ARTIK POU ÉTIDYÉ 31
« A pou nou fò, byen dibout »
« Mo frè-ya, zòt mo kontan-an, a pou zòt fò, byen dibout » (1 COR. 15:58).
KANTIK 122 Soyons fermes, inébranlables !
KOUTWÉY ASOU SA NOU KÉ WÈ a
1-2. Poukisa nou pouvé di ki roun krétyen kou roun gran batiman ki rot bokou ? (1 Corinthiens 15:58).
AN 1978, annan vil Tokyo (Japon), yé koumansé konstrwi roun gran batiman ki té ka monté rot kousidiré i té ka touché syèl-a. I té gen 60 étaj. Moun-yan té ka doumandé yé kò kouman sa batiman-an té ké pouvé tchenbé lò i té ké gen tranblémandétèr ki ka rivé souvan annan sa koté-a. Mé sa-ya ki té ka konstrwi sa batiman-an té gen roun sigré. Ki sigré ? Yé té fè sa batiman-an roun fason pou i té pouvé pliyé pannan roun tranblémandétèr san i pa kasé. I té ké pouvé tchenbé pannan roun tranblémandétèr paské i té fèt pou boujé roun ti moso san i pa krazé. Krétyen-yan kou sa gran batiman-an. Poukisa ?
2 Roun krétyen divèt fò é an menm tan a pa pou i tro rèd. I divèt fò ké byen dibout lò a pou défann lalwa ké prensip Jéova-ya (li 1 Corinthiens 15:58). Annan sa sitiasyon-an, i « paré pou obéyi » é i pa ka fè pyès konpromi. An menm tan, i divèt montré i « rézonab », sa lé di i divèt adapté so kò lò i pouvé fè l’ ouben lò i divèt fè l’ (Jacq. 3:17). Si i ka réfléchi konsa, i pa ké tro rèd, é i pa ké asèpté tout bagaj konsa non plis. Annan sa artik-a, nou ké wè annan ki sitiasyon nou divèt fò. Nou ké wè osi senk métòd Satan ka sèrvi pou éséyé fè nou arété obéyi Jéova. Apré sa, nou ké wè kouman nou pouvé tchenbé rèd douvan li.
ANNAN KI SITIASYON NOU DIVÈT FÒ ?
3. Ki lalwa Jéova bay nou annan Actes 15:28, 29 ?
3 Jéova, a li prémyé ki gen drwa bay nou lalwa pou nou swiv, é i toujou fè so lalwa roun fason pou sa fasil pou so pèp konprann li (Is. 33:22). Parèkzanp, annan 1é syèk-a, kolèj santral-a bay trwa domenn koté krétyen-yan divèt rété fò : 1) yé pa divèt adoré zidòl é a Jéova rounso yé divèt adoré, 2) yé divèt rèspèkté disan-an ki sakré é 3) yé divèt asèpté swiv prensip-ya ki annan Labib-a é ki rot (li Actes 15:28, 29). Jòdla, kouman krétyen-yan pouvé rété fò annan sa trwa domenn-yan ?
4. Kouman nou ka montré ki a Jéova rounso nou ka adoré ? (Révélation 4:11).
4 Nou pa ka adoré zidòl é a Jéova rounso nou ka adoré. Jéova té doumandé Israyélit-ya adoré li rounso (Deut. 5:6-10). Lò Djab-a tanté Jézi, Jézi byen fè li sonjé ki a Jéova rounso nou divèt adoré (Mat. 4:8-10). A pou sa nou pa ka adoré zidòl. Nou pa ka adoré moun non plis — parèkzanp, roun chèf rélijyé, roun chèf politik, roun moun ki sélèb annan zafè èspòr, sinéma, lanmizik —, nou pa ka aji ké yé kousidiré a té dé bondjé. A Jéova rounso nou ka adoré, sa-la ki « kréyé tout bagaj », é nou ka obéyi li (li Révélation 4:11).
