1. Ki kalité problèm roun patché sèrvitèr Jéova ka jwenn ?

ÈS TO ka djoubaté ké roun problèm séryé ? Pitèt roun moun annan asanblé-a fè to lapenn ? (Jacq. 3:2). Ouben pitèt roun kanmarad lékòl ouben roun kolèg travay ka ari to paské to ka adoré Jéova (1 Pierre 4:3, 4). Ouben to fanmi pitèt ka éséyé anpéché to alé annan réinyon-yan ouben ankò yé ka éséyé anpéché to palé di to lafwa (Mat. 10:35, 36). Si problèm-an vréman rèd, pitèt to ka pansé ki sa pi bon ki to arété adoré Jéova. Mé to pouvé sir ki, kèlkanswa problèm to ka jwenn, Jéova ké bay to sajès pou to pouvé sipòrté l’ é i ké bay to osi fòrs pou to tchenbé.

2. Dapré Romains 15:4, kouman Paròl Bondjé-a pouvé idé nou ?

² Jéova véyé pou yé marké annan Labib-a èkzanp moun ki pa té parfè mé ki rivé tchenbé anba problèm ki té rèd. Poukisa i fè sa ? Pou nou pouvé wè kisa sa èkzanp-ya ka anprann nou. A sa Pòl ka di annan Romains 15:4 (li). Lò nou ka li sa èkzanp-ya, sa pouvé ankourajé nou é bay nou roun èspwar. Mé a pou nou fè plis ki li Labib-a. Nou divèt lésé sa nou ka li annan Labib-a chanjé fason nou ka pansé ké fason nou ka wè bagaj-ya. Parèkzanp, kisa nou pouvé fè si nou bézwen roun konsèy parapòrta roun problèm nou gen ? Nou pouvé swiv sa métòd-a * : 1) priyè, 2) imajiné, 3) pran tan byen réfléchi épi 4) fè sa to anprann. Annou wè kouman nou pouvé fè sa kat bagaj-ya, apré sa nou ké sèrvi sa  métòd-a pou wè kisa sa ki rivé rwa David ké apot Pòl ka anprann nou.

3. Anvan to koumansé li Labib-a, kisa to divèt fè, é poukisa ?

³ 1) Priyè. Anvan to koumansé li Labib-a, doumandé Jéova idé to pou to pouvé wè kouman to pouvé byen profité di sa to ka li. Parèkzanp, si to ka chaché roun konsèy pou réglé roun problèm, doumandé Jéova idé to trapé annan so Paròl, prensip ki ké idé to désidé kisa to divèt fè (Phil. 4:6, 7 ; Jacq. 1:5).

4. Kisa ki pouvé idé to pou sa to ka li annan Labib-a pa rété jis roun istwè asou roun papyé ?

⁴ 2) Imajiné. Jéova ka pèrmèt nou fè roun bagaj èspésyal : nou pouvé imajiné bagaj-ya annan nou tèt. Pou sa to ka li annan Labib-a pa rété jis roun istwè asou roun papyé, éséyé imajiné sa ki ka pasé é fè kousidiré a to ki annan plas moun-an. Éséyé wè sa moun-an wè é éséyé rousanti sa moun-an pitèt rousanti annan so tchò.

5. Asou kisa to divèt pran tan byen réfléchi, é kisa ki pouvé idé to fè sa ?

⁵ 3) Pran tan byen réfléchi. To divèt pran tan byen réfléchi asou sa to ka li é asou kouman sa pouvé itil pou to annan to lavi. Sa ka idé to fè lyen-an ant sa to ja konnèt ké sa to ka anprann, épi sa ka idé to osi konprann pi byen sa to ka li. Lò to ka li Labib-a san to pa pran tan byen réfléchi, a kousidiré to té gen tout engrédyan pou fè manjé asou roun tab mé to pa té ka mété yé ansanm. Mé si to ka pran tan réfléchi, a kousidiré to té ka mété tout engrédyan-yan ansanm é a konsa to ké pouvé manjé roun bon manjé. Pou idé to pran tan réfléchi to pouvé doumandé to kò sa késyon-yan épi chaché répons-ya osi : « Kisa moun-an annan istwè-a fè pou réglé so problèm ? Kouman Jéova idé l’ ? Kisa sa ka anprann mo é kouman sa pouvé idé mo tchenbé lò mo gen roun problèm ? »

