1. Kisa ki pitèt fè to rété èstébékwé lò to koumansé palé di Labib-a ké ròt-ya ?

ÈS TO ka sonjé jou-a to konprann ki to té trouvé lavérité-a ? Sa to té ka anprann annan Labib-a té tèlman klè pou to, klè kou dlo ròch ! To té ka pansé ki, kou to menm, to fanmi ké to zanmi té ké kontan anprann sa. To té sir ki sa Labib-a ka di té ké fè yé gen roun lavi ki pi bèl ké roun bèl èspwar (Ps. 119:105). Donk, to pa fè ni roun ni dé, to alé palé pou tout to zanmi ké to fanmi. Mé kouman yé réyaji ? To pa té ka antann sa, mé près yé tout pa té lé tandé sa to té ka di yé.

2-3. Kouman près tout moun annan lépòk Jézi réyaji lò i té ka fè mirak é lò i té ka ansényé ?

² Nou pa divèt rété èstébékwé paské moun-yan pa lé kouté sa nou ka préché. Près tout moun annan lépòk Jézi pa asèpté l’ menm si i té ka fè mirak ki té ka byen montré ki Bondjé té ké li. Parèkzanp, Jézi résisité Lazar. A té roun mirak so lèlmi té oblijé krè. Mé magré sa mirak-a, chèf jwif-ya pa asèpté ki Jézi té sa Mési-a. Yé té jis lé tchwé ni Jézi ni Lazar ! (Jean 11:47, 48, 53 ; 12:9-11).

³ Jézi té savé ki près tout moun pa té ké lé asèpté ki i té sa Mési-a (Jean 5:39-44). Men sa i di dé disip Janbatis : « Sa-la ki pa ka wè annan sa mo ka fè pyès rézon pou i tonbé gen tchò kontan * » (Mat. 11:2, 3, 6). Mé poukisa i gen bokou moun konsa ki pa asèpté Jézi ?

4. Di kisa nou ké palé annan sa artik-a ?

 ⁴ Annan sa artik-a ké sa-la ki ka vin dèyè-a, nou ké wè poukisa près tout moun annan lépòk Jézi pa té gen lafwa annan li. Nou ké wè osi poukisa jòdla bokou moun pa lé kouté sa nou ka di. É pi enpòrtan-an, nou ké wè sa nou divèt fè pou nou pa lésé anyen anpéché nou swiv Jézi.

5. Poukisa roun ran moun pitèt pansé ki Jézi pa té pouvé sa Mési-a ?

⁵ Bokou moun pa asèpté swiv Jézi akoz di koté i té soti. Yé té ka rékonnèt ki i té sa roun ansényan ki té vayan é ki té ka fè mirak. Mé pou yé, a té yenki pitit roun ti charpantyé. Anplis di sa, i té ka rété Nazarèt, é roun patché moun té ka pansé ki sa vil-a pa té gen pyès enpòrtans. Parèkzanp, anvan Natanaèl divini disip Jézi, i doumandé : « Ki bon bagaj Nazarèt pouvé bay ? » (Jean 1:46). Pou li, pitèt i pa té gen anyen annan sa koté-a. Ouben pitèt i té ka sonjé profési ki annan Michée 5:2, ki té ka di ki Mési-a té ké fèt Bètléèm. I pa té ké fèt Nazarèt.

6. Annan lépòk Jézi, kisa ki té divèt fè moun-yan sir ki Jézi té sa Mési-a ?

⁶ Kisa Paròl Bondjé-a té ka di ? Izayi té di ki lèlmi Jézi-ya pa té ké pran tan chaché konnèt ‘bagaj [asou Mési-a]’, sa lé di bagaj asou koté i té soti (Is. 53:8). Pourtan, profési-ya té ka bay patché enfòrmasyon asou sa. Si yé té pran tan byen gadé tout bagaj, yé té ké wè ki Jézi té fèt Bètléèm é ki rwa David té sa so gangan (Luc 2:4-7). Jézi té byen fèt koté Michée 5:2 té di i té ké fèt. Alòr, problèm-an a té kisa ? Moun annan lépòk Jézi kouri pran yé désizyon san yé pa chaché konnèt tout bagaj asou li. A pou sa yé pa asèpté Jézi.

