1-2. Kisa roun moun divèt fè anvan i batizé ?

 PANNAN senk lannen-yan ki pasé, plis pasé roun milyon moun divini Témwen Jéova. Kou Timoté annan prémyé syèk-a, roun patché annan yé koumansé anprann vérité-ya ki annan Labib dipi yé té « toupiti » (2 Tim. 3:14, 15). Rounòt ran vin konnèt lavérité lò yé té ja gran, é ròt ankò té ja granmoun. I gen déztrwa lannen, roun madanm ki té ka étidyé Labib ké Témwen Jéova-ya batizé lò i té gen 97 lannen !

² Si to ka étidyé Labib ké Témwen Jéova-ya ouben si a to papa ké to manman ki Témwen, ès to lé batizé ? A roun bèl bagaj. Mé anvan to batizé to divèt vouwé Jéova to lavi. Sa artik-a ké èspliké kisa vouwé Bondjé so lavi lé di. I ké montré osi poukisa to pa bézwen pè vouwé Bondjé to lavi épi batizé si to paré pou fè sa.

VOUWÉ BONDJÉ SO LAVI KISA SA LÉ DI ?

3. Bay èkzanp moun annan Labib ki vouwé Jéova yé lavi.

³ Annan Labib, roun moun ki té ka vouwé Bondjé so lavi, a té roun moun Jéova té ka chwazi pou roun bagaj èspésyal. Israyélit-ya té sa roun nasyon Jéova té chwazi. É roun ran annan yé té vouwé Jéova yé lavi pou roun bagaj èspésyal. Parèkzanp Aaron té ka poté asou so marétèt roun plak ki té ka briyé é ki té fèt ké lò. Sa plak-a ki té fèt ké lò té ka montré ki Bondjé té chwazi l’ pou fè roun bagaj èspésyal : i té gran prèt an Israyèl  (Lév. 8:9). Naziréyen-yan osi té ka vouwé Jéova yé lavi pou roun bagaj èspésyal. Mo « naziréyen »-an ka vini di mo ébré-a nazir, sa lé di « sa-ya ki chwazi » ouben « ki vouwé pou roun sèrvis èspésyal ». Naziréyen-yan té gen pou rèspèkté sèrten bagaj annan Lalwa Moyiz ki té fèt èspésyalman pou yé (Nomb. 6:2-8).

4. a) Poukisa nou pouvé di ki roun moun ki ka vouwé Jéova so lavi séparé di ròt-ya pou roun bagaj èspésyal ? b) Kisa sa lé di « arété viv pou nou menm » ? (gadé zimaj-a osi).

⁴ Lò to ka vouwé Jéova to lavi, to ka chwazi divini disip Jézi Kris é to ka chwazi mété volonté to Bondjé an prémyé annan to lavi. Kisa sa lé di pou to ? Jézi di : « Si roun moun lé swiv mo, i divèt arété viv pou li menm » (Mat. 16:24). An grèk, lò yé ka di « i divèt arété viv pou li menm », sa pouvé lé di osi « i divèt mété sa i lé asou koté ». Donk, si to ka vouwé Jéova to lavi, to ké divèt réfizé fè tousa ki pa k’alé ké so volonté (2 Cor. 5:14-15). Parèkzanp, to ké divèt réfizé fè « sa lachè-a ka bay », kou kondwit sèksyèl ki pa pròp (Gal. 5:19-21 ; 1 Cor. 6:18). Ès to lavi ké pi rèd paské i gen bagaj to pa ké pouvé fè ? To lavi pa ké rèd si to kontan Jéova é si to sir ki so lalwa bon pou to (Ps. 119:97 ; Is. 48:17, 18). Men sa roun frè yé k’aplé Nicholas ka di asou sa : « To pouvé wè lalwa Jéova kou roun lajòl ki ka anpéché to fè sa to lé, ouben kou roun kaj koté lyon-yan fronmen pou anpéché yé manjé to. »

5. a) Kouman roun moun ka vouwé Jéova so lavi ? b) Ki diférans i gen ant vouwé Jéova so lavi épi batizé ? (gadé zimaj-a osi).

