajé l’ (1 Sam. 23:16, 17). Menm fason-an, Jéova sèrvi Élizé pou idé Éli (1 Rois 19:16, 21 ; 2 Rois 2:2). Jòdla, Jéova pouvé sèrvi nou fanmi, nou zanmi, ouben ansyen-yan pou idé nou. Mé lò nou ka soufri nou gen tandans ka rété annan nou kwen ; sa nou lé a rété nou rounso. Sa nòrmal. Mé kisa nou pouvé fè pou Jéova soutni nou ?

13. Kisa nou divèt fè pou Jéova soutni nou ? (gadé zimaj-a osi).

¹³ Sa nou divèt fè : Pa rété to rounso. Lò roun moun ka rété annan so kwen, a yenki so sitiasyon ké so problèm i ka wè. É akoz di sa, i pouvé pran mové désizyon (Prov. 18:1). Sa vré, nou tout bézwen rété nou rounso tanzantan, èspésyalman lò nou ka jwenn éprèv. Mé si nou ka rété nou rounso pannan lontan, nou ka riské viré nou do bay sa Jéova ka fè pou idé nou. Alòr menm si sa rèd menm, lésé to fanmi, to zanmi ké ansyen-yan idé to. A pou to wè ki Jéova ka sèrvi yé pou soutni to (Prov. 17:17 ; Is. 32:1, 2).

JÉOVA KÉ KONSOLÉ TO

14. Ki bagaj pouvé fè nou pè ?

¹⁴ Problèm-an : Nou pouvé jwenn problèm ki ka fè nou pè kou nou pa té janmen pè anvan. Sèrvitèr Bondjé tan-lontan jwenn problèm ki fè yé pè ouben ki fè yé soufri akoz di yé lèlmi ouben akoz di ròt bagaj ankò (Ps. 18:4 ; 55:1, 5). Jòdla, moun pouvé éséyé baré nou chimen lò nou lékòl ouben annan nou travay. Moun annan nou fanmi ouben  otorité-ya osi pouvé éséyé fè sa. Ouben nou pouvé pè mouri paské nou gen roun maladi ki grav. Annan tout sa sitiasyon-yan nou pouvé santi kousidiré nou sa roun timoun ki pa pouvé défann so kò. Lò a konsa, kouman Jéova ka idé nou ?

15. Dapré Psaume 94:19, kisa Jéova ké fè pou nou ?

¹⁵ Sa Jéova ka fè : I ka konsolé nou é i ka kalmé nou tchò (li Psaume 94:19). Sa Psaume-an pouvé fè nou sonjé roun tifi ki pè toubonnman é ki pa ka rivé dronmi paské loraj-a ka pété. Nou pouvé imajiné so papa ka vini rasiré l’ é ka tchenbé l’ annan so bra jiktan i pran somèy. Loraj-a ka pété toujou, mé annan bra so papa, i ka santi i an sékirité. Lò nou annan roun problèm ki ka fè nou pè, a kousidiré nou bézwen nou Papa ki annan syèl-a kroké nou osi jiktan nou ka santi nou kò byen. Kisa nou divèt fè pou Jéova konsolé nou ?

16. Kisa nou divèt fè pou Jéova konsolé nou ? (gadé zimaj-a osi).

¹⁶ Sa nou divèt fè : Pasé tan ké Jéova souvan. É pou to fè sa, a pou to priyè é a pou to li so Paròl (Ps. 77:1, 12-14). Konsa, lò to ké jwenn roun sitiasyon ki ké mété présyon anlè to, lanmenm to ké priyè to Papa ki annan syèl-a. Di li sa ki ka fè to pè ké sa ki ka fè to enkyèt. Kouté sa i ka di to annan so Paròl pou konsolé to (Ps. 119:28). Pitèt to ké santi ki sèrten liv di Labib-a ka konsolé to èspésyalman. Parèkzanp, liv Job, Psaumes ouben Proverbes, épi sa Jézi di annan Matthieu chapit 6 pouvé ankourajé to. Lò to ka priyè é lò to ka li Labib-a, to ka lésé Jéova konsolé to.

17. Di kisa nou pouvé sir ?

¹⁷ Nou pouvé sir ki Jéova ké la lò malò ké tonbé asou nou. Nou pa ké janmen tousèl (Ps. 23:4 ; 94:14). Jéova ka promèt protéjé nou, fè nou rété byen dibout, soutni nou épi konsolé nou. Men sa Isaïe 26:3 ka di asou Jéova : « To ké protéjé sa-ya ki ka konté asou to ké tout yé tchò, to ké bay yé roun lapè ki pa ka fini paské a to yé ka fè konfyans. » Atò, fè Jéova konfyans é fè tousa ki fo pou i idé to. Konsa, menm lò to ké annan éprèv, to ké gen fòrs.