ARTIK POU ÉTIDYÉ 3
KANTIK 35 « Annou konprann ki bagaj ki pi enpòrtan »
Pran désizyon ki ka fè Jéova plézi
« Krenn Jéova, a koumansman sajès-a, é konnèt Sa-la ki Pi-Sen-an, men sa ki entélijans-a » (PROV. 9:10).
SA NOU KÉ ANPRANN
Nou ké wè ki lò nou gen konésans ké entélijans é lò nou ka pran tan byen réfléchi, sa ka idé nou pran bon désizyon.
1. Kisa nou tout gen pou fè ?
NOU GEN désizyon pou nou pran touléjou. Roun ran désizyon fasil pou pran. Parèkzanp, nou pa ka réfléchi lontan pou désidé ki tchenbétchò nou ké pran ouben ki lèr nou ké alé dronmi. Mé i gen ròt désizyon ki pi difisil pou pran. Parèkzanp, lò a nou lasanté, nou fanmi ké nou zanmi, sa ki pouvé fè nou tchò kontan ouben fason nou ka adoré Jéova. Nou lé pran désizyon ki ké bon pou nou ké nou fanmi. Mé pi enpòrtan-an, nou lé nou désizyon fè Jéova plézi (Rom. 12:1, 2).
2. Kisa to divèt fè pou to pran bon désizyon ?
2 To ké gen plis chans pran bon désizyon 1) si to ka chaché gen tout enfòrmasyon to bézwen, 2) si to ka chaché savé sa Jéova ka di asou sa é 3) si to ka réfléchi pou wè sa ki bon ké sa ki pa bon annan chak désizyon. Annan sa artik-a, nou ké wè sa trwa bagaj-ya é nou ké wè kouman nou pouvé anprann réfléchi pi byen (Héb. 5:14).
CHACHÉ GEN TOUT ENFÒRMASYON TO BÉZWEN
3. Bay roun èkzanp ki ka montré poukisa to divèt chaché gen tout enfòrmasyon to bézwen anvan to pran roun désizyon.
3 Pou pran roun bon désizyon, prémyé bagaj nou divèt fè, a chaché gen tout enfòrmasyon nou bézwen. Poukisa sa enpòrtan ? Annou pran roun èkzanp : Roun moun gen roun gro problèm santé é i k’alé wè roun dòktèr. Ès dòktèr-a ké di li ki rémèd pou i pran san i pa menm ni gadé li ni pozé li pyès késyon ? Awa. I pa ké jen fè sa. To menm osi, to ké pran pi bon désizyon si to ka chaché savé tousa to bézwen savé parapòrta désizyon to gen pou pran-an. Kouman to pouvé fè sa ?
4. Dapré Proverbes 18:13, kouman to pouvé rivé gen enfòrmasyon to bézwen ? (gadé zimaj-a osi).
4 Souvan, nou pouvé rivé gen enfòrmasyon nou bézwen lò nou ka pozé késyon. Imajiné yé ka envité to annan roun lafèt. Ès to divèt ouben ès to pa divèt alé ? Si to pa konnèt moun-an ki ka òrganizé sa lafèt-a é si to pa savé a ki kalité lafèt, asiré, to ké divèt pozé li déztrwa késyon. Parèkzanp : « Ki koté sa lafèt-a ké fèt ? Konmyen moun i ké gen ? Ès i ké gen roun moun pou gadé si tout bagaj ka byen pasé ? Kimoun ki ké la ? Ki bagaj yé prévwè fè pannan sa lafèt-a ? Ès i ké gen alkòl ? » Lò yé ké réponn to, to ké pouvé pran roun bon désizyon (li Proverbes 18:13).
Pozé késyon pou to trapé tout enfòrmasyon to bézwen a (gadé paragraf 4).
5. Lò to gen tout enfòrmasyon to bézwen, kisa to divèt fè ?
5 Aprézan to gen tout enfòrmasyon to bézwen, a pou to pran tan réfléchi asou sa. Parèkzanp, kisa to ké fè si to ka anprann ki, annan sa lafèt-a, i ké gen moun ki pa ka rèspèkté sa Jéova ka di asou sa ki bon ké sa ki pa bon ouben to ka anprann ki i ké gen alkòl, mé ki pyès moun pa ké véyé pou wè si moun pa ka bwè tròp ? Ès mové bagaj pouvé rivé pannan sa lafèt-a ? (1 Pierre 4:3). Épi, kisa to ké fè si sa lafèt-a ka fèt menm jou to divèt alé annan to réinyon ouben si i ké anpéché to alé préché kou to gen labitid fè l’ ? Lò to ké réfléchi asou tout sa bagaj-ya, sa ké pi fasil pou to pran roun bon désizyon. Mé sa pa asé. To savé sa to ka pansé di sitiasyon-an, mé kisa Jéova li menm ka pansé di sa ? (Prov. 2:6).
