1. Poukisa nou pouvé di ki Satan kou roun chasò ?

SA ROUN chasò lé, a tchenbé zannimo i ka chasé-a ouben tchwé l’. É kou Labib-a ka di, i pouvé sèrvi plizyèr trap (Job 18:8-10). Kouman i ka fè pou fè zannimo-a vini ? I ka byen gadé sa i ka fè : Kisa i kontan ? Ki koté i ka alé ? Kisa i pa ka panga ? Satan kou roun chasò. I ka byen gadé sa nou ka fè. I ka byen gadé sa nou kontan é ki koté nou ka alé. Apré sa, i ka mété roun trap pou éséyé fè nou tonbé annan l’ lò nou pa ka antann. Mé Labib-a ka di nou ki, si nou ka tonbé annan roun di so trap, nou pouvé soti anba l’. É pi enpòrtan-an, i ka anprann nou pa tonbé annan so trap.

2. Bay dé trap Satan ka sèrvi ki ka byen maché.

² Òrgèy ké vorasité-a *, a dé trap Satan ka sèrvi ki ka byen maché. Dipi nanninannan, Djab-a ka sèrvi sa défo-ya pou tchenbé nou. I kou roun moun ki ka éséyé tchenbé roun zozo, i ka éséyé fè moun-yan alé annan so kalfich (Ps. 91:3). Mé i gen bagaj nou pouvé fè pou nou pa tonbé annan so trap, paské Jéova ka byen di nou kisa Satan ka fè pou trapé moun (2 Cor. 2:11).

3. Poukisa Labib-a ka palé di moun ki tonbé annan zafè òrgèy ouben vorasité-a ?

³ Pou nou pa tonbé annan trap òrgèy ké vorasité-a, Jéova ka fè nou sonjé annan so Paròl sa ki rivé roun ran annan so sèrvitèr-ya. Annan istwè nou ké wè-ya, to ké wè ki Satan jis rivé tchenbé annan so trap plizyèr wonm ki té ka sèrvi Jéova dipi lontan. Ès sa lé di ki nou blijé tonbé  annan trap Djab-a ? Non a pa sa ! Jéova mété sa istwè-ya annan Labib-a « pou avèrti nou » (1 Cor. 10:11). I savé ki sa pouvé idé nou pou nou pa tonbé annan trap Satan ouben pou nou soti anba yé.

4. Kisa ki ké rivé nou si nou ka tonbé annan zafè òrgèy-a ?

⁴ Satan lé nou vin gen òrgèy. I savé ki, si nou ka tonbé annan sa zafè òrgèy-a, nou ké divini kou li é nou pa ké pouvé viv pou tout-tan (Prov. 16:18). A pou sa Pòl di ki sa-la ki ka « koumansé krè so kò » ka riské « trapé menm pinisyon ké Djab-a » (1 Tim. 3:6, 7). A roun bagaj ki pouvé rivé nou tout, ki i gen lontan ouben ki i pa gen lontan nou ka sèrvi Jéova.

5. Dapré Ecclésiaste 7:16, 20, kisa roun moun ki gen òrgèy ka fè ?

⁵ Roun moun ki gen òrgèy, a roun moun ki ka gadé pou so douvan lèstomak. Satan lé nou gadé pou nou douvan lèstomak. I lé nou sonjé nou kò plis pasé Jéova, èspésyalman lò nou gen problèm. Ès yé ja akizé to pou roun bagaj to pa té fè ? Sa Satan té ké pi kontan, a ki to faché ké Jéova ouben ké so òrganizasyon ! I té ké lé fè to krè ki sèl fason to pouvé réglé problèm-an, a fè bagaj-ya kou to lé pasé to swiv konsèy Jéova ka bay to annan so paròl (li Ecclésiaste 7:16, 20).

