1-2. a) Kisa roun mouché ki ka étidyé konpòrtman moun-yan, di ? b) Kisa nou ké wè annan sa artik-a ?

JÒDLA, milyon moun ka di ki yé ka krè Jézi ka èkzisté, mé yé pa ka asèpté sa i anprann nou (2 Tim. 4:3, 4). Roun mouché ki ka étidyé konpòrtman moun-yan ka di : « Si i té gen rounòt Jézi ki té ka viv ansanm ké nou an nou lépòk é ki té ka di menm bagaj ki Jézi a so lépòk [...], ès nou té ké réfizé kouté l’ kou nou fè l’ i ja gen 2 000 lannen ? [...] Lò yé ka pozé sa késyon-an, souvan, moun-yan ka réponn wi *. »

² Annan 1^é syèk-a, roun patché moun tandé Jézi ansényé é yé wè l’ fè mirak. Mé yé pa té gen lafwa annan li. Poukisa ? Annan artik nou fin wè-a, nou wè kat bagaj pou èspliké poukisa Jwif-ya pa asèpté Jézi. Annan sa artik-a, nou ké wè kat ròt bagaj. Nou ké wè osi poukisa jòdla, bokou moun pa lé asèpté vré disip Jézi-ya é kisa nou divèt fè pou nou pa tonbé.

3. Kisa Jézi té ka fè pou moun-yan gadé l’ asou koté ?

³ Jézi té ka pasé tan ké tout kalité moun. Détan, i té ka manjé ké grotchap-ya ki té gen patché soumaké mé i té ka pasé bokou tan osi ké sa ki té maléré é ki pa té gen pyès èspwar. Anplis di sa, i té gen lapenn pou sa-ya yé té ka di yé té « péchèr ». Roun ran ki té ka krè yé kò, té ka gadé l’ asou koté lò i té ka fè sa. Roun jou, yé doumandé so  disip-ya : « Poukisa zòt ka manjé ké bwè ké sa-ya ki ka ranmasé enpo é ké moun ki ka fè péché ? » Jézi réponn yé : « A pa moun ki gen bon lasanté ki bézwen dòktèr mé a sa-ya ki malad. Mo vini pou fè moun répanti, mo pa vini pou sa-ya ki jis. Mo vini pou sa-ya ki ka fè péché » (Luc 5:29-32).

4. Dapré Izayi, kisa Jwif-ya té divèt savé asou Mési-a ?

⁴ Kisa Paròl Bondjé-a té ka di ? Lontan anvan Mési-a vini asou latè-a, Izayi té di ki moun-yan pa té ké asèpté l’. I té ka di annan so profési : « Yé té ka méprizé l’ é moun-yan pa menm té lé pasé òbò li [...]. A kousidiré yé té séré so vizaj pou nou. Yé té ka méprizé l’ é i pa té gen valò pou nou » (Is. 53:3). Izayi té di ki moun-yan pa té ké lé pasé òbò Mési-a. Donk Jwif-ya annan 1^é syèk-a té divèt savé ki moun-yan pa té ké asèpté Jézi.

5. Kouman roun patché moun ka wè vré disip Jézi-ya jòdla ?

⁵ Ès nou gen menm problèm-an jòdla ? Wi. Roun patché chèf légliz byen kontan rousouvwè annan yé Légliz grotchap-ya, moun ki gen bokou soumaké ouben sa-ya yé ka wè kou grangrèk. Yé ka asèpté yé, menm si yé ka fè bagaj Jéova rayi. An menm tan, yé ka méprizé sèrvitèr Jéova-ya ki gen roun bon konpòrtman é ki gen bokou balan pou fè sa ki byen. Poukisa yé ka fè sa ? Paské sèrvitèr Jéova-ya pa anyen annan sa monn-an. Mé kou Pòl di, Bondjé chwazi ‘sa-ya yé ka méprizé’ (1 Cor. 1:26-29). Tout sa ki ka adoré Jéova ké fidélité gen bokou valò pou li.

6. Kisa Jézi di annan Matthieu 11:25, 26, é kouman nou pouvé imité l’ ?

⁶ Kisa nou divèt fè pou nou pa tonbé ? (li Matthieu 11:25, 26). Annou pa lésé lidé sa monn-an gen asou nou aji asou nou. A pou nou byen konprann ki a yenki moun ki ka fè yé kò toupiti Jéova ka itilizé pou fè so volonté (Ps. 138:6). Annou byen réfléchi asou tousa i fè gras a so sèrvitèr-ya, menm si yé pa sa dé grangrèk pou sa monn-an.

