Jéova lé ki moun maryé viv ansanm ké tchò kontan é rété pròch pou tout-tan (Mat. 19:4-6). Si to lé maryé, kouman to pouvé trouvé roun bon madanm ouben roun bon mouché ? Kou a Jéova ki fè nou, i byen savé sa nou bézwen fè pou nou gen roun maryaj ki ka fè nou tchò kontan. A pou sa, si to ka swiv prensip i ka bay nou, asiré pa pitèt to tchò ké kontan. Annou wè plizyèr annan sa prensip-ya.

Pou koumansé, men sa nou divèt savé : « Tchò-a pi trèt pasé pyès ròt bagaj é i byen désidé » (Jér. 17:9). Lò dé moun ki lé maryé ka koumansé frékanté yé konpanyen, yé tchò pouvé pri vit é sa pouvé anpéché yé byen réfléchi. Si apré sa, yé ka kouté sa yé tchò ka di yé é yé ka désidé maryé, sa pouvé fini annan roun bèl benyenyen (Prov. 28:26). A pou sa, a pa roun bon bagaj lò yé ka di sa yé gen annan yé tchò tro bònò ouben lò yé ka promèt yé konpanyen gran bagaj anvan menm yé byen konnèt ròt-a.

Proverbes 22:3 ka di : « Moun-an ki ka fè atansyon ka wè danjé-a é i ka séré so kò, mé moun-an ki ka krè tout bagaj ka kontinyé vansé é i ka soufri akoz di sa. » Ki danjé i gen ké sit ki fèt pou jwenn roun moun pou maryé ? Malérèzman, roun ran moun kontré ké moun yé pa té konnèt asou Entèrnèt, yé koumansé frékanté yé é pita yé konprann ki moun-an yé té ka frékanté-a té doublé yé. I gen moun malonnèt osi ki fè fo kont asou Entèrnèt pou bloublou moun ki pa ka panga é pou vòlò yé soumaké. Détan, sa moun malonnèt-ya té ka di yé té Témwen Jéova.

Annou wè rounòt danjé. Roun ran annan sa sit-ya ka sèrvi lojisyèl pou kalkilé ki kalité moun ka alé ké to. Mé anyen pa ka di ki sa yé ka di-a vré. Désidé maryé ké roun moun, a roun bagaj ki enpòrtan toubonnman. Ès sa té ké roun bon bagaj di lésé roun machin roun moun fè désidé kimoun ki pi bon pou to maryé ? Ès matématik pouvé pi fò pasé prensip Labib-a ka bay ? (Prov. 1:7 ; 3:5-7).

Nou ka jwenn sa ròt prensip-a annan Proverbes 14:15 : « Roun moun tèbè ka krè tousa yé ka di l’, mé roun moun ki ka fè atansyon ka panga koté i ka mété so pyé. » Anvan to désidé roun moun bon pou to, a pou to anprann byen konnèt li.  Mé si to ka sèrvi roun sit pou fè sa, sa ké rèd menm. Menm si zòt chak pouvé wè enfòrmasyon asou ròt-a é menm si zòt ka pasé roun patché tan ka palé ansanm asou Entèrnèt, ès to pouvé vréman di ki to konnèt moun-an ? Roun ran moun ki té ka pansé ki yé té trouvé bon moun-an pou fè yé lavi rété èstébékwé lò yé wè moun-an vré é lò yé konprann ki kalité moun i té sa vréman.

Men sa David ékri annan Psaume 26:4 : « Mo pa ka maché ké moun ki ka bloublou moun é mo pa ka menm bòrdé moun-yan ki ka séré ki kalité moun yé fika ». Bokou moun ka pansé sa nòrmal di manti asou yé menm pou fè moun krè ki yé miyò pasé sa yé sa vréman. Roun ran moun ka séré yé défo ouben ka fè atansyon pou sa yé ka mété asou Entèrnèt pa fè moun wè sa défo-ya. Roun moun pouvé di ki i Témwen Jéova mé ès i batizé vré ? Ès i gen bon rélasyon ké Jéova ? Ès moun annan so asanblé ka rèspèkté l’ paské i gen roun bèl kondwit ? Ouben ès so kondwit pa djè bèl, ouben pi mové ankò, ès a pa roun bon frékantasyon menm ? (1 Cor. 15:33 ; 2 Tim. 2:20, 21). Dapré sa Labib-a ka di, ès i gen drwa maryé ? To bézwen savé tout sa bagaj-ya. Mé to pa ké janmen konnèt tousa si to pa ka palé ké Témwen ki konnèt sa moun-an to ka frékanté-a (Prov. 15:22). Épi, roun sèrvitèr Jéova ki fidèl pa ké menm sonjé alé mété so kò ké pyès moun ki pa ka krè annan Bondjé (2 Cor. 6:14 ; 1 Cor. 7:39).

Ké tout danjé i gen ké sa sit ki fèt pou jwenn moun pou maryé, miyò to chaché rounòt fason pou kontré sa-la ki ké divini to madanm ouben to mouché. Mé, koté to ké pouvé kontré ké moun-an to ké maryé ké li-a ? Lò gouvèrnman-an pa ka défann nou jwenn nou konpanyen, roun Témwen Jéova pouvé anprann konnèt roun moun lò i ka alé annan réinyon-yan, annan gran asanblé-ya ouben annan ròt okazyon ké plizyèr zanmi.

Lò nou pa pouvé jwenn nou konpanyen annan Sal di Rwayonm-yan, kou pannan pandémi Covid-19-a, nou ka sèrvi Entèrnèt pou alé annan nou réinyon. To gen lokazyon anprann konnèt ròt Témwen Jéova ki pa maryé. To pouvé kouté yé fè yé diskour ouben tandé yé bay répons pou montré yé lafwa (1 Tim. 6:11, 12). To pouvé osi palé ké yé annan ti-lasal yé ka fè apré réinyon-yan. Épi lò to ka alé annan bagaj yé ka òrganizé asou Entèrnèt pou anmizé, to pouvé byen gadé kouman moun-an to lé konnèt-a ka fè ké ròt-ya ; sa ké pèrmèt to wè kouman i fika (1 Pierre 3:4). Piti piti, lò to ké anprann konnèt moun-an pi byen, to ké wè si zòt lé fè menm bagaj-a annan zòt lavi é si zòt toulédé bon pou maryé ansanm.

Lò moun ki pa maryé ka sèrvi prensip ki annan Labib-a pou idé yé chaché roun madanm ouben roun mouché, yé gen plis chans gen roun maryaj ké tchò kontan. A sa menm proverbe-a ka di : « Sa-la ki ka trouvé roun bon madanm [ouben roun bon mari] a roun trézòr i trapé, é i ka ganyen favèr Jéova-a » (Prov. 18:22).