1. Kouman to ka wè Jéova ?

 ÈS TO ja éséyé imajiné kouman Jéova fika ? Lò to ka priyè l’, kouman to ka wè l’ ? A vré, nou pa pouvé wè l’, mé Labib-a ka di plizyèr bagaj asou li pou palé di li. I ka di ki i sa « roun solèy ké roun boukliyé » ké « roun gro difé ki ka boulé tout bagaj » (Ps. 84:11 ; Héb. 12:29). Ézékyèl wè Jéova annan roun vizyon, i di ki i kou safir. I di osi ki i kou roun métal ki ka kléré, é ki i kou roun arkansyèl ki ka kléré fò (Ézéch. 1:26-28). Sa pouvé fè nou santi nou kò toupiti, nou jis pouvé pè.

2. Kisa ki pouvé anpéché nou vin pi pròch di Jéova ?

² Kou nou pa pouvé wè Jéova, pitèt sa rèd pou nou krè ki i kontan nou. Ès akoz di roun bagaj ki rivé nou, nou ka pansé ki Jéova pa ké janmen pouvé kontan nou ? Sa pouvé rivé, parèkzanp, si nou papa pa janmen montré nou ki i té kontan nou. Jéova ka konprann sa nou ka rousanti é kouman sa ka aji asou nou. A pou sa, pou idé nou, i ka di nou ki kalité moun i sa annan so Paròl.

3. Poukisa sa ké bon ki nou palé di lanmou Jéova ka montré nou ?

³ Mo-a ki ka èspliké pi byen ki kalité moun Jéova sa, a « lanmou ». Labib-a ka di ki « Bondjé sa lanmou » (1 Jean 4:8). Tousa i ka fè, a ké lanmou i ka fè l’. Tèlman i gen lanmou é tèlman sa lanmou-a fò, i jis kontan sa-ya ki pa kontan l’ (Mat. 5:44, 45). Annan sa artik-a, nou ké palé di Jéova é di lanmou i ka montré nou. Pi nou ké anprann bagaj asou nou Bondjé, pi nou ké kontan l’.

 JÉOVA KONTAN NOU BOKOU

4. Kisa to ka rousanti lò to ka sonjé ki Jéova « gen bokou lanmou pou nou » ? (gadé zimaj-a osi).

⁴ « Jéova gen bokou lanmou pou nou » (Jacq. 5:11). Annan Labib-a, i ka di ki i kou roun manman ki kontan so pitit (Is. 66:12, 13). Imajiné roun manman ki ka okipé di so pitit ké bokou lanmou. I ka fè l’ soté asou so jounou é i ka palé jantiman ké li, ké roun vwa ki dous. Lò i ka kriyé ouben lò i gen roun bagaj ki ka fè l’ mal, i ka fè sa ki fo pou bay li sa i bézwen. Nou pouvé sir ki lò nou ké anba traka, Jéova ké bay nou tout so lanmou. Moun-an ki ékri Psaume 94:19 di : « Lò mo té kouvri anba problèm, to konsolé mo é to kalmé mo tchò. »

5. Kou to savé ki Jéova sa roun Bondjé ki gen lanmou fidèl, di kisa to pouvé sir ?

⁵ Jéova fidèl (Ps. 103:8). Lò nou ka fè roun bagaj ki pa bon, i pa ka lésé nou tonbé. So pèp Israyèl fè li lapenn plizyèr fwa. Pourtan, lò pèp-a té ka répanti, i té ka montré li so lanmou fidèl. Parèkzanp, roun jou i di li : « To vin gen bokou valò pou mo, mo bay to lònò é mo kontan to » (Is. 43:4, 5). Jéova pa chanjé. Nou toujou pouvé konté asou so lanmou. Menm si nou fè bagaj ki té grav, i pa ké lésé nou tonbé. Si nou ka répanti é nou ka rouvini òbò li, nou ké wè ki so lanmou pou nou pa chanjé. I ka promèt nou ‘pardonnen nou ké tout so tchò’ (Is. 55:7). Labib-a ka di ki lò i ka pardonnen nou, a kousidiré i té ka « fè sézon soulajman rivé » (Actes 3:19).

