Mo fèt 19 mé 1940, a Amioun, o Liban. Plizyèr lannen pita, mo fanmi déménajé pou alé viv Tripoli. Mo lévé annan roun fanmi koté i té gen bokou lanmou é ki té kontan Jéova. Mo té gen trwa sò ké roun frè, é a mo ki té dèrnyé-a. Pou mo manman ké mo papa, zafè ganyen soumaké, a pa té sa ki té pi enpòrtan. Pou nou fanmi, sa ki té pi enpòrtan, a té étidyé Labib-a, alé annan réinyon krétyen-yan épi préché.

I té gen plizyèr krétyen wen annan nou asanblé. Roun annan yé, Michel Aboud, té ka dirijé sa nou té ka aplé l’étude de livre. I té anprann konnèt lavérité lò i té Nouyòrk, é i koumansé préché o Liban an 1921. Sa mo ka sonjé jis jòdla, a ki i té gen bokou rèspè pou dé jenn sò ki té fè lékòl Galaad, Anne ké Gwen Beavor, é i té janti ké yé. Yé divini nou bon zanmi annan fanmi-a. Plizyèr lannen pita, mo té kontan toubonnman lò mo rouwè Anne Ozétazini. Roun tibi tan apré, mo rouwè Gwen, i té maryé ké Wilfred Gooch é sa tan-an, i té bétélit an Anglétèr.

Lò mo té timoun, i pa té gen bokou Témwen Jéova o Liban. Mé nou té ka bay nou  kò balan pou palé ké moun-yan di sa nou té anprann annan Labib-a menm si plizyèr chèf rélijyé pa té kontan sa. Jis jòdla, mo ka byen sonjé plizyèr bagaj ki rivé nou.

Roun jou, mo ké mo sò Sana, nou té ka préché annan roun batiman. Roun monpè yenki débarké anlè nou konsa koté nou té ka palé ké moun annan batiman-an. A roun moun ki té dèt aplé l’. I koumansé jouré mo sò, épi i koumansé kòlè é i jité l’ annan èskalyé-ya. Sana té blésé. Roun moun aplé lapolis, yé vini é yé doumandé roun moun okipé di mo sò. Polisyé-ya mennen monpè-a lapolis, é a la yé wè i té gen roun pistolè asou li. Chèf lapolis-a doumandé l’ : « Kisa ou ka fè atò ? Ou ka montré moun bagaj asou Bondjé ouben ou ka anprann moun lavyolans ? »

Mo ka byen sonjé osi jou-a nou asanblé louwé roun kar pou alé préché roun koté ki té lwen. Tout bagaj té ka byen pasé jistan monpè ki té ka rété annan sa koté-a tandé palé di sa nou té ka fè épi i rasanblé roun patché moun pou ataké nou. Yé jis voyé ròch asou nou, é yé blésé mo papa an mitan so tèt. Mo ka rouwè so vizaj plen ké disan. I viré annan kar-a ké mo manman, é nou swiv yé, nou té tou enkyèt. Mo pa ké janmen bliyé sa mo manman di toupannan i té ka nétwayé vizaj mo papa : « Jéova, pardonnen yé. Yé pa savé sa yé ka fè. »

Rounòt kou, nou alé wè nou fanmi ki té ka rété annan vil koté mo fèt. Koté mo granpapa, i té gen roun lévèk. I té savé ki mo papa ké mo manman té Témwen Jéova. Mé a pou mo i palé, menm si mo té gen sizan rounso. I doumandé mo : « É to menm, poukisa to pa batizé ? » Mo di li ki mo té sa roun timoun toujou, é ki pou mo té pouvé batizé, mo té divèt konnèt Labib-a pi byen épi gen roun lafwa pi fò. Kou i pa té kontan sa mo té réponn li, i di mo granpapa ki mo té dérèspèkté l’.

Mé, sa kalité bagaj-ya pa té ka rivé souvan. An jénéral, Libanè-ya janti é yé kontan rousouvwè moun. Souvan nou té ka gen bèl ti kozé ké moun-yan é nou té ka bay bokou léson biblik.

Mo té ka alé lékòl toujou, lò roun jenn frè ki té ka vini di Vénézwéla vini o Liban. I té ka vini annan réinyon nou asanblé, é i kontré ké mo sò Wafa. Finalman, yé maryé épi yé alé viv o Vénézwéla. Lò Wafa té ka ékri mo papa, i té ka sipliyé l’ pou nou fanmi déménajé é vini jwenn li o Vénézwéla. I té anvi wè nou tèlman. I ensisté tèlman, ki i rivé fè nou déménajé.

