1. Détan, di kisa roun ran sèrvitèr Jéova ki fidèl pa sir ?

 LÒ NOU ka sonjé ki Jéova kontan tout so sèrvitèr, sa ka rasiré nou ! Labib ka di : « Jéova kontan so pèp » (Ps. 149:4). Mé détan, roun ran tèlman dékourajé ki yé ka doumandé yé kò : « É mo menm, ès Jéova kontan mo ? » Tan-lontan, plizyèr sèrvitèr Jéova ki té fidèl doumandé yé kò menm bagaj-a (1 Sam. 1:6-10 ; Job 29:2, 4 ; Ps. 51:11).

2. Kimoun ka fè Jéova plézi ?

² Labib ka byen montré ki menm si nou pa parfè, nou pouvé fè Bondjé plézi. Kisa nou divèt fè ? Nou divèt montré ki nou gen lafwa annan Jézi épi batizé (Jean 3:16). Lò nou ka batizé, nou ka montré tout moun ki nou répanti di nou péché é ki nou promèt Bondjé fè so volonté (Actes 2:38 ; 3:19). Jéova kontan toubonnman lò i ka wè nou fè sa bagaj-ya pou nou divini so zanmi. Tout tan nou ka fè tousa nou pouvé pou nou tchenbé nou promès, i kontan nou é i ka pèrmèt nou sa so zanmi (Ps. 25:14).

3. Kisa nou ké wè annan sa artik-a ?

³ Magré sa, roun ran ka krè ki yé pa ka fè Jéova plézi. Poukisa ? Kouman Jéova ka montré nou ki i kontan sa nou ka fè ? É kisa roun krétyen pouvé fè pou i sir ki Jéova kontan sa i ka fè ?

 POUKISA ROUN RAN KA KRÈ KI YÉ PA KA FÈ JÉOVA PLÉZI

4-5. Menm si détan to ka pansé ki to pa vo anyen, di kisa to pouvé sir ?

⁴ Dipi yé toupiti roun patché moun ka pansé ki yé pa vo anyen é yé ka briga ké sa (Ps. 88:15). Men sa roun frè yé k’aplé Adrián ka rakonté : « Mo toujou krè ki mo pa té vo anyen. Lò mo té piti, mo té ka priyè pou mo fanmi alé annan Paradi-a, mé mo té sir ki mo menm, mo pa té asé byen pou mo alé annan Paradi-a osi. » Tony, ki pa lévé annan roun fanmi krétyen, ka di : « Mo papa ké mo manman pa janmen di mo ki yé té kontan mo, ouben ki yé té fyèr di mo. Donk pou mo, mo pa té ka janmen fè asé. »

⁵ Si to ka soufri paské to ka krè ki to pa vo anyen, sonjé ki a Jéova li menm ki fè to vini òbò li (Jean 6:44). I ka wè bon bagaj annan to tchò ki to menm pitèt to pa ka wè, é i savé ki kalité moun to sa vréman (1 Sam. 16:7 ; 2 Chron. 6:30). Donk, to pouvé krè li lò i ka di ki to gen valò pou li (1 Jean 3:19, 20).

6. Kisa Pòl té ka pansé di li menm ?

⁶ Roun ran krétyen fè mové bagaj anvan yé anprann konnèt lavérité. Jik jòdla, yé konsyans ka bat yé lò yé ka sonjé sa (1 Pierre 4:3). Ròt krétyen ki fidèl divèt briga yé menm osi ké défo yé gen. É to menm, ès to tchò ka kondané to ? Si a sa, a pou to savé ki ròt sèrvitèr Jéova ja rousanti menm bagaj-a. Parèkzanp, apot Pòl té ka santi ki i pa té vo anyen lò i té ka sonjé so défo (Rom. 7:24). A vré, i té répanti é i té batizé, mé i té ka di ki ‘annan tout apot-ya, a li ki té pi piti’, é annan ‘moun ki té ka fè péché’, ‘a li ki té prémyé’ (1 Cor. 15:9 ; 1 Tim. 1:15).

