1. Ki vérité to anprann lò to koumansé étidyé Labib-a ?

 ÈS TO ka sonjé sa to rousanti lò to koumansé étidyé Labib-a ? Pitèt to té étoné lò to anprann ki Bondjé gen roun non. Pitèt to té soulajé lò to anprann ki Bondjé pa ka fè moun soufri annan difé lanfè. Épi to té dèt kontan lò to anprann ki to té ké pouvé rouwè moun to kontan ki mouri épi viv ansanm ké yé annan paradi-a asou latè-a.

2. Ki progrè to fè toupannan to té ka anprann vérité-ya ki annan Labib-a ? (Éphésiens 5:1, 2).

² Pi to étidyé Labib-a, pi to lanmou pou Jéova vin pi fò. Sa lanmou-a fè to apliké sa to té ka anprann. Gras a prensip-ya ki annan Labib-a, to rivé pran pi bon désizyon. Pou to té pouvé fè to Bondjé plézi, to chanjé to mantalité ké to konpòrtman. Menm fason roun timoun ka imité so papa ké so manman ki kontan li, to té ka imité to Papa ki annan syèl-a (li Éphésiens 5:1, 2).

3. Ki késyon nou pouvé pozé nou kò ?

³ Nou pouvé doumandé nou kò : « Ès jòdla mo kontan Jéova plis pasé lò mo batizé ? Ès mo ka sanblé Jéova plizanplis annan fason mo ka réfléchi ké annan sa mo ka fè ? Parèkzanp, ès mo frè ké sò-ya ka wè ki mo kontan yé plizanplis ? » Si « lanmou to té gen o koumansman » vin roun tibi frèt, pa dékourajé. A sa ki rivé prémyé krétyen-yan. Jézi pa lésé yé tonbé é i pa ké lésé nou tonbé non plis (Rév. 2:4, 7). I savé ki nou pouvé viré gen menm lanmou nou té gen lò nou koumansé étidyé Labib-a.

4. Kisa nou ké wè annan sa artik-a ?

 ⁴ Annan sa artik-a, nou ké wè kouman nou pouvé kontinyé fè nou lanmou pou Jéova ké pou nou konpanyen vin pi fò. Apré sa, nou ké wè plizyèr bénédiksyon nou tout, ki a nou menm ki a nou frè ké sò-ya, nou pouvé jwenn lò nou ka fè sa.

5-6. a) Ki problèm Pòl jwenn lò i té ka préché ? b) Kisa ki idé Pòl pa lésé tonbé ?

⁵ Apot Pòl té kontan annan so sèrvis pou Jéova, mé a pa tout tan sa té fasil pou li. I vwayajé lwen souvan, é a sa lépòk-a, sa pa té fasil pou vwayajé ; plizyèr fwa i té « an danjé akoz di larivyè » é « akoz di volèr-ya ». Anplis di sa, détan, so lèlmi fè li wè mizè (2 Cor. 11:23-27). É a pa tout tan so frè ké sò-ya té gen rékonésans pou bagaj i té ka fè pou yé (2 Cor. 10:10 ; Phil. 4:15).

⁶ Kisa ki idé Pòl pa lésé tonbé ? Gras a Ékritir-ya ké sa i té wè annan so lavi, i té anprann bokou bagaj asou Jéova. A pou sa, i té sir ki so Bondjé té kontan li (Rom. 8:38, 39 ; Éph. 2:4, 5). A konsa i vin gen bokou lanmou pou li. É i montré sa lanmou-a lò i « idé sen-yan » é lò i kontinyé fè l’ (Héb. 6:10).

7. Bay roun fason pou to fè to lanmou pou Jéova vin pi fò.

⁷ Nou pouvé fè nou lanmou pou Jéova vin pi fò si nou gen labitid étidyé so Paròl souvan. Lò to ka li vèrsé annan Labib-a, éséyé wè kisa sa ka anprann to asou li. Doumandé to kò : « Kouman sa istwè-a ka montré mo ki Jéova kontan mo ? Poukisa sa ka fè mo kontan l’ plis ? »

8. Poukisa nou ka di ki nou pouvé fè nou lanmou pou Bondjé vin pi fò gras a lapriyè ?

⁸ Rounòt fason pou nou fè nou lanmou pou Jéova vin pi fò, a lò nou ka priyè l’ touléjou é lo nou ka di li sa nou gen annan nou tchò (Ps. 25:4, 5). Jéova, li menm, ké réponn nou lapriyè (1 Jean 3:21, 22). Men sa Khanh b, roun sò ki ka viv an Azi, ka di : « Anvan, mo té kontan Jéova parapòrta sa mo té anprann asou li annan Labib-a. Mé lò mo wè ki i té ka réponn mo lapriyè, mo vin kontan li plis é sa bay mo anvi fè li plézi. »

