1. Poukisa sèrten sèrvitèr Jéova ka santi yé kò tousèl ?

DÉTAN, nou tout pouvé santi nou kò tousèl. Pou roun ran moun, yé pa ka santi yé kò konsa lontan. Pou rounòt ran, sa pi difisil. Nou pouvé santi nou kò tousèl menm si i gen patché moun òbò nou. I gen sa, lò yé ka chanjé asanblé, sa rèd pou yé divini zanmi ké ròt moun. Rounòt ran lévé annan roun fanmi koté yé té ka fè bokou bagaj ansanm. Mé, kou yé lésé yé fanmi, yé ka santi yé kò tousèl. Ròt ankò pédi roun moun yé té kontan é yé tchò gro. Épi sèrten krétyen ka santi yé kò tousèl paské moun annan yé fanmi ké zanmi yé té gen anvan, ki pa Témwen, pa lé wè yé ankò ouben yé ka pèrsékité yé. A sa ki ka rivé èspésyalman sa-ya ki fin konnèt lavérité-a.

2. Ki késyon nou ké réponn annan sa artik-a ?

² Jéova konnèt nou, i ka konprann nou byen menm. Lò nou ka santi nou kò tousèl, i ka wè l’ é i lé idé nou. Kouman i ka fè sa ? Kisa nou pouvé fè lò nou ka santi nou kò tousèl ? É kouman nou pouvé idé moun annan nou asanblé ki ka santi yé kò tousèl ? Annan sa artik-a, nou ké wè répons asou sa késyon-yan.

3. Kouman Jéova montré ki i té ka gadé pou Éli ?

³ Jéova lé ki tout so sèrvitèr gen tchò kontan. I pròch di nou chak, é lò nou dékourajé, i ka wè l’ (Ps. 145:18, 19). Parèkzanp, annou wè kouman i pran swen di so  profèt Éli. Sa wonm fidèl-a viv annan roun lépòk ki té rèd pou nasyon Israyèl-a. Moun ki té gen bokou pouvwar, té ka pèrsékité sa-ya ki té ka sèrvi Jéova é yé té ka chaché tchwé Éli (1 Rois 19:1, 2). Épi, Éli té ka pansé ki i té dèrnyé profèt Jéova-a é sa té dèt ka dékourajé l’ ankò plis (1 Rois 19:10). Jéova fè roun bagaj pou so profèt lanmenm. Pou i té pouvé konsolé l’, i voyé roun zanj pou di li ki a pa té li rounso ki té rété fidèl é ki roun patché ròt Israyélit té ka kontinyé adoré l’ ! (1 Rois 19:5, 18).

4. Kouman Marc 10:29, 30 ka montré ki Jéova ka gadé pou so sèrvitèr lò yé fanmi ké yé zanmi lésé yé tonbé ?

⁴ Jéova savé ki détan, sa-ya ki ka désidé fè so volonté divèt lésé roun patché bagaj. Pou roun ran, a yé zanmi ké yé fanmi ki ka lésé yé tonbé. Roun jou, pitèt paské i té enkyèt, apot Pyèr doumandé Jézi : « Nou lésé tout bagaj épi nou swiv to. Kisa nou ké gen ? » (Mat. 19:27). Jézi di so disip jantiman ki asanblé-a té ké sa kou roun fanmi pou yé (li Marc 10:29, 30). É Jéova, ki sa chèf sa fanmi-a, ka promèt ki i ké idé tout sa ki lé adoré l’ (Ps. 9:10). Donk, i pouvé idé to lò to ka santi to kò tousèl. Mé, i gen bagaj to pouvé fè pou i idé to. Ki bagaj ?