7. Poukisa bokou moun ka méprizé Témwen Jéova-ya ?

⁷ Ès nou gen menm problèm-an jòdla ? Wi. An jénéral, Témwen Jéova-ya pa gen bokou lajan é a pa moun enpòrtan annan lasosyété-a. A pou sa, bokou moun ka wè nou kou « dé moun ki pa fè gran lékòl, dé moun kou tout moun » (Actes 4:13). Roun ran moun ka pansé ki nou pa adòk pou anprann moun sa Labib-a ka di paské nou pa fè gran lékòl pou konnèt bagaj asou Bondjé. Rounòt ran ka di ki Témwen Jéova-ya sa roun « rélijyon ki soti Amérik », mé asou tout Témwen Jéova-ya i pa menm gen 15 % ka rété Ozétazini. Ròt ankò tandé moun di ki nou pa ka krè annan Jézi. Yé di nou « kominis », « èspyon amériken » ouben ankò « èstrémis ». Atò, bokou moun pa lé divini Témwen Jéova paské yé tandé sa manti-ya é yé pa konnèt lavérité asou pèp Jéova-a.

8. Dapré Actes 17:11, kisa moun-yan divèt fè pou savé kimoun ki ka vréman adoré Bondjé ?

⁸ Kisa ki ké anpéché nou pédi nou lafwa ? Nou divèt chaché konnèt lavérité. A sa Lik fè lò i ékri so Lévanjil. I fè tousa i té pouvé pou byen ‘chaché konnèt sa ki té rivé dipi koumansman-an’. I té lé ki moun ki té ké li so liv ‘wè ki sa yé té anprann yé’ asou Jézi ‘té vréman vré’ (Luc 1:1-4). Jwif-ya ki té ka rété Béré fè kou li. Lò yé tandé bon nouvèl-a asou Jézi, yé alé wè annan Ékritir ébrayik-ya pou wè si sa yé té ka di yé té vré (li Actes 17:11). Menm fason-an, jòdla, moun-yan divèt chaché konnèt lavérité. Yé divèt konparé sa Témwen Jéova-ya ka anprann  yé ké sa Labib-a ka di. Yé divèt osi étidyé istwè Témwen Jéova-ya di nou lépòk. Si yé ka fè sa, yé pa ké lésé sa moun ka di ouben ka pansé, bloublou yé.

9. Kouman roun ran moun réyaji lò Jézi pa asèpté fè roun mirak ki té ka vin di syèl-a ?

⁹ Pou roun ran moun sa Jézi té ka anprann yé-a pa té asé. Yé té lé plis ki sa. Yé té lé ki Jézi montré yé roun « mirak ki ka vin di syèl-a » pou montré yé ki i té sa Mési-a (Mat. 16:1). Pitèt, yé pa té ka byen konprann profési ki annan Daniel 7:13, 14. A pa té a sa lépòk-a Jéova té prévwè pou sa profési-a réyalizé. Sa Jézi té ka anprann moun-yan té divèt asé pou yé té sir ki i té sa Mési-a. Malérèzman, lò i pa fè mirak yé té doumandé li-a, roun ran pa asèpté l’ (Mat. 16:4).

10. Kouman Jézi réyalizé sa Izayi té ékri asou Mési-a ?

¹⁰ Kisa Paròl Bondjé-a té ka di ? Profèt Izayi té ékri asou Mési-a : « I pa ké ni rélé ni palé fò, é i pa ké fè moun tandé so vwa annan lari-a » (Is. 42:1, 2). Lò Jézi fè so travay asou latè-a i pa chaché fè so kò rémarké. Jézi pa fè pyès tanp pou fè moun wè, i pa té ka mété lenj èspésyal é i pa té ka doumandé pyès moun aplé l’ ké tit èspésyal. Pannan so prosè, menm si so lavi té an danjé, i pa asèpté fè roun mirak pou fè rwa Éròd plézi (Luc 23:8-11). A vré i fè mirak, mé sa ki té pi enpòrtan pou li a té préché bon nouvèl-a. I di so disip-ya : « A pou sa mo vini » (Marc 1:38).

