ARTIK POU ÉTIDYÉ 2
KANTIK 132 Aprézan, nou ka fè rounsèl
Zòt wonm maryé, bay zòt madanm lònò
« Zòt wonm maryé, […] a pou zòt bay yé lònò » (1 PIERRE 3:7).
SA NOU KÉ ANPRANN
Nou ké wè kouman roun mari pouvé montré ki i kontan é ki i ka rèspèkté so madanm annan sa i ka di ké sa i ka fè.
1. Poukisa Jéova kréyé maryaj-a ?
JÉOVA, a « Bondjé ki éré-a », é i lé nou tchò kontan nou menm osi (1 Tim. 1:11). Pou nou lavi pi bèl, i bay nou plizyèr kado (Jacq. 1:17). Roun annan sa kado-ya, a maryaj-a. Lò roun mouché ké roun madanm ka maryé, yé ka promèt kontan ké rèspèkté yé konpanyen. Lò yé ka fè tousa yé pouvé pou yé lanmou rété fò, yé tchò kontan toubonnman (Prov. 5:18).
2. Poukisa roun patché maryaj pa ka maché jòdla ?
2 Malérèzman, roun patché mouché ké madanm pa ka rèspèkté promès yé fè jou yé maryé. Kisa sa ka bay ? Yé tchò pa kontan. Dapré réchèrch plizyèr èspésyalis fè i pa gen lontan, roun patché mouché ka bat yé madanm, yé ka palé rèd ké yé ouben yé ka malmennen yé di ròt fason ankò. Sèrten mari janti ké yé madanm douvan tout moun, mé lò yé lakaz, yé méchan ké yé. É roun patché mari ka gadé pòrnografi é akoz di sa, yé maryaj ka pran dlo.
3. Poukisa sèrten mari ka malmennen yé madanm ?
3 Poukisa sèrten mari ka malmennen yé madanm ? Pitèt yé papa té vyolan é jòdla, yé ka pansé ki sa nòrmal di malmennen yé madanm. Ròt mouché ka malmennen yé madanm paské a sa près tout mouché-ya annan yé kiltir ka fè. Sa mouché-ya ka krè ki a pou yé rèd ké yé madanm pou fè yé savé ki a yé ka koumandé. Pitèt yé pa anprann kontrolé yé kò lò yé ka kòlè. Sèrten mouché ka gadé pòrnografi é akoz di sa, yé ka pansé ki madanm-yan la yenki pou kouché ké yé. Anplis di sa, plizyèr èspésyalis wè ki sitiasyon-an vin pi mové akoz di pandémi Covid-19-a. Mé kèlkéswa so sitiasyon, roun mari pa janmen gen rézon di malmennen so madanm.
4. Kisa mari-ya divèt panga, é poukisa ?
4 Mari-ya divèt panga wè madanm-yan kou monn-an ka wè yé a. Poukisa ? Pas sa roun moun ka mété annan so lidé a sa i ka fè apré. Apot Pòl avèrti krétyen wen-yan ki té ka rété Ròm. I di yé « pa lésé monn-an fòrmé » yé (Rom. 12:1, 2). Sa té ka fè roun ti moman asanblé Ròm té fèt lò Pòl ékri yé. Mé sa apot-a di ka fè nou konprann ki sèrten annan sa asanblé-a té ka réfléchi kou monn-an toujou. A pou sa Pòl di yé chanjé fason yé té ka réfléchi ké aji. Jòdla osi, mari-ya divèt kouté sa konsèy-a. Malérèzman, sèrten annan yé ka lésé monn-an détenn asou yé é yé ka malmennen yé madanm b. Kouman Jéova lé mari-ya trété yé madanm ? Vèrsé sa artik ka apiyé asou-a ka réponn sa késyon-an.
5. Dapré 1 Pierre 3:7, kouman mari-ya divèt aji ké yé madanm ?
5 (Li 1 Pierre 3:7.) Jéova ka bay mari-ya lòrd bay yé madanm lònò. Lò to ka bay roun moun lònò, to ka montré ki to ka rèspèkté l’. Donk, roun mari divèt janti ké so madanm é aji ké li ké lanmou. Annan sa artik-a, nou ké wè kouman roun mari ka montré ki i ka rèspèkté é ki i kontan so madanm. Mé anvan sa, nou ké wè déztrwa bagaj roun mari pa janmen divèt fè ké so madanm.
