ARTIK POU ÉTIDYÉ 28
KANTIK 123 Fidèlement soumis à l’ordre théocratique
Ès to ka rivé fè diférans ant lavérité ké manti ?
« Tchenbé rèd, ké sentir lavérité ka maré zòt ren » (ÉPH. 6:14).
SA NOU KÉ ANPRANN
Nou ké anprann kouman nou pouvé fè diférans ant lavérité Jéova anprann nou ké manti Satan ké nou lèlmi ka di.
1. Kisa to ka pansé di lavérité ?
PÈP Jéova-a kontan lavérité i gen annan Labib. A annan sa lavérité-a nou lafwa ka pran rasin (Rom. 10:17). Nou sir ki Jéova fè asanblé krétyen-an pou i sa « potomitan-an ki ka fè lavérité-a tchenbé » (1 Tim. 3:15). É a ké tchò kontan nou ka obéyi « sa-ya ki ka dirijé » nou, paské yé ka èspliké nou lavérité ki annan Labib é yé ka idé nou fè volonté Bondjé (Héb. 13:17).
2. Dapré Jacques 5:19, menmsi nou asèpté lavérité, kisa ki pouvé rivé nou ?
2 Mé, menmsi nou asèpté lavérité é ki nou ka rékonnèt ki Jéova ka sèrvi so òrganizasyon pou gidé nou, nou pouvé pati lwen di lavérité (li Jacques 5:19). Sa Satan té ké pi kontan, a wè nou arété fè Labib konfyans ouben douté di konsèy òrganizasyon Bondjé-a ka bay nou (Éph. 4:14).
3. Poukisa nou bézwen tchenbé lavérité-a rèd ? (Éphésiens 6:13, 14).
3 (Li Éphésiens 6:13, 14.) Titalò, Djab-a ké di roun patché manti pou bloublou nasyon-yan pou fè yé briga kont Jéova (Rév. 16:13, 14). Nou savé osi ki Satan ké travay pi rèd ankò pou bloublou pèp Jéova-a (Rév. 12:9). A pou sa, sa enpòrtan ki nou rivé fè diférans ant lavérité ké manti é ki nou obéyi lavérité (Rom. 6:17 ; 1 Pierre 1:22). Nou ké bézwen sa pou nou rété vivan pannan gran tribilasyon-an !
4. Kisa nou ké wè annan sa artik-a ?
4 Annan sa artik-a, nou ké wè dé bèl kalité nou divèt gen pou nou fè diférans ant manti ké lavérité ki ka vini di Labib é pou nou lésé òrganizasyon Jéova-a gidé nou. Épi nou ké wè trwa bagaj nou divèt fè pou nou kontinyé tchenbé lavérité-a rèd.
BÈL KALITÉ NOU DIVÈT GEN POU NOU FÈ DIFÉRANS ANT LAVÉRITÉ KÉ MANTI
5. Lò nou gen lakrent pou Jéova, kouman sa ka idé nou fè diférans ant lavérité ké manti ?
5 Lakrent pou Jéova. Lò nou gen lakrent pou Jéova, nou kontan l’ tèlman ki nou pa lé fè anyen ki pa ka fè l’ plézi. Kou nou gen lakrent pou li é nou lé fè l’ plézi, nou lé fè diférans ant sa ki bon ké sa ki pa bon, ant sa ki vré ké sa ki pa vré (Prov. 2:3-6 ; Héb. 5:14). Nou pa janmen divèt pè moun pasé nou kontan Jéova. Si nou pè moun pasé nou kontan Jéova, nou ké fè moun plézi, mé, souvan, sa moun kontan pa ka fè Jéova plézi.
