1. Kisa ka idé sèrvitèr Jéova-ya kontinyé adoré l’ menmsi yé ka jwenn problèm ?

 LABIB ka di ki nou ka viv « dé tan difisil pou sipòrté » (2 Tim. 3:1). Pèp Jéova-a ka jwenn menm problèm ki sa-ya ki annan monn Satan-an, é anplis di sa, moun ka pèrsékité yé paské yé ka adoré Jéova. Kisa ka idé nou kontinyé adoré Jéova magré sa problèm-yan ? Roun bagaj ki ka idé nou, a ki nou konnèt li ; nou savé ki i sa « Bondjé ki vivan-an » (Jér. 10:10 ; 2 Tim. 1:12).

2. Poukisa nou pouvé di ki Jéova sa Bondjé ki vivan-an ?

² Jéova, a roun vré moun ki ka soutni nou lò nou anba éprèv é ki ka chaché kouman i pouvé idé nou (2 Chron. 16:9 ; Ps. 23:4). Si nou ka wè l’ kou Bondjé ki vivan-an, sa pouvé idé nou tchenbé annan nenpòrt ki éprèv. Kouman sa idé rwa David ?

3. Kisa David té lé di lò i di : « Jéova vivan ! » ?

³ David té konnèt Jéova é i té ka konté asou li. Lò rwa Sayil ké ròt moun té ka éséyé tchwé l’, David doumandé Jéova idé l’ (Ps. 18:6). Bondjé réponn so lapriyè, i sové l’. David di : « Jéova vivan ! » (Ps. 18:46). Lò i di sa, a pa té jis pou di ki Bondjé ka èkzisté. Roun liv a ka di ki David té ka byen montré ki Jéova sa vré Bondjé-a, sa-la ki ké toujou idé so sèrvitèr-ya. Grasa so èspéryans, David té savé ki so Bondjé té « vivan », é kou i té sir di sa, i té ankò pi désidé adoré l’ épi louwé l’ (Ps. 18:28, 29, 49).

4. Ki bénédiksyon nou ké jwenn si nou ka wè Jéova kou Bondjé ki vivan-an ?

 ⁴ Si nou sir ki Jéova sa Bondjé ki vivan-an, nou ké anvi adoré l’ ké balan. Grasa sa, nou ké gen fòrs pou tchenbé anba éprèv-ya, nou ké anvi fè tousa nou pouvé pou travay pou li é nou ké byen désidé rété pròch di li.

BONDJÉ KI VIVAN-AN KÉ BAY TO FÒRS

5. Poukisa nou pa gen pyès rézon pou nou pè lò nou ka jwenn éprèv ? (Philippiens 4:13).

⁵ Si nou ka sonjé ki Jéova « vivan » é ki i toujou paré pou idé nou, nou ké pouvé tchenbé annan nenpòrt ki éprèv, piti kou gran. Anfèt, i pouvé idé nou annan nenpòrt ki éprèv paské pyès problèm pa tro rèd pou li. A li ki Tou-Pwisan-an é i pouvé bay nou fòrs pou tchenbé (li Philippiens 4:13). Donk, nou pa gen pyès rézon pou nou pè lò nou ka jwenn éprèv. Lò nou ka wè kouman Jéova ka idé nou lò nou gen ti problèm, nou sir ki i ké idé nou osi lò nou ké gen gro problèm.

6. Kisa ki rivé David ki idé l’ fè Jéova konfyans ankò plis ?

⁶ Annou wè dé bagaj ki rivé David é ki idé l’ fè Jéova konfyans ankò plis. Lò David té sa roun ti bèrjé, roun lyon chapé ké roun mouton ki té annan troupo so papa. Rounòt jou, a roun lous ki fè menm bagaj-a. Annan sa dé sitiasyon-yan, ké kouraj, i kouri dèyè sa zannimo-ya é i sové mouton-yan. Mé, i pa di ki a li rounso ki té rivé fè sa ké so pròp fòrs. I té savé ki a té Jéova ki té dèyè sa (1 Sam. 17:34-37). David pa jen bliyé sa. I pran tan byen réfléchi asou sa, é i vin sir ki Bondjé ki vivan-an té ké bay li fòrs pita osi.

