1. Kouman Psaume 15:1-5 pouvé idé nou ?

 ANNAN ròt artik-a, nou wè ki sa-ya ki ka vouwé Jéova yé lavi pouvé sa so envité, sa lé di gen roun lanmityé ki fò ké li. Mé kisa nou pouvé fè pou nou kontinyé gen sa kalité lanmityé-a ké li ? Psaume 15-an ka palé di sa (li Psaume 15:1-5). I ka bay nou konsèy ki ké idé nou rété pròch di nou Bondjé.

2. Kisa David té pitèt ka sonjé lò i palé di tant Jéova-a ?

² Psaume 15-an ka koumansé konsa : « O Jéova, kimoun to ké envité rété annan to tant ? Kimoun ki ké pouvé rété annan to montangn ki sen ? » (Ps. 15:1). Lò David palé di « tant » Jéova-a, pitèt i té ka sonjé tabèrnak-a ki rété annan vil Gabaon pannan roun tan. Ouben, kou i palé osi di « montangn [Jéova-a] ki sen », pitèt i té ka sonjé tant-a ki té asou montangn Syon-an annan vil Jérizalèm. A annan sa koté-a, plizyèr kilomèt annan sid vil Gabaon, i té monté roun tant pou mété arch Alyans-a jiktan yé fè roun tanp pita (2 Sam. 6:17).

3. Poukisa nou divèt anvi konprann Psaume 15-an ? (gadé zimaj-a osi).

³ I pa té gen bokou Israyélit ki té pouvé sèrvi annan tabèrnak-a é a déztrwa rounso ki té pouvé antré annan tant-a koté i té gen arch Alyans-a. Parkont, tout sèrvitèr Jéova-ya té pouvé vini annan so tant senbolik lò yé ta ka divini so zanmi é lò yé té ka fè éfòr pou yé rété zanmi ké li. É a sa nou tout lé. A pou sa, annou gadé Psaume 15-an, ki ka palé di déztrwa bèl kalité nou divèt chaché gen pou nou rété zanmi ké Jéova.

 MACHÉ DRÈT É FÈ SA KI JIS

4. Kouman nou savé ki a pa loutou di batizé pou nou fè Jéova plézi ? (Isaïe 48:1).

⁴ Annan Psaume 15:2, yé ka di ki roun zanmi Bondjé ka « maché drèt » é ka « fè sa ki jis ». Lò yé ka di « maché » ké « fè », yé ka palé di bagaj roun moun divèt kontinyé fè. Mé ès nou pouvé « maché drèt » vré ? Wi. Menmsi nou pyès pa parfè, Jéova ka wè nou kou dé moun ki ka « maché drèt » lò nou ka fè tousa nou pouvé pou nou obéyi l’. Lò nou ka vouwé Bondjé nou lavi é nou ka batizé, a koumansé nou ka koumansé nou vwayaj ké li. Annou pa bliyé ki annan lépòk Labib, Jéova pa té ka envité roun moun vini annan so tant sèlman paské i té ka fè parti di nasyon Israyèl-a. Roun ran té ka priyè l’, ‘mé yé pa té ka fè l’ ni ké tout yé tchò ni ké jistis’ (li Isaïe 48:1). Israyélit-ya ki té sensèr té divèt anprann konnèt sa Jéova té lé épi obéyi. Menm fason-an, jòdla, pou nou fè Jéova plézi, a pa loutou di batizé ké fè parti di asanblé krétyen-an. A kontinyé « fè sa ki jis » ki tout. Kisa sa lé di ?

5. Kisa sa lé di obéyi Jéova annan tousa nou ka fè ?

⁵ Pou Jéova, « maché drèt » ké « fè sa ki jis », a plis ki alé annan réinyon-yan chak simenn (1 Sam. 15:22). Nou divèt fè tousa nou pouvé pou nou obéyi Bondjé annan tousa nou ka fè menm lò nou tousèl (Prov. 3:6 ; Eccl. 12:13, 14). A pou nou fè l’ menm lò a roun bagaj nou ka pansé ki pa vréman enpòrtan. Lò nou ka fè sa, nou ka montré ki nou vréman kontan nou Bondjé é sa ka fè l’ kontan nou ankò plis (Jean 14:23 ; 1 Jean 5:3).