6. Kouman zafè pè moun fè dis chèf israyélit manti ?
6 Si nou pè moun pasé nou gen lakrent pou Bondjé, nou pouvé pati lwen di lavérité. Annou wè èkzanp 12 èspyon-yan ki té alé gadé péyi Jéova té promèt bay Israyélit-ya. Dis annan yé té plis pè Kananéyen-yan pasé yé té kontan Jéova. Yé di Israyélit-ya : « Nou pa pouvé briga kont sa pèp-a, paské i pi fò pasé nou » (Nomb. 13:27-31). Lò to ka gadé, Kananéyen-yan té pi fò pasé Israyélit-ya, a vré. Mé lò yé di ki Israyélit-ya pa té pouvé bat yé lèlmi, yé té ka bliyé ki yé Bondjé, a té Jéova. Sa dis èspyon-yan té divèt mété yé lidé asou sa Jéova té lé Israyélit-ya fè. Yé té divèt réfléchi osi asou sa Jéova té fin fè pou yé. Si yé té fè sa, yé té ké wè ki fòrs Kananéyen-yan té gen pa té anyen douvan fòrs Jéova gen paské i tou-pwisan. Joziyé ké Kalèb pa té kou sa èspyon-yan ki pa té gen lafwa. Yé té lé fè Jéova plézi. Donk, yé di pèp-a : « Si nou ka fè Jéova plézi, asiré pa pitèt, i ké fè nou antré annan sa péyi-a [...] é i ké bay nou l’ » (Nomb. 14:6-9).
7. Kouman nou pouvé fè nou lakrent pou Jéova vin pi fò ? (gadé zimaj-a osi).
7 Pou fè nou lakrent pou Jéova vin pi fò, nou divèt chaché fè l’ plézi chak fwa nou gen désizyon pou pran (Ps. 16:8). Lò to ka li istwè annan Labib, doumandé to kò : « Si mo té annan sa sitiasyon-an, ki désizyon mo té ké pran ? » Parèkzanp, imajiné to té la ka kouté dis chèf israyélit-ya ka di pèp-a ki yé pa ké pouvé bat Kananéyen-yan. Ès to té ké krè sa yé ka di é ès to té ké pè moun ? Ouben ès to lanmou pou Jéova té ké pi fò ? Ès to té ké byen désidé fè l’ plézi ? Tout roun jénérasyon Israyélit pa rivé wè ki sa Joziyé ké Kalèb té ka di, a té lavérité. Akoz di sa, Jéova pa pèrmèt yé antré annan Péyi i té promèt yé-a (Nomb. 14:10, 22, 23).
Kimoun to té ké krè ? (gadé paragraf 7).
8. Ki bèl kalité nou divèt travay rèd pou gen, é poukisa ?
8 Imilité-a. Jéova ka fè sa-ya ki gen imilité konnèt lavérité (Mat. 11:25). Ké imilité, nou asèpté roun moun idé nou anprann konnèt vérité-ya ki annan Labib (Actes 8:30, 31). Mé, nou divèt panga pou nou pa koumansé krè nou kò. Si nou ka krè nou kò, nou pouvé pansé ki sa Labib ka di ké sa òrganizasyon Jéova-a ka di bon mé ki fason nou ka wè bagaj-ya bon osi.
9. Kouman nou pouvé kontinyé gen imilité ?
9 Pou nou kontinyé gen imilité, nou divèt sonjé ki nou pa anyen òbò Jéova (Ps. 8:3, 4). Nou pouvé priyè osi pou nou gen imilité é pou nou rété mòl annan so lanmen kou latè gra. Jéova ka sèrvi so Paròl ké so òrganizasyon pou anprann nou fason i ka pansé. É i ké idé nou bay fason i ka pansé-a plis valò pasé noupa. Lò to ka li Labib, chaché wè bagaj ki ka montré kouman Jéova kontan imilité-a é kouman i rayi moun ka krè yé kò é ka fè ròklò. É si to wè to gen roun rèsponsabilité ki ka bay to roun moso otorité ouben ki ka fè ki ròt-ya ka wè to plis, a pou to travay ankò pi rèd pou to kontinyé gen imilité.
