1. Kisa Jéova fè pou nou chak ?

JÉOVA fè nou chak vini òbò li (Jean 6:44). Réfléchi asou tousa sa lé di. Toupannan i té ka byen gadé milyar moun asou tout latè-a, i wè koté to roun bagaj ki té gen bokou valò : roun tchò sensèr ki té ké gen bokou lanmou pou li (1 Chron. 28:9). Jéova konnèt to, i ka konprann to é i kontan to. Sa lidé-a ka ankourajé nou bokou !

2. Ki èkzanp Jézi pran pou montré ki Jéova ka gadé pou so brébi ?

² Jéova ka gadé pou to, mé i ka gadé osi pou tout to frè ké to sò-ya. Pou idé nou konprann sa lidé-a, Jézi konparé Jéova ké roun bèrjé. Si roun bèrjé gen 100 mouton épi roun annan yé ka chapé é ka pédi, kisa bèrjé-a ka fè ? I ké lésé « 99 ròt-ya asou montangn-an pou alé chaché sa-la ki pédi-a ». Lò i ka trouvé mouton-an, i pa ka faché dèyè li. Pasé i fè sa, i kontan toubonnman ! Kisa sa ka anprann nou ? Pou Jéova, chak brébi i gen gen valò. Jézi di : « Mo Papa ki annan syèl-a pa lé rounsèl annan sa piti-ya mouri » (Mat. 18:12-14).

3. Di kisa nou ké palé annan sa artik-a ?

³ Nou pa lé pyès annan nou frè ouben nou sò dékourajé akoz di nou. Atò, kouman nou pouvé fè pou nou pa fè ròt-ya tonbé ? É kouman nou divèt réyaji si roun moun ka fè nou lapenn ? Annan sa artik-a, nou ké réponn sa késyon-yan. Mé pou koumansé, annou wè kimoun ki sa « piti-ya » yé ka palé annan Matthieu chapit 18.

4. « Piti-ya », a kimoun ?

⁴ « Piti-ya » Jézi ka palé sa so disip. Ki yé piti ki yé gran, yé « kou timoun », paské yé ka lésé Jézi ansényé yé (Mat.  18:3). Yé ka vini di tout koté di tout kiltir, yé chak gen yépa pèrsonalité ké yépa lidé, mé yé tout gen lafwa annan Jézi. É li menm kontan yé bokou (Mat. 18:6 ; Jean 1:12).

5. Kisa Jéova ka rousanti lò roun moun ka fè roun annan so sèrvitèr tonbé ouben soufri ?

⁵ Tout « piti-ya » gen valò pou Jéova. Si nou lé konprann sa i ka rousanti pou yé, annou sonjé sa nou ka rousanti pou timoun-yan. Yé gen valò pou nou. Nou lé protéjé yé, paské yé pa gen ni fòrs, ni èspéryans ni sajès granmoun gen. Nou pa ka sipòrté wè pyès moun soufri. Mé nou ka faché ankò plis lò roun moun ka fè roun timoun soufri. A menm bagaj-a pou Jéova. I lé protéjé nou. É lò roun moun ka fè roun di so sèrvitèr tonbé ouben soufri, i pa kontan. I kòlè menm (Is. 63:9 ; Marc 9:42).

6. Dapré 1 Corinthiens 1:26-29, kouman monn-an ka wè disip Jézi-ya ?

⁶ Poukisa ankò disip Jézi-ya kou dé « piti » ? Ében, kimoun ki gran annan sa monn-an ? Sa-ya ki gen bokou soumaké, sa-ya tout moun konnèt é sa-ya ki gen pouvwar. Òbò yé, a kousidiré disip Jézi-ya pa anyen ; pou monn-an, yé sa dé « piti » (li 1 Corinthiens 1:26-29). Mé a pa konsa Jéova ka wè yé.

