1. Poukisa Jézi doumandé so Papa véyé asou so disip ?

PANNAN dèrnyé lannwit Jézi fè asou latè-a, i priyè pou so disip, paské i té savé ki yé té ké jwenn problèm. I té kontan so zanmi. A pou sa i doumandé so Papa « véyé asou yé paské méchan-an la » (Jean 17:14, 15). I té savé ki lò i té ké routounen annan syèl-a, Satan té ké kontinyé ataké tout sa ki lé adoré Jéova. Donk adoratèr Bondjé-ya té ké bézwen Bondjé protéjé yé.

2. Poukisa nou pouvé sir ki Jéova ké réponn nou ?

² Jéova réponn Jézi pas i té kontan l’. Si nou ka fè tousa nou pouvé pou fè Jéova plézi, i ké kontan nou osi é i ké réponn nou lò nou ké priyè l’ pou doumandé li idé nou ké protéjé nou. Jéova sa roun papa ki kontan so fanmi é i ka pran swen di so pitit. So non, sa lé di so répitasyon, ka fè nou sir ki i ké toujou kontinyé fè sa.

3. Poukisa nou bézwen Jéova protéjé nou ?

³ Nou bézwen Jéova protéjé nou plis pasé pyès tan. Yé mété Satan dèrò di syèl-a é i « kòlè toubonnman » (Rév. 12:12). Anplis di sa, i rivé fè roun ran moun krè ki lò yé ka pèrsékité nou ‘a pou Bondjé yé ka fè sa’ (Jean 16:2). Ròt moun ankò, ki pa ka krè ki Bondjé ka èkzisté, ka pèrsékité nou paské nou pa kou yé. Mé nou pa divèt pè. Poukisa ? Paské Paròl Bondjé-a ka di : « Sényèr-a fidèl, é i ké fè zòt vin pi fò é i ké protéjé zòt di méchan-an » (2 Thess. 3:3). Kouman Jéova ka protéjé nou ? Annou wè dé bagaj i ka bay nou.

4. Dapré Éphésiens 6:13-17, kisa Jéova ka bay nou pou protéjé nou ?

⁴ Jéova ka bay nou roun ékipman pou protéjé nou lò Satan ka ataké nou (li Éphésiens 6:13-17). Sa ékipman èspirityèl-a solid é i ka byen maché. Mé i ké protéjé nou sèlman si nou ka mété chak parti di sa ékipman-an é si nou pa ka tiré l’. Kisa chak parti ka réprézanté ? Annou wè sa.

5. A kisa ki sentir lavérité, é poukisa nou divèt mété l’ ?

⁵ Sentir lavérité-a ka réprézanté lavérité nou ka trouvé annan Paròl Bondjé-a. Poukisa nou bézwen mété sa sentir-a ? Paské Satan a « papa manti-a » (Jean 8:44). Sa ka fè lannen i ka manti, é i bloublou « tout moun asou latè-a » ! (Rév. 12:9). Mé lavérité nou ka trouvé annan Labib-a ka anpéché li bloublou nou. Pou nou mété sa sentir-a asou nou, nou divèt anprann lavérité asou Jéova, adoré l’ « ké lèspri épi ké lavérité » é fè tout bagaj roun fason ki drèt (Jean 4:24 ; Éph. 4:25 ; Héb. 13:18).

6. A kisa ki kwiras lajistis é poukisa nou divèt mété l’ ?

⁶ Kwiras lajistis-a ka réprézanté prensip Jéova ki drèt. Poukisa nou divèt mété l’ ? Menm fason roun kwiras ka protéjé tchò roun sòlda, kwiras lajistis-a ka protéjé nou. Konsa pyès mové bagaj annan monn-an pa ké pouvé chanjé moun-an nou sa ofon nou tchò (Prov. 4:23). Jéova lé nou kontan l’ é nou adoré l’ ké tout nou tchò (Mat. 22:36, 37). Mé Satan ka éséyé fè nou kontan bagaj Jéova rayi annan monn-an, pou fè nou arété sèrvi li ké tout nou tchò (Jacq. 4:4 ; 1 Jean 2:15, 16). É si sa pa ka maché, i ké pèrsékité nou pou éséyé fè nou fè bagaj Jéova pa kontan.

7. Kouman nou ka poté kwiras lajistis-a ?

⁷ Nou ka poté kwiras lajistis-a lò nou ka asèpté sa Jéova ka di asou sa ki bon ké sa ki pa bon, é lò nou ka fè sa i ka di nou annan nou lavi (Ps. 97:10). Roun ran moun pouvé di ki sa Jéova ka di asou sa ki bon ké sa ki pa bon ka anpéché yé viv. Mé si nou té ka arété swiv prensip Jéova annan nou lavi, nou té ké kou roun sòlda ki ka tiré so kwiras an mitan roun konba paské i ka santi i tro lou pou poté. Nou té ké di sa sòlda-a fou ! Sa-ya ki ka adoré Jéova pa ka wè so koumannman kou roun « fardo » : yé savé ki sa koumannman-yan pouvé sové yé lavi (1 Jean 5:3, nòt).