7. Poukisa Jézi di ki farizyen-yan té ipokrit é kouman yé réyaji ?

⁷ Jézi pa té pè di chèf rélijyé-ya di so lépòk ki sa yé té ka fè pa té bon paské yé pa té ka anprann pèp-a adoré Jéova kou i lé. Parèkzanp, i di farizyen-yan ki yé té ipokrit paské pou yé, fason yé té ka lavé yé lanmen té pi enpòrtan pasé fason yé té ka pran swen di yé papa ké yé manman (Mat. 15:1-11). So disip dèt rété èstébékwé lò i palé pou yé paské yé di li : « To savé, farizyen-yan lévé faché lò yé tandé sa to di. » I réponn yé : « Mo Papa ki annan syèl-a ké raché tout plant i pa planté. Lésé yé. Yé lé montré moun chimen-an mé yé pa menm ka wè. É si roun moun ki pa ka wè ka gidé rounòt moun ki pa ka wè, yé toulédé ké tonbé annan roun trou » (Mat. 15:12-14). Jézi pa arété di lavérité paské chèf rélijyé-ya pa té kontan.

8. Kouman Jézi montré ki a pa tout bagaj rélijyon-yan ka anprann moun ki ka fè Bondjé plézi ?

⁸ Anplis di sa, Jézi byen fè tout moun savé ki i gen sèrten bagaj rélijyon-yan ka anprann moun ki pa vré. I pa janmen di ki tout bagaj sé rélijyon-yan ka anprann moun-yan té ka fè Bondjé plézi. I pito di ki roun patché moun té ké maché asou chimen lanmò-a ki gran, é ki i pa té ké gen bokou moun ki té ké maché asou chimen lavi-a ki piti (Mat. 7:13, 14). I menm  èspliké ki i té ké gen roun ran moun ki té ké di yé ka sèrvi Bondjé mé pannan sa tan-an, anyen pa la. A pou sa i bay sa avèrtisman-an : « Panga fo profèt-ya, ki ka vini koté zòt dous kou mouton, mé ki voras kou lou. A asou frwi yé ka bay [sa lé di dapré sa yé ka fè] zòt ké rékonnèt yé » (Mat. 7:15-20).

9. Jézi montré ki plizyèr bagaj rélijyon-yan té ka ansényé pa té vré. Bay déztrwa annan.

⁹ Kisa Paròl Bondjé-a té ka di ? Profési-a té ka di ki Mési-a té ké bay so kò balan pou kaz Jéova-a (Ps. 69:9 ; Jean 2:14-17). A sa ki fè li montré ki, annan so lépòk, plizyèr bagaj rélijyon-yan té ka ansényé pa té vré é ki sa yé té ka fè pa té bon. Parèkzanp, Farizyen-yan té ka krè ki nanm-an pa té ka mouri ; Jézi, li menm, anprann nou ki moun mouri-ya ka dronmi (Jean 11:11). Sadiséyen-yan pa té ka krè annan rézirèksyon-an ; Jézi, li menm, résisité so zanmi Lazar (Jean 11:43, 44 ; Actes 23:8). Farizyen-yan té ka di ki tout bagaj ki ka rivé ja marké roun koté é ki a Bondjé ki ka fè tout sa bagaj-ya rivé, a pa to ka désidé. Jézi, li menm, anprann nou ki nou tout pouvé chwazi si nou lé ouben si nou pa lé adoré Bondjé (Mat. 11:28).

10. Poukisa bokou moun pa kontan nou ?

¹⁰ Ès nou gen menm problèm-an jòdla ? Wi. Roun patché moun jòdla pa ka asèpté nou paské nou ka montré yé ké Labib-a ki i gen sèrten bagaj rélijyon-yan ka anprann moun-yan ki pa vré. Roun patché rélijyon ka di ki Bondjé ka pini méchan-yan annan difé lanfè. Yé ka sèrvi sa ansèyman-an pou fè moun-yan fè sa yé lé. Nou menm ki ka adoré Jéova, Bondjé-a ki plen ké lanmou, nou ka idé yé konprann ki a roun manti. Rélijyon-yan ka di osi ki nanm-an pa ka mouri. Nou menm, nou ka èspliké moun-yan ki a koté fo rélijyon-yan sa ansèyman-an soti é ki si a té vré, rézirèksyon-an pa té ké sèrvi anyen. Roun patché rélijyon ka  di osi ki nou lavi ékri dipi lontan mé nou menm, nou ka anprann moun-yan ki nou tout pouvé désidé si nou lé adoré Bondjé ouben si nou pa lé adoré l’. Souvan, chèf rélijyé-ya ka lévé faché lò yé ka tandé sa !