7. Kisa Jéova lé nou rousanti pou nou frè ké nou sò-ya ?

⁷ Jéova kontan tout so sèrvitèr, ki yé ka sèrvi l’ dipi lontan, ouben ki yé fin koumansé sèrvi l’. Tout nou frè ké nou sò-ya gen valò pou li ; yé divèt gen valò pou nou osi. Nou lé kontan « tout frè ké sò-ya ». A pa déztrwa annan yé rounso nou lé kontan (1 Pierre 2:17). Nou divèt fè tousa nou pouvé pou protéjé yé ké pran swen di yé. Si yé ka vin di nou ki nou fè roun moun lapenn, ouben ki roun moun faché akoz di nou, a pa pou nou fè kousidiré anyen pa té rivé, épi pansé ki moun-an divèt anprann pardonnen épi fin ké sa. Détan poukisa roun ran moun ka faché ? Pitèt sèrten ka santi yé kò toupiti òbò ròt-ya akoz di fason yé lévé ouben di sa ki rivé yé annan yé lavi. Rounòt ran fin rivé annan lavérité, é yé pòkò anprann ki yé divèt pardonnen ròt-ya lò yé ka fè roun bagaj ki pa bon. Ki a sa, ki a rounòt problèm, nou divèt fè tousa nou pouvé pou viré byen ké moun-an. An menm tan, roun moun ki ka faché vit divèt rékonnèt ki a roun bagaj i divèt chanjé. A ké roun bon bagaj pou li ké pou ròt-ya osi.

8. Annan lépòk disip-ya, ki mantalité moun-yan té gen é kouman sa aji asou yé ?

⁸ Mé kisa ki fè Jézi palé di « piti-ya » ? A paské so disip-ya té doumandé l’ : « Kimoun ki pi gran annan rwayonm-an ki annan syèl-a ? » (Mat. 18:1). A sa lépòk-a, roun patché Jwif té lé moun wè yé kou dé moun ki té enpòrtan. Roun téolojyen ékri : « Sa ki té pi enpòrtan annan lavi moun-yan, a té rousouvwè lònò ròt-ya té ka bay yé, é divini sélèb *. »

9. Kisa disip Jézi-ya té divèt fè ?

⁹ Sa ki té pi enpòrtan pou Jwif-ya, a té toujou fè pi byen pasé ròt-ya. Jézi té savé ki so disip-ya té lévé annan sa mantalité-a, é ki yé té divèt travay rèd pou arété chaché dépasé ròt-ya. I di yé :  « A pou sa-la ki pi gran annan zòt divini kou sa-la ki pi piti, é a pou sa-la ki ka dirijé divini kou sa-la ki ka sèrvi » (Luc 22:26). Pou nou divini ‘kou sa-ya ki pi piti’, nou divèt ‘wè ròt-ya kou moun ki pi fò pasé nou’ (Phil. 2:3). Pi nou ka chaché pansé konsa, mwens nou ka riské fè ròt-ya tonbé.

10. Ki konsèy Pòl bay nou divèt swiv ?

¹⁰ Chak frè ké chak sò pi fò pasé nou annan roun bagaj. Sa fasil pou nou konprann sa lò nou ka rété asou yé bèl kalité. Nou divèt tchenbé kont di sa Pòl di Korentyen-yan : « Kimoun ki ka fè to divini diféran di rounòt moun ? Wi, kisa to gen yé pa bay to ? É si a bay yé bay to l’, poukisa to ka voyé to kò monté kousidiré yé pa té bay to l’ ? » (1 Cor. 4:7). Nou pa janmen divèt lé ki moun-yan poté nou anlè, ouben nou pa janmen divèt pansé ki nou pi fò pasé ròt-ya. Si roun frè vayan annan zafè fè diskour, ouben si roun sò ka étidyé Labib-a ké bokou moun, yé divèt louwé Jéova pou sa yé pouvé fè.

