ARTIK POU ÉTIDYÉ 5
KANTIK 108 L’amour fidèle de Dieu
Bénédiksyon nou ka jwenn pas Jéova kontan nou
« Jézi Kris vini annan monn-an pou sové moun ki ka fè péché » (1 TIM. 1:15).
SA NOU KÉ ANPRANN
Nou ké wè ki bénédiksyon nou ka jwenn grasa ranson-an é kouman nou pouvé montré Jéova nou rékonésans pou sa bèl kado-a.
1. Kisa nou pouvé fè pou fè tchò Jéova kontan ?
IMAJINÉ to ka bay roun moun roun bèl kado, roun kado ki ké itil pou li. To pa té ké kontan wè moun-an yenki mété to kado annan roun kwen épi bliyé l’ ! Parkont, si i ka sèrvi to kado é si i ka montré to so rékonésans pou sa kado-a, sa ké fè to plézi. Kisa sa èkzanp-a ka anprann nou ? Jéova bay so Pitit pou nou. So tchò kontan lò nou ka montré nou rékonésans pou ranson-an é pou lanmou ki fè l’ bay nou sa bèl kado-a ! (Jean 3:16 ; Rom. 5:7, 8).
2. Kisa nou ké wè annan sa artik-a ?
2 Mé, ké tan-an, ranson-an pouvé gen mwens valò pou nou kousidiré nou té ka mété sa kado Bondjé bay nou-a annan roun kwen. Menmsi nou byen kontan gen l’, pitèt nou pa ké sonjé l’ ankò. Pou sa pa rivé nou, a pou nou chaché gen toujou plis rékonésans pou sa Jéova ké Jézi fè pou nou. A sa sa artik-a ké idé nou fè. Nou ké wè ki bénédiksyon nou ka jwenn grasa ranson-an dipi jòdla é ki bénédiksyon nou ké jwenn titalò. Nou ké wè osi kouman nou pouvé montré nou rékonésans pou lanmou Jéova èspésyalman pannan lépòk Mémoryal-a.
BÉNÉDIKSYON NOU KA JWENN DIPI JÒDLA GRASA RANSON-AN
3. Bay roun bénédiksyon nou ka jwenn jòdla grasa ranson-an.
3 Nou ka jwenn bénédiksyon dipi jòdla grasa sakrifis Jézi. Parèkzanp, grasa ranson-an, Jéova ka pardonnen nou péché. I pa blijé fè l’. Mé a sa i lé fè. David ékri roun psaume pou montré Jéova so rékonésans. Men sa i di annan sa chanté-a : « Pas to, o Jéova, to sa roun Bondjé ki bon é ki paré pou pardonnen » (Ps. 86:5 ; 103:3, 10-13).
4. Pou kimoun Jéova bay ranson-an ? (Luc 5:32 ; 1 Timothée 1:15).
4 Sèrten moun ka pansé ki yé pa mérité Jéova pardonnen yé. Mé pou byen di, pyès moun pa mérité sa. Apot Pòl té ka konprann ki i ‘pa té ka menm mérité yé aplé l’ apot’. Magré sa, i di : « Mo divini moun-an mo sa jòdla grasa favèr Bondjé mo pa mérité-a » (1 Cor. 15:9, 10). Lò nou ka répanti, Jéova ka pardonnen nou. Poukisa ? I pa ka fè l’ pas nou mérité l’, mé pas i kontan nou. Si to tris pas to ka pansé ki to pa mérité Jéova pardonnen to, sonjé ki i pa bay ranson-an pou moun ki parfè. I bay ranson-an pou moun ki pa parfè é ki ka répanti (li Luc 5:32 ; 1 Timothée 1:15).
5. Ès Jéova blijé pardonnen nou ? Èspliké.