7. Kisa nou pa divèt bliyé parapòrta péché nou fè anvan ?

⁷ Si nou ka répanti, nou Papa ki annan syèl-a ka promèt nou pardonnen nou (Ps. 86:5). Donk, si to ka rigrété péché to fè ké tout to tchò, to pouvé krè Jéova : i pardonnen to (Col. 2: 13).

8-9. Kouman to pouvé arété krè ki to pa ké janmen fè asé pou fè Jéova plézi ?

⁸ Nou tout lé fè tousa nou pouvé pou sèrvi Jéova ké tousa nou gen. Mé pitèt to ka di ki sa to ka fè pa ké janmen asé pou fè l’ plézi. Men sa roun sò yé k’aplé Amanda ka di : « Mo toujou gen tandans ka pansé ki bay Jéova sa to gen ki miyò, sa lé di fè toujou plis. Souvan, mo lé fè plis ki sa mo pouvé fè. É lò mo pa ka rivé, mo tris menm é mo ka pansé ki Jéova pa kontan non plis. »

⁹ Kouman to pouvé arété krè ki to pa ké janmen fè asé pou fè Jéova plézi ? Pa bliyé ki Jéova rézonab. I pa ka janmen doumandé to fè plis ki sa to pouvé fè. Dipi to ka fè tousa to pouvé, i kontan sa to ka bay li. To pouvé réfléchi osi asou èkzanp moun annan Labib ki sèrvi Jéova ké tout yé tchò. Pòl parèkzanp. Pannan lontan, i fè roun patché kilomèt épi i kréyé roun patché asanblé. Mé lò so sitiasyon chanjé é i pa té pouvé préché bokou kou anvan, ès Bondjé arété kontan l’ ? Non. Kou Pòl kontinyé fè sa i té pouvé, Jéova béni l’ (Actes 28:30, 31). Menm fason-an, sa  to pouvé bay Jéova pouvé chanjé. Mé sa ki enpòrtan pou li, a sa to gen annan to tchò. Aprézan, annou wè kouman Jéova ka montré nou ki nou ka fè l’ plézi.

KOUMAN JÉOVA KA MONTRÉ NOU KI NOU KA FÈ L’ PLÉZI ?

10. Kouman to pouvé « tandé » Jéova ka di to ki to ka fè l’ plézi ? (Jean 16:27).

¹⁰ Gras a Labib. Jéova lé montré sa-ya i kontan ki yé ka fè l’ plézi. Dé fwa, i di ki Jézi té sa so Pitit i kontan-an é ki i té ka fè l’ plézi (Mat. 3:17 ; 17:5). Ès to té ké kontan tandé Jéova di to ki to ka fè l’ plézi ? Jéova pa ka palé dirèktéman ké to, mé i ka fè l’ ké so Paròl Labib. To pouvé « tandé » l’ ka di to ki to ka fè l’ plézi lò to ka li sa Jézi di annan Évanjil-ya (li Jean 16:27). Jézi té èkzaktéman kou so Papa. É plizyèr fwa, i di so disip ki té fidèl mé ki pa té parfè, ki i té kontan ké sa yé té ka fè. Donk, lò to ka li sa paròl-ya, to pouvé imajiné ki a sa Jéova ka di to (Jean 15:9, 15).

11. Poukisa lò to gen éprèv sa pa lé di ki Jéova pa kontan to ankò ? (Jacques 1:12).

¹¹ Gras a sa i ka fè. Jéova anvi idé nou. Parèkzanp, i ka bay nou sa bézwen pou viv. Détan, i ka lésé nou trapé éprèv, kou i fè l’ ké Jòb (Job 1:8-11). Mé lò to gen éprèv, sa pa lé di ki Jéova pa kontan to ankò. A pito moman-an pou to pouvé montré li kouman to kontan l’ é to ka fè l’ konfyans (li Jacques 1:12). A la to pouvé wè osi kouman i kontan to é i ka soutni to.