KISA NOU POUVÉ FÈ POU NOU TCHENBÉ LAVÉRITÉ-A RÈD
10. Kimoun Jéova sèrvi pou di so pèp sa i té divèt fè é pou dirijé l’ ?
10 Kontinyé fè òrganizasyon Jéova-a konfyans. Annan Israyèl tan-lontan-an, Jéova sèrvi Moyiz épi apré i sèrvi Joziyé pou gidé so pèp (Jos. 1:16, 17). Lò Israyélit-ya té ka wè sa mouché-ya kou dé moun ki té ka réprézanté Jéova, i té ka béni yé. Roun patché lannen apré sa, lò asanblé krétyen-an fèt, Jéova sèrvi roun group moun pou gidé asanblé-a : 12 apot-ya (Actes 8:14, 15). Apré sa, annan sa group-a, i vin gen plizyèr ansyen di Jérizalèm osi. Lò asanblé-ya té ka kouté sa mouché-ya ki té fidèl, yé té ka « kontinyé divini pi fò annan lafwa é yé té ka vin pi bokou chak jou » (Actes 16:4, 5). Jòdla, Jéova ka béni nou osi lò nou ka swiv sa so òrganizasyon ka di. Mé, kisa Jéova té ké rousanti si nou pa té ka asèpté sa-ya i chwazi pou dirijé so pèp ? Pou nou réponn sa késyon-an, annou wè sa ki rivé Israyélit-ya lò yé té k’alé pou antré annan Péyi Bondjé té promèt yé-a.
11. Kisa ki rivé Israyélit-ya ki rébélé yé kò kont sa-la Jéova té chwazi pou dirijé so pèp ? (gadé zimaj-a osi).
11 Lò Israyélit-ya té asou chimen Péyi Bondjé té promèt yé-a, sèrten mouché ki té gen rèsponsabilité annan pèp-a koumansé di ki a pa Jéova ki té mété Moyiz pou dirijé yé. Yé di li : « Tout moun ki la [sa lé di : pa to rounso] sen, yé tout, é Jéova anmitan yé » (Nomb. 16:1-3). A vré, pou Bondjé ‘tout moun ki té la té sen’, mé a Moyiz Jéova té chwazi pou dirijé so pèp (Nomb. 16:28). Lò sa-ya ki té ka rébélé yé kò kritiké Moyiz, a té Jéova yé té ka kritiké osi. Yé pa té ka mété yé lidé asou sa Jéova té lé, yé lidé té asou sa yé té lé : yé té lé plis pouvwar é yé té lé moun wè yé. Bondjé tchwé tout chèf sa-ya ki té ka rébélé yé kò ansanm ké sa-ya ki té dakò ké yé. Rounlo ké roun patché moun mouri sa jou-a (Nomb. 16:30-35, 41, 49). Jòdla osi, nou pouvé sir ki Jéova pa kontan ké sa-ya ki ka dérèspèkté so òrganizasyon.
Kimoun to té ké soutni ? (gadé paragraf 11).
12. Poukisa òrganizasyon Jéova-a mérité nou fè l’ konfyans ?
12 Òrganizasyon Jéova-a mérité nou fè l’ konfyans. Lò nou bézwen chanjé fason nou ka konprann roun bagaj annan Labib ouben lò nou divèt chanjé fason nou ka adoré Jéova, sa-ya ki ka dirijé nou ka fè l’ (Prov. 4:18). Yé ka fè l’ paské sa ki pi enpòrtan pou yé, a fè Jéova plézi. Lò yé gen désizyon pou pran, yé ka fè tousa yé pouvé osi pou swiv sa Labib ka di pas Labib, a modèl tout sèrvitèr Jéova-ya divèt swiv.
13. « Bon paròl-ya », a kisa, é kisa nou divèt fè ké yé ?
13 « Kontinyé pran modèl asou bon paròl-ya » (2 Tim. 1:13). Sa « bon paròl-ya », a ansèyman krétyen-yan nou ka trapé annan Labib (Jean 17:17). Tousa nou ka krè ka vini di sa ansèyman-yan. Òrganizasyon Jéova-a ka anprann nou pa lagé sa ansèyman-yan. Tout tan nou ké fè sa, nou Bondjé ké béni nou.