5. Poukisa nou ka rèspèkté lalwa Jéova-a asou disan-an ki sakré ?
5 Nou ka rèspèkté lalwa Jéova asou disan-an ki sakré. Poukisa ? Paské Jéova ka di ki disan-an ka réprézanté lavi, é lavi, a roun kado i fè nou ki gen bokou valò (Lév. 17:14). Prémyé fwa Jéova di moun-yan ki yé té pouvé manjé lachè zannimo-ya, i défann yé manjé disan-an (Gen. 9:4). I répété sa lò i bay Israyèl Lalwa Moyiz-a (Lév. 17:10). É annan 1é syèk-a, i fè kolèj santral-a di tout krétyen-yan « réfizé pran […] disan » (Actes 15:28, 29). Nou byen désidé obéyi sa koumannman-an lò nou ka pran roun désizyon pou nou lasanté b.
6. Kisa nou ka fè pou nou swiv prensip Bondjé-ya ki rot ?
6 Nou dakò ké prensip Jéova-ya ki rot (Héb. 13:4). Apot Pòl ka sèrvi roun zimaj ki fò lò i ka doumandé nou « tchwé » tout parti annan nou kò, sa lé di fè tousa nou pouvé pou nou jité tout vyé mové anvi. Nou ka fè atansyon pou nou pa gadé anyen, ouben pou nou pa fè anyen ki pouvé fè nou fè roun péché sèksyèl (Col. 3:5 ; Job 31:1). Lò nou douvan roun tantasyon, lanmenm nou ka jité tout mové lidé ouben tout mové konpòrtman ki pouvé gaté nou lanmityé ké Bondjé.
7. Kisa nou divèt byen désidé fè, é poukisa ?
7 Jéova lé nou ‘obéyi […] ké tout nou tchò’ (Rom. 6:17). So konsèy toujou bon pou nou é nou pa pouvé chanjé so lalwa (Is. 48:17, 18 ; 1 Cor. 6:9, 10). A pou sa, nou ka fè tousa nou pouvé pou nou fè Jéova plézi. É nou gen menm mantalité ké moun-an ki ékri sa Psaume-an : « Mo désidé obéyi to koumannman toulong, jiska lafen » (Ps. 119:112). Mé Satan byen désidé fè nou moli pou nou pa djè anvi obéyi Jéova ankò. Ki métòd i ka sèrvi ?
KOUMAN SATAN KA ÉSÉYÉ FÈ NOU MOLI POU NOU PA DJÈ ANVI OBÉYI JÉOVA ANKÒ ?
8. Ki kalité pèrsékisyon Satan ka sèrvi pou nou pa djè anvi obéyi Jéova ankò ?
8 Pèrsékisyon-an. Pou nou pa anvi obéyi Jéova ankò, Satan ka sèrvi vyolans ké pèrsékisyon-an. I lé « manjé » nou, sa lé di krazé nou lanmityé ké Jéova (1 Pierre 5:8). Annan 1é syèk-a, yé ménasé krétyen-yan, yé bat yé é yé tchwé roun ran annan yé paské yé té byen désidé rété fidèl (Actes 5:27, 28, 40 ; 7:54-60). Jòdla, Satan toujou ka sèrvi pèrsékisyon-an. Parèkzanp, a sa ki ka pasé lò yé ka malmennen nou kou yé ka fè l’ Larisi ké annan ròt péyi ouben lò yé ka fè ròt bagaj pou pèrsékité nou.
9. Pran èkzanp roun frè pou èspliké poukisa sa enpòrtan pou nou panga présyon anba anba.
9 Présyon anba anba. Anplis di pèrsékité nou, Satan ka sèrvi « trap » (Éph. 6:11). Annou wè sa ki rivé Robert, roun di nou frè. I té antré lopital pou roun gro opérasyon. I di dòktèr-a ki i pa té ké janmen asèpté yé bay li disan. Dòktèr-a promèt li ki i té ké rèspèkté so désizyon. Mé lannwit anvan yé opéré l’, rounòt dòktèr vini wè Robert lò so fanmi té ja alé. I di li ki nòrmalman yé pa té ké bézwen bay li disan mé kou nou pa jen savé, yé té ké mété disan asou koté kanmenm. Pitèt i té ka pansé ki, kou so fanmi pa té la, Robert té ké chanjé lidé. Mé Robert rété fò. I répété ki i pa té ké janmen asèpté pran disan.