11. Kisa roun ran moun kontan ?

¹¹ Ès nou gen menm problèm-an jòdla ? Wi. Bokou moun kontan gran katédral koté i gen bèl dékorasyon ki ka kouté chè. Yé kontan lò moun annan légliz gen gran grad é yé kontan osi sérémoni yé ka fè san yé pa menm konnèt koté sa sérémoni-ya soti. Mé lò sa moun-yan ka alé annan sa rélijyon-yan, kisa yé ka anprann asou Bondjé ké asou sa i prévwè fè ? Yé pa ka anprann gran  kichoz. Parkont, sa-ya ki ka vini annan nou réinyon ka anprann yé viv kou Jéova ka doumandé nou viv. Nou sal di Rwayonm-yan pa dékoré ké gran bagaj pou fè moun wè, mé yé pròp é yé senp. Sa-ya ki gen rèsponsabilité annan asanblé-a pa ka mété lenj èspésyal. Yé pa gen pyès gran grad non plis. Sa nou ka anprann moun épi sa nou ka krè ka apiyé asou Paròl Bondjé-a. Mé magré sa, bokou pa ka asèpté kouté sa nou ka di paské yé ka pansé ki fason nou ka adoré Bondjé-a tro senp pou yé. Anplis di sa, sa nou ka anprann moun, a pa sa yé lé tandé.

12. Dapré Hébreux 11:1, 6, asou kisa nou lafwa divèt apiyé ?

¹² Kisa ki ké anpéché nou pédi nou lafwa ? Pòl di krétyen-yan ki té ka rété Ròm : « Nou pouvé gen lafwa, gras a sa nou ka tandé. É si nou ka tandé, a paské roun moun ka palé di Kris » (Rom. 10:17). Donk, a pa lò nou k’alé annan gran bèl sérémoni ki pa gen anyen ka wè ké Labib-a ki nou ka fè nou lafwa vin pi fò. A lò nou ka étidyé Labib-a nou ka fè nou lafwa vin pi fò. A pou nou gen roun lafwa ki fò é ki ka apiyé asou vré konésans-a paské « san lafwa nou pa pouvé fè Bondjé plézi » (li Hébreux 11:1, 6). A pou sa nou pa bézwen roun gran mirak ki ka vini di syèl-a pou nou pouvé sir ki nou trouvé Lavérité-a. Lò nou ka byen étidyé sa Labib-a ka di, sa divèt asé pou nou fè nou lafwa vin pi fò é pou nou pa gen pyès dout ankò.

13. Poukisa bokou moun kritiké Jézi ?

¹³ Disip JanBatis rété étoné lò yé wè ki disip Jézi-ya pa té ka jeûné, sa lé di rété san manjé pannan roun tan. Jézi èspliké yé ki yé pa té gen pyès rézon pou fè sa tout tan i té la ké yé (Mat. 9:14-17). Magré sa, farizyen-yan ké ròt lèlmi Jézi té ka kritiké l’ paské i pa té ka swiv yé tradisyon. Yé té ka faché osi lò Jézi té ka géri moun jou saba-a (Marc 3:1-6 ;  Jean 9:16). Yé té ka di ki yé té ka rèspèkté saba-a mé an menm tan, sa pa té ka déranjé yé wè moun achté ké vandé an mitan Tanp-a. É yé té ka kòlè lò Jézi té ka di douvan tout moun kouman yé té ipokrit (Mat. 21:12, 13, 15). Épi roun jou Jézi té ka préché annan sinagòg Nazarèt, moun-yan Jézi té ka palé pou yé-a koumansé faché. Lò Jézi di douvan tout moun ki yé té kou Israyélit tan-lontan-yan, sa té tròp pou yé. I di ki yé té ka gadé pou yé douvan lèstomak é ki yé pa té gen lafwa (Luc 4:16, 25-30). Bokou moun pa asèpté Jézi paské i pa fè sa yé té ka pansé i té ké fè (Mat. 11:16-19).

14. Poukisa Jézi pa asèpté swiv roun ran tradisyon ?

¹⁴ Kisa Paròl Bondjé-a té ka di ? Jéova té fè Izayi di : « Sa pèp-a ka vini òbò mo ké yé bouch. Yé ka bay mo lònò ké yé bouch mé yé tchò byen lwen di mo é lakrent yé gen pou mo-a ka apiyé asou koumannman moun yé anprann » (Is. 29:13). Jézi té gen rézon pa swiv tradisyon ki pa té k’alé ké sa Paròl Bondjé-a ka di. Sa-ya ki té pi kontan règ ké tradisyon wonm té mété pasé Paròl Bondjé-a, pa asèpté ni Jéova ni Mési i té voyé pou yé-a.