12. Kisa èkzanp Dmitri ka anprann to ?

¹² Annou palé di Dmitri. Roun frè ki ka rété an Azi. I pédi so travay é i pa té ka rivé trouvé rounòt lanmenm. Donk, i désidé préché plis pou montré Jéova ki i té ka fè l’ konfyans. Mwa té ka pasé, i pa té ka trouvé pyès travay. Apré sa, i tonbé é i pa té pouvé lévé di so lit ankò. A la i koumansé di so kò ki i pa té sa roun bon mari, ni roun bon papa, é ki i pa té ka fè Jéova plézi ankò. Épi roun jou aswè, so tifi enprimé Isaïe 30:15 : « Men sa ki ké sa zòt fòrs : rété kalm é  fè mo konfyans. » I mennen papyé-a pou li annan so lit épi i di li : « Papa, lò to ké dékourajé, sa vèrsé-a ké idé to. » A sa moman-an, Dmitri randé so kò kont ki gras a Jéova, so fanmi té toujou gen manjé, lenj pou mété épi roun koté pou yé viv. I ka di : « Sa mo té gen pou fè, a té rété kalm épi kontinyé fè mo Bondjé konfyans. » Si to annan menm kalité sitiasyon-an, to pouvé sir ki Jéova ka gadé pou to é ki i ké idé to tchenbé rèd.

13. Kimoun Jéova ka itilizé pou fè nou konprann ki nou ka fè l’ plézi, é kouman i ka fè l’ ?

¹³ Gras a nou frè ké nou sò-ya. Jéova ka sèrvi nou frè ké nou sò-ya pou fè nou santi ki i kontan nou. Parèkzanp i pouvé fè yé di nou roun bagaj ki ké ankourajé nou jiskont lò nou bézwen. A sa ki rivé roun sò ki ka rété an Azi. I pédi so travay é i vin malad menm. Épi so mari fè roun péché grav é akoz di sa, i pédi so rèsponsabilité ansyen. I ka di : « Mo pa té ka konprann poukisa tousa té ka rivé mo. Mo té ka pansé ki mo té pitèt fè roun bagaj ki pa té bon, é ki mo pa té ka fè Jéova plézi ankò. » I sipliyé Jéova pou i rasiré l’. Kouman Jéova réponn li ? « Plizyèr ansyen annan asanblé-a rasiré mo é fè mo konprann ki Jéova té kontan mo. » Pita, i doumandé Jéova rasiré l’ ankò. I ka di : « Menm jou-a, mo rousouvwè roun lèt plizyèr frè ké sò annan mo asanblé té ékri pou ankourajé mo. Pi mo té ka li l’, pi mo té sir ki Jéova té tandé mo. » Souvan, Jéova ka sèrvi so sèrvitèr pou fè nou konprann ki i kontan nou (Ps. 10:17).

14. Kisa Jéova ka fè ankò pou montré nou ki nou ka fè l’ plézi ?

 ¹⁴ Jéova ka montré nou ki i kontan nou gras a konsèy nou frè ké sò ka bay nou. Parèkzanp, annan 1^é syèk-a, Jéova itilizé Pòl pou ékri asanblé-ya 14 lèt. Annan sa lèt-ya, i gen konsèy ki fò mé ki plen ké lanmou. Poukisa Jéova fè Pòl ékri sa konsèy-ya ? Paské i sa roun bon Papa ki ka korijé so timoun « i kontan » (Prov. 3:11, 12). Alòr, si yé ka bay to roun konsèy ki ka vini di Labib-a, sa pa lé di ki i pa kontan to, a pou to wè sa kou roun prèv ki ka montré ki i kontan to (Héb. 12:6). Ki ròt bagaj ka montré ki nou ka fè Jéova plézi ?