11. Dapré sa Jézi ka di annan Jean 8:45-47, kisa Bondjé ka doumandé so sèrvitèr-ya fè ?

¹¹ Kisa nou divèt fè pou nou pa tonbé ? Si nou vréman kontan lavérité-a, nou ké krè é nou ké fè sa Bondjé ka di (li Jean 8:45-47). Nou pa kou Djab-a, nou ka tchenbé annan lavérité-a. Nou pa janmen ka fè anyen ki pa ka alé ké sa nou ka krè (Jean 8:44). Bondjé ka doumandé so sèrvitèr-ya ‘rayi sa ki mové’ épi ‘kontan sa ki bon’ (Rom. 12:9 ; Héb. 1:9).

12. Poukisa fason Jézi mouri-a fè roun patché Jwif tonbé ?

¹² Poukisa ankò roun patché Jwif tonbé ? Men sa Pòl ékri : « Nou ka préché Kris yé maré asou roun poto, roun bagaj ka fè Jwif-ya tonbé » (1 Cor. 1:23). Roun patché Jwif pa asèpté Jézi parapòrta fason i mouri-a. Pou yé, pas i té mouri asou roun poto, sa té lé di ki i té sa roun kriminèl épi roun péchèr mé i pa té sa Mési-a (Deut. 21:22, 23).

13. Kisa tout sa ki tonbé akoz di Jézi pa asèpté krè ?

¹³ Jwif-ya ki tonbé akoz di Jézi pa té ka krè ki i pa té fè anyen, ki yé té manti pou yé té akizé l’ é ki sa yé té fè l’ pa té jis. A pa roun vré prosè yé té fè pou Jézi. Gran tribinal jwif-a té rasanblé vitman, é yé pa té rèspèkté lalwa (Luc 22:54 ; Jean 18:24). Jij-ya té ja gen yé lidé asou Jézi lò yé té ka kouté tousa moun-yan té ka di asou l’. É yé jis chaché roun « bagaj ki pa té vré pou di asou [l’] pou yé té pouvé tchwé l’ ». Kou yé pa té ka rivé fè sa yé té lé, gran prèt-a éséyé fè Jézi di roun bagaj pou i té akizé so pròp kò. A té roun bagaj ki té kont lalwa  (Mat. 26:59 ; Marc 14:55-64). É apré Bondjé résisité Jézi, sa jij malonèt-ya bay sòlda romen-yan ki té ka véyé tonm-an « roun patché pyès lanmonnen an arjan » pou yé té manti lò kò Jézi pa té la ankò (Mat. 28:11-15).

14. Kisa Paròl Bondjé-a té di asou lanmò Mési-a ?

¹⁴ Kisa Paròl Bondjé-a té ka di ? Annan lépòk Jézi-a, roun patché Jwif pa té ka pansé ki Mési-a té ké divèt mouri. Pourtan, annou gadé sa Paròl Bondjé-a té di : « I bay so lavi é a ké péchèr yé mété l’ ; i poté péché roun patché moun é i doumandé pardon pou péchèr-ya » (Is. 53:12). Donk, Jwif-ya pa té gen pyès rézon pou yé tonbé paské yé té tchwé Jézi kousidiré i té sa roun péchèr.

15. Kisa yé di asou Témwen Jéova-ya é ki fè roun ran tonbé ?

¹⁵ Ès nou gen menm problèm-an jòdla ? Asiré pa pitèt ! Kou yé fè pou Jézi, yé ka akizé Témwen Jéova-ya é yé ka kondanen yé menm si yé pa fè anyen. Men déztrwa èkzanp : Ozétazini ant 1930 ké 1940, frè-ya souvan alé plédé douvan tribinal pou yé té lésé yé adoré Bondjé kou yé té lé. Yé té ka wè ki roun ran jij té ja gen yé vyé lidé asou nou. O Kanada, Légliz katolik ké Léta mété yé kò ansanm pou baré nou. Yé mété roun patché proklamatèr lajòl sèlman paské yé té palé di rwayonm Bondjé-a. An Almagn koté i té gen nazi, gouvèrnman-an tchwé roun patché jenn frè. Épi dipi déztrwa lannen, gouvèrnman Larisi mété roun patché frè ké sò lajòl paské yé palé di Labib-a. Gouvèrnman-an ka di ki a roun « bagaj ki èstrémis ». Yé jis entèrdi Traduction du monde nouveau-a annan lang ris, yé ka di ki a roun « liv èstrémis » paské non « Jéova » annan l’.