6. Poukisa nou divèt fè sa nou anprann ?

⁶ 4) Fè sa to anprann. Jézi di ki si to pa ka fè sa to ka anprann, to kou roun mouché ki fè so kaz asou sab. I ka travay rèd mé a pou anyen. Poukisa ? Paské lò gro dlo ké van-an ké bat kaz-a, i ké tonbé (Mat. 7:24-27). Menm fason-an, si nou ka priyè, si nou ka imajiné, si nou ka pran tan byen réfléchi mé si nou pa ka fè sa nou anprann, a pou anyen nou fè tousa. Lò nou ké jwenn problèm ouben pèrsékisyon, nou lafwa pa ké asé fò. Mé si nou ka étidyé épi fè sa nou anprann, nou ké pran pi bon désizyon, nou ké pi trankil é nou lafwa ké vin pi fò (Is. 48:17, 18). Annou itilizé sa kat bagaj-ya nou fin wè : priyè, pran tan byen réfléchi, imajiné ké fè sa nou anprann, pou nou pouvé wè kisa sa ki rivé rwa David ka anprann nou.

7. Ki istwè annan Labib-a nou ké wè aprézan ?

⁷ Ès roun zanmi ouben roun moun annan to fanmi trayi to ? Si sa ja rivé, roun bagaj ki pouvé idé to, a étidyé kisa David fè lò so pitit Absalon trayi l’ é lò i éséyé divini rwa a so plas (2 Sam. 15:5-14, 31 ; 18:6-14).

8. Kisa to pouvé fè pou Jéova idé to ?

⁸ 1) Priyè. Anvan to koumansé li istwè-a, di Jéova kouman to ka soufri akoz di mové bagaj yé fè to (Ps. 6:6-9). Byen di li sa to ka santi. Apré sa, doumandé li idé to wè ki prensip ki pouvé idé to savé sa to divèt fè.

9. Rakonté kouman Absalon trayi David.

 ⁹ 2) Imajiné. Sonjé sa ki pasé annan sa istwè-a é éséyé imajiné kouman sa ki rivé David aji asou li. Pannan plizyèr lannen, Absalon fè tousa i té pouvé pou pèp-a kontan l’ (2 Sam. 15:7). Lò i wè ki moman-an té rivé, i voyé plizyèr èspyon annan tout péyi Israyèl pou préparé pèp-a pou yé té asèpté l’ kou yé rwa. I jis rivé fè Ayitofèl, ki té sa roun bon zanmi David mé osi so konséyé, maché ké li annan sa i té prévwè-a. Absalon fè so kò rwa é apré sa i éséyé tchenbé ké tchwé David ki té pitèt byen malad a sa lépòk-a (Ps. 41:1-9). Lò David vin savé sa Absalon té lé fè, i chapé di Jérizalèm. Finalman, larmé Absalon briga ké larmé David. Larmé Absalon pédi é Absalon mouri.

10. Kouman rwa David té pouvé réyaji ?

¹⁰ Apré sa, imajiné kouman David té pouvé santi so kò apré tout sa bagaj-ya rivé l’. I té kontan Absalon é i té ka fè Ayitofèl konfyans. Mé yé toulédé trayi l’. É yé jis chaché tchwé l’. David té divèt byen tris. I té pouvé pansé ki so ròt zanmi-ya té jwenn Absalon annan so méchansté osi é i té pouvé arété fè yé konfyans. I té pouvé gadé pou so douvan lèstomak épi pran kouri li rounso. Épi osi, i té pouvé lésé tout sa bagaj-ya dékourajé l’ nèt. Mé David pa fè anyen di tousa. I pa rété asou sa problèm-yan. Kouman i rivé fè sa ?

11. Kouman David réyaji ?

¹¹ 3) Pran tan byen réfléchi. Ki prensip to pouvé anprann ké sa istwè-a ? « Kisa David fè pou réglé problèm-an ? » David pa pran pè, é i pa kouri pran roun désizyon ki pa té ké bon. I pa lésé sitiasyon-an anpéché li désidé sa i té divèt fè, fòrs i té pè. I pito doumandé Jéova idé li. I doumandé so zanmi osi idé li. É i pa pédi tan fè sa i té désidé fè-a. Menm si David té tris bokou, i pa arété fè ròt-ya konfyans é i pa koumansé rayi tout moun. I kontinyé fè Jéova ké so zanmi konfyans.