11. Kisa nou ka anprann ké èkzanp sèrvitèr-a ki pa té gen pityé ?

¹¹ Roun ti moman apré Jézi èspliké so disip ki yé pa té divèt fè ròt-ya tonbé, Jézi rakonté èkzanp sèrvitèr-a ki pa té gen pityé. Rwa-a té désidé lésé tonbé soumaké sèrvitèr-a té dévé l’. I pa té ké janmen pouvé randé l’ sa kantité soumaké-a. Pita, sa menm sèrvitèr-a réfizé fè menm bagaj-a pou rounòt sèrvitèr, ki té dévé l’ mwens lajan ki li menm té divèt bay rwa-a. Atò, rwa-a fè yé mété sa sèrvitèr ki té san pityé-a lajòl. Kisa nou ka anprann ? Jézi di : « A menm fason-an mo Papa ki annan syèl-a ké fè ké zòt chak si zòt pa ka pardonnen zòt frè ké tout zòt tchò » (Mat. 18:21-35).

12. Si nou ka réfizé pardonnen, kimoun nou ka fè soufri ?

¹² Sa sa sèrvitèr-a fè pa té bon ni pou li, ni pou ròt-ya. Pou koumansé, i fè sèrvitèr-a ki té dévé l’ soumaké soufri lò i « mété l’ lajòl » jistan i té randé l’ so soumaké. Épi i fè ròt sèrvitèr-ya ki té ka gadé sa i té ka fè soufri osi. Labib-a ka di :« Lò ròt sèrvitèr-ya wè sa ki té rivé, yé tchò té gro. » A menm bagaj-a pou nou. Sa nou ka fè ka aji asou ròt-ya. Si roun moun ka fè nou méchansté é nou pa lé pardonnen li, kisa ki pouvé rivé ? Nou ké fè l’ soufri paské nou pa lé pardonnen l’, é paské nou ké fè kousidiré nou pa ka wè l’, é nou pa ké montré li nou kontan l’. Anplis di sa, ròt moun annan asanblé-a ké jennen akoz di nou paské yé ké wè ki nou gen roun problèm ké nou frè ouben ké nou sò.

13. Kisa sa Crystal viv ka anprann nou ?

¹³ Lò nou ka pardonnen nou frè ké nou sò-ya, sa bon pou nou menm, é sa bon pou ròt-ya osi. A sa roun sò pyonyé nou ké aplé Crystal konprann. Roun sò annan so asanblé té ka fè l’ soufri. Crystal ka sonjé : « I té ka di mo bagaj ki té ka fè mo mal ; chak kou, a kousidiré i té ka bay mo kout kouto. Lò nou té k’alé préché, mo pa menm té lé monté annan menm loto ké li. Akoz di sa, mo pédi ni balan mo té gen ni mo lajwa. » Crystal té ka pansé ki i té gen drwa faché pou sa. Mé i désidé pa tchenbé sò-a asou so tchò, ni rété asou sa i té ka rousanti. Pasé i fè sa, a ké imilité  i swiv konsèy ki annan Labib-a, é ki annan artik « Pardonnez de tout votre cœur » ki parèt annan La Tour de Garde 15 òktòb 1999. A konsa i pardonnen so sò. I ka di : « Nou tout ka briga pou mété nouvo pèrsonalité-a, é Jéova ka pardonnen nou ké bon tchò chak jou. Lò mo konprann sa, a kousidiré yé té tiré roun gro fardo asou mo zépol. Dipi sa jou-a, mo viré gen tchò kontan. »

14. a) Dapré Matthieu 18:21, 22, ké kisa apot Pyèr té divèt pitèt briga ? b) Kisa nou pouvé fè si sa rèd pou nou pardonnen ?