CHACHÉ SAVÉ SA JÉOVA KA PANSÉ
6. Dapré Jacques 1:5, poukisa nou divèt priyè pou nou doumandé Jéova idé nou ?
6 Doumandé Jéova idé to konprann sa i ka pansé di sitiasyon-an. Jéova ka promèt bay nou sajès nou bézwen pou nou savé si roun désizyon ké fè l’ plézi. I ka bay sa sajès-a « san konté é i pa ka fè pyès répròch » (li Jacques 1:5).
7. Kouman to pouvé savé sa Jéova ka pansé di roun bagaj ? Bay roun èkzanp.
7 Lò to doumandé Jéova gidé to, chaché wè kouman i ka réponn to. Imajiné to an vakans annan roun péyi to pa konnèt é to ka pédi to chimen. To ka doumandé roun moun di sa koté-a idé to. Ès to ké pati anvan i réponn to ? Non, to pa ké fè sa. To ké byen kouté sa i ka di to. Menm fason-an, lò to doumandé Jéova bay to sajès, éséyé konnèt so répons. Chaché prensip-ya annan Labib ki k’alé ké to sitiasyon. Parèkzanp, anvan to désidé si to ké alé annan roun lafèt, to pouvé gadé sa Labib ka di asou lafèt koté yé ka fè yenki bagaj malpròp, mové frékantasyon é poukisa sa pi enpòrtan to soutni Rwayonm-an pasé to fè to kò plézi (Mat. 6:33 ; Rom. 13:13 ; 1 Cor. 15:33).
8. Kisa to pouvé fè si to bézwen yé idé to trapé prensip-ya ki k’alé ké to sitiasyon ? (gadé zimaj-a osi).
8 Détan, to ké pitèt bézwen yé idé to trapé prensip-ya ki k’alé ké to sitiasyon. To pouvé doumandé roun frè ouben roun sò ki gen èspéryans bay to konsèy. Mé sa ki ké idé to osi, a fè déztrwa réchèrch. To ké pouvé trapé roun patché enfòrmasyon grasa zouti pou fè réchèrch kou Guide de recherche pour les Témoins de Jéhovah-a ké liv Versets pour la vie chrétienne-an. É pa bliyé ki sa to lé, a pran roun désizyon ki ké fè Jéova plézi.
Chaché savé sa Jéova ka pansé b (gadé paragraf 8).
9. Kouman nou pouvé sir ki nou désizyon ké fè Jéova plézi ? (Éphésiens 5:17).
9 Kouman nou pouvé sir ki nou désizyon ké fè Jéova plézi ? Pou koumansé, nou divèt byen konnèt li. Labib ka di : « Konnèt Sa-la ki Pi-Sen-an, men sa ki entélijans-a » (Prov. 9:10). Pou nou gen entélijans, sa lé di, pou nou byen konprann bagaj-ya, nou divèt byen konnèt kalité Jéova gen, sa i prévwè fè, sa i kontan ké sa i rayi. Doumandé to kò : « Parapòrta sa mo konnèt asou Jéova, ès sa désizyon-an ké fè l’ plézi ? » (li Éphésiens 5:17).
10. Poukisa prensip-ya ki annan Labib pi enpòrtan pasé tradisyon nou fanmi ouben kiltir nou péyi ?
10 Détan, pou nou fè Jéova plézi, nou divèt fè nou fanmi ouben nou zanmi lapenn. Parèkzanp, roun papa ké roun manman ki lé sa ki miyò pou yé tifi, pouvé mété présyon asou l’ pou i maryé ké roun frè ki gen bokou soumaké é ki ké pouvé menm okipé di yé, menmsi sa frè-a pa djòk annan domenn èspirityèl-a. Yé lé yé tifi gen tousa i bézwen pou viv, sa nòrmal. Mé, kimoun ki ké idé l’ fè so lanmityé ké Jéova vin pi fò ? Kouman Jéova ka wè sa ? Nou ka jwenn répons-a annan Matthieu 6:33. Annan sa vèrsé-a, Jézi ka ankourajé krétyen-yan « chaché Rwayonm-an […] an prémyé ». Menmsi krétyen-yan ka bay yé papa ké yé manman lònò é menmsi yé ka rèspèkté moun di yé koté, sa ki pi enpòrtan pou yé, a fè Jéova plézi.
RÉFLÉCHI POU WÈ SA KI BON KÉ SA KI PA BON ANNAN CHAK DÉSIZYON
11. Dapré Hébreux 5:14, si to ka byen réfléchi, kisa to ké pouvé fè ?
11 Aprézan to savé ki prensip to bézwen pou to pran to désizyon, réfléchi asou sa to pouvé fè (li Hébreux 5:14). Lò to ka pran tan byen réfléchi, sa ka idé to wè sa chak désizyon pouvé bay. A pa tout tan sa ké fasil pou to pran to désizyon. Mé si to ka pran tan byen réfléchi, sa ké idé to pran bon désizyon, menm annan sitiasyon ki rèd.
12-13. Si to ka pran tan byen réfléchi lò to ka chaché roun travay, kouman sa ké idé to pran roun bon désizyon ?