⁵ Kouman roun moun ka vouwé Bondjé so lavi ? Lò to ka vouwé Jéova to lavi, sa lé di ki to ka priyè l’ pou promèt  li ki a li rounso to ké adoré é ki to ké toujou mété so volonté an prémyé annan to lavi. Anfèt, to ka promèt li ki to ké kontinyé kontan li « ké tout to tchò, ké tout to nanm, ké tout to pansé épi ké tout to fòrs » (Marc 12:30). Pou batenm-an, tout moun ka wè ki to vouwé Jéova to lavi. Mé lò to ka priyè Jéova pou vouwé li to lavi, a roun bagaj to ka fè to rounso ké li. A roun vé ki sakré. To gen pou rèspèkté sa vé-a kou Jéova lé to fè l’ (Eccl. 5:4, 5).

POUKISA VOUWÉ JÉOVA TO LAVI A ROUN BON BAGAJ ?

6. Poukisa roun moun ka vouwé Jéova so lavi ?

⁶ Prémyé bagaj-a ki ka fè to vouwé Jéova to lavi, a to lanmou pou li. É sa lanmou-a pa ka vin akoz di sa to ka rousanti rounso. Mé pito paské to trapé « vré konésans »-a é paské to ka « wè bagaj-ya kou Bondjé ka wè yé » (Col. 1:9). A sa bagaj-ya ki fè to lanmou grandi. Lò to étidyé Labib to vin sir ki 1) Jéova ka èkzisté, 2) ki Labib, a so Paròl, épi 3) i ka sèrvi so òrganizasyon pou fè so volonté fèt.

7. Kisa nou divèt fè anvan nou vouwé Jéova nou lavi ?

⁷ Roun moun ki ka vouwé Jéova so lavi divèt konnèt prémyé ansèyman nou ka anprann annan so Paròl é apliké sa i ka anprann annan so lavi. I divèt fè tousa i pouvé pou palé ròt-ya di so lafwa osi (Mat. 28:19, 20). Kou so lanmou pou Jéova vin pi fò, sa i divèt lé, a adoré l’ li rounso. Si to gen sa kalité lanmou-a pou Bondjé, to ké konprann  ki to pa divèt vouwé Jéova to lavi ni batizé sèlman paské to lé fè to papa ké to manman ouben moun-an ki ka étidyé Labib ké to plézi, ni menm pou to fè kou to zanmi.

8. Kouman rékonésans-a pouvé idé to désidé vouwé Jéova to lavi ? (Psaume 116:12-14).

⁸ Si to ka sonjé tousa Jéova fè pou to, to ké anvi vouwé li to lavi (li Psaume 116:12-14). Labib ka di ki a li ki ka bay « tout bèl bagaj ké tout kado parfè » (Jacq. 1:17). Pi gran kado i fè nou-a, a sakrifis so Pitit, Jézi. Sonjé sa : gras a ranson-an, to pouvé gen roun lanmityé ké Jéova ki fò é to gen posibilité viv pou tout-tan (1 Jean 4:9, 10, 19). Vouwé Bondjé to lavi, a roun annan pi bon fason i gen pou montré to rékonésans pou sa sakrifis-a ki sa pi bèl prèv lanmou pyès moun pa janmen bay, épi pou tout ròt bénédiksyon i ka bay to (Deut. 16:17 ; 2 Cor. 5:15). Liv Viv ké tchò kontan pou tout-tan ! ka palé di sa lidé-a annan parti 4 di léson 46-a, koté i gen vidéyo-a Annou bay Jéova kado. I ka diré trwa minit.

ÈS TO PARÉ ?