Nou rivé o Vénézwéla an 1953, é nou pran roun kaz a Karakas. Nou pa té lwen  di kaz prézidan-an. Kou mo té jenn toujou, mo té tou kontan lò mo té ka wè prézidan-an pasé douvan nou kaz annan so gro loto ké moun-an ki té ka kondwi loto-a pou li. Mé sa té rèd pou mo manman ké mo papa abitchwé ké péyi-a, lang-a, kiltir-a, manjé-a ké tan-an ki té diféran. Yé té fin koumansé abitchwé lò roun malò rivé.

Mo papa koumansé santi so kò pa byen. Nou té étoné paské i té toujou gen roun bon lasanté. Nou pa menm té ka sonjé nou té wè l’ malad roun jou. Mé yé wè ki i té gen roun kansèr annan so pankréa, é yé opéré l’. Malérèzman, i mouri roun simenn apré sa.

Mo pa pouvé èspliké kouman nou pa té byen menm. Mo té gen 13 an rounso. Nou pa té ka pansé ki mo papa té ké mouri. É nou té ka pansé ki nou pa té ké janmen gen tchò kontan ankò. Pannan roun tan, sa té rèd pou mo manman asèpté ki so mari pa té la ankò. Mé nou konprann ki lavi-a té divèt kontinyé, é gras a Jéova, nou rivé gadé douvan. Lò mo té gen 16 an, mo fini lisé-a a Karakas, mo té lé vréman idé mo fanmi gen plis soumaké.

A sa lépòk-a, mo sò Sana maryé ké Rubén Araujo, roun frè ki té routounen viv Vénézwéla apré i té fè Lékòl Galaad. Épi yé alé viv Nouyòrk. Lò nou fanmi désidé ki mo té ké alé linivèrsité, nou di ki mo té ké pouvé alé laba épi rété koté yé. Lò mo té ka rété koté yé, mo sò ké mo bofrè idé mo pou mo vin pi pròch ké Jéova. Anplis di sa, annan nou asanblé èspanyòl Brouklin, i té gen roun patché frè ki té gen bokou èspéryans. Annan yé i té gen Milton Henschel ké Frederick Franz, ki té ka travay o Bétèl. Mo té kontan pas mo té pouvé anprann konnèt yé.

Lò mo té près fini mo prémyé lannen linivèrsité, mo koumansé doumandé mo kò si mo té pran bon désizyon annan mo lavi. Mo té li plizyèr artik annan La Tour de Garde ki té ka fè moun sonjé ki sa enpòrtan di désidé fè bagaj pou Jéova, é mo té réfléchi bokou asou sa artik-ya. Mo té ka wè osi kouman pyonyé-ya ké bétélit-ya annan nou asanblé té gen tchò kontan, é mo té lé menm bagaj-a. Mé mo patékò batizé. Mo konprann ki mo té divèt vouwé mo lavi pou Jéova. A sa mo fè. É jou 30 mars 1957, mo batizé.

Apré mo batizé, mo koumansé sonjé divini pyonyé. Pi tan-an té ka pasé, pi mo té anvi divini pyonyé, mé mo té ka byen wè ki sa pa té ké fasil. Wi, kouman mo té pouvé pyonyé é an menm tan alé linivèrsité ? A konsa mo désidé arété alé linivèrsité, routounen Vénézwéla épi divini pyonyé. Mo té oblijé ékri mo manman ké mo frè ké sò-ya plizyèr fwa pou èspliké yé sa mo té désidé fè-a.

 Mo routounen viv Karakas an jwenn 1957. A la mo wè ki sitiasyon mo fanmi pa té bon menm. Yé té bézwen rounòt moun alé travay pou ganyen soumaké. Kisa mo té pouvé fè pou yé ? Yé propozé mo travay annan roun labank, mé mo té tèlman anvi divini pyonyé ! Épi, a té pou sa mo té rouvin viv Vénézwéla. Ében mo désidé fè toulédé : pannan plizyèr lannen, mo travay a plen tan annan roun labank toupannan mo té pyonyé. A prémyé fwa annan mo lavi mo té okipé konsa mé mo té gen tchò kontan osi !

Apré sa, mo té kontan osi lò mo kontré ké Sylvia, roun bèl ti sò ki té ka vini di Almagn é ki té kontan Jéova. I té vini viv Vénézwéla ké so papa ké so manman. Nou maryé é nou fè dé timoun : roun tiboug, Michel (nou ka aplé Mike), ké roun tifi, Samira. A sa lépòk-a, mo té ka pran swen di mo manman osi, é finalman, i vini viv koté nou. Mo té divèt arété mo sèrvis pyonyé pou mo té pouvé pran swen di mo fanmi, mé mo té ka kontinyé gen mantalité pyonyé-a. Mo ké Sylvia nou té ka pran sèrvis pyonyé òksilyèr chak kou nou té pouvé pannan nou vakans.