10. Poukisa nou divèt réfizé réfléchi kou moun-yan ka réfléchi jòdla ? (1 Corinthiens 3:19, 20).
10 Fason moun-yan ka réfléchi. Si nou ka réfléchi kou moun-yan ka réfléchi jòdla, nou ka riské bliyé Jéova ké so prensip (li 1 Corinthiens 3:19, 20). « Sajès sa monn-an » souvan ka ankourajé moun-yan dézobéyi Bondjé. Annan 1é syèk-a, sa-ya ki té ka rété Pèrgam ké Tiyatir té ka adoré zidòl é yé té ka mennen roun vyé lavi ; é roun ran krétyen koumansé fè kou yé. Donk Jézi roupran sa asanblé-ya annan sa dé vil-ya paské yé té ka asèpté imoralité sèksyèl-a (Rév. 2:14, 20). Jòdla osi, moun-yan ka éséyé fè nou asèpté vyé lidé. Nou zanmi ouben nou fanmi ké pitèt éséyé fè nou krè ki nou tro rèd é ki nou divèt dézobéyi lalwa Jéova. Parèkzanp, pitèt yé ké di nou ki nou pouvé fè sa nou lé, sa pa ka fè anyen, é ki prensip-ya ki annan Labib-a, a bagaj tan-lontan.
11. Kisa nou pa divèt fè ?
11 Détan, pitèt nou pouvé pansé ki sa Jéova ka di nou fè pa asé klè é pitèt menm nou pouvé anvi alé « pi lwen ki sa ki marké » (1 Cor. 4:6). A annan sa trap-a chèf rélijyé-ya annan lépòk Jézi tonbé. Yé té ka mété yépa règ annan Lalwa Moyiz é akoz di sa, yé té ka fè moun-yan poté roun fardo ki té lou (Mat. 23:4). Jéova ka sèrvi so Paròl ké so òrganizasyon pou byen di nou sa nou divèt fè ké sa nou pa divèt fè. Donk nou pa gen pyès rézon pou mété plis règ pasé sa yé ka bay nou (Prov. 3:5-7). Alòr, annou pa alé pi lwen ki sa ki marké annan Labib-a é annou pa oblijé nou frè ké sò-ya swiv pyès règ asou bagaj chak moun gen drwa désidé pou li menm.
12. Kouman Satan ka fè tout moun tandé bagaj ki ka bloublou yé ?
12 Bagaj ki ka bloublou moun. Satan ka sèrvi « bagaj ki pa gen valò é ki ka bloublou moun » ké ‘prensip moun-yan annan sa monn-an ka swiv’ pou tronpé é pou divizé moun-yan (Col. 2:8). Annan 1é syèk-a, annan sa bagaj-ya ki ka bloublou moun, i té gen filozofi ki té ka apiyé asou lidé moun-yan ké tradisyon jwif ki pa té ka vini di Ékritir-ya. Épi sèrten té lé fè moun krè ki krétyen-yan té divèt rèspèkté Lalwa Moyiz. A té dé bagaj ki té ka bloublou moun paské yé té ka anpéché moun-yan mété yé lidé asou Jéova, vré Sours sajès-a. Jòdla, Satan ka sèrvi laradyo, Entèrnèt, latélé ké rézo sosyal-ya pou fè tout moun tandé fo enfòrmasyon chèf politik-ya ka di ouben bagaj moun ka di san yé pa gen pyès prèv asou sa. A pa dé fwa nou wè sa pannan pandémi Covid-19-a c. Frè ké sò-ya ki swiv sa nou òrganizasyon té di nou fè pa enkyété yé kò tròp kou sa-ya ki té ka kouté fo enfòrmasyon (Mat. 24:45).