9. Si roun moun pòkò paré pou vouwé Jéova so lavi, kisa i pa divèt fè ?

⁹ Pitèt to ka di to kò ki to pòkò paré pou vouwé Jéova to lavi épi batizé. Pitèt to gen ròt chanjman pou fè annan to lavi pou to obéyi lalwa Jéova, ouben pitèt to bézwen plis tan pou fè to lafwa vin pi fò (Col. 2:6, 7). Tout moun pa ka fè progrè vitman, é tout jennjan-yan pa paré pou vouwé Jéova yé lavi épi batizé an menm tan. Donk, pou wè ki progrè to ka fè, pa konparé to kò ké rounòt moun ; gadé sa to menm to pouvé fè (Gal. 6:4, 5).

10. Si to ka pansé ki to pòkò paré pou vouwé Jéova to lavi épi batizé, kisa to pouvé fè ? (gadé osi karé-a «  Pou sa-ya ki ka grandi annan lavérité-a »).

¹⁰ Si to ka randé to kò kont ki to pòkò paré pou vouwé Jéova to lavi, gardé sa bèl òbjèktif-a. Doumandé Jéova béni éfòr to ka fè pou fè tout chanjman to divèt fè toujou (Phil. 2:13 ; 3:16). To pouvé sir ki i ké kouté to lapriyè é ki i ké réponn to (1 Jean 5:14).

POUKISA ROUN RAN KA ÉZITÉ

11. Kouman Jéova ké idé nou rété fidèl ?

¹¹ Roun ran moun paré pou vouwé Jéova yé lavi épi batizé, é pourtan yé ka ézité. Détan yé ka di annan yé tchò : « É si mo batizé épi mo ka fè roun péché grav épi yé ka mété mo dèrò di asanblé-a ? » Si a sa to pè, a pou to sir ki Jéova ké bay to tousa to bézwen pou to ‘gen roun kondwit kou [i] ka doumandé’ é pou to « fè li plézi » (Col. 1:10). I ké bay to fòrs osi pou to fè sa ki byen. I ja montré ki i pouvé fè l’ paské i fè l’ pou roun patché moun (1 Cor. 10:13). A pou sa finalman i pa gen bokou moun ki èskominyé. Jéova ka bay nou sa nou bézwen pou nou rété fidèl, asiré pa pitèt.

12. Kisa ki ké idé to pa fè roun péché ki grav ?

¹² Paské nou pyès pa parfè nou tout pouvé anvi fè sa ki mové (Jacq. 1:14) Mé, a to ki pou désidé sa to ké fè lò i ké gen roun tantasyon. Finalman, a to ki ké désidé kouman to ké mennen to lavi. Menm si roun ran moun pouvé éséyé fè to krè ki to pa pouvé kontrolé ni sa to ka di ni sa to ka rousanti, sa pa vré  menm, to pouvé fè l’. É menm lò i gen tantasyon, to pouvé désidé pa fè roun bagaj ki mové. Pou to fè sa, priyè chak jou, étidyé Paròl Bondjé souvan, alé annan réinyon asanblé-a é palé di to lafwa. Konsa, to ké gen fòrs to bézwen pou rèspèkté vé to fè-a. Anplis di sa, Jéova ké idé to rèspèkté l’, pa janmen bliyé sa (Gal. 5:16).

13. Ki bèl èkzanp Jozèf lésé pou nou ?

¹³ Sa ké pi fasil pou to rèspèkté vé to fè-a si to ka désidé alavans kouman to ké réyaji si to ka jwenn roun tantasyon. A sa roun patché moun annan Labib fè é yé menm yé pa té parfè non plis. Annou palé di Jozèf. A pa dé fwa madanm Pitifar éséyé kasé ti bwa annan so zorè. Mé i té ja savé kouman pou i té réyaji. Labib ka di ki « Jozèf pa té lé » sa menm é i té ka di li : « Kouman to lé mo fè roun bagaj mové konsa épi péché kont Bondjé ? » (Gen. 39:8-10). Sa klè, Jozèf té ja désidé kouman i té divèt réyaji anvan menm madanm Pitifar té koumansé fala l’. Konsa, sa té pi fasil pou i té fè sa ki té drèt lò madanm-an tanté l’.