12 Imajiné sa sitiasyon-an : To ka chaché roun travay ki ké pèrmèt to bay to fanmi sa i bézwen pou viv. To ka trapé dé travay. Donk, to ka pran tan byen gadé yé chak pou wè kilès to ké pran. To ka doumandé to kò : « A ki kalité travay ? Konmyen tan mo ké travay annan simenn-an ? Konmyen tan mo ké bézwen pou mo alé annan travay-a ? » Sa dé travay-ya k’alé ké prensip-ya ki annan Labib. Pitèt to ké pran roun annan yé paské a roun travay to kontan fè ouben akoz di soumaké-a. Mé i gen ròt bagaj pou to gadé anvan to pran to désizyon.
13 Parèkzanp, ès sa travay-ya ké pèrmèt to alé annan réinyon to asanblé ? Ès to ké gen asé tan toujou pou to idé chak moun annan to fanmi pou yé santi yé kò an sékirité, pou yé tchò kontan é pou yé pròch di Jéova ? Si to ka pozé to kò sa kalité késyon-yan, sa ké idé to mété « bagaj ki pi enpòrtan », sa lé di to sèrvis pou Jéova é sa to fanmi bézwen, anvan soumaké (Phil. 1:10). Donk, to ké pouvé pran roun désizyon Jéova ké béni.
14. Si nou ka pran tan byen réfléchi é si nou kontan nou konpanyen, kisa nou ké fè ?
14 Lò nou ka pran tan byen réfléchi, sa ka idé nou sonjé osi sa nou désizyon pouvé fè ròt-ya. Nou pa lé « fè pyès moun tonbé » (Phil. 1:10). Sa enpòrtan pou nou swiv sa prensip-a lò nou ka pran nou désizyon. Parèkzanp, parapòrta fason nou ka abiyé ké penyen ké fason nou ka ranjé nou kò. Pitèt i gen bagaj nou kontan, mé ès sa bagaj-ya pouvé choké nou frè ké nou sò ouben moun ki pa Témwen ? Si nou ka byen réfléchi, sa ké idé nou rèspèkté sa yé ka rousanti. É, paské nou kontan nou konpanyen, nou ké chaché sa ki pi bon « pou ròt-a » épi nou ké rékonnèt nou limit (1 Cor. 10:23, 24, 32 ; 1 Tim. 2:9, 10). Atò, nou ké pran roun désizyon ki ka montré ki nou kontan ròt-ya é ki nou ka rèspèkté yé.
15. Ki konsèy pouvé itil pou nou lò nou gen pou pran roun désizyon ki enpòrtan ?
15 Si to gen pou pran roun désizyon ki enpòrtan, sonjé sa to ké divèt fè parapòrta sa désizyon-an. Jézi anprann nou « kalkilé konmyen soumaké [roun projè] ké kouté » nou (Luc 14:28). Pou kouté konsèy Jézi, chaché wè ki kantité éfòr to ké divèt fè épi konmyen tan ké ki kantité soumaké to ké bézwen pou fè sa to désidé fè-a. Détan, to ké divèt palé ké to fanmi pou wè kouman chak moun ké divèt soutni désizyon to pran-an. Poukisa sa konsèy-ya bon ? Si to ka swiv sa konsèy-ya, pitèt to ké wè ki to bézwen chanjé déztrwa bagaj annan sa to désidé fè-a ouben ki to divèt pran rounòt désizyon. É si to ka palé ké to fanmi é si to ka kouté sa i ka di to, to fanmi ké pi anvi travay ansanm ké to pou sa to désidé fè-a byen maché (Prov. 15:22).
PRAN ROUN DÉSIZYON KI KÉ MENNEN BON BAGAJ
16. Ki konsèy ké idé to pran roun désizyon ki ké mennen bon bagaj ? (gadé karé-a osi : « Kouman to pouvé pran bon désizyon »).
16 Ès to swiv konsèy nou fin wè-ya ? Ès to chaché tout enfòrmasyon to bézwen ? Ès to tchenbé kont di prensip-ya ki pouvé idé to pran roun désizyon ki ka fè Jéova plézi ? Si a sa, to paré pou pran to désizyon. É to pouvé doumandé Jéova idé to pou sa désizyon-an mennen bon bagaj.
17. Kouman to pouvé pran roun bon désizyon ?
17 Menmsi to ja pran désizyon ki mennen bon bagaj, pa bliyé ki, pou to pran roun bon désizyon, to divèt konté asou sajès Jéova-a pasé to konté asou to entélijans ké to èspéryans. A Jéova rounso ki pouvé bay to vré konésans-a ké vré entélijans-a épi idé to byen réfléchi pou wè sa chak désizyon pouvé bay, é a sa ki sajès-a (Prov. 2:1-5). Wi, i pouvé idé to pran désizyon ki ka fè l’ plézi ! (Ps. 23:2, 3).
KANTIK 28 Jéova, a kimoun to zanmi ?
