A sèlman gras a ranson Jézi péyé-a lò i bay so disan ki Bondjé pouvé pardonnen nou péché (Éph. 1:7). Mé, Labib ka di : « Kou [Bondjé] té ka pran pasyans, i pardonnen péché moun fè tan-lontan », sa lé di, anvan Jézi bay ranson-an (Rom. 3:25). Kouman Jéova té pouvé fè sa é an menm tan kontinyé swiv so prensip ki jis é ki parfè ?

Lò Jéova désidé bay roun « désandans » ki té ké sové moun-yan ki té ké gen lafwa annan li, a sa moman-an, pou li, ranson-an té ja péyé (Gen. 3:15 ; 22:18). I té sir ki lò moman-an té ké rivé, so sèl Pitit té ké bay so lavi kou ranson ké tout so tchò (Gal. 4:4 ; Héb. 10:7-10). Lò i té asou latè-a, kou i té ka réprézanté Bondjé, Jézi té gen drwa pardonnen péché moun-yan menm si i patékò bay so lavi kou ranson. É i fè l’ paské i té savé ki so sakrifis té ké kouvri péché sa-ya ki té gen lafwa annan so Papa (Mat. 9:2-6).