13. Kisa ki pouvé distrè nou, é poukisa nou divèt panga ?
13 Bagaj ki ka distrè nou. A pa pou nou bliyé « ki bagaj ki pi enpòrtan » (Phil. 1:9, 10). Bagaj-ya ki ka distrè nou pouvé fè nou gaspiyé roun patché tan épi fè nou arété mété nou lidé asou sa ki pi enpòrtan. Bagaj nou ka fè touléjou — kou manjé, bwè, anmizé, travay — pouvé distrè nou si nou ka mété yé an prémyé annan nou lavi (Luc 21:34, 35). Anplis di sa, touléjou yé ka éséyé plen nou tèt ké enfòrmasyon asou sa yé ka aplé conflits sociaux ouben controverses politiques. Nou pa pouvé lésé sa bagaj-ya distrè nou sinon nou ké pouvé koumansé pran parti annan nou tèt é annan nou tchò. Nou fin wè plizyèr métòd Satan ka sèrvi pou nou pa anvi fè sa ki bon ankò. Aprézan, annou wè kouman nou pouvé rété fò épi tchenbé rèd douvan li.
KISA NOU DIVÈT FÈ POU NOU RÉTÉ FÒ ?
Pou to pouvé rété byen dibout, a pou to sonjé poukisa to bay Jéova to lavi é to batizé, a pou to étidyé Paròl Bondjé-a épi réfléchi asou sa to ka anprann, a pou to chaché gen roun tchò ki fò é a pou to fè Jéova konfyans (gadé paragraf 14-18).
14. Bay roun prémyé bagaj to pouvé fè pou to rété fò.
14 Sonjé poukisa to bay Jéova to lavi é to batizé. To fè sa paské to té lé fè Jéova plézi. Sonjé sa ki fè to sir ki to té trapé lavérité-a. To anprann konnèt to Papa ki annan syèl-a é to koumansé kontan l’ épi rèspèkté l’. To lafwa grandi é i fè to répanti. To tchò fè to lésé mové bagaj to té ka fè épi fè sa Jéova kontan. To té soulajé lò to konprann ki Bondjé té pardonnen to (Ps. 32:1, 2). To koumansé vini annan nou réinyon épi palé pou tout moun di bèl bagaj to té anprann. Aprézan to bay Bondjé to lavi é to batizé, to ka maché asou chimen lavi-a é to byen désidé pa lésé sa chimen-an (Mat. 7:13, 14).
15. Ki bénédiksyon nou ka jwenn lò nou ka étidyé épi nou ka pran tan réfléchi asou sa nou ka étidyé ?
15 Étidyé Paròl Bondjé-a épi réfléchi asou sa to ka anprann. Menm fason roun pyébwa bézwen so rasin alé fon pou i tchenbé dibout, nou bézwen nou lafwa alé fon annan Paròl Bondjé-a pou nou rété fò. Pi roun pyébwa ka grandi pi so rasin ka alé lwen é ka alé fon annan latè-a. Menm fason-an, lò nou ka étidyé é nou ka pran tan réfléchi asou sa nou ka étidyé, nou lafwa ka vin pi fò é nou pi sir ankò ki a prensip Bondjé-ya ki pi bon (Col. 2:6, 7). Sonjé kouman Jéova idé so sèrvitèr-ya tan-lontan lò i di yé sa pou yé té fè, lò i bay yé konsèy é lò i protéjé yé. Parèkzanp, Ézékyèl byen gadé lò roun zanj té ka byen méziré tanp-a ki té annan vizyon i té ka wè-a. Sa vizyon-an bay Ézékyèl plis fòrs. É jòdla, sa ka anprann nou ki sa enpòrtan pou nou swiv prensip Jéova mété pou vré ladorasyon-an d (Ézéch. 40:1-4 ; 43:10-12). Nou menm osi, nou ka jwenn roun patché bénédiksyon lò nou ka pran tan étidyé bagaj-ya ki fon annan Paròl Bondjé-a épi réfléchi asou yé.
16. Kou tchò Robert té fò, kouman sa protéjé li ? (Psaume 112:7).
16 A pou to chaché gen roun tchò ki fò. Rwa David di Jéova kouman i té kontan li. I chanté : « Mo tchò fò, o Bondjé » (Ps. 57:7). Nou menm osi nou tchò pouvé fò, sa lé di nou pouvé fè Jéova konfyans ké tout nou tchò (li Psaume 112:7). A sa ki rivé Robert nou ja palé anvan. Lò dòktèr-a di li ki yé té ké mété disan asou koté, Robert réponn li ki si yé té ka riské bay li disan, i té ké rantré an so kaz lanmenm. I ka di : « Mo pa ézité pyès é mo pa té enkyèt. »
Si nou lafwa fò, nou ké pouvé rété fò kèlkéswa éprèv nou ka jwenn (gadé paragraf 17).