6. Kisa Zacharie 2:8 ka anprann nou asou Jéova ?

⁶ (Li Zacharie 2:8.) Kou i kontan nou, Jéova ka rousanti sa nou ka rousanti é i lé protéjé nou. Lò nou ka soufri, i ka soufri. A pou sa nou pouvé sir ki i ké kouté nou si nou ka priyè l’ pou di li : « Protéjé mo kousidiré mo té sa to grenn wéy » (Ps. 17:8). Wéy-a, a roun parti annan nou kò ki sansib é ki gen bokou valò. Donk, lò Jéova ka konparé nou ké so grenn wéy, a kousidiré i té ka di nou : « Mo sèrvitèr-ya, si roun moun ka manyen zòt, a sa ki gen valò pou mo i ka manyen. »

7. Poukisa nou divèt fè sa ki fo pou nou pi sir ki Jéova kontan nou ?

⁷ Jéova lé nou chak nou sir ki i kontan  nou. Mé i savé ki détan, akoz di mové bagaj ki rivé nou anvan, nou ka doumandé nou kò si i pouvé kontan nou. Ouben pitèt atchwèlman, nou annan roun sitiasyon ki pouvé fè nou douté ki i kontan nou. Nou ké pi sir ki i kontan nou si nou ka gadé kouman i ka montré so lanmou pou Jézi, pou krétyen wen-yan é pou nou chak.

KOUMAN JÉOVA KA MONTRÉ SO LANMOU ?

8. Poukisa Jézi té sir ki so Papa té kontan l’ ?

⁸ Jéova ké Jézi, so Pitit i kontan-an, kontan yé konpanyen dipi nanninannan. A roun lanmityé ki pi vyé pasé pyès ròt lanmityé ki pouvé èkzisté. Kou nou ka wè l’ annan Matthieu 17:5, Jéova byen montré ki i té kontan Jézi. I té pouvé di : « Men […] sa-la […] ki ka fè mo plézi. » Mé kou i té lé nou savé kouman i kontan so Pitit, i aplé l’ « mo Pitit, sa-la mo kontan-an ». Jéova té fyèr di li, èspésyalman paské i té paré bay so lavi an sakrifis (Éph. 1:7). Jézi li menm, pa té ka douté ki so Papa té kontan li. I té tèlman sir ki so Papa té kontan l’ ki i té ka rousanti sa jik ofon so tchò. I di plizyèr fwa ki i té sir ki so Papa té kontan l’ (Jean 3:35 ; 10:17 ; 17:24).

9. Kisa Pòl di pou montré ki Jéova kontan krétyen wen-yan bokou ? (Romains 5:5).

⁹ Jéova byen montré osi ki i kontan krétyen wen-yan (li Romains 5:5). Si to ka byen gadé, Pòl di ki Jéova « plen » yé ké sa lanmou-a. Roun diksyonèr biblik ka èspliké ki a kousidiré Jéova té vidé sa lanmou-a « kou roun larivyè a » asou yé. Sa èkzanp-a ka vréman byen montré kouman Jéova kontan yé ! Krétyen wen-yan savé ki ‘Bondjé kontan’ yé (Jude 1). Apot Jan èspliké sa yé ka rousanti, i di : « Gadé ki kalité lanmou Papa-a bay nou, pou yé aplé nou pitit Bondjé ! » (1 Jean 3:1). Mé ès a krétyen wen-yan rounso Jéova kontan ? Non. Jéova montré ki i té kontan nou chak.

10. Ki pi gran bagaj Jéova fè pou montré to ki i kontan to ?

¹⁰ Ki pi gran bagaj Jéova fè pou montré nou ki i kontan nou ? Ranson-an, a pi bèl bagaj pyès moun pa janmen fè pou montré so lanmou ! (Jean 3:16 ; Rom. 5:8). Jéova bay so Pitit i té tèlman kontan an sakrifis. I lésé l’ mouri pou tout moun, pou i pouvé pardonnen yé péché é pou yé pouvé divini so zanmi (1 Jean 4:10). Pi nou ké réfléchi asou sa Jéova ké Jézi péyé, pi nou ké randé nou kò kont di kantité lanmou yé gen pou nou chak (Gal. 2:20). A pa sèlman parapòrta so jistis Bondjé bay ranson-an. A roun kado i fè nou pas i kontan nou. Jéova montré ki i kontan nou, lò i bay sa ki té gen plis valò pou li, so Pitit. I lésé Jézi soufri épi mouri pou nou !