14. Kisa ki ké pèrmèt nou réfizé bagaj ki mové ?

¹⁴ Kouman to pouvé montré ki to byen désidé kou Jozèf ? A pou to désidé aprézan sa to ké fè lò tantasyon-an ké vin. Anprann di non lanmenm lò i gen bagaj Jéova rayi épi fè tousa to pouvé pou to pa menm sonjé sa bagaj-ya (Ps. 97:10 ; 119:165). Konsa, lò to ké jwenn roun tantasyon, to ké di non san bégéyé. To ké savé kouman pou to réyaji. To ké ja désidé ki konpòrtman to ké gen.

15. Kouman roun moun pouvé montré ki i ka « chaché Jéova ké tout so tchò » ? (Hébreux 11:6).

¹⁵ Mé, ès i gen rounòt bagaj ki ka anpéché to vouwé Jéova to lavi épi batizé menm si to savé ki to trouvé lavérité é ki to lé adoré Bondjé ké tout to tchò ? Si a sa, swiv èkzanp rwa David lésé é sipliyé Jéova konsa : « Byen gadé annan mo tchò, o Bondjé, pou to savé sa i gen annan l’. Byen gadé annan mo tchò, pou to savé sa ki ka fè mo enkyèt. Gadé pou wè si i pa gen mové  bagaj annan mo tchò, é fè mo maché asou chimen lavi pou tout-tan-an » (Ps. 139:23, 24). Jéova ka béni « moun-yan ki ka chaché l’ ké tout yé tchò ». É to ka montré l’ ki a sa to ka fè, lò to ka fè tousa to pouvé pou rivé vouwé to lavi épi batizé (li Hébreux 11:6).

KONTINYÉ VIN PRÒCH KÉ JÉOVA

16-17. Kouman Jéova ka fè sa-ya ki lévé annan lavérité-a vin òbò li ? (Jean 6:44).

¹⁶ Jézi di ki pyès moun pa pouvé divini so disip si Jéova pa ka fè l’ vini òbò li (li Jean 6:44). Ès to ja réfléchi asou sa bèl bagaj Jézi di-a ké asou sa sa lé di pou to ? Jéova ka wè bon bagaj annan tchò chak moun i ka fè vini òbò li. I ka wè sa moun-an kou « so nasyon èspésyal », ouben roun bagaj i gen « ki gen bokou valò » (Deut. 7:6 ; nòt). A konsa i ka wè to osi.

¹⁷ Mé pitèt to sa roun jennjan é a to papa ké to manman ki Témwen Jéova. Pitèt to ka santi ki to ka adoré Jéova sèlman paské to paran ka fè l’ mé pa paské i fè to vini òbò li. Labib-a ka di : « Vini pi pròch di Bondjé, é i ké vini pi pròch di zòt » (Jacq. 4:8 ; 1 Chron. 28:9). Lò a to ka désidé vini pi pròch di Jéova, i ka vini pròch di to osi. Pou li, to pa sa jis roun moun annan roun group. I ka fè chak moun vini òbò li, é a menm bagaj-a i ka fè pou sa-ya ki lévé annan lavérité-a. Donk, lò roun moun ki lévé annan lavérité-a ka désidé vini pròch di li, Jéova ka fè sa ki marké annan Jacques 4:8 (gadé 2 Thessaloniciens 2:13).

18. Kisa nou ké wè annan ròt artik-a ? (Psaume 40:8)

¹⁸ Lò to ka vouwé Jéova to lavi é to ka batizé, to ka imité mantalité Jézi. A ké tchò kontan i vin douvan so Papa pou fè tousa i té ké doumandé li fè (li Psaume 40:8 ; Héb. 10:7). Annan ròt artik-a, nou ké wè sa ki ké idé to kontinyé sèrvi Jéova ké fidélité apré to batenm.