6. Kisa sa roun sò ki ka rété an Oland di ka anprann nou ?

⁶ Roun sò ki ka rété an Oland pa té ka rivé sipòrté défo ròt-ya ankò. I désidé ki i pa té pouvé rété ké sa moun-yan ankò. I ka di : « Mo té ka santi mo kò tousèl, é mo pa té ka rivé sipòrté frè ké sò-ya annan mo asanblé ankò. Mo di mo mari ki nou té divèt chanjé asanblé. » Apré sa, nou sò gadé émisyon Télé JW pou mwa mars 2016-a, ki té ka montré kouman nou pouvé fè ké défo ròt-ya gen. I ka di : « Mo konprann ki pasé mo éséyé chanjé frè ké sò-ya annan mo asanblé, mo té divèt gen imilité épi rékonnèt ki mo menm  mo té gen mopa défo. Émisyon-an fè mo sonjé Jéova plis é sa fè mo sonjé osi ki nou divèt fè sa i ka doumandé nou fè. » Kisa sa i ka di ka anprann nou ? Lò to ka jwenn roun problèm, kontinyé sonjé Jéova an prémyé. É sipliyé l’ pou i idé to wè ròt-ya kou li menm ka wè yé. To Papa ki annan syèl-a ka wè ki défo yé gen, magré sa, i ka pardonnen yé ké tout so tchò. I lé to fè menm bagaj-a (1 Jean 4:20).

7. Kisa ki rivé rwa Ozyas ?

⁷ Paské rwa Jida-a, Ozyas, vin gen òrgèy, i pa kouté konsèy ròt-ya bay li, é i fè roun bagaj i pa té gen drwa fè. Sa mouché-a té vayan : i té ganyen roun patché lagèr, i té fè plizyèr vil, é i té gen roun patché gran bitasyon. Labib-a ka di ki « vré Bondjé-a fè tout bagaj byen maché pou li » (2 Chron. 26:3-7, 10). Mé i ka di dèyè sa : « Dipi Ozyas divini pwisan, i koumansé krè so kò, é a sa ki fè l’ tonbé. » Jéova té byen di ki a té prèt-ya rounso ki té gen drwa boulé lansan annan Tanp-a. Mé rwa Ozyas fè roun bagaj i pa té gen drwa fè, i alé annan tanp-a pou boulé lansan-an. Jéova fè lalèp tonbé asou sa mouché-a ki té plen ké òrgèy. É Ozyas rété konsa jis jou i mouri (2 Chron. 26:16-21).

8. Dapré 1 Corinthiens 4:6, 7, kisa ki ké idé nou pa divini roun moun ki gen òrgèy ?

⁸ Ès, kou Ozyas, nou té ké pouvé pri annan trap òrgèy-a ? Annou wè sa ki rivé José. I té gen roun antrépriz ki té ka byen maché, i té ka ganyen bokou soumaké é a té roun ansyen tout moun té kontan. I té ka fè diskour annan gran asanblé-ya, é rèsponsab sirkonskripsyon-yan détan té ka vini wè li pou i té bay yé déztrwa konsèy. I ka di : « Problèm-an, a ki mo pa té ka konté asou Jéova, mo té ka konté sèlman asou sa mo té konnèt fè é asou èspéryans mo té gen. Mo té ka di ki mo té asé fò é mo pa kouté konsèy ké avèrtisman Jéova. » José fè roun péché grav, é yé mété l’ dèrò di asanblé-a. I gen déztrwa lannen i roudivini Témwen Jéova. I ka di : « Jéova anprann mo ki sa ki pi enpòrtan, a pa grad nou gen-an, mé a fè sa i ka doumandé nou fè. » Annou sonjé ki, si nou konnèt fè roun bagaj é si yé ka bay nou bagaj pou fè  annan asanblé-a, a sèlman gras a Jéova (li 1 Corinthiens 4:6, 7). Si nou gen òrgèy, Jéova pa ké lé itilizé nou.

9. Kisa vorasité-a fè Satan ké Èv fè ?

⁹ Lò nou ka palé di moun ki voras, lanmenm nou ka sonjé Satan Djab-a. Lò i té ka sèrvi Jéova, i dèt té gen roun patché bèl bagaj pou fè. Mé sa pa té asé pou li : i té lé gen ladorasyon nou divèt bay Jéova rounso. É i té ké lé nou fè kou li. A pou sa i ka éséyé fè nou krè ki sa nou gen pa asé. I ja sèrvi sa trap-a ké Èv. Pas i té kontan yé, Jéova té bay Èv ké so mari roun patché bon bagaj pou manjé. Yé té pouvé manjé « frwi tout pyébwa-ya ki té annan jarden-an », sòf rounsèl (Gen. 2:16). Magré sa, Satan rivé fè Èv krè ki a pou i té manjé frwi pyébwa-a Jéova té défann yé manjé. Sa i té gen-an pa té asé pou li ankò. É nou savé sa ki pasé apré : i péché, é finalman, i mouri (Gen. 3:6, 19).