5 Menmsi sa ka fè roun patché lannen nou ka adoré Jéova, nou pa janmen divèt pansé ki nou mérité i pran pityé pou nou é i pardonnen nou. Jéova ka sonjé tousa nou ka fè pou li, a vré (Héb. 6:10). Mé ranson-an, a roun kado, a pa péyé i ka péyé nou pou sa nou fè pou li. Si dapré nou, nou mérité i pardonnen nou pas nou fè roun patché bagaj pou li, a kousidiré nou té ka di ki nou pa bézwen ranson-an é ki Jézi mouri pou bon tchò (gadé Galates 2:21).
6. Poukisa Pòl travay rèd pou Jéova ?
6 Pòl té savé ki menmsi i té ka fè rounlo ké roun patché bagaj pou Jéova, Jéova pa té blijé pardonnen l’. Atò, poukisa i travay rèd pou li ? I pa fè l’ pas i té lé montré ki i té mérité Jéova pardonnen l’, i fè l’ pas i té lé montré so rékonésans (Éph. 3:7). Kou Pòl, annou kontinyé travay rèd pou Jéova ké balan, mé a pa pou nou fè l’ kousidiré sa té ké pèrmèt nou mérité Jéova pardonnen nou. Annou fè l’ pou montré nou gen rékonésans.
7. Ki ròt bénédiksyon nou ka jwenn dipi jòdla grasa ranson-an ? (Romains 5:1 ; Jacques 2:23).
7 Ki ròt bénédiksyon nou ka jwenn dipi jòdla grasa ranson-an ? Grasa sakrifis Jézi, nou pouvé gen roun lanmityé ki fò ké Jéova a. Kou nou wè l’ annan ròt artik-a, lò nou ka fèt, nou pa ka fè parti di fanmi Bondjé. Mé grasa ranson-an, nou pouvé « viv annan lapè ké [li] » é vin pi pròch ké li (li Romains 5:1 ; Jacques 2:23).
8. Poukisa nou divèt di Jéova mèrsi pou kado i fè nou-a, lapriyè ?
8 Kou Jéova sa nou zanmi, nou gen roun bèl lònò : nou pouvé priyè l’. Jéova ka kouté lapriyè so sèrvitèr-ya ka fè douvan tout moun, mé i ka kouté nou chak lò nou ka priyè lò nou tousèl osi. Lapriyè ka idé nou rété kalm épi gen lapè annan nou tchò, mé a pa sèl bagaj i ka fè. Lò nou ka priyè, sa pouvé fè nou lanmityé ké Jéova vin pi fò osi (Ps. 65:2 ; Jacq. 4:8 ; 1 Jean 5:14). Lò Jézi té asou latè, i té ka priyè souvan pas i té savé ki so Papa té ka kouté l’ é ki sa té ka pèrmèt li gardé roun bon lanmityé ké li (Luc 5:16). Nou tchò plen ké rékonésans pas grasa ranson-an Jéova ka pèrmèt nou divini so zanmi é nou jis pouvé priyè pou palé ké li !
BÉNÉDIKSYON NOU KÉ JWENN TITALÒ GRASA RANSON-AN
9. Ki bénédiksyon sa-ya ki ka adoré Jéova ké fidélité ké trapé titalò grasa ranson-an ?
9 Ki bénédiksyon sa-ya ki ka adoré Jéova ké fidélité ké trapé titalò grasa ranson-an ? Yé ké gen lavi pou tout-tan. Bokou moun ka pansé ki nou pa pouvé viv pou tout-tan pas dipi nanninannan moun ka mouri. Mé dapré sa Jéova té prévwè, moun té divèt viv pou tout-tan. Si Adan pa té péché, pyès moun pa té ké jen pansé ki nou pa pouvé viv pou tout-tan. É menmsi jòdla sa rèd pou nou imajiné nou kò ka viv pou tout-tan, nou pouvé krè sa pas Jéova péyé pri-a pou pèrmèt nou viv pou tout-tan. I bay lavi so pròp Pitit (Rom. 8:32).