5. Poukisa sa enpòrtan di réfléchi asou tousa Jéova ka fè pou nou ?

⁵ Réfléchi asou tousa Jéova ka fè pou to (Ps. 55:22). Sa ké idé to wè ki to pa tousèl. Carol * pa maryé é a li rounso ki ka adoré Jéova annan so fanmi. I ka di : « Lò mo ka sonjé kouman Jéova idé mo lò mo té gen problèm, sa ka idé mo santi ki mo pa tousèl. Mo sir ki i ké toujou la pou mo. »

6. Kouman 1 Pierre 5:9, 10 pouvé ankourajé sa-ya ki ka soufri paské yé ka santi yé kò tousèl ?

⁶ Sonjé sa Jéova ka fè pou ankourajé so sèrvitèr ki ka soufri paské yé ka santi yé kò tousèl (li 1 Pierre 5:9, 10). Dipi plizyèr lannen, a Hiroshi rounso ki  Témwen Jéova annan so fanmi. I ka di : « Nou tout gen noupa problèm annan asanblé-a, mé chak moun ka fè tousa i pouvé pou sèrvi Jéova. Lò nou ka sonjé sa, sa pouvé ankourajé nou lò a nou rounso ki annan lavérité annan nou fanmi. »

7. Kisa lapriyè ka fè pou to ?

⁷ Kontinyé priyè, li Labib-a é alé annan réinyon-yan. Pou koumansé, priyè Jéova é di li sa to gen asou to tchò (1 Pierre 5:7). Lò Massiel, roun jenn sò, désidé sèrvi Jéova, i santi so kò tousèl paské so fanmi pa té ka sèrvi Jéova. I ka di : « Si mo rivé pa santi mo kò tousèl ankò, a paské, parèkzanp, mo té ka louvri mo tchò pou Jéova. I té sa roun vré papa pou mo. Mo té ka priyè l’ touléjou é détan menm plizyèr fwa annan lajournen-an pou di li sa mo té gen asou mo tchò. »

8. Kisa sa ka fè pou to lò to ka li é lò to ka pran tan réfléchi asou Paròl Bondjé-a ?

⁸ Anplis di sa, li paròl Bondjé-a souvan é pran tan réfléchi asou istwè ki ka montré ki Jéova kontan to. Roun sò yé ka aplé Bianca divèt sipòrté vyé paròl so fanmi ka voyé pou dékourajé li. I ka di : « Sa ki ka idé mo bokou, a lò mo ka li é lò mo ka réfléchi asou istwè ki annan Labib-a, ké istwè lavi moun ki ka sèrvi Jéova ki jwenn sitiasyon ki ka sanblé ké mo pa. » I gen frè ké sò ka anprann vèrsé ki ka ankourajé yé bokou kou Psaume 27:10 ké Isaïe 41:10. Ròt ka kouté Labib-a ké piblikasyon nou ké wè pannan réinyon-yan, konsa yé pa ka santi yé kò tousèl lò yé ka li Labib-a ouben lò yé ka préparé yé réinyon.

9. Kisa alé annan réinyon-yan ka fè pou to ?

⁹ Pou fini, fè tousa to pouvé pou alé annan chak réinyon. Sa to ké tandé-a ké ankourajé to é to ké vin pi pròch ké to frè ké sò-ya (Héb. 10:24, 25). Massiel, nou ja palé anvan, ka di : « Mo té timid bokou, mé mo té désidé pa raté pyès réinyon. É chak kou mo té ka alé, mo té ka éséyé bay roun répons. Sa idé mo santi mo kò pi pròch ké frè ké sò-ya. »

10. Poukisa sa enpòrtan di divini zanmi ké nou frè ké sò ?

¹⁰ Divini zanmi ké to frè ké sò-ya. Chaché divini zanmi ké moun annan asanblé-a ki ké anprann to bokou bagaj. Yé pa oblijé gen menm laj ouben menm kiltir ké to. Labib-a ka di ki ‘a moun ki granmoun ki gen sajès’ (Job 12:12).  Sa-ya ki pi gran pouvé anprann osi ké sa-ya ki pi jenn. David té lontan pi jenn pasé Jonatan, mé sa pa anpéché yé divini bon zanmi (1 Sam. 18:1). Yé idé yé konpanyen kontinyé sèrvi Jéova menm si yé té ka jwenn gro problèm (1 Sam. 23:16-18). Roun sò, yé ka aplé Irina, é ki pa gen pyès Témwen Jéova annan so fanmi jòdla, ka di : « Nou frè ké sò-ya pouvé vréman divini kou nou pròp fanmi, nou papa ké manman ouben nou frè ké sò. Jéova pouvé itilizé yé pou bay nou sa nou bézwen. »