12. Kisa Jéova fè pou idé David ?

¹² Kouman Jéova idé David ? Si to ka pran tan chaché, to ké anprann ki Jéova bay David fòrs i té bézwen pou sipòrté sa éprèv-a (Ps. 3:1-8 ; paròl ki marké anvan koumansman Psaume-an). Jéova béni tout désizyon David pran. É i idé so zanmi ki té briga pou protéjé l’.

13. Kouman to pouvé imité David si roun moun fè to roun bagaj ki fè to mal séryé ? (Matthieu 18:15-17).

¹³ 4) Fè sa to anprann. Doumandé to kò : « Kouman mo pouvé imité David ? » To ké divèt fè vit pou réglé problèm-an. Soulon sitiasyon-an, to pouvé swiv konsèy Jézi bay annan Matthieu 18 ouben swiv prensip-a ki annan sa konsèy-a (li Matthieu 18:15-17). Mé to pa divèt kouri pran roun désizyon lò to kòlè. Priyè Jéova pito pou i idé to rété kalm é pou i idé to savé sa to divèt fè. Pa arété fè to zanmi konfyans. Pasé to fè sa, asèpté lò yé ka bay to roun lanmen (Prov. 17:17). É pi enpòrtan-an, swiv tout konsèy Jéova ka bay to annan so Paròl (Prov. 3:5, 6).

14. Annan ki sitiasyon 2 Timothée 1:12-16 ké 4:6-11, 17-22 pouvé ankourajé to ?

¹⁴ Ès to fanmi pa kontan paské to ka sèrvi Jéova é ès yé ka éséyé baré to chimen ? Ouben ès to ka rété annan  roun koté gouvèrnman-an ka anpéché Témwen Jéova-ya adoré Jéova kou yé lé ? Si to annan roun sitiasyon konsa, sa ké ankourajé to si to ka li 2 Timothée 1:12-16 ké 4:6-11, 17-22 *. Pòl ékri sa vèrsé-ya lò i té lajòl : donk sa ké pouvé ankourajé to.

15. Kisa to pouvé doumandé Jéova ?

¹⁵ 1) Priyè. Anvan to koumansé li sa vèrsé-ya, palé ké Jéova di to problèm é byen di li kouman to ka santi to kò. Apré sa, doumandé Jéova idé to wè ki prensip annan sa ki rivé Pòl ké pouvé idé to savé sa to divèt fè.

16. Kisa ki rivé Pòl ?

¹⁶ 2) Imajiné. Imajiné a to ki Pòl. Yé maré l’ ké chenn annan roun lajòl Ròm. Yé ja mété l’ lajòl anvan, mé sa kou-a, i sir yé ké tchwé l’. Plizyèr frè i byen konnèt anbandonnen l’ é a pa ti las i las (2 Tim. 1:15).

17. Kouman Pòl té pouvé réyaji ?

¹⁷ Pòl té pouvé gadé dèyè épi pansé ki si i pa té préché bokou konsa yé pa té ké arété l’. I té pouvé rété faché ké sa-ya ki té an Azi é ki té anbandonnen l’. É i té pouvé arété fè so ròt zanmi-ya konfyans. Mé Pòl pa fè anyen di tousa. Kouman i rivé sir ki i té pouvé fè so zanmi konfyans toujou, é ki Jéova té ké rékonpansé l’ ?

18. Kouman Pòl réyaji ?

¹⁸ 3) Pran tan byen réfléchi. Trouvé répons asou sa késyon-an : « Kouman Pòl réglé so problèm ? » Menm si i té savé ki i té ké mouri, Pòl pa janmen bliyé ki sa ki té pi enpòrtan-an, a té di bay Jéova laglwar é i kontinyé chaché kouman i té pouvé ankourajé ròt-ya. I kontinyé priyè Jéova pou doumandé l’ idé li (2 Tim. 1:3). Pòl pa kontinyé sonjé frè-ya ki té anbandonnen l’. I pito di kouman i té kontan sa so zanmi-ya té fè pou idé li ké bokou lanmou. Anplis di sa, Pòl kontinyé étidyé Paròl Bondjé-a (2 Tim. 3:16, 17 ; 4:13). É pi enpòrtan-an, i té sir ki Jéova ké Jézi té kontan li. Yé pa té anbandonnen li é i té sir yé té ké rékonpansé l’ pou so sèrvis fidèl.