11. Kisa Jérémie 31:3 ka anprann nou ?

¹¹ Kou nou wè l’, Jéova pa ka gardé sa i ka rousanti pou li rounso, i ka montré so lanmou (li Jérémie 31:3). I fè nou vini òbò li paské i kontan nou (gadé Deutéronome 7:7, 8 ). Anyen ni pyès moun pa pouvé séparé nou di so lanmou (Rom. 8:38, 39). Kisa to ka rousanti lò to ka sonjé ki Jéova kontan to ? Li Psaume 23, épi gadé kouman David té ka santi so kò paské Jéova té kontan li é té ka pran swen di li. Nou chak pouvé rousanti menm bagaj-a osi.

 KISA TO KA ROUSANTI LÒ TO KA SONJÉ KI JÉOVA KONTAN TO ?

12. Di kisa Psaume 23 ka palé ?

¹² (Li Psaume 23:1-6.) Psaume 23-a, a roun chanté koté David ka di ki i sir ki Jéova kontan li é ki i ké toujou pran swen di li. I ka palé di bagaj èspésyal i gen ant li ké so Bèrjé, Jéova. David té ka lésé Jéova gidé l’, sa té ka pèrmèt li santi so kò an sékirité, i té ka konté asou li konplètman. É i té savé ki Jéova té ké montré li so lanmou touléjou pannan tout so lavi. Poukisa i té sir di sa ?

13. Poukisa David té sir ki Jéova té ké toujou pran swen di li ?

¹³ « Mo pa ké manké anyen. » David té ka santi ki i pa té ka manké li anyen paské Jéova té toujou bay li sa i té bézwen. I té savé osi ki so Bondjé té sa so zanmi, é ki i té ka fè l’ plézi. A pou sa i té sir ki kèlkanswa sa ki té ké rivé l’ dimen, Jéova té ké kontinyé bay li tousa i té bézwen. I té sir ki Jéova té kontan l’ bokou, é sa lidé-a té pi fò pasé pyès bagaj ki té pouvé fè li enkyèt. É a sa ki fè l’ kontan toubonnman (Ps. 16:11).

14. Kouman Jéova pouvé pran swen di nou ké lanmou ?

¹⁴ Jéova ka pran swen di nou ké lanmou, èspésyalman lò malò ka tonbé anlè nou. Claire b, ki bétélit dipi pasé 20 lannen, pa té savé sa pou i té fè lò malò asou malò tonbé asou so fanmi. So papa fè roun AVC, é i rété andikapé akoz di sa. Yé mété roun di so sò dèrò di asanblé-a é so fanmi pédi ti magazen yé té gen é yé kaz osi. Kouman Jéova pran swen di yé ké  lanmou ? Claire ka di : « Jéova toujou fè sa ki fo pou mo fanmi gen sa i té bézwen chak jou. Souvan, i bay yé plis ki sa mo té pouvé imajiné ! Mo toujou ka sonjé sa Jéova fè pou montré mo ki i té kontan mo, é sa gen bokou valò pou mo. Sa idé mo tchenbé annan éprèv mo jwenn pita. »

15. Kisa ki té ka pèrmèt David roupran fòrs ? (gadé zimaj-a osi).

¹⁵ « I ka roubay mo fòrs. » Détan, David té trakasé akoz di tout problèm i té gen épi akoz di tout éprèv i té ka jwenn (Ps. 18:4-6). Mé, kou Jéova té kontan l’ bokou, é té ka gadé pou li, sa té ka roubay li fòrs. Lò i té las, Jéova té ka mennen l’ annan ‘savann koté i té gen bokou zèrb’ épi ‘koté i té gen bokou dlo’. Sa té ka pèrmèt li roupran kouraj épi kontinyé sèrvi so Bondjé ké tchò kontan (Ps. 18:28-32).

16. Kouman lanmou Jéova-a ka roubay to fòrs ?

¹⁶ Jòdla osi, lò nou ka jwenn éprèv annan nou lavi, ‘a gras a lanmou fidèl Jéova-a nou pa ka disparèt’ (Lam. 3:22 ; Col. 1:11). Annou palé di Rachel. Pannan pandémi Covid 19-a, so mari lésé l’ tonbé, li ké Jéova. So dé bra té kasé. Kisa Jéova fè pou li ? I ka èspliké : « Jéova fè sa ki fo pou mo santi ki i kontan mo. I bay mo roun patché zanmi. Yé té ka pasé tan ké mo, yé té ka mennen manjé pou mo, yé té ka voyé mésaj ké vèrsé pou ankourajé mo, yé té ka souri pou mo, épi yé té toujou ka fè mo sonjé ki Jéova té ka okipé di mo. Mo pa ka arété di Jéova mèrsi paské i bay mo roun fanmi ki kontan mo. »