7. Kouman fason David té ka wè bagaj-ya idé l’ briga kont Golyat ?

⁷ Pita, lò David dèt té sa roun jennjan toujou, i alé koté larmé Israyèl té ka briga. Sòlda-ya té pè paské roun bi papa Filisten yé té ka aplé Golyat, té soti pou « provoké larmé Israyèl-a » (1 Sam. 17:10, 11). Sòlda-ya té pè paské yé té ka mété yé lidé asou Golyat ki té rot é asou sa i té ka di pou provoké yé (1 Sam. 17:24, 25). Mé, a pa konsa David té ka wè bagaj-ya. Pou li, a pa té larmé Israyèl rounso Golyat té ka provoké, mé a té « larmé Bondjé ki vivan-an » i té ka provoké osi (1 Sam. 17:26). A Jéova an prémyé i té ka sonjé. I té savé ki Bondjé-a ki té idé l’ lò i té bèrjé, té ké idé l’ sa kou-a osi. Kou David té sir ki Jéova té ké soutni l’, i briga kont Golyat é i ganyen ! (1 Sam. 17:45-51).

8. Kisa to pouvé fè pou to pi sir ki Jéova ké idé to tchenbé annan sitiasyon ki rèd ? (gadé zimaj-a osi).

⁸ Nou menm osi nou ké rivé tchenbé annan sitiasyon ki rèd si nou pa ka bliyé roun bagaj enpòrtan : Bondjé ki vivan-an paré pou idé nou (Ps. 118:6). Nou ké sir di sa ankò plis, si nou ka réfléchi asou sa Jéova fè tan-lontan. Li istwè annan Labib ki ké fè to sonjé kouman i sové so sèrvitèr-ya (Is. 37:17, 33-37). Gadé osi artik ké vidéyo asou jw.org ki ka montré ki i ka soutni nou frè ké sò-ya jòdla. Anplis di sa, sonjé chak fwa Jéova idé to. Pitèt to ka pansé ki Jéova pa fè gran bagaj pou sové to. Parèkzanp, i pa sové to di djòl roun lyon ouben roun lous. Mé asiré, i fè bokou bagaj pou to annan to lavi. I envité to divini so zanmi (Jean 6:44). É a  grémési Jéova si to annan lavérité-a jik jòdla. Alòr, doumandé li idé to sonjé chak fwa i réponn to lapriyè, i soutni to o bon moman é i pran swen di to toupannan to té annan roun éprèv. Si to ka réfléchi asou sa kalité bagaj-ya, to ké pi sir ki Jéova ké kontinyé idé to.

9. Kouman nou divèt wè nou éprèv ? (Proverbes 27:11).

⁹ Si nou ka wè Jéova kou Bondjé ki vivan-an, sa ké idé nou wè nou problèm kou li menm ka wè yé. Lò nou gen problèm, nou divèt mété nou lidé asou sa ki pi enpòrtan-an. Djab-a ka di ki si nou gen problèm, nou ké lésé Jéova. Donk, fason nou ka réyaji lò nou gen problèm ka aji asou Jéova (Job 1:10, 11 ; li Proverbes 27:11). Lò nou ka rété fidèl ké nou Bondjé magré nou éprèv, nou ka montré ki nou kontan l’ é ki Djab-a, a roun mantò. Pitèt gouvèrnman koté to ka rété-a ka baré chimen pèp Jéova-a, pitèt to gen problèm soumaké ouben moun-yan koté to ka rété pa mélé ké bon nouvèl-a. Si a sa, sonjé ki to sitiasyon ka pèrmèt to fè tchò Jéova kontan. É pa bliyé ki i pa ké janmen pèrmèt yé tanté to pasé sa to pouvé sipòrté (1 Cor. 10:13). I ké bay to fòrs pou to tchenbé.