11. Kouman to pouvé gen bon zanmi ?

¹¹ Sa pa fasil pou to gen zanmi, èspésyalman lò to timid. Ratna sa roun sò ki timid bokou, é i anprann lavérité menm si ròt moun té ka chaché anpéché li fè sa. I ka di : « Mo té divèt asèpté ki mo té bézwen mo frè ké mo sò-ya annan asanblé-a idé mo. » Di roun moun sa nou gen asou nou tchò, a pa roun bagaj ki senp. Mé i pa gen dé chimen si nou lé divini so zanmi. To zanmi lé ankourajé to ké idé to, mé yé bézwen to di yé kouman yé pouvé fè sa.

12. Ki pi bon fason nou gen pou trapé zanmi ?

¹² Roun annan pi bon fason nou gen pou trapé zanmi, a lò nou ka préché ké nou frè ké sò-ya. Carol, nou ja palé anvan, ka di : « Mo rivé divini zanmi ké plizyèr sò paské mo té ka préché ké fè ròt bagaj pou Jéova ké yé. Lannen apré lannen, Jéova itilizé mo zanmi pou idé mo. » Sa toujou bon pou nou lò nou ka divini zanmi ké krétyen ki fidèl. Jéova ka sèrvi zanmi nou gen pou idé nou lò nou dékourajé, parèkzanp, lò nou ka santi nou kò tousèl (Prov. 17:17).

13. Kisa tout krétyen-yan divèt fè ?

¹³ Tout krétyen-yan divèt fè yépa pou i gen lapè annan asanblé-a é montré chak moun ki yé kontan yé. Konsa pyès moun pa ké santi so kò tousèl (Jean 13:35). Gras a sa nou ka di ké sa nou ka fè, nou pouvé vréman ankourajé nou frè ké nou sò-ya. Gadé sa roun sò di : « Lò mo anprann lavérité, asanblé-a divini mo fanmi. Mo pa té ké janmen divini Témwen Jéova si mo frè ké sò-ya pa té idé mo. » Kisa to pouvé fè pou sa-ya ki ka sèrvi Jéova yé rounso annan yé fanmi, santi ki frè ké sò-ya annan asanblé-a kontan yé ?

14. Kouman nou pouvé divini bon zanmi ké sa ki nouvo annan asanblé-a ?

¹⁴ Éséyé divini zanmi ké sa ki nouvo annan asanblé-a. Ès annan to asanblé i gen moun ki ka étidyé Labib-a é ki ka vini annan réinyon-yan ? Ès i gen fanmi ki fin rivé ouben frè ké sò ki batizé i pa gen lontan ? Pou koumansé, to pouvé rousouvwè yé jantiman (Rom. 15:7). Mé di roun moun bonjou jantiman pa ké asé. Sa to lé, a divini bon zanmi ké yé. Donk, montré yé ki to vréman lé konnèt yé. Éséyé konprann ki problèm yé ka jwenn, mé fè atansyon pa antré annan yé lavi. I gen sa ki pa ka rivé di sa yé ka rousanti, alòr a pa pou to fòrsé yé. Byen chwazi késyon to ké pozé yé é pran tan kouté yé. Parèkzanp, to pouvé doumandé yé kouman yé vini konnèt lavérité.

15. Kisa krétyen ki gen èspéryans pouvé fè pou idé ròt-ya ?

¹⁵ Lò frè ké sò ki gen èspéryans, é èspésyalman ansyen-yan, ka montré ki  yé ka gadé pou moun annan asanblé-a, lafwa sa moun-yan ka divini pi fò. Melissa lévé annan lavérité ké so manman. I ka di : « Mo gen bokou rékonésans pou frè-ya ki montré mo yé té ka gadé pou mo é ki divini kou dé papa pou mo ! Lò mo bézwen palé, mo savé mo pouvé konté asou yé. » Roun jenn frè yé ka aplé Mauricio, té tris é i santi so kò tousèl lò frè-a ki té étidyé Labib-a ké li lésé lavérité. I ka di : « Si mo rivé kontinyé vansé, a èspésyalman paské ansyen-yan pran tan gadé pou mo. Yé té ka palé ké mo. Yé té ka préché ké mo. Yé té ka palé mo di bèl pépit èspirityèl yé té trouvé lò yé té ka étidyé Labib-a yé rounso. É yé jis té ka fè èspòr ké mo. » Jòdla, Melissa ké Mauricio annan sèrvis a plen tan-an.