10. Annan ki sitiasyon David tonbé annan trap vorasité-a ?

¹⁰ Jéova té bay David patché bagaj : soumaké, laglwar, i té fè li ganyen asou roun patché lèlmi. David té gen rékonésans pou tout bon bagaj i té bay li ; i jis di ki i té gen « tro bokou pou i té pouvé rakonté yé ! » (Ps. 40:5). Mé i gen roun moman, i divini voras. Sa Jéova té bay li-a pa té asé pou li ankò. I té lé plis. I té gen plizyèr madanm, mé i koumansé lé roun madanm ki té ja maryé : Bètsabé, madanm Ouri Itit-a. Pas i té ka gadé pou so douvan lèstomak, David alé kouché ké li, é madanm-an tonbé ansent. Mé a pa sa rounso i fè : i trouvé roun mwayen pou yé tchwé Ouri ! (2 Sam. 11:2-15). Mé kisa i té gen annan so tèt ? Ès i té ka krè ki Jéova pa té ké wè l’ ? Sa sèrvitèr Bondjé ki té fidèl tonbé annan trap vorasité-a, é i byen pran fè. Mé érèzman pou li, i rékonnèt ki i té péché é i répanti. I té kontan toubonnman paské Jéova té pardonnen l’ ! (2 Sam. 12:7-13).

11. Dapré Éphésiens 5:3, 4, kisa ki pouvé idé nou briga ké vorasité-a ?

¹¹ Kisa sa ki rivé David ka anprann nou ? Sa ka anprann nou ki, si nou toujou gen rékonésans pou tousa Jéova ka bay nou, nou ké pouvé briga ké vorasité-a (li Éphésiens 5:3, 4). Nou divèt  kontan ké sa nou gen. Souvan, lò nou ka koumansé étidyé Labib-a ké roun moun, nou ka di li di Jéova mèrsi chak jou pou roun bagaj èspésyal. Si moun-an ka fè sa pannan roun simenn, a lafen simenn-an i ké di Jéova mèrsi pou sèt bagaj diféran (1 Thess. 5:18). Ès to menm osi to abitchwé fè sa ? Si to ka réfléchi asou tousa Jéova ka fè pou to, sa ké idé to gen rékonésans. Rékonésans-a ké fè to kontan ké sa to gen. É si to kontan ké sa to gen, sa ké anpéché to tonbé annan trap vorasité-a.

12. Kisa vorasité-a fè Jida Iskaryòt fè ?

¹² Pas i té sa roun gran voras, Jida Iskaryòt fè roun bagaj ki té mové menm, i trayi Jézi. Pourtan, lò Jézi chwazi l’ pou i divini so apot, i pa té gen sa défo-a (Luc 6:13, 16). Nou pouvé di ki i té vayan annan sa i té ka fè é yé té pouvé fè l’ konfyans paské a li yé té doumandé jéré zafè soumaké-a pou yé tout. Sa soumaké-a, a té kou ofrann nou ka fè jòdla pou travay prédikasyon-an ki ka fèt asou tout latè-a. Jézi ké disip-ya té ka sèrvi sa soumaké-a pou péyé sa yé té pou péyé lò yé té ka préché. Mé, Jida koumansé vòlò annan sa soumaké-a. I té tandé Jézi palé souvan di trap vorasité-a (Marc 7:22, 23 ; Luc 11:39 ; 12:15). Mé i pa kouté konsèy Jézi té bay asou sa.

13. Kitan sa vin klè pou tout moun ki Jida té sa roun gran voras ?

¹³ Roun tibi tan anvan Jézi mouri, tout moun wè ki Jida té sa roun gran voras. Simon, sa-la ki té gen lalèp, té envité Jézi ké so disip épi Mari ké so sò Mart. Toupannan yé té ka manjé, Mari lévé é i vidé asou tèt Jézi roun dilwil ka santi bon ki té ka kouté chè menm. Jida ké ròt disip-ya té faché. Ròt disip-ya pitèt pansé ki sa té ké pi bon pou yé té vandé sa dilwil-a é sèrvi soumaké-a pou idé maléré-ya. Mé pou Jida li menm, a rounòt bagaj ki té ka maché annan so lidé. « A té roun volèr ». I té ké byen lé pran annan soumaké-a ankò. Finalman, pas i té sa roun gran voras, i trayi Jézi pou trant pyès lanmonnen an arjan, pri yé té ka péyé pou roun èsklav (Jean 12:2-6 ; Mat. 26:6-16 ; Luc 22:3-6).