10. Kisa krétyen wen-yan ké ròt brébi-ya présé wè ?
10 Menmsi Jéova ké bay nou lavi pou tout-tan titalò, i lé nou pran plézi réfléchi asou sa dipi aprézan. Krétyen wen-yan ké gen roun bèl lavi annan syèl-a é yé ké dirijé latè-a ké Jézi (Rév. 20:6). Ròt brébi-ya ké viv asou latè-a koté i pa ké gen ni doulò ni chagren ankò (Rév. 21:3, 4). Ès to ka fè parti di sa-ya ki gen èspwar viv pou tout-tan asou latè-a ? Sa rékonpans-a pa gen mwens valò pasé rékonpans sa-ya ki k’alé annan syèl-a ! Jéova fè nou pou nou viv pou tout-tan asou latè-a. Atò, nou ké kontan sa lavi-a toubonnman !
11-12. Ki bénédiksyon nou ké jwenn annan paradi-a nou présé wè ? (gadé zimaj-ya osi).
11 Imajiné tousa to ké pouvé fè annan paradi-a. To pa ké bézwen pè ni maladi ni lanmò ankò (Is. 25:8 ; 33:24). É Jéova ké bay to tout bon bagaj to lé. Kisa to té ké kontan anprann ? Ès to té ké lé anprann plis bagaj asou zannimo-ya ? Ès to té ké lé anprann jwé lanmizik ? Ès to té ké lé anprann désiné ? Annan paradi-a, nou ké bézwen moun ki konnèt désiné ké konstrwi kaz é nou ké bézwen moun pou fè manjé, pou fè zouti é pou planté (Is. 35:1 ; 65:21). Kou to ké viv pou tout-tan, to ké gen tan anprann fè tousa to lé.
12 Anplis di sa, a pa ti kontan nou ké kontan rousouvwè sa-ya ki ké résisité ! (Actes 24:15). Nou ké kontan anprann plis bagaj asou Jéova grasa tout bèl bagaj i kréyé ! (Ps. 104:24 ; Is. 11:9). É pi enpòrtan ankò, nou pa ké janmen péché ankò. Donk, nou ké pouvé adoré Jéova san nou pa janmen bézwen doumandé li pardon ankò ! Ès to té ké paré pédi lavi annan paradi-a pou profité « roun ti moman [di] plézi péché-a ka bay » ? (Héb. 11:25). Awa ! Tout sakrifis to pouvé fè jòdla pa anyen òbò tout sa bénédiksyon-yan. Pa bliyé, paradi-a, a pa roun bagaj nou ké divèt antann pou tout-tan. Roun jou i ké la, douvan nou wéy. É tousa ké fèt paské lanmou Jéova gen pou nou fè li bay nou so Pitit !
Annan bénédiksyon nou ké jwenn annan paradi-a, kilakèl to présé wè ? (gadé paragraf 11-12).
MONTRÉ TO RÉKONÉSANS POU LANMOU JÉOVA
13. Kouman nou pouvé montré nou rékonésans pou lanmou Jéova ? (2 Corinthiens 6:1).
13 Kouman nou pouvé montré nou rékonésans pou ranson Jéova bay nou-a ? Lò nou ka mété l’ an prémyé annan nou lavi (Mat. 6:33). Annou pa bliyé ki Jézi mouri « pou sa-ya ki ka viv pa viv pou yé menm ankò, mé pou yé viv pou sa-la ki mouri pou yé é ki résisité » (2 Cor. 5:15). Ké bonté, Jéova pardonnen nou. Lò nou ka fè tousa nou pouvé pou sèrvi l’, nou ka montré ki nou ka konprann tousa i fè pou nou é ki nou gen rékonésans pou sa (li 2 Corinthiens 6:1).