14. Kouman sèrten krétyen annan 1é syèk-a arété « pran modèl asou bon paròl-ya » ?
14 Si nou té ka arété « pran modèl asou bon paròl-ya », kisa ki té ké pouvé rivé nou ? Annou wè sa ki rivé annan 1é syèk-a. Sèrten krétyen té ka di bagaj ki pa té vré. Yé té ka di ki jou Bondjé-a té rivé. Pitèt yé té ka di sa parapòrta roun lèt Pòl té ékri swadizan. Sèrten krétyen annan vil Tésalonik pa menm pran tan vérifyé si sa té vré, yé krè sa moun té ka di asou jou Jéova-a é yé jis té ka répété sa bagaj-a. Si yé té sonjé sa Pòl té anprann yé lò i té ké yé, yé pa té ké tonbé annan sa trap-a (2 Thess. 2:1-5). A pou sa i di yé pa krè tousa yé té ka tandé. É pou yé pa tonbé annan menm trap-a, men kouman i fini dézyèm lèt i ékri pou yé-a : « Mo, Pòl, mo ka voyé bonjou pou zòt, é a ké mo lanmen mo ka ékri sa. A sa mo ka ékri annan chak lèt pou zòt sir ki a mo ki ka ékri ; a konsa mo ka ékri » (2 Thess. 3:17).
15. Kisa nou pouvé fè pou protéjé nou kò kont enfòrmasyon ki vré swadizan ? Bay roun èkzanp (gadé zimaj-ya osi).
15 Kisa nou pouvé anprann di sa Pòl di Tésalonisyen-yan ? Lò nou ka tandé palé di roun bagaj ki pa k’alé ké sa nou anprann annan Labib ouben roun bagaj ki ka choké nou, annou pran tan byen réfléchi. Roun jou, annan ex-Union soviétique-a, nou lèlmi bay frè-ya roun lèt ki té ka vini di syèj mondyal-a swadizan é ki té ka ankourajé frè-ya séparé yé kò di òrganizasyon-an pou fè yépa òrganizasyon. Yé té ké di ki sa lèt-a té ka vini di Kolèj santral-a vré, mé yé pa rivé bloublou frè-ya paské sa sa lèt-a té ka di pa té k’alé ké sa yé té anprann. Jòdla, détan, moun ki kont lavérité-a ka sèrvi bagaj kou Entèrnèt ké rézo sosyal-ya pou éséyé bloublou nou ouben séparé nou. Pasé nou ‘lésé yé soukouyé nou fasilman’, annou protéjé nou kò, annou réfléchi pou wè si sa nou ka tandé ouben sa nou ka li ka alé ké lavérité nou konnèt (2 Thess. 2:2 ; 1 Jean 4:1).
Pa lésé enfòrmasyon ki vré swadizan bloublou to a (gadé paragraf 15).
16. Dapré Romains 16:17, 18, kouman nou divèt fè ké sa-ya ki ka di bagaj ki pa k’alé ké lavérité ?
16 Rété ansanm ansanm ké sa-ya ki fidèl ké Jéova. Jéova lé so sèrvitèr-ya adoré l’ ansanm ansanm. Nou ké rivé fè l’ si nou ka kontinyé tchenbé lavérité-a rèd. Sa-ya ki ka di bagaj ki pa k’alé ké lavérité ka séparé moun annan asanblé-a. A pou sa Jéova ka di nou « rété lwen di yé ». Si nou pa ka fè l’, nou ka riské pati lwen di lavérité (li Romains 16:17, 18).
17. Ki bénédiksyon nou ka jwenn lò nou ka fè diférans ant lavérité ké manti é lò nou ka tchenbé lavérité-a rèd ?
17 Si nou ka rivé fè diférans ant lavérité ké manti épi si nou ka tchenbé lavérité-a rèd, nou lanmityé ké Jéova ké rété fò é nou ké kontinyé gen roun lafwa ki fò (Éph. 4:15, 16). Nou pa ké lésé fo ansèyman-yan ké manti Satan ka di bloublou nou. Épi Jéova ké protéjé nou pannan gran tribilasyon-an. Donk, kontinyé tchenbé lavérité-a rèd. Konsa, ‘Bondjé lapè ké la ké to’ (Phil. 4:8, 9).
KANTIK 122 Soyons fermes, inébranlables !
a MEN SA NOU KA WÈ ASOU ZIMAJ-YA : Yé ka montré nou sa ki pasé lò frè-ya annan ex-Union soviétique-a rousouvwè roun lèt ki té ka vini di syèj mondyal-a swadizan, mé ki, anfèt, té ka vini di nou lèlmi. Jòdla, nou lèlmi pouvé sèrvi Entèrnèt pou bloublou nou é pou fè tout moun krè bagaj ki pa vré asou òrganizasyon Jéova-a.