6. Dapré Hébreux 6:10-12, kisa ki pi enpòrtan pasé tout bon bagaj nou fè anvan ?

⁶ Lò Jéova ka gadé sa nou ja fè pou li, sa ka fè l’ plézi toubonnman. Mé, a pa  paské nou fè bon bagaj anvan ki sa lé di ki nou ké pouvé rété annan so tant. A sa nou ka byen wè annan Hébreux 6:10-12 (li). Jéova pa ka bliyé bon bagaj nou fè pou li. Mé i lé nou kontinyé adoré l’ ké tout nou tchò « jistan lafen-an rivé ». É i ké rékonpansé nou, i ké rété nou zanmi pou tout-tan « si nou pa ka moli » (Gal. 6:9).

DI LAVÉRITÉ ANNAN TO TCHÒ

7. Kisa sa lé di « di lavérité annan so tchò » ?

⁷ Roun moun ki lé rété annan tant Jéova-a divèt « di lavérité annan so tchò » (Ps. 15:2). A pa manti rounso i pa divèt manti. Jéova lé nou onèt annan tousa nou ka di ké tousa nou ka fè (Héb. 13:18). Sa enpòrtan « paské Jéova rayi moun-an ki ka fè bagaj anba anba » é « i ka divini bon zanmi ké moun-yan ki ka maché drèt » (Prov. 3:32).

8. Kisa nou pa lé fè ?

⁸ Sa-ya ki ka ‘di lavérité annan yé tchò’ pa ka fè kousidiré yé ka obéyi Bondjé épi pannan sa tan-an, yé ka dézobéyi l’ lò yé tousèl (Is. 29:13). Yé pa ka fè bagaj anba anba. Roun moun ki ka fè bagaj anba anba pouvé koumansé krè ki a pa tout tan lalwa Jéova bon (Jacq. 1:5-8). I pouvé dézobéyi Jéova annan bagaj i ka pansé ki pa enpòrtan. Apré sa, si i ka wè ki anyen pa ka rivé l’, i pouvé koumansé fè bagaj ki pi mové ankò. Menmsi i ka pansé ki i ka adoré Bondjé, Jéova pa ké asèpté sa (Eccl. 8:11). Mé, nou menm, nou lé rété onèt annan tout bagaj.

9. Kisa ki rivé prémyé fwa Jézi kontré ké Natanayèl, é kisa sa ka anprann nou ? (gadé zimaj-a osi).

⁹ Sa vréman enpòrtan ki nou sa roun moun ki ka « di lavérité annan so tchò ». Nou ka konprann sa lò nou ka gadé sa ki rivé lò Filip envité so zanmi Natanayèl kontré ké Jézi. A té prémyé fwa Jézi té ka wè Natanayèl é pourtan i di : « Men roun vré Israyélit ki pa gen pyès ipokrizi annan so tchò » (Jean 1:47). Jézi té savé ki so ròt disip-ya té  onèt, mé Natanayèl té ankò pi onèt. Kou nou menm, Natanayèl pa té parfè, mé i pa té ipokrit. A roun bagaj Jézi té kontan bokou é i félisité l’ pou sa. Ès Jézi té ké pouvé di menm bagaj-a asou nou osi ? Nou té ké byen kontan !

10. Poukisa nou divèt panga sa nou ka di ? (Jacques 1:26).

¹⁰ Près tout Psaume 15-an ka palé di fason nou divèt aji ké ròt-ya. Vèrsé 3-a ka di ki moun-an ki envité annan tant Jéova-a « pa ka malpalé asou moun pou sali yé répitasyon, i pa ka fè so konpanyen pyès mové bagaj é i pa ka malpalé so zanmi ». Souvan, roun moun ki ka malpalé ròt-ya pou sali yé répitasyon ka fè yé soufri bokou é Jéova pa ké asèpté i rété annan so tant ankò (li Jacques 1:26).