14. Kouman nou pouvé montré ki nou ka fè Jéova konfyans ?
14 Rounòt fason nou pouvé montré nou rékonésans pou lanmou Jéova, a lò nou ka fè l’ konfyans é lò nou ka kouté konsèy i ka bay nou. Lò nou gen roun désizyon pou pran, parèkzanp, ès nou ké fè gran lékòl ouben ki kalité travay nou ké pran, annou doumandé nou kò sa i lé nou fè (1 Cor. 10:31 ; 2 Cor. 5:7). Lò a lafwa ka fè nou pran roun désizyon, nou lafwa ké nou lanmityé ké Jéova ka vin pi fò. É nou ankò pi sir ki sa nou ka antann pou dimen ké fèt (Rom. 5:3-5 ; Jacq. 2:21, 22).
15. Kouman nou pouvé montré Jéova nou rékonésans pannan lépòk Mémoryal-a ?
15 I gen rounòt bagaj ankò nou pouvé fè pou montré nou rékonésans pou lanmou Jéova. Nou pouvé profité di lépòk Mémoryal-a pou montré li tout rékonésans nou gen pou ranson-an. Annou fè tousa nou pouvé pou nou la sa jou-a, mé anplis di sa, annou envité tout moun vini (1 Tim. 2:4). Annou èspliké yé kouman Mémoryal-a ké fèt. Plizyèr vidéyo pouvé idé nou. Parèkzanp, vidéyo Poukisa Jézi mouri ? ké Sonjé sakrifis Jézi asou jw.org. Ansyen-yan yé menm ké fè tousa yé pouvé pou envité frè ké sò-ya ki pa ka vini annan nou réinyon ankò. Imajiné lajwa i ké gen annan syèl-a ké asou latè-a si sèrten annan sa brébi-ya ki pédi anvi rouvin annan troupo Jéova-a ! (Luc 15:4-7). Jou Mémoryal-a, annou di tout moun bonjou kou nou gen labitid fè l’, mé annou gadé èspésyalman pou sa-ya ki ka vini pou prémyé fwa-a ouben pou sa-ya sa ka fè lontan yé pa vini annan nou réinyon. Nou lé yé santi ki nou kontan wè yé ! (Rom. 12:13).
16. Poukisa a roun bon bagaj si to ka prévwè préché plis pannan lépòk Mémoryal-a ?
16 Ès to pouvé préché plis pannan lépòk Mémoryal-a ? A roun bon fason pou nou montré nou rékonésans pou sa Jéova ké Jézi fè pou nou. Pi nou ké préché, pi nou ké wè Jéova idé nou é pi nou ké fè l’ konfyans (1 Cor. 3:9). Pran tan byen li vèrsé-ya yé prévwè pou nou li pannan lépòk Mémoryal-a. To ké trapé program ké vèrsé-ya annan ti liv Annou byen gadé Ékritir-ya chak jou ouben annan Kayé lavi ké sèrvis-a. To ké menm pouvé fè réchèrch asou sa vèrsé-ya lò to ké étidyé to rounso.
17. Kisa Jéova kontan ? (gadé karé-a osi : « Kouman to pouvé montré to rékonésans pou lanmou Jéova-a »).
17 Pitèt to pa ké pouvé fè tousa yé ka propozé to fè annan sa artik-a. Mé pa bliyé ki Jéova pa ka konparé sa to ka fè ké sa ròt-ya ka fè. I ka wè sa to gen ofon to tchò. É i kontan lò i ka wè ki to gen bokou rékonésans pou so bèl kado, ranson-an (1 Sam. 16:7 ; Marc 12:41-44).
18. Poukisa nou gen rékonésans pou Jéova ké Jézi ?
18 A grasa ranson-an si Jéova pouvé pardonnen nou péché, si nou pouvé gen roun lanmityé ké li é si nou gen èspwar viv pou tout-tan. Atò, annou toujou montré nou rékonésans pou lanmou Jéova. A sa lanmou-a ki fè l’ bay nou tout sa bénédiksyon-yan ! É annou toujou montré nou rékonésans pou lanmou Jézi. I té tèlman kontan nou ki i bay so lavi pou nou ! (Jean 15:13 ; 1 Jean 4:19).
KANTIK 154 L’amour ne disparaît jamais