14. Kouman roun frè ké so madanm apliké sa Jézi di annan Luc 16:13 ?

¹⁴ Jézi fè so disip-ya sonjé sa prensip-a : « Zòt pa pouvé travay kou roun èsklav pou Bondjé ké Soumaké-a an menm tan » (li Luc 16:13). Sa Jézi di-a bon toujou pou nou jòdla. Annou wè kouman roun frè ké so madanm an Roumani apliké sa paròl Jézi té di-a. Yé té propozé yé vin travay pou roun tan annan roun péyi koté moun-yan gen plis soumaké. Yé ka di : « Nou té gen roun gro prè pou ranboursé. Donk, lò nou koumansé réfléchi, nou di ki sa travay-a, a té roun bénédiksyon di Jéova. » Mé, yé konprann ki i té gen roun trap dèyè sa : si yé té ka asèpté sa travay-a, yé pa té ké gen bokou tan ankò pou sèrvi Jéova. Apré yé té fin li artik « Demeurons fidèles, le cœur unifié » annan La Tour de Garde 15 out 2008, yé té savé kisa yé té divèt fè. Yé ka di : « Si nou té alé viv annan rounòt péyi pou ganyen plis soumaké, nou pa té ké mété nou rélasyon ké Jéova an prémyé annan nou lavi ankò. Nou lanmityé ké Jéova té ké pran fè. » Donk yé pa asèpté sa travay-a. Kisa ki rivé ? Frè-a trouvé roun travay an Roumani, é sa travay-a pèrmèt yé ganyen asé soumaké  pou péyé sa yé té gen pou péyé-a. Men sa sò-a ka di : « Lanmen Jéova pa janmen tro kourt. » Sa frè-a ké so madanm byen kontan yé chwazi Jéova pou yé Mèt pasé yé chwazi soumaké-a.

15. Kouman nou savé ki nou pouvé soti anba trap Djab-a ?

¹⁵ É si nou ka randé nou kò kont ki nou tonbé annan trap òrgèy-a ouben vorasité-a ? Pòl di ki sa-ya Djab-a « pran tou vivan » pouvé soti anba sa trap-ya (2 Tim. 2:26). Parèkzanp, David kouté konsèy Natan bay li-a, i répanti so kò pas i té montré i té sa roun gran voras é i routrouvé bon rélasyon i té gen ké Jéova. Annou pa janmen bliyé ki Jéova pi fò pasé Satan. Donk, si nou ka asèpté i idé nou, nou ké pouvé soti anba nenpòrt ki kalité trap Djab-a ka mété pou nou.

16. Kisa ki ké idé nou pa tonbé annan trap Djab-a ?

¹⁶ Pasé nou soti anba trap Djab-a, sa pi bon pou nou pa tonbé annan yé. A sèlman si Jéova ka idé nou nou ké rivé. Annou pa pansé nou tro fò. Menm sa ki té ka sèrvi Jéova dipi lontan tonbé annan trap òrgèy ouben vorasité-a. Atò, sipliyé Jéova touléjou pou idé to wè si i gen menm roun ti tras sa défo-ya annan fason to ka pansé ouben annan sa to ka fè (Ps. 139:23, 24). Pa janmen lésé yé pran rasin annan to tchò !

17. Titalò, kisa ki ké rivé nou lèlmi, Djab-a ?

¹⁷ Sa ka fè lontan, Satan ka chaché pran moun annan so trap. Mé titalò, a li yé ké maré é yé ké tchwé (Rév. 20:1-3, 10). Nou vréman présé wè sa fèt. Toupannan nou ka antann sa, annou kontinyé panga trap Djab-a. Annou pa lésé òrgèy ouben vorasité-a pran pyé asou nou. É annou toujou désidé ‘pa lésé Djab-a pyès chans’, paské konsa i ‘ké pran kouri lwen di nou’ (Jacq. 4:7).