11. Kisa yé ka fè sa-ya ki ka palé moun mal pou sali yé répitasyon é ki pa ka répanti ?

¹¹ David ka palé di roun moun ki ka palé moun mal pou sali yé répitasyon. I ka manti asou yé é sa ka fè yé soufri. Yé ka mété moun ki ka fè sa é ki pa ka répanti dèrò di asanblé-a (Jér. 17:10).

12-13. Kisa ki pouvé rivé nou frè ké sò, é kouman nou pouvé malpalé yé san nou pa fè parèsprè ? (gadé zimaj-a osi).

¹² Psaume 15:3 ka fè nou sonjé osi ki sa-la ki envité annan tant Jéova-a pa ka fè so konpanyen pyès méchansté é i pa ka sali répitasyon so zanmi. Ès sa pouvé rivé nou di sali répitasyon nou zanmi ?

¹³ Sa pouvé rivé nou di malpalé roun moun san nou pa fè parèsprè. Parèkzanp : 1) roun sò ka arété so sèrvis pyonyé pèrmanan, 2) roun frè ké so madanm pa ka sèrvi annan Bétèl-a ankò ouben 3) roun frè pa asistan ouben pa ansyen ankò. Ès a pou nou alé di ròt-ya ki sa frè ké sò-ya dèt fè roun mové bagaj é ki a pou sa yé sitiasyon chanjé ? I pouvé gen roun patché rézon ki pouvé èspliké poukisa yé sitiasyon chanjé é  pitèt nou pa menm savé. Anplis di sa, kou nou ja di l’, roun moun ki envité annan tant Jéova-a « pa ka fè so konpanyen pyès mové bagaj é i pa ka malpalé so zanmi ».

BAY SA KI GEN LAKRENT POU JÉOVA LÒNÒ

14. Kouman nou ka fè savé si roun moun « mové » pou nou pa rété ké l’ ?

¹⁴ Psaume 15:4 ka di ki roun moun ki zanmi ké Jéova « pa ka rété ké mové moun ». Kouman nou pouvé savé si roun moun mové ? A pa nou ki pouvé désidé si roun moun mové. Poukisa ? Paské kou nou pa parfè, nou pouvé kontan roun moun jis paské nou ka santi ki nou byen ké l’ épi nou pouvé rayi rounòt moun jis paské i ka nèrvé nou. A pou sa, a moun Jéova ka di ki yé « mové », nou pa divèt frékanté (1 Cor. 5:11). Annan yé, i gen sa-ya ki ka fè mové bagaj é ki pa lé répanti, sa ki pa ka rèspèkté sa nou ka krè ouben sa ki ka éséyé gaté nou lanmityé ké Jéova (Prov. 13:20).

15. Bay roun fason nou pouvé bay « sa ki gen lakrent pou Jéova » lònò.

¹⁵ Parkont, Psaume 15:4 ka di ki nou divèt bay « sa ki gen lakrent pou Jéova » lònò. A pou sa nou toujou ka chaché roun fason pou nou aji ké bonté épi ké rèspè ké zanmi Jéova-ya (Rom. 12:10). Larèstan vèrsé-a ka di ki sa-ya ki annan tant Jéova-a ‘pa ka rouvini anlè yé promès, menmsi a mové bagaj sa ka mennen pou yé’. Si nou pa ka tchenbé roun promès nou fè, nou ké fè ròt-ya lapenn bokou (Mat. 5:37). Parèkzanp, Jéova lé roun mouché ké so madanm rèspèkté vé yé fè yé konpanyen lò yé maryé. Sa ka fè l’ plézi osi lò papa ké manman-yan ka fè tousa yé pouvé pou tchenbé promès yé ka fè yé timoun. Nou lanmou pou Bondjé ké pou nou konpanyen ké fè nou fè tousa nou pouvé pou nou toujou tchenbé promès nou ka fè-ya.