PA FÈ ANYEN KI POUVÉ FÈ TO MADANM LAPENN
6. Kouman Jéova ka wè roun mari ki ka bat so madanm ? (Colossiens 3:19).
6 Roun mari pa divèt bat so madanm. Jéova rayi moun ki vyolan (Ps. 11:5). Lò roun mari ka malmennen so madanm, i pa kontan sa menm (Mal. 2:16 ; li Colossiens 3:19). Kou 1 Pierre 3:7 ka di, lò roun mari pa ka trété so madanm kou i divèt fè l’, so lanmityé ké Bondjé ka pran roun tap. Pitèt Jéova pa menm ka kouté so lapriyè.
7. Ki kalité bagaj roun mari pa divèt fè ? (Éphésiens 4:31, 32 ; gadé osi nòt « Pou byen konprann »).
7 Roun mari pa divèt palé rèd ké so madanm. Sèrten mari ka rélé asou yé madanm é yé ka di bagaj ki ka fè l’ mal. Mé Jéova rayi « tout kalité […] kòlè, rélé ké jouré c » (li Éphésiens 4:31, 32). I ka tandé tout bagaj. Fason roun mouché ka palé ké so madanm menm ofon kaz-a enpòrtan pou li. Lò roun mari ka palé rèd ké so madanm, a pa so maryaj sèlman i ka gaté, i ka gaté so lanmityé ké Jéova osi (Jacq. 1:26).
8. Kouman Jéova ka wè pòrnografi-a, é poukisa ?
8 Roun mari pa divèt gadé pòrnografi. Kouman Jéova ka wè pòrnografi-a ? I rayi sa. Donk, roun mouché ki ka gadé bagaj malpròp ka gaté so lanmityé ké Jéova é pa ka rèspèkté so madanm d. Jéova lé mari-ya fidèl ké yé madanm. Roun mari ki fidèl pa ka janmen tronpé so madanm. I pa ka menm sonjé fè roun bagaj konsa ! Jézi di ki roun mouché ki ka gadé rounòt madanm ké anvi ja fè roun adiltèr ké li « annan so tchò » e (Mat. 5:28, 29).
9. Détan, mouché-ya ka fòrsé yé madanm fè bagaj sèksyèl ki ka fè yé ronté. Poukisa Jéova rayi sa kalité konpòrtman-an ?
9 Roun mari pa divèt fòrsé so madanm fè bagaj i pa lé fè lò yé ka kouché ansanm. Sèrten mari ka fòrsé yé madanm fè bagaj sèksyèl ki ka fè l’ ronté é ki ka fè l’ santi so kò sal ouben ki ka fè l’ krè ki i pa kontan l’. Jéova rayi sa kalité konpòrtman-an paské sa ka montré ki mari-a ka gadé yenki pou so douvan lèstomak é ki i pa mélé ké so madanm. I lé mari-ya kontan yé madanm, i lé yé janti ké yé é i lé yé rèspèkté yé konsyans (Éph. 5:28, 29). Si roun mari ka fè so madanm ronté, ka malmennen l’ ouben ka gadé pòrnografi, kisa i divèt fè pou chanjé so mantalité ké so konpòrtman ?
KOUMAN ROUN MARI POUVÉ ARÉTÉ MALMENNEN SO MADANM
10. Kouman èkzanp Jézi pouvé idé mari-ya ?
10 Kisa ki pouvé idé roun mari arété malmennen so madanm ouben arété fè l’ ronté ? A pou i swiv èkzanp Jézi. Menmsi Jézi pa janmen maryé, fason i trété so disip sa roun bon èkzanp pou mari-ya (Éph. 5:25). Parèkzanp, annou wè kouman Jézi trété so apot, kouman i palé ké yé é sa sa ka anprann mari-ya.
11. Kouman Jézi trété so apot ?
11 Jézi té janti ké so apot. I té ka rèspèkté yé. I pa té méchan ké yé. Menmsi i té sa yé Sényèr ké yé Mèt, i pa jen sèrvi so fòrs pou fè yé konprann ki a li té ka koumandé. I té ka fè so kò toupiti, i té ka sèrvi yé (Jean 13:12-17). I di so disip : « Pran èkzanp asou mo, pas mo dous é mo pa ka fè gran larjò, é zòt ké trapé konsolasyon » (Mat. 11:28-30). Nou ka wè ki Jézi, a té roun moun ki té dous. Roun moun ki dous, a pa roun moun ki fèb. Okontrèr, si i ka rivé kontrolé so kò, a pas i fò. Lò yé ka provoké l’, i ka rété kalm é i ka kontrolé sa i ka rousanti.