BONDJÉ KI VIVAN-AN KÉ RÉKONPANSÉ TO

10. Kisa Bondjé ki vivan-an ka fè pou sa-ya ki ka adoré l’ ?

¹⁰ Jéova sa « sa-la ki ka rékonpansé » sa-ya ki ka adoré l’ (Héb. 11:6). Dipi aprézan, i ka bay nou lapè é i ka idé nou kontan ké sa nou gen. Épi dimen, i ké bay nou lavi pou tout-tan. Nou pouvé fè l’ konfyans ké tout nou tchò, é nou pouvé sir ki i lé é ki i pouvé rékonpansé nou osi. É kou nou sir di sa, nou anvi fè tousa nou pouvé annan nou travay pou li, kou sèrvitèr Bondjé-ya fè l’ tan-lontan. Annou wè èkzanp roun krétyen annan 1^é syèk-a, Timoté (Héb. 6:10-12).

11. Kisa ki pousé Timoté travay rèd annan asanblé-a ? (1 Timothée 4:10).

 ¹¹ (Li 1 Timothée 4:10.) Timoté té gen roun lafwa ki té fò annan Bondjé ki ka rékonpansé-a. A pou sa i « travay rèd » é i « briga ». Kouman i fè sa ? Apot Pòl ankourajé l’ divini pi vayan pou ansényé é pou fè diskour. I doumandé l’ osi sa roun èkzanp bay so frè ké sò, jennjan kou granmoun. É annan sa i té gen pou fè, i té gen bagaj ki té difisil. Parèkzanp, i té divèt bay so frè ké sò-ya konsèy. I té divèt fè l’ ké lanmou, mé roun fason ki fran osi (1 Tim. 4:11-16 ; 2 Tim. 4:1-5). Timoté té pouvé sir ki menmsi a pa tout tan yé té ka wè ouben yé té kontan sa i té ka fè, Jéova té ké rékonpansé l’ (Rom. 2:6, 7).

12. Kisa ka pousé ansyen-yan travay rèd annan asanblé-a ? (gadé zimaj-a osi).

¹² Jòdla, ansyen-yan yé menm osi pouvé sir ki Jéova ka wè bon travay yé ka fè é ki sa travay-a gen valò pou li. Ansyen-yan ka ankourajé frè ké sò-ya, yé ka ansényé, yé ka préché, mé anplis di sa, bokou ka bay roun lanmen pou konstrwi koté nou ka adoré Jéova, ouben annan opérasyon pou poté sékour. Ròt annan group ki ka vizité moun malad ouben annan sa yé ka aplé comités de liaison hospitaliers-ya. Ansyen-yan ki ka asèpté fè tout sa bagaj-ya, savé ki asanblé-a, a di Jéova, a pa di roun moun. Donk, yé ka travay ‘ké tout yé nanm’ é yé sir ki Jéova ké rékonpansé yé (Col. 3:23, 24).

13. Kouman Jéova ka wè tousa nou ka fè pou adoré l’ ?

¹³ A pa tout moun ki pouvé divini ansyen. Mé tout moun pouvé bay Jéova roun bagaj. I kontan lò nou ka fè tousa nou pouvé pou adoré l’. I ka wè sa nou ka bay pou soutni tousa  òrganizasyon-an ka fè asou tout latè-a menmsi nou pa pouvé bay bokou. I kontan lò, menmsi nou pè moun, nou ka lévé nou lanmen pou réponn pannan roun réinyon ouben lò nou ka pardonnen sa-ya ki fè nou lapenn. Menmsi to pa pouvé bay bokou kou to té ké lé, a pou to sir ki tousa to ka fè gen valò pou Jéova. I kontan to, i kontan sa to ka fè é i ké rékonpansé to (Luc 21:1-4).

