Nou pouvé pozé nou kò sa késyon-an si nou ka li sa pasaj-a tro vit. Mé anfèt, istwè-a ka palé di dé Méfibochèt diféran. Annou wè sa ki pasé é kisa sa ka anprann nou.

Rwa Israyèl-a, Sayil, té gen sèt tiboug ké dé tifi. So prémyé pitit, a té Jonatan é i té gen rounòt tiboug yé té ka aplé Méfibochèt. A té Rizpa ki té bay li sa tiboug-a. Jonatan li menm osi té gen roun tiboug yé té ka aplé Méfibochèt. Donk Sayil té gen so pitit ké roun pitit di so pitit, é yé té ka aplé yé toulédé Méfibochèt.

Roun jou, Sayil ataké Gabaonit-ya ki té ka rété an mitan Israyélit-ya, é i chaché tchwé yé tout. Aparaman i tchwé roun patché annan yé. Mé i pa té gen drwa fè sa. Poukisa ? Paské annan lépòk Joziyé, chèf Israyèl-ya té promèt Gabaonit-ya ki yé pa té ké janmen chaché problèm ké yé (Jos. 9:3-27).

Sa promès-a té toujou valab annan lépòk Sayil. Mé Sayil pa rèspèkté l’ é i chaché fin ké Gabaonit-ya. A konsa « Sayil ké so fanmi tchwé moun » (2 Sam. 21:1). Pita David divini rwa annan plas Sayil. Roun jou, plizyèr Gabaonit ki té rivé chapé yé lapo vini rakonté li sa ki té rivé. David doumandé yé sa i té pouvé fè pou i té pouvé ranjé sa Sayil té fè é pou Jéova té viré béni péyi-a. Pasé yé doumandé soumaké, yé doumandé David bay yé sèt pitit di pitit mouché-a ki té éséyé ‘fè yé disparèt’ pou yé tchwé yé (Nomb. 35:30, 31). David asèpté sa yé doumandé li-a (2 Sam. 21:2-6).

A sa moman-an, Sayil ké Jonatan té ja mouri ; yé té pédi yé lavi plizyèr lannen anvan sa annan roun lagèr. Mé Méfibochèt, pitit Jonatan-an, té vivan toujou. I té divini andikapé lò i té piti é lò Sayil ataké Gabaonit-ya, i pa té annan sa. Anplis di sa, David té promèt Jonatan rété zanmi ké li é ki i té ké protéjé tout pitit ké pitit di pitit Jonatan. É Méfibochèt té roun annan yé (1 Sam. 18:1 ; 20:42). Labib-a ka di : « Rwa-a [David] vin pran pityé pou Méfibochèt, pitit Jonatan ké pitit di pitit Sayil, akoz di promès David ké Jonatan, pitit Sayil, té fè douvan Jéova » (2 Sam. 21:7).

David asèpté fè sa Gabaonit-ya té ka doumandé li fè. I bay yé dé pitit Sayil, i gen roun annan yé yé té ka aplé Méfibochèt, ké senk pitit di so pitit (2 Sam. 21:8, 9). A konsa i ranjé bagaj-ya, péyi-a pa té koupab di péché Sayil ankò.

Sa istwè-a pa la pou anyen. Lalwa Bondjé té ka byen di : « Yé pa ké tchwé timoun-yan akoz di sa yé papa fè » (Deut. 24:16). Jéova pa té ké janmen asèpté yé tchwé Sayil so dé pitit-ya ké senk pitit di so pitit si yé pa té fè anyen. Lalwa té ka di osi : « Yé ké tchwé roun moun pou sopa péché rounso. » Donk dapré sa nou ka wè, sa senk désandan Sayil ki mouri té bay li lanmen lò i té éséyé tchwé tout Gabaonit-ya. Konsa, sa sèt mouché-ya péyé pou yé péché.

Sa istwè-a ka montré nou ki nou pa pouvé fè roun mové bagaj épi apré di ki a yenki obéyi nou té ka obéyi roun lòrd yé bay nou. I gen roun provèrb ki ka di : « Fè chimen koté to ka maché-a vin plat, é to pa ké gen pyès problèm asou tout chimen to ké alé. Pa fè ni a drèt ni a goch. Fè to pyé rété lwen di sa ki mové » (Prov. 4:24-27 ; Éph. 5:15).