9. Kisa ki ka montré ki Timoté té ka fè so lanmou pou so frè ké sò-ya vin pi fò ?

⁹ Plizyèr lannen apré Pòl divini krétyen, i kontré ké Timoté, roun jennjan ki té gen roun patché bèl kalité é ki té kontan Jéova ké moun-yan bokou. Pita, men sa Pòl di asou li pou Filipyen-yan : « Mo pa gen pyès ròt moun ki ka fè kou li, ki ka vréman enkyété so kò pou zòt » (Phil. 2:20). Pitèt Timoté té konnèt byen òrganizé bagaj-ya ouben i té ka fè bèl diskour, mé a pa sa ki touché Pòl lò i wè l’. Aparaman, sa ki touché li, a ki Timoté té kontan so frè ké sò-ya. Yé té divèt présé wè li rouvin vizité yé asanblé (1 Cor. 4:17).

10. Kouman Ana ké so mari montré yé frè ké yé so-ya ki yé té kontan yé ?

¹⁰ Nou menm osi, annou chaché wè kouman nou pouvé idé nou frè ké nou sò-ya (Héb. 13:16). Annan ròt artik-a, nou palé di Ana ké so mari. Annou wè sa yé fè. Apré roun gro tanpèt pasé, yé alé wè roun fanmi Témwen. Yé wè ki twa kaz-a té tonbé é yé pa té gen pyès lenj pròp ankò. Ana ka di : « Nou pran yé lenj, nou lavé yé, é nou bay yé tou  répasé, tou pliyé. Pou nou, a pa té gran kichoz, mé paské nou fè sa, nou vin bon zanmi jik jòdla. » A paské Ana ké so mari kontan yé frè ké yé sò-ya ki yé idé yé (1 Jean 3:17, 18).

11. a) Lò nou ka fè éfòr pou montré nou lanmou pou nou frè ké sò-ya, kouman sa pouvé aji asou yé ? b) Dapré Proverbes 19:17, kouman Jéova ka réyaji lò nou ka montré nou lanmou pou nou konpanyen ?

¹¹ Lò nou ka montré nou frè ké nou sò-ya ki nou kontan yé é lò nou janti ké yé, yé ka wè ki nou ka éséyé imité Jéova. É pitèt nou pa ké janmen savé kouman yé gen rékonésans pou sa nou fè. Khanh, nou ja palé anvan, kontan lò i ka sonjé moun-yan ki idé li. I ka di : « Mo gen bokou rékonésans pou tout sa sò-ya ki mennen mo préché ké yé. Yé té ka vini chaché mo, yé té ka envité mo manjé ké yé, épi apré sa, yé té ka mennen mo jik annan mo kaz pou yé té sir ki anyen pa té ka rivé mo. A jòdla mo ka konprann ki yé fè bokou éfòr pou fè sa. É yé fè sa paské yé té kontan mo. » Sa vré, a pa tout moun ki ké di nou mèrsi chak fwa. Men sa Khanh ka di asou sò-ya ki idé li : « Mo té ké byen kontan randé yé tout bèl bagaj yé fè pou mo, mé mo pa savé koté yé chak ka rété jòdla. Érèzman, Jéova, li menm, savé koté yé ka rété é mo ka priyè pou i rékonpansé yé. » Khanh gen rézon : Jéova ka wè tout ti bagaj nou ka fè pou ròt moun. I ka wè sa kou roun sakrifis ki gen bokou valò. Pou li, a kousidiré i dévé nou é i lé ranboursé nou (li Proverbes 19:17).

12. Kouman roun frè pouvé montré so lanmou pou so frè ké sò-ya annan so asanblé ? (gadé zimaj-ya osi).

¹² Si to sa roun frè, kouman to pouvé montré to kontan to frè ké sò-ya épi  idé yé ? Roun jenn frè yé ka aplé Jordan, doumandé roun ansyen sa i té pouvé fè pou i té pi itil annan asanblé-a. Ansyen-an félisité l’ pou progrè i té ja fè é i bay li déztrwa konsèy. Parèkzanp, i di li rivé bònò lasal pou i di so frè ké sò-ya bonjou, bay répons pannan réinyon-yan, préché souvan ké frè ké sò annan so group prédikasyon épi chaché wè kouman i pouvé idé so frè ké sò-ya annan so asanblé. Lò Jordan swiv sa konsèy-ya, i pa anprann fè sa bagaj-ya rounso ; i fè so lanmou pou so frè ké sò-ya vin pi fò osi. I konprann ki lò roun frè ka divini asistan, a pa la i ka koumansé idé ròt-ya ; i ka kontinyé fè l’ (1 Tim. 3:8-10, 13).