¹⁴ Nou savé ki nou divèt pardonnen é ki a pi bon bagaj nou pouvé fè. Mé détan, pitèt sa rèd pou nou pardonnen. Pitèt sa té difisil osi pou apot Pyèr (li Matthieu 18:21, 22). Kisa ki pouvé idé nou pa rété asou sa ròt-ya ka fè ki pa bon ? Prémyèrman, annou sonjé tout péché Jéova pardonnen nou (Mat. 18:32, 33). Nou pa ka mérité i pardonnen nou. Mé magré sa, i ka pardonnen nou ké tout so tchò (Ps. 103:8-10). « Si a konsa Bondjé montré i kontan nou, atò nou menm nou oblijé kontan nou konpanyen. » Pou byen di, nou pa gen chwa. Nou divèt pardonnen nou frè ké nou sò-ya (1 Jean 4:11). Dézyèmman, annou réfléchi asou tout bénédiksyon nou ké jwenn si nou ka pardonnen : sa ké bon pou moun-an ki fè nou lapenn, nou ké idé asanblé-a viv byen ansanm, nou ké kontinyé rété zanmi ké Jéova, é nou ké tiré roun fardo asou nou zépol (2 Cor. 2:7 ; Col. 3:14). Trwazyèmman, annou priyè Jéova. A li ki ka doumandé nou pardonnen. Annou pa lésé Satan gaté bèl lanmityé nou gen ké nou frè ké sò-ya (Éph. 4:26, 27). Pou nou pa tonbé annan trap Djab-a, nou bézwen Jéova idé nou.

15. Kou Colossiens 3:13 ka di, kisa nou pouvé fè si sa roun frè ouben roun sò fè, fè nou mal ?

¹⁵ Kouman to divèt réyaji si sa roun frè ouben roun sò fè, fè to mal menm ? Fè tousa to pouvé pou to rété byen ké moun-an. Di Jéova sa to gen asou to tchò. Doumandé li béni moun-an ki fè to mal é idé to wè bèl kalité i kontan koté li (Luc 6:28). Si to pa ka rivé bliyé sa to frè ouben to sò fè to, réfléchi asou fason to ké pouvé palé ké li di sa. Sa toujou miyò di pansé ki a pa lé frè-a ouben sò-a té lé fè to lapenn (Mat. 5:23, 24 ; 1 Cor. 13:7). Lò to ké palé pou li, kontinyé pansé ki i gen bon lentansyon. É si i pa lé fè lapè ké to aprézan ? ‘A pou to kontinyé sipòrté l’.’ A pou to pran pasyans ké li (li Colossiens 3:13). É sa ki pi enpòrtan-an, pa tchenbé l’ asou to tchò paské sa pouvé gaté to rélasyon ké Jéova. Pa lésé anyen ni pyès moun fè to tonbé. A konsa to ké montré ki to kontan Jéova plis ki tout ròt bagaj (Ps. 119:165).

16. Kisa nou chak gen pou fè ?

¹⁶ A roun plézi pou nou sèrvi Jéova nou tout ansanm. Nou sa « rounsèl troupo » anba « rounsèl bèrjé » (Jean 10:16). Liv Organisés pour faire la volonté de Jéhovah ka di annan paj 165 : « Kou to ka sèrvi Jéova ansanm ké to frè ké to sò annan lapè, to divèt idé asanblé-a rété konsa. » Pou fè sa, nou divèt fè tousa nou pouvé pou « wè nou frè ké nou sò-ya kou Jéova ka wè yé ». Nou tout sa dé « piti » ki gen bokou valò douvan li. Ès a konsa to ka wè to frè ké to sò-ya ? Jéova ka wè é i kontan tousa to ka fè pou idé yé é fè bon bagaj pou yé (Mat. 10:42).

17. Kisa nou byen désidé fè ?

¹⁷ Nou kontan nou frè ké nou sò-ya. A pou sa nou « byen désidé pa mété douvan roun frè, ni roun ròch ki pouvé fè li tonbé, ni rounòt bagaj » (Rom. 14:13). Annou wè nou frè ké nou sò-ya kou dé moun ki pi fò pasé nou. Annou pardonnen yé ké tout nou tchò. É annou pa lésé pyès moun fè nou tonbé. Pasé nou fè sa, « annou kontinyé chaché tousa ki ka mennen lapè é tousa ki ka idé nou konpanyen grandi » (Rom. 14:19).