17. Kisa èkzanp Robert ka anprann nou ? (gadé zimaj-a osi).
17 Robert rété fò paské i té ja désidé pa fè pyès konpromi lontan anvan i antré lopital. Kisa ki fè li désidé sa ? Prémyèrman, i té lé fè tchò Jéova kontan. Dézyèmman, i té pran tan byen étidyé sa Labib-a ké nou piblikasyon ka di asou lavi ké disan-an ki sakré. Trwazyèmman, i té sir ki si i té ka obéyi Jéova, i té ké jwenn bénédiksyon pou tout-tan. Nou menm osi, nou tchò pouvé fò kèlkéswa éprèv nou ka jwenn.
Barak ké so sòlda kouri dèyè larmé Siséra ké kouraj (gadé artik paragraf 18).
18. Ki èkzanp Barak ka bay nou annan zafè fè Jéova konfyans ? (gadé zimaj-a anlè prémyé paj-a).
18 Fè Jéova konfyans. Barak ganyen roun lagèr paské i fè Jéova konfyans lò i doumandé li fè sèrten bagaj. A sa lépòk-a, i pa té gen pyès boukliyé ni pyès lans an Israyèl. Pourtan, Jéova doumandé li alé briga ké larmé Kananéyen-yan. Yé chèf, a té Siséra é so sòlda té gen bokou zarm (Juges 5:8). Profétès Débora di Barak désann annan roun savann an mitan dé montangn pou alé briga ké Siséra ké so 900 char. Menm si i té savé ki sa char-ya té ké pi fò pasé li annan sa koté-a, Barak obéyi. Lò sòlda Israyélit-ya té ka désann di montangn Tabòr-a, Jéova fè roun gro lapli tonbé. Char Siséra-ya koumansé kolé annan labou-a é Jéova fè Barak ganyen (Juges 4:1-7, 10, 13-16). Jéova ké fè nou ganyen nou menm osi si nou ka fè li konfyans é si nou ka fè sa-ya ki ka réprézanté li konfyans lò yé ka di nou sa pou nou fè (Deut. 31:6).
A POU TO BYEN DÉSIDÉ RÉTÉ FÒ
19. Poukisa to byen désidé rété fò ?
19 Tout tan nou ké viv annan sa monn-an, nou ké toujou divèt briga pou nou rété fò (1 Tim. 6:11, 12 ; 2 Pierre 3:17). Annou byen désidé pa lésé ni pèrsékisyon-an, ni présyon anba anba, ni fason moun-yan ka réfléchi jòdla, ni bagaj ki ka bloublou moun, ni bagaj ki pouvé distrè nou ‘charyé’ nou (Éph. 4:14). Annou rété maré ké Jéova, toujou byen désidé obéyi so koumannman. Mé pou sèrten bagaj, nou divèt rézonab. Annan ròt artik-a, nou ké wè ki èkzanp Jéova ké Jézi ka bay nou annan sa domenn-an.
KANTIK 129 Gardons notre endurance
a Dipi annan lépòk Adan ké Èv, Satan ka éséyé fè moun krè ki sa pi bon pou yé désidé yé rounso kisa ki bon é kisa ki mové. É i té ké lé nou fè menm bagaj-a parapòrta lalwa Jéova ké konsèy nou ka rousouvwè annan asanblé krétyen-an. Sa artik-a ké idé nou pa lésé mantalité moun-yan annan monn Satan-an détenn asou nou épi i ké idé nou pi désidé obéyi Jéova.
b Pou gen plis détay asou fason Bondjé ka wè disan-an, gadé léson 39 annan liv Viv ké tchò kontan pou tout-tan !
c Gadé artik « Protégez-vous de la mésinformation » asou jw.org.
d Pou gen plis enfòrmasyon asou sa, gadé chapit 13 ké 14 annan liv Le culte pur de Jéhovah enfin rétabli !