12. Kouman Jézi té ka palé pou ròt-ya ?
12 Jézi té ka konsolé ké ankourajé ròt-ya ké sa i té ka di. I pa té ka palé rèd ké so disip (Luc 8:47, 48). Lò so lèlmi té ka jouré l’ é té ka provoké l’, « i pa té ka jouré yé » (1 Pierre 2:21-23). É détan, i té ka désidé fronmen so bouch pasé i palé rèd ké moun-yan (Mat. 27:12-14). Men roun bèl èkzanp pou mari-ya !
13. Dapré Matthieu 19:4-6, kouman roun mari pouvé « rété ké so madanm » ? (gadé zimaj-a osi).
13 Jézi doumandé mari-ya rété fidèl ké yé madanm. I répété sa so Papa di : roun mari divèt « rété ké so madanm » (li Matthieu 19:4-6). An grèk, annan sa vèrsé-a, lò yé ka di « rété ké » sa lé di « kolé ké ». Donk, lanmou roun mouché ké so madanm gen divèt tèlman fò ki a kousidiré yé kolé ké roun lakòl. Si roun ka fè ròt-a soufri, yé toulédé ké soufri. Roun mari ki kontan so madanm pa ka gadé pyès kalité pòrnografi. Lanmenm, i ka tounen so tèt pou so wéy pa gadé « sa ki pa vo anyen » (Ps. 119:37). Anfèt, i fè roun kontra ké so wéy : i byen désidé pa janmen gadé rounòt fanm ké anvi (Job 31:1).
Roun mari ki fidèl pa ka asèpté gadé pòrnografi g (gadé paragraf 13).
14. Kisa roun mari ki ka malmennen so madanm divèt fè pou i viré byen ni ké so madanm ni ké Jéova ?
14 Roun mari ki ka bat ouben ki ka rélé asou so madanm divèt swiv èkzanp Jézi. Mé anplis di sa, i divèt fè roun bagaj pou i viré byen ni ké so madanm ni ké Jéova. Ki bagaj i divèt fè ? Prémyèrman, a pou i konprann ki i gen roun problèm séryé é a pou i sonjé ki pyès moun pa pouvé séré anyen pou Jéova (Ps. 44:21 ; Eccl. 12:14 ; Héb. 4:13). Dézyèmman, a pou i arété malmennen so madanm épi chanjé konpòrtman (Prov. 28:13). Trwazyèmman, a pou i doumandé so madanm ké Jéova pardon é montré yé ki i vréman ka rigrété sa i fè (Actes 3:19). A pou i sipliyé Jéova osi pou i bay li anvi chanjé épi idé l’ réfléchi, palé ké aji roun fason ki ka fè l’ plézi (Ps. 51:10-12 ; 2 Cor. 10:5 ; Phil. 2:13). Katriyèmman, a pou i aji soulon sa i ka doumandé Jéova, a pou i rayi tout kalité vyolans ké tout kalité jouré (Ps. 97:10). Senkyèmman, a pou i alé wè ansyen-yan annan so asanblé vitman pou yé idé l’ (Jacq. 5:14-16). Sizyèmman, a pou i désidé sa i ké fè pou i pa viré tonbé annan sa mové konpòrtman-an ankò. Roun mari ki ka gadé pòrnografi divèt fè sa sis bagaj-ya osi. Jéova ké béni tout éfòr roun krétyen ki maryé ka fè pou i chanjé (Ps. 37:5). Mé sa krétyen-an divèt fè plis ki arété fè bagaj ki ka fè so madanm lapenn. A pou i anprann montré so madanm ki i kontan l’ é ki i ka rèspèkté l’ osi. Kouman i ké fè sa ?
KOUMAN TO POUVÉ MONTRÉ KI TO KONTAN É KI TO KA RÈSPÈKTÉ TO MADANM
15. Kouman roun mari pouvé montré ki i kontan so madanm ?
15 Montré l’ ki to kontan l’. Frè-ya yé maryaj ka byen maché, gen labitid montré yé madanm touléjou ki yé kontan l’ (1 Jean 3:18). Roun mari pouvé fè bagaj ki senp pou montré so madanm ki i kontan l’. Parèkzanp, i pouvé tchenbé so lanmen ouben kroké l’. I pouvé voyé li roun ti mésaj asou so pòrtab pou di li : « Mo fanm, mo kontan to » ouben pou doumandé l’ : « Ès tout bagaj k’alé pou to ? » Tanzantan, to pouvé bay li roun boutché flèr ouben bay li roun kado pou montré li ki to kontan l’. Roun mari ki ka fè sa ka montré ki i ka bay so madanm lònò é i ka fè so maryaj vin pi fò.