16. Ki ròt bagaj nou pouvé fè pou nou bay zanmi Jéova-ya lònò ?

¹⁶ Rounòt fason nou pouvé bay zanmi Jéova-ya lònò, a lò nou kontan rousouvwè é lò nou kontan bay (Rom. 12:13). Lò nou ka pasé tan ké nou frè ké sò-ya, non sèlman pannan réinyon-yan ouben prédikasyon-an, mé osi lò nou ka anmizé ké yé, nou ka vin pi pròch ké yé é nou ka vin pi pròch di Jéova osi. Anplis di sa, lò nou ka montré ki nou kontan rousouvwè, nou ka imité nou Bondjé.

PANGA KONTAN SOUMAKÉ !

17. Poukisa Psaume 15-an ka palé di soumaké ?

¹⁷ Annan Psaume 15:5, nou ka li ki roun moun Jéova ka envité « pa ka prété so soumaké pou fè bénéfis é i pa ka asèpté soumaké anba tab kont roun moun inosan ». Poukisa sa psaume-an ki toupiti ka palé di soumaké ? Paské si nou kontan soumaké, sa pouvé divini pi enpòrtan pasé moun-yan épi pasé Jéova osi (1 Tim. 6:10). Annan Labib, roun ran pa té jis ké yé frè ki té maléré. Yé té ka fè yé randé yé plis soumaké ki sa yé té prété yé. I gen sèrten jij osi ki té ka asèpté soumaké anba tab pou yé kondané moun ki té inosan. Jéova rayi sa kalité bagaj-ya (Ézéch. 22:12).

18. Ki késyon pouvé idé nou réfléchi asou fason nou ka wè soumaké ? (Hébreux 13:5).

 ¹⁸ Sa té ké bon di réfléchi asou fason nou ka wè soumaké. Doumandé to kò : « Ès soumaké toujou annan mo tèt é ès mo toujou ka doumandé mo kò sa mo pouvé achté ké l’ ? Si mo prété soumaké koté roun moun, ès mo ka pran tan pou mo viré bay li so soumaké paské mo ka di ki i pa bézwen ? Ès lò mo gen soumaké mo ka santi ki mo miyò pasé ròt-ya ? Ès sa rèd pou mo bay ròt-ya ? Ès mo ka pansé ki roun ran frè ké sò gen soumaké paské yé kontan sa plis pasé Jéova ? Ès mo plis zanmi ké sa-ya ki gen soumaké pasé sa-ya ki maléré ? » Jéova fè nou roun bèl lònò, i envité nou annan so tant. Mé, a sèlman si nou pa kontan soumaké nou ké pouvé rété annan tant Jéova-a. Konsa, i pa ké janmen lésé nou tonbé ! (li Hébreux 13:5).

JÉOVA KONTAN SO ZANMI

19. Poukisa Jéova lé nou fè tousa ki marké annan Psaume 15-an ?

¹⁹ Psaume 15-an ka fini ké sa promès-a : « Roun moun konsa pa ké janmen tonbé » (Ps. 15:5). Sa vèrsé-a ka èspliké poukisa Jéova lé nou swiv tousa ki marké annan sa psaume-an. A paské i lé nou tchò kontan. Si nou ka fè sa Jéova ka doumandé nou fè, nou lavi ké pi bèl é i ké protéjé nou (Is. 48:17).

20. Kisa sa-ya Jéova ka envité ka antann ?

²⁰ Sa-ya Jéova ka envité annan so tant pouvé gen roun bèl lavi dimen. Sa-ya ki wen ké viv annan syèl-a koté Jézi « préparé roun plas » pou yé (Jean 14:2). É sa-ya ki gen èspwar viv asou latè-a ké kontan wè promès nou ka jwenn annan Révélation 21:3 fèt. A pa ti kontan nou tout kontan Jéova envité nou pou nou sa so zanmi, pou nou rété annan so tant pou tout-tan !