Timoun-yan té ka alé lékòl toujou lò sa mo rakonté o koumansman rivé mo. Nou té ka viv byen, nou pa té gen pyès problèm soumaké é ròt moun ki té ka travay annan ròt labank té ka rèspèkté mo. Mé mo menm, mo té lé yé konnèt mo kou roun sèrvitèr Jéova. Sa mo di mo kò sa jou-a kontinyé maché annan mo lidé. Mo ké mo madanm, nou désidé asiz épi byen gadé kouman nou té ka dépansé nou soumaké. Si mo té ka lésé mo travay labank, yé té ké bay mo roun gro patché soumaké. Nou pa té gen pyès dèt. É nou té paré pou gen roun lavi pi senp. Dapré sa nou kalkilé, nou té ké gen asé soumaké pou viv pannan roun bon moman.

Sa désizyon-an pa té fasil pou pran, mé mo madanm ké mo manman soutni mo ké tout yé tchò. A konsa mo rivé roukoumansé sèrvis pyonyé-a. Mo té kontan kou roun sousouri : a kousidiré tout bagaj té ké byen pasé ! Mé sa ki té dèyè patékò touché...

Roun jou, nou dòktèr di nou ki Sylvia té ansent. Nou volé ! Nou té kontan osi ! Mé, mo té désidé roudivini pyonyé. Alòr, kisa pou mo té fè ? Lanmenm nou asèpté lidé  roudivini manman ké papa, é nou té présé wè nou fanmi grandi. Mé ès mo té ké pouvé sèrvi Jéova a plen tan toujou ?

Lò nou réfléchi asou sa ankò, nou désidé fè sa nou té di nou té ké fè. Nou garson Gabriel fèt an avril 1985, mé mo lésé mo travay é mo roudivini pyonyé an jwen sa menm lannen-an. Pita, yé mété mo pou mo fè parti di Komité filyal-a. Mé, Bétèl-a té apéprè a 80 kilomèt di Karakas ; donk mo té gen pou fè sa chimen-an ki té long dé ouben trwa fwa chak simenn.

Bétèl-a té annan roun vil yé ka aplé La Victoria. Pou nou té pouvé pi pròch di Bétèl-a, nou désidé alé rété annan sa vil-a. A té roun gran chanjman pou nou. Mo gen bokou rékonésans pou mo fanmi, ki fè bokou bagaj pou idé mo. Mo sò Baha asèpté lanmenm di pran swen di mo manman. Mike té ja maryé, mé Samira ké Gabriel té ka viv ké nou toujou. Lò yé vini ké nou La Victoria, yé asèpté alé lwen di yé zanmi. Mo madanm, Sylvia, asèpté lésé roun gran vil koté i té gen bokou bagaj, pou alé annan roun ti vil é nou tout té gen pou abitchwé ké roun kaz ki té pi piti. Lò nou déménajé, sa té lé di fè gran chanjman.

Mé, apré sa, nou sitiasyon chanjé ankò. Gabriel maryé, épi Samira trouvé roun koté pou i rété. Apré sa, an 2007, yé envité mo ké Sylvia divini bétélit, é nou bétélit jis jòdla. Mike, nou pi gran garson, ansyen, é i pyonyé ké so madanm, Monica. Gabriel ansyen osi, i ka rété an Itali ké so madanm, Ambra. Samira menm, i pyonyé, é an menm tan, i ka travay pou Bétèl-a dipi so kaz.

Annan mo lavi, mo té gen pou pran bokou désizyon enpòrtan, mé mo pa ka rigrété anyen. Si mo té gen pou fè l’, mo té ké roupran menm désizyon-yan jòdla. Mo ka di Jéova mèrsi pou tout travay i bay mo fè pou li. Lannen apré lannen, mo konprann ki sa ki té pi enpòrtan-an a té kontinyé gen bon rélasyon ké li. Ki nou gen piti ouben gran désizyon pou pran, i pouvé bay nou « lapè ki ka dépasé tousa nou pouvé konprann » (Phil. 4:6, 7). Mo ké Sylvia, nou kontan toubonnman paské nou ka sèrvi Jéova annan Bétèl-a, é nou sir ki i béni tout désizyon nou pran paské a chak fwa nou té ka tchenbé kont di li.