8. Kisa sa lé di gen bon balan annan nou pyé kou roun soulyé pou alé di bon nouvèl-a ?

⁸ Pòl ka di nou osi ki nou divèt gen bon balan annan nou pyé kou roun soulyé pou alé di bon nouvèl lapè. Sa lé di ki nou toujou divèt paré pou préché bon nouvèl Rwayonm-an. Lò nou ka palé di Labib-a pou ròt-ya, nou lafwa ka vin pi fò. Sa ka vréman ankourajé nou lò nou ka wè kouman sèrvitèr Jéova-ya asou tout latè-a ka chaché tout okazyon pou palé di bon nouvèl-a — pou yé kolèg travay, yé kanmarad lékòl, annan téritwar koté i gen magazen ké biro, di kaz an kaz, lò yé ka fè yé komisyon, lò yé ka alé wè yé fanmi ki pa Témwen, lò yé ka palé ké moun yé konnèt é menm lò yé pa pouvé soti di yé kaz pannan roun tan. Si nou té ka arété préché pas nou pè, nou té ké kou roun sòlda ki ka tiré so soulyé pannan roun konba. I ka riské blésé so pyé. É si i blésé,  kouman i ka fè protéjé so kò épi obéyi lòrd so chèf ka bay li ?

9. Poukisa nou bézwen tchenbé nou gran boukliyé lafwa-a byen fò ?

⁹ Gran boukliyé lafwa-a ka réprézanté nou lafwa annan Jéova. Nou sir ki Bondjé ké réyalizé tout so promès. Sa lafwa-a ka idé nou « étenn tout flèch difé méchan-an ka voyé ». Poukisa nou bézwen poté sa gran boukliyé-a ? Paské i ka protéjé nou pou apòsta-ya pa bloublou nou é pou nou pa dékourajé lò moun-yan ka voyé vyé paròl asou nou. Si nou pa gen bokou lafwa, nou pa ké gen fòrs pou obéyi Jéova lò ròt-ya ké éséyé fè nou fè mové bagaj. Mé chak kou nou ka défann nou lafwa douvan nou kolèg travay ouben nou kanmarad lékòl, nou ka paré dèyè nou boukliyé (1 Pierre 3:15). Chak kou nou ka réfizé roun travay ki té ké fè nou ganyen plis soumaké mé ki té ké anpéché nou fè tousa nou pouvé annan sèrvis Jéova-a, nou ka tchenbé nou boukliyé byen fò (Héb. 13:5, 6). É chak kou nou ka kontinyé adoré Jéova menm si yé lé baré nou chimen, nou ka sèrvi nou boukliyé pou protéjé nou kò (1 Thess. 2:2).

10. Kas délivrans-a, a kisa é poukisa nou divèt mété l’ ?

 ¹⁰ Kas délivrans-a, a èspwar Jéova ka bay nou, sa lé di èspwar nou gen ki i ké rékonpansé tout sa ki ka fè so volonté é ki, si nou mouri, i ké résisité nou (1 Thess. 5:8 ; 1 Tim. 4:10 ; Tite 1:1, 2). Menm fason roun kas ka protéjé tèt sòlda-a, èspwar délivrans-a ka protéjé nou lèspri. Kouman ? Sa èspwar-a ka idé nou kontinyé mété nou lidé asou promès Bondjé épi pa lésé problèm nou gen krazé nou. Kouman nou ka poté sa kas-a ? Nou ka poté l’ si nou ka kontinyé wè bagaj-ya kou Jéova ka wè yé. Parèkzanp, nou pa lé konté asou richès-ya ki pa la pou tout-tan, mé a Bondjé nou lé fè konfyans (Ps. 26:2 ; 104:34 ; 1 Tim. 6:17).

11. A kisa ki zépé lèspri-a é poukisa nou divèt sèrvi l’ ?

¹¹ Zépé lèspri-a, a Paròl Bondjé-a, Labib-a. Sa zépé-a pouvé mété tout kalité manti dèrò é libéré moun ki èsklav akoz di fo ansèyman ké mové labitid ki pa bon pou yé (2 Cor. 10:4, 5 ; 2 Tim. 3:16, 17 ; Héb. 4:12). Nou ké anprann byen sèrvi sa zépé-a lò nou ka étidyé Labib-a é gras a fòrmasyon òrganizasyon Bondjé-a ka bay nou (2 Tim. 2:15). Kou nou wè l’, Jéova ka bay nou roun ékipman. Mé i ka bay nou rounòt bagaj pou protéjé nou ankò. A kisa ?

12. Ki ròt bagaj nou bézwen ankò, é poukisa ?

¹² Roun sòlda ki abitchwé fè lagèr byen savé ki i pa pouvé briga li rounso kont roun gran larmé. I bézwen so kanmarad sòlda idé li. Menm fason-an, nou pa pouvé ganyen kont Satan ké sa-ya ki ka maché ké li nou rounso, nou bézwen nou frè ké sò-ya idé nou. Jéova bay nou « frè ké sò asou tout latè-a » pou idé nou (1 Pierre 2:17).