16. Poukisa roun mari divèt di so madanm sa i kontan koté li ?
16 Di li sa to kontan koté li. Roun mari ki ka rèspèkté é ki kontan so madanm ka ankourajé l’ é ka di li ki i gen valò pou li. I pa ka bliyé di li mèrsi pou tousa i ka fè pou soutni l’ (Col. 3:15). Lò roun mari ka di so madanm poukisa i kontan li, so madanm ka santi so kò an sékirité, i ka santi ki so mari kontan l’ é ki i ka bay li lònò (Prov. 31:28).
17. Kouman roun mari pouvé montré ki i ka rèspèkté so madanm ?
17 A pou to janti é a pou to rèspèkté l’. Roun mari ki kontan so madanm ka pran swen di li é ka montré l’ ki i gen valò pou li. I ka wè li kou roun bèl kado Jéova bay li (Prov. 18:22 ; 31:10). Donk, i janti ké li é i ka rèspèkté l’ menm lò i ka kouché ké li. I pa ka fòrsé l’ fè bagaj sèksyèl ki pouvé fè l’ ronté, ki pouvé fè l’ santi ki i la yenki pou kouché ké li ouben bagaj sèksyèl ki pa k’alé ké so konsyans f. Mari-a li menm osi divèt fè tousa i pouvé pou i kontinyé gen roun bon konsyans douvan Jéova (Actes 24:16).
18. Kisa mari-ya divèt byen désidé fè ? (gadé karé-a osi : « Kat fason roun mari pouvé montré ki i ka rèspèkté so madanm »).
18 Zòt wonm maryé, zòt pouvé sir ki Jéova ka wè é ki i kontan tout éfòr zòt ka fè pou zòt bay zòt madanm lònò annan tousa zòt ka di é tousa zòt ka fè. A pou zòt byen désidé bay li lònò : a pa pou zòt fè anyen ki pouvé fè l’ soufri. A pou zòt janti ké li, a pou zòt rèspèkté l’ é a pou zòt montré ki zòt kontan li. Konsa, zòt ké montré li ki i gen valò pou zòt. É lò zòt ka bay zòt madanm lònò, zòt ka protéjé pi bèl lanmityé zòt pouvé gen : zòt lanmityé ké Jéova (Ps. 25:14).
KANTIK 131 « Ce que Dieu a uni »
a Mari-ya divèt li artik « Ès to ka trété madanm-yan kou Jéova ka trété yé ? » annan Tourdégard janvyé 2024-a.
b Si to mari ka malmennen to, artik « De l’aide pour les victimes de violences conjugales » pouvé idé to. To pouvé trapé sa artik-a annan parti « Divers » asou jw.org ké JW Library®.
c POU BYEN KONPRANN : Dapré Labib, « jouré », a lò roun moun ka voyé vyé paròl pou fè ròt-a soufri é a lò i pa ka arété di ròt-a sa i pa kontan ké li. Donk, dipi roun mari ka di roun bagaj ki ka fè so madanm soufri, a jouré i ka jouré l’.
d Gadé artik « La pornographie peut briser votre couple » annan parti « De l’aide pour les familles » asou jw.org ouben JW Library.
e Si so mari ka gadé pòrnografi, roun madanm pouvé li artik « Si to mouché ouben to madanm ka gadé pòrnografi » annan Tourdégard out 2023-a.
f Labib pa ka di sa ki pròp ké sa ki pa pròp lò roun mouché ka kouché ké so madanm. Krétyen-yan ki maryé divèt désidé sa yé ké fè pou montré ki yé lé bay Jéova lònò, ki yé lé fè yé konpanyen plézi épi kontinyé gen roun bon konsyans. An jénéral, yé pa ké palé di sa kalité bagaj-ya ké ròt-ya.
g MEN SA NOU KA WÈ ASOU ZIMAJ-A : Plizyèr kolèg roun frè ka ensisté pou i gadé pòrnografi annan yé liv.