15. Kisa bokou moun pa kontan ké Témwen Jéova-ya ?

¹⁵ Ès nou gen menm problèm-an jòdla ? Wi. Bokou moun pa kontan zafè Témwen Jéova-ya pa annan lafèt kou anivèrsèr nésans ouben Lanowèl, menm si sa lafèt-ya pa ka vini di Labib-a. Ròt moun ka faché paské Témwen Jéova-ya pa annan lafèt moun ka fè pou péyi-a ouben pa ka swiv bagaj moun ka fè pou moun mouri-ya ki pa k’alé ké sa Paròl Bondjé-a ka di. Sa-ya ki ka faché konsa ka pitèt pansé ki fason yé ka adoré Bondjé ka fè l’ plézi. Mé Jéova pa pouvé asèpté fason yé ka adoré l’ si yé pi kontan tradisyon monn-an pasé sa Labib-a ka di ki klè (Marc 7:7-9).

16. Dapré Psaume 119:97, 113, 163-165, kisa nou divèt fè, é kisa nou divèt réfizé fè ?

¹⁶ Kisa ki ké anpéché nou pédi nou lafwa ? Nou divèt fè nou lanmou pou lalwa Jéova ké so prensip vin pi fò (li Psaume 119:97, 113, 163-165). Si nou kontan Jéova, nou pa ké swiv pyès tradisyon i pa kontan. É anyen pa ké vin anvan nou lanmou pou li.

17. Annan lépòk Jézi, kisa bokou moun té ka antann Mési-a fè ?

¹⁷ Annan lépòk Jézi, roun ran moun té ka antann i chanjé gouvèrnman-an. Yé té ka pansé ki Mési-a té ké tiré yé anba dominasyon Romen-yan ki té ka malmennen yé. Mé, lò yé éséyé fè Jézi divini yé rwa i pa asèpté sa (Jean 6:14, 15). Rounòt ran, prèt-ya èspésyalman, té pè ki Jézi chanjé gouvèrnman-an. Sa té ké fè Romen-yan faché épi yé té ké tiré otorité yé té bay yé. Kou yé té enkyèt ké zafè lapolitik, bokou Jwif pa asèpté Jézi.

18. Di ki profési asou Mési-a bokou moun pa tchenbé kont ?

¹⁸ Kisa Paròl Bondjé-a té ka di ? Roun patché profési té ka di ki roun jou, Mési-a té ké sa roun gèryé ki té ké ganyen. Mé, ròt profési té ka di ki anvan sa, i té divèt mouri pou nou péché (Is. 53:9, 12). Atò, poukisa Jwif-ya pa té gen bon lidé asou sa Mési-a té divèt fè ? Bokou annan yé pa té lé tchenbé kont di profési ki pa té ka promèt roun rémèd lanmenm pou yé problèm (Jean 6:26, 27).

19. Akoz di ki mové lidé bokou moun pa ka asèpté sa nou ka di ?

 ¹⁹ Ès nou gen menm problèm-an jòdla ? Wi. Bokou moun pa lé kouté sa nou ka di paské nou pa ka mélé annan lapolitik. Pou yé, nou divèt voté. Mé, nou menm, nou ka konprann ki pou Jéova, si nou ka chwazi roun chèf asou latè-a sa lé di ki nou pa ka asèpté Jéova (1 Sam. 8:4-7). Bokou moun ka pansé ki nou divèt konstrwi lékòl ké lopital ouben fè plis bagaj pou idé moun. Yé pa ka asèpté sa nou ka di paské nou ka travay rèd pou préché bon nouvèl-a pasé nou chaché rémèd pou problèm monn-an.

20. Dapré sa Jézi di an Matthieu 7:21-23, kisa ki divèt pi enpòrtan pou nou ?

²⁰ Kisa ki ké anpéché nou pédi nou lafwa ? (li Matthieu 7:21-23). Sa ki divèt pi enpòrtan pou nou, a fè travay Jézi bay nou-a (Mat. 28:19, 20). Annou pa janmen lésé ni lapolitik ni problèm sa monn-an fè nou bliyé sa ki pi enpòrtan. Nou kontan moun-yan é lò yé gen problèm sa ka fè nou lapenn. Mé nou savé ki pi bon fason nou pouvé idé yé, a lò nou ka palé yé di Rwayonm-an é lò nou ka èspliké yé kouman yé pouvé divini zanmi Jéova.

21. Kisa nou divèt byen désidé fè ?

²¹ Annan sa artik-a, nou wè kat rézon ki fè ki bokou moun pa asèpté Jézi annan 1^é syèk-a é ki ka fè ki jòdla roun ran moun ka kritiké so disip-ya. Annan artik ki ka vin dèyè-a, nou ké wè kat ròt bagaj ki pouvé anpéché roun ran moun swiv Jézi. Annou byen désidé pa janmen tonbé é fè tousa nou pouvé pou nou lafwa rété fò !