19. Kouman Jéova idé Pòl ?

¹⁹ Jéova té di Pòl ki yé té ké pèrsékité l’ (Actes 21:11-13). Kouman i idé l’ ? I réponn li lò i té ka priyè l’ é i bay li fòrs (2 Tim. 4:17). Pòl té travay rèd pou rousouvwè so rékonpans. Jéova promèt li ki i té ké rousouvwè sa rékonpans-a. Jéova itilizé osi plizyèr zanmi Pòl té gen pou bay li sa i té bézwen.

20. Dapré Romains 8:38, 39, di kisa Pòl té sir, é kouman nou pouvé imité l’ ?

²⁰ 4) Fè sa to anprann. Doumandé to kò : « Kouman mo pouvé imité Pòl ? » Kou Pòl, a pou nou savé ki roun jou, yé ké pèrsékité nou (Marc 10:29, 30). Pou nou rété fidèl douvan Jéova lò nou anba problèm, nou bézwen kontinyé priyè l’, é nou bézwen étidyé so Paròl souvan é nou pa divèt janmen bliyé ki sa ki pi enpòrtan-an a kontinyé bay Jéova laglwar. Nou pouvé sir ki Jéova pa ké janmen lésé nou é ki anyen pa ké pouvé fè li arété kontan nou (li Romains 8:38, 39 ; Héb. 13:5, 6).

21. Kisa ki idé Aya ké Hector pa lésé problèm yé té gen anpéché yé vansé ?

²¹ Èkzanp nou ka jwenn annan Labib-a pouvé idé nou gen fòrs nou bézwen-an  pou sipòrté nenpòrt ki kalité sitiasyon. Parèkzanp, Aya, roun sò ki pyonyé o Japon, di ki istwè Jonas idé li arété pè préché annan lari-a. Roun jennjan yé ka aplé Hector ka rété an Endonézi é so manman ké so papa pa Témwen Jéova. I ka di ki èkzanp Rit idé li anvi anprann konnèt Jéova é adoré l’.

22. Kouman to pouvé byen profité di sa to ka wè annan vidéyo, fim ké artik asou roun moun annan Labib-a ?

²² I gen roun ran moun annan Labib-a ki jwenn menm kalité problèm ki to. Kisa ki pouvé idé to anprann konnèt yé pi byen ? Òrganizasyon Jéova-a fè plizyèr vidéyo, lèktir biblik kou pyès téyat ké plizyèr artik « Imitez leur foi », koté nou ka wè lavi sa moun-yan, kousidiré nou té la ké yé *. Anvan to gadé, kouté ouben li sa èkzanp-ya, doumandé Jéova idé to wè ki lidé ké pouvé idé to. Imajiné a to ki annan istwè-a. Pran tan byen réfléchi asou sa sa sèrvitèr Jéova fidèl-ya fè, é kouman i idé yé réglé yé problèm. Apré sa, chaché wè kouman to pouvé fè sa to anprann annan topa sitiasyon. Di Jéova mèrsi pou sa i ja ka fè pou idé to. Épi chaché kouman to pouvé ankourajé ròt-ya, konsa to ké pouvé di Jéova mèrsi pou sa i ka fè pou idé to.

23. Dapré Isaïe 41:10, 13, kisa Jéova ka promèt fè pou nou ?

²³ Lavi annan sa monn Satan ka dirijé-a rèd é détan, nou pa savé sa pou nou fè (2 Tim. 3:1). Mé nou pa divèt ni pè ni enkyèt : Jéova savé ki problèm nou ka jwenn. Lò nou ka tonbé, i ka promèt nou tchenbé nou ké so lanmen drèt (li Isaïe 41:10, 13). Atò, a pou nou sir ki Jéova ké toujou la pou idé nou. Annou chaché pran fòrs annan Labib-a. Si nou ka fè sa, nou ké pouvé tchenbé anba nenpòrt ki problèm !