RÉTÉ PRÒCH KÉ BONDJÉ KI VIVAN-AN

14. Lò nou gen roun lanmityé ki fò ké Jéova, kouman sa ka idé nou rété fidèl ? (gadé zimaj-a osi).

¹⁴ Si nou lanmityé ké Jéova fò, sa ké pi fasil pou nou rété fidèl. Annou wè èkzanp Jozèf. I réfizé fè roun bagaj sèksyèl malpròp. Pou li, Bondjé, a té roun vré moun, é i pa té lé fè l’ lapenn (Gen. 39:9). Pou nou gen roun lanmityé ki fò ké Jéova osi, a pou nou pran tan priyè l’ é étidyé so Paròl. A konsa nou lanmityé ké li ké vin pi fò. É si kou Jozèf nou gen roun lanmityé ki fò ké Jéova, nou pa ké fè anyen ki pouvé fè l’ lapenn (Jacq. 4:8).

15. Kisa sa Israyélit-ya fè annan dézèr-a ka anprann nou ? (Hébreux 3:12).

¹⁵ Sa-ya ki ka bliyé ki Jéova sa Bondjé ki vivan-an pouvé lésé l’ byen vit. Annou wè sa ki rivé Israyélit-ya lò yé té annan dézèr-a. Yé té savé ki Jéova té ka èkzisté, mé yé koumansé douté ki i té ké bay yé sa yé té bézwen pou viv. Yé jis doumandé : « Ès Jéova anmitan nou ouben i pa anmitan nou ? » (Ex. 17:2, 7). Roun ti moso tan apré, yé tounen yé do bay Bondjé. Nou pa lé imité yé vyé èkzanp (li Hébreux 3:12).

16. Kisa ki pouvé fè nou lafwa fébli ?

¹⁶ Annan sa monn-an, sa rèd rété pròch di Jéova. Bokou moun pa ka krè ki Bondjé ka èkzisté. É souvan, yé té ké di ki sa-ya ki pa ka rèspèkté so lalwa gen  roun bèl ti lavi. Lò nou ka wè sa, sa pouvé fè nou lafwa fébli. Pitèt nou pa ké janmen di ki Bondjé pa ka èkzisté, mé pitèt nou pouvé koumansé douté ki i ké fè roun bagaj pou nou. Pannan roun tan, moun-an ki ékri Psaume 73-a té gen sa kalité dout-ya. I té ka wè ki moun a so lantou pa té ka obéyi lalwa Bondjé, é pourtan, yé té gen roun bèl ti lavi. Atò, i koumansé doumandé so kò si adoré Jéova té vo lapenn (Ps. 73:11-13).

17. Kisa ki ké idé nou rété pròch ké Jéova ?

¹⁷ Kisa ki idé moun-an ki ékri Psaume 73-a chanjé lidé ? I réfléchi asou sa ki té ké rivé sa-ya ki ka bliyé Jéova (Ps. 73:18, 19, 27). I réfléchi osi asou bénédiksyon nou ka jwenn lò nou ka adoré Jéova (Ps. 73:24). Nou menm osi, annou réfléchi asou bénédiksyon Jéova ka bay nou. É annou imajiné kouman nou lavi té ké fika si nou pa té ka sèrvi l’. Si nou ka réfléchi asou sa kalité bagaj-ya, sa pouvé idé nou pou nou byen désidé rété fidèl, épi di menm bagaj ké moun-an ki ékri Psaume 73-a : « Pou mo menm, vini òbò Bondjé, a roun bon bagaj pou mo » (Ps. 73:28).

18. Poukisa nou pa bézwen pè pou dimen ?

¹⁸ Nou pouvé sir ki nou ké pouvé tchenbé anba nenpòrt ki problèm nou ké pitèt jwenn pannan sa dèrnyé jou-ya. Poukisa ? Paské nou ka ‘sèrvi kou èsklav roun Bondjé ki vivan é ki vré’ (1 Thess. 1:9). Nou Bondjé sa roun vré moun ki ka idé sa-ya ki ka adoré l’. I té la ké so sèrvitèr-ya an tan-lontan, é i la ké nou jòdla osi. Titalò, nou ké douvan pi gran tribilasyon ki pa janmen fèt-a. Mé nou pa ké nou rounso, Jéova ké la ké nou (Is. 41:10). Donk, a pou nou tout « plen ké kouraj » é annou di ké tout nou fòrs : « Jéova ka sové mo ; mo pa ké pè » (Héb. 13: 5, 6).