13. Dapré Hébreux 10:24, 25, kouman nou réinyon ka idé nou ?

¹³ Roun fason Jéova ka idé nou, a lò nou ka alé annan nou réinyon (li Hébreux 10:24, 25). Lò nou dékourajé, é sa ka rivé nou tout, réinyon-yan pouvé ankourajé nou. Sa ka ankourajé nou lò nou ka tandé nou frè ké sò-ya réponn. Diskour ké démonstrasyon yé ka fè ka idé nou pi désidé adoré Jéova. É sa ka ankourajé nou lò nou ka palé ké nou frè ké sò-ya anvan ké apré réinyon-yan (1 Thess. 5:14). Anplis di sa, lò nou ka alé annan nou réinyon, nou pouvé idé nou frè ké sò-ya é sa ka fè nou tchò kontan (Actes 20:35; Rom. 1:11, 12). Nou réinyon ka idé nou rounòt fason ankò. A kousidiré yé ka fòrmé nou pou nou briga : gras a sa réinyon-yan, nou ka vin pi vayan annan prédikasyon ké ansèyman-an. Parèkzanp, nou ka anprann byen sèrvi nou bwèt zouti pou ansényé. Donk, byen préparé to kò pou réinyon-yan. Byen kouté pannan réinyon-yan. É apré réinyon-yan, apliké sa to anprann-an. A konsa to ké divini roun « bon sòlda Jézi Kris » (2 Tim. 2:3).

14. Kimoun ankò ka idé nou ?

¹⁴ Roun patché zanj ka idé nou osi. Nou savé sa rounsèl zanj pouvé fè. Alòr alé wè sa roun larmé zanj pouvé fè ! (Is. 37:36). Pyès moun ni pyès démon pa pouvé ganyen asou larmé Jéova. Jéova tou-pwisan, donk lò i la òbò nou, kèlkanswa kantité lèlmi i pouvé gen, nou ké toujou pi fò pasé yé (Juges 6:16).  A pa blag non ! Sonjé tout sa bagaj-ya lò roun kolèg travay, roun kanmarad lékòl ouben roun moun annan to fanmi ki pa Témwen ka di ouben ka fè bagaj ki ka dékourajé to. To pa janmen tousèl : si to ka kontinyé swiv dirèksyon Jéova ka bay to, i ké idé to annan to konba.

15. Dapré Isaïe 54:15, 17, poukisa pyès moun pa pouvé fè sèrvitèr Bondjé-ya fronmen yé bouch ?

¹⁵ Monn Satan-an rayi nou akoz di roun patché bagaj. Nou pa ka fè lapolitik é nou pa ka fè lagèr. Nou ka fè tout moun konnèt non Bondjé. Nou ka di tout moun ki a Rwayonm-an sèlman ki ké mété lapè asou latè-a é nou ka obéyi lalwa Bondjé. Nou ka fè tout moun savé ki chèf sa monn-an a roun mantò é a roun kriminèl (Jean 8:44). Nou ka di tout moun ki titalò Jéova ké krazé monn Satan-an. Mé Djab-a ké sa-ya ki ka maché ké li pa ké janmen fè nou fronmen nou bouch. Nou ké kontinyé louwé Jéova tout fason nou pouvé. Ké tout fò i fò-a, Satan pa pouvé fè nou arété préché bon nouvèl-a asou tout latè-a. A sèlman paské Jéova ka protéjé nou, nou ka rivé fè sa (li Isaïe 54:15, 17).

16. Kisa Jéova ké fè pou sové nou pannan gran tribilasyon-an ?

¹⁶ Pannan gran tribilasyon-an, Jéova ké sové nou di roun fason èspésyal. Pou koumansé, i ké sové nou lò i ké fè tout rwa asou latè-a krazé Gran Babilòn-an, sa lé di tout fo rélijyon-yan (Rév. 17:16-18 ; 18:2, 4). Apré sa, i ké sové nou lò i ké kayakaya larèstan monn Satan-an pannan Armagédon (Rév. 7:9, 10 ; 16:14, 16).

17. Poukisa sa enpòrtan pou nou rété pròch ké Jéova ?

¹⁷ Si nou ka rété pròch ké Jéova, Satan pa ké pouvé fè nou pyès bagaj Bondjé pa pouvé réparé. A li Bondjé ké détrwi pou tout-tan (Rom. 16:20). Donk mété tout ékipman Bondjé bay nou pou lagèr é pa tiré l’ ! Pa éséyé briga to rounso. Idé to frè ké sò-ya é fè tousa Jéova ka di to fè. Si to ka fè sa, to pouvé sir ki to Papa ki annan syèl-a é ki kontan to ké bay to plis fòrs é ké protéjé to (Is. 41:10).