17. Poukisa David pa té pè « pyès mové bagaj » rivé li ?

¹⁷ « Mo pa pè pyès mové bagaj rivé mo, paské to la ké mo. » David té souvan an danjé, so lèlmi té pwisan. Mé gras a lanmou Jéova, i té ka santi so kò an sékirité, i té ka santi ki Jéova té ka protéjé l’. I té ka byen wè ki, kèlkéswa sitiasyon-an, Jéova té la ké li, é sa té ka rasiré l’. A pou sa i chanté : « [Jéova] libéré mo di tousa ki té ka fè mo pè » (Ps. 34:4). A vré, détan, David té pè, mé kou i té savé ki Jéova té kontan l’, sa pèrmèt li pa rété asou sa.

18. Lò to sir ki Jéova kontan to, kouman sa pouvé bay to fòrs annan roun sitiasyon ki ka fè to enkyèt ?

¹⁸ Lò nou savé ki Jéova kontan nou, kouman sa pouvé bay nou fòrs lò  nou annan roun sitiasyon ki ka fè nou enkyèt ? Susi, roun sò ki pyonyé, ka èspliké sa li ké so mari rousanti lò yé tibolonm tchwé so kò : « Lò roun malò konsa ka tonbé anlè to rounsèl kou, sa ka tromatizé to. Apré sa, to pè, épi to pa savé sa pou to fè. Mé kou nou savé Jéova kontan nou, nou ka santi ki nou an sékirité é ki i ka protéjé nou. » Rachel, nou palé anvan, ka sonjé : « Roun jou, aswè, mo té tris toubonnman é mo té enkyèt. Alòr, mo priyè Jéova, menm si mo té ka jémi. Lanmenm, mo santi ki i té ka rasiré ké kalmé mo, kou roun manman ka fè l’ pou so bébé, é mo pran somèy. Mo pa ké janmen bliyé sa jou-a. » Pou fini, annou palé di Tassos, roun ansyen ki fè kat lannen lajòl paské i pa té lé fè so sèrvis militèr. Kouman Jéova pran swen di li é montré l’ ki i té kontan l’ ? I ka di : « Jéova bay mo tousa mo té bézwen é menm plis ankò. Sa pèrmèt mo vin ankò pi sir ki mo pouvé fè li konfyans nèt. Anplis di sa, gras a so lèspri, mo kontinyé gen lajwa menm si sitiasyon-an té tris menm. Sa pèrmèt mo wè ki, pi mo té ké travay ansanm ké li, pi i té ké montré mo so bonté. Donk, mo divini pyonyé pèrmanan pannan mo té lajòl toujou. »

A POU TO VIN PI PRÒCH DI TO BONDJÉ KI KONTAN TO BOKOU

19. a) Si nou sir ki Jéova kontan nou, di kisa nou ké palé annan nou lapriyè ? b) Ki vèrsé ki ka palé di lanmou Jéova ka touché to èspésyalman ? (gadé karé-a «  Plizyèr vèrsé ki ka pèrmèt nou santi ki Jéova kontan nou bokou »).

¹⁹ Sa ki rivé David, Claire, Rachel, Susi ké Tassos ka montré ki Jéova, ‘Bondjé-a ki plen ké lanmou’, la ké so sèrvitèr-ya (2 Cor. 13:11). I ka gadé pou nou chak. Nou sir ki i ka ‘antouré nou ké so lanmou fidèl’ (Ps. 32:10). Pi nou ké réfléchi asou fason i ka montré nou so lanmou, pi nou ké randé nou kò kont ki i ka aji annan nou lavi, é pi nou ké vin ankò pi pròch di li. Annou pa pè priyè l’ é annou di li kouman nou bézwen so lanmou. Annou di li tousa ki ka fè nou enkyèt, toupannan nou sir ki i ka konprann nou é ki i toujou paré pou idé nou (Ps. 145:18, 19).

20. Poukisa lanmou Jéova gen pou nou ka fè nou vini òbò li ?

²⁰ Menm fason chalò roun difé chwit lò i ka fè frèt, lanmou Jéova gen pou nou ka fè nou vini òbò li. So lanmou fò, mé i dous osi. Donk, pran plézi rousanti lanmou i ka montré to. Épi, kou i kontan to, pa pè di osi ké tout to tchò : « Mo kontan Jéova » ! (Ps. 116:1).