RÒT BAGAJ KI KA MONTRÉ KI NOU KA FÈ JÉOVA PLÉZI

15. Kimoun Jéova ka bay so lèspri sen, é poukisa sa ka rasiré nou ?

¹⁵ Jéova ka bay sa-ya ki ka fè l’ plézi so lèspri sen (Mat. 12:18). Doumandé to kò : « Ès mo ka rivé gen sèrten kalité lèspri sen ka bay ? » Parèkzanp, pitèt to rémarké ki to ka pran plis pasyans ké ròt-ya parapòrta sa to té ka fè anvan to konnèt Jéova. Anfèt, pi to gen kalité lèspri sen-an ka bay, pi to pouvé sir ki to ka fè Jéova plézi ! (gadé karé-a «  Frwi lèspri-a, a... »).

16. Kimoun Jéova ka doumandé préché bon nouvèl-a, é kisa sa ka fè to ? (1 Thessaloniciens 2:4).

¹⁶ Jéova ka doumandé sa-ya i kontan préché bon nouvèl-a (li 1 Thessaloniciens 2:4). Annou wè kouman prédikasyon-an ankourajé Jocelyn, roun di nou sò. Roun jou, i lévé, i té dékourajé. I ka di : « Mo pa té gen pyès fòrs, é mo té ka santi ki mo pa té vo anyen. Mé mo té pyonyé é sa jou-a mo té di ki mo té ké préché. Alòr, mo priyè épi mo alé. » Sa jou-a, i kontré ké Mari, roun madanm tou janti ki asèpté étidyé Labib. Plizyèr mwa pita, Mari di li ki lò i konyen so lapòt, i té ka priyè Bondjé pou i idé l’. Kisa Jocelyn rousanti lò i anprann sa ? I ka di : « A kousidiré Jéova té di mo : “To ka fè mo plézi” ». A vré, a pa tout moun ki ka asèpté nou mésaj. Mé to pouvé sir ki Jéova kontan lò i ka wè to fè tousa to  pouvé pou fè tout moun konnèt bon nouvèl-a.

17. Kisa sa Vicky di ka anprann nou ? (Psaume 5:12).

¹⁷ Jéova ka pèrmèt sa-ya ki ka fè l’ plézi profité di ranson-an (1 Tim. 2:5, 6). Kisa to pouvé fè si to gen lafwa annan ranson-an é to batizé mé to pa ka rivé krè ki Jéova kontan ké sa to ka fè ? Pa bliyé ki détan, nou divèt panga sa nou ka rousanti ; parkont, nou toujou pouvé fè Jéova konfyans. Pou li, sa-ya ki gen lafwa annan ranson-an, a dé moun ki jis é i ka promèt béni yé (li Psaume 5:12 ; Rom. 3:26). Lò Vicky réfléchi asou ranson-an sa idé l’ bokou. Men sa i ka èspliké : « Mo vin konprann ki Jéova té pran bokou pasyans ké mo. Anfèt, fason mo té ka réyaji, a kousidiré mo té ka di li : “To lanmou pa fò asé pou touché mo. Sakrifis to Pitit pa gran asé pou kouvri mo péché.” » Lò i réfléchi asou ranson-an, sa bèl kado-a, a prémyé fwa i rousanti lanmou Jéova gen pou li. To menm osi, to pouvé rousanti lanmou Jéova si to ka pran tan réfléchi asou ranson-an.

18. Di kisa nou pouvé sir si nou ka kontinyé kontan nou Papa ki annan syèl-a ?

¹⁸ Menm si to ka fè tousa to pouvé pou to swiv konsèy-ya ki annan sa artik-a, détan, pitèt to ké santi to dékourajé é to ké doumandé to kò si Jéova kontan to. Si a sa, a pou to sonjé ki i ka bay « sa-ya ki ka kontinyé kontan l’ » so favèr (Jacq. 1:12). Atò, rété pròch di li épi chaché wè kouman i ka montré to ki to ka fè l’ plézi. Pou fini, pa bliyé ki Jéova « pa lwen di nou chak » (Actes 17:27).