13. Kisa ki bay Christian anvi fè éfòr pou viré gen kalité yé ka doumandé roun ansyen gen ?

¹³ Ès to té asistan ouben ansyen anvan ? Jéova pa bliyé tousa to fè pou li ké lanmou (1 Cor. 15:58). É i ka rémarké osi tousa to lanmou pou li ka fè to fè jòdla. Roun frè yé ka aplé Christian té tris lò i pédi so rèsponsabilité ansyen annan asanblé-a. Mé i di : « Mo désidé fè tousa mo té pouvé pou sèrvi Jéova ké tout mo tchò, menm si mo pa té ansyen. » Pita, Christian roudivini ansyen. Men sa i ka di : « Mo té roun tibi pè roudivini ansyen. Mé kou Jéova té gen mizérikòrd pou mo, é té ka pèrmèt mo roudivini ansyen, mo asèpté sa rèsponsabilité-a paské mo kontan li é mo kontan mo frè ké sò-ya. »

14. Kisa sa Elena di ka anprann to ?

¹⁴ Sèrvitèr Jéova-ya ka montré yé lanmou pou yé konpanyen osi (Mat. 22:37-39). A sa nou ka wè annan sa Elena di. Sa sò-a ka rété Jéòrji. Men sa i ka di : « Lò mo koumansé préché, sèl bagaj ki  té ka bay mo anvi préché, a té mo lanmou pou Jéova. Mé pi mo té kontan Jéova, pi mo té kontan moun-yan osi. Mo fè éfòr pou réfléchi asou problèm yé té ka jwenn é asou bagaj ki té ké pouvé touché yé tchò. Pi mo té ka sonjé yé konsa, pi mo té anvi idé yé » (Rom. 10:13-15).

15-16. Kou nou ka wè l’ asou zimaj-ya, ki bèl bagaj ka rivé nou lò nou ka montré ròt-ya nou kontan yé ?

¹⁵ Lò nou ka montré nou lanmou pou nou frè ké sò-ya, a pa yé rounso ki ka jwenn bénédiksyon. Lò pandémi Covid-19-a koumansé, roun frè yé ka aplé Paolo ké so madanm idé roun patché sò ki ja granmoun sèrvi yé aparèy élèktronik pou préché. Roun annan sa sò-ya pa té alèz menm ké sa zafè-a. Mé i éséyé kanmenm. I rivé voyé envitasyon pou Mémoryal-a pou plizyèr moun annan so fanmi ké so aparèy élèktronik. Kisa sa bay ? Swasant annan yé vini annan Mémoryal-a asou Entèrnèt ! Éfòr Paolo ké so madanm fè té itil pou sa sò-a ké pou moun annan so fanmi. Pita, men sa sò-a ékri pou Paolo : « Mèrsi pou sa fòrmasyon to bay nou-a, nou ki granmoun. Mo pa ké janmen bliyé kouman Jéova gadé pou nou é kouman zòt travay rèd pou idé nou. »

¹⁶ Paolo anprann roun bagaj enpòrtan : lanmou pi enpòrtan pasé konésans  ouben bagaj to konnèt fè. Men sa Paolo konprann : « Mo té rèsponsab sirkonskripsyon. Mé jòdla, mo ka randé mo kò kont ki pitèt frè ké sò-ya bliyé diskour mo fè, mé yé toujou ka sonjé sa mo fè pou idé yé. »

17. Lò nou ka montré roun moun nou kontan li, ès a li rounso ki ka jwenn bénédiksyon ?

¹⁷ Lò nou ka montré nou lanmou pou ròt-ya, nou ka jwenn bénédiksyon nou menm osi. É souvan, a bénédiksyon nou pa ka antann. A sa nou ka wè ké sa ki rivé Jonatan, roun frè ki ka rété Nouvèl-Zélann. Roun sanmdi aprémidi, i té ka fè cho, i wè roun pyonyé tousèl ka préché. Alòr i désidé ki i té ké préché ké li chak sanmdi aprémidi. Mé i pa té ka pansé ki li menm té ké profité di sa bon bagaj i té ka fè-a. Men sa i ka di : « A sa lépòk-a, mo pa té kontan préché. Mé lò mo byen gadé kouman sa pyonyé-a té ka ansényé, é lò mo wè bèl rézilta i té ka trapé, mo koumansé pran plézi préché. Épi osi, i divini roun bon zanmi ki idé mo fè progrè, ki idé mo kontan préché é vin pi pròch ké Jéova. »

18. Kisa Jéova lé nou fè ?

¹⁸ Jéova lé ki nou tout, nou kontinyé fè nou lanmou pou li é pou nou frè ké sò-ya vin pi fò. Kou nou wè l’, nou ké fè nou lanmou pou Jéova vin pi fò si nou ka li so Paròl, si nou ka pran tan réfléchi asou l’, é si nou ka priyè li souvan. É nou ké kontan nou frè ké sò-ya plis si nou ka idé yé lò yé bézwen. Pi nou lanmou ké vin fò, pi nou lanmityé ké Jéova é nou lanmityé ké nou frè ké sò-ya ké vin fò. É sa lanmityé-ya ké rété pou tout-tan !