16-17. Kisa nou pouvé fè ankò pou idé ròt-ya ?

¹⁶ Idé to frè ké sò-ya lò yé bézwen (Gal. 6:10). Léo sa roun misyonèr ki ka rété lwen di so fanmi. I ka di : « Byen souvan, tousa nou bézwen, a ki roun moun fè roun bagaj janti pou nou jiskont lò nou bézwen. » I ka di ankò : « Roun jou, mo fè roun aksidan ké mo loto. Lò mo rantré an mo kaz, mo té enkyèt menm. Mé, roun frè ké so madanm envité mo vin manjé ké yé. Mo pa ka sonjé sa nou manjé, mé mo ka byen sonjé kouman yé kouté mo jantiman. Apré sa, mo santi mo kò pi byen ! »

¹⁷ Nou tout gen tchò kontan lò nou pouvé rété ké ròt Témwen é palé di diskour nou tandé. Parèkzanp, annan nou gran asanblé-ya. Mé Carol, nou ja palé anvan, ka di : « Mo ka santi mo kò tousèl èspésyalman annan gran asanblé-ya. » Poukisa i ka di sa ? I ka di : « A vré, mo an mitan roun patché frè ké sò mé souvan, yé ké yé fanmi. Lò mo ka wè yé ansanm, a la mo ka santi mo kò tousèl ankò plis. » Pou sa-ya ki fin pédi yé mari ouben yé madanm, sa rèd osi pou yé alé annan roun gran asanblé. Ès to konnèt roun moun annan sa sitiasyon-an ? Ès to pa pouvé envité l’ vini annan prochen gran asanblé-a ké to fanmi ?

18. Kouman nou pouvé fè sa 2 Corinthiens 6:11-13 ka di lò nou ka rousouvwè moun ?

 ¹⁸ Pasé tan ké to frè ké sò-ya. To pouvé envité plizyèr moun annan to asanblé vini ké to lò to ka fè bagaj pou anmizé, èspésyalman sa-ya ki ka santi yé kò tousèl. Nou lé ‘louvri nou tchò gran’, èspésyalman pou yé (li 2 Corinthiens 6:11-13). Melissa, nou ja palé anvan, ka sonjé : « Sa té ka fè nou tèlman plézi lò frè ké sò té ka envité nou an yé kaz ouben lò yé té ka envité nou pati an vakans ké yé. » Annan to asanblé, ès i gen roun moun èspésyalman to pouvé envité pou fè sa ?

19. Kitan èspésyalman nou divèt pasé tan ké nou frè ké sò-ya ?

¹⁹ Pou roun ran frè ké sò, i gen dé moman annan lannen-an, yé té ké byen kontan nou rété ké yé. Parèkzanp, sa pa fasil di rété òbò moun ki pa Témwen lò a sézon lafèt. Ròt ankò tris menm, parèkzanp, lò a jou anivèrsèr lanmò roun moun yé té kontan. Lò nou ka envité sa frè ké sò-ya pou yé pasé tan ké nou, nou ka montré yé ki nou ka ‘vréman enkyété nou kò’ pou yé (Phil. 2:20).

20. Kouman sa Jézi di annan Matthieu 12:48-50 pouvé ankourajé nou lò nou ka santi nou kò tousèl ?

²⁰ Nou pouvé santi nou kò tousèl akoz di diféran bagaj. Mé nou pa janmen divèt bliyé ki Jéova ka konprann sa nou ka rousanti é byen souvan, i ka sèrvi nou frè ké nou sò-ya pou bay nou sa nou bézwen (li Matthieu 12:48-50). Kanta nou menm, annou toujou montré nou rékonésans pou fanmi Jéova bay nou-a é annou toujou montré nou frè ké sò-ya ki nou la pou yé. Kèlkéswa nou sitiasyon, nou pa janmen tousèl. Jéova toujou la òbò nou !