16. Kou nou ka wè l’ annan 1 Jean 4:1, poukisa nou pa divèt lésé manti moun-yan ka rakonté asou nou bloublou nou ?

¹⁶ Kisa nou divèt fè pou nou pa tonbé ? A pou nou vérifyé si sa yé ka di, a lavérité. Annan diskour i fè asou montangn-an, Jézi té di so disip-ya ki yé té ké di « tout kalité manti » asou yé (Mat. 5:11). A Satan ki dèyè sa manti-ya. A li ki ka fè moun-yan ki pa kontan nou sonmen manti anlè nou (Rév. 12:9, 10). Nou pa ka kouté sa kalité manti-ya é nou pa ka lésé sa ni fè nou pè ni fè nou lafwa vin fèb (li 1 Jean 4:1).

17. Kisa ki rivé anvan Jézi mouri é ki pitèt fè roun ran tonbé ?

¹⁷ Jis anvan Jézi mouri, roun annan so 12 apot-ya trayi l’. I gen rounòt ki di trwa fwa ki i pa té konnèt li é yé tout lésé l’ lannwit anvan i mouri (Mat. 26:14-16, 47, 56, 75). I pa té étoné. Li menm té di ki sa té ké pasé konsa (Jean 6:64 ; 13:21, 26, 38 ; 16:32). Lò tout sa bagaj-ya rivé, pitèt roun ran ki té la désidé ki yé pa té lé rété so disip ankò. Pitèt yé di : « Si a konsa apot Jézi-ya ka fè, mo pa anvi maché ké yé ! »

18. Ki profési akonpli jis anvan Jézi mouri ?

¹⁸ Kisa Paròl Bondjé-a té ka di ? Pasé plizyèr syèk anvan sa, Jéova té di ki yé té ké trayi Mési-a pou 30 pyès an arjan (Zach. 11:12, 13). Sa-la ki té ké trayi l’, a té ké roun moun ki té pròch ké li (Ps. 41:9). Profèt Zakari té di osi : « Frapé bèrjé-a é a pou troupo-a chapé tout koté ! » (Zach. 13:7). Sa lévènman-yan pa té ké fè sa-ya ki sensèr tonbé. Non, sa té ké fè yé lafwa vin pi fò.

19. Kisa sa-ya ki sensèr savé ?

 ¹⁹ Ès nou gen menm problèm-an jòdla ? Wi. Roun ran Témwen bokou moun té konnèt lésé lavérité, yé divini apòsta é éséyé fè ròt-ya maché dèyè yé. Annan journal, latélé, laradyo ké asou Entèrnèt, yé alé kritiké sèrvitèr Bondjé-ya épi yé di bagaj ki pa vré asou yé. Mé sa yé ka fè pa ka fè sa-ya ki sensèr tonbé paské yé savé ki Labib-a té ka di ki yé té ké fè sa kalité bagaj-ya (Mat. 24:24 ; 2 Pierre 2:18-22).

20. Kisa nou pouvé fè pou nou pa lésé sa-ya ki lésé lavérité-a fè nou tonbé ? (2 Timothée 4:4, 5).

²⁰ Kisa nou divèt fè pou nou pa tonbé ? Nou divèt étidyé souvan épi priyè toulong pou nou lafwa rété fò é a pou nou toujou gen bagaj pou fè annan travay Jéova bay nou fè-a (li 2 Timothée 4:4, 5). Si nou lafwa fò, sa moun ké di anlè nou pa ké fè nou pè (Is. 28:16). É si nou kontan Jéova, so Paròl ké nou frè ké sò-ya, nou pa ké tonbé akoz di sa-ya ki lésé lavérité-a.

21. Menm si près tout moun pa lé kouté sa nou ka di, di kisa nou pouvé sir ?

²¹ Annan 1^é syèk-a, roun patché moun tonbé akoz di Jézi é yé pa asèpté l’. Mé roun patché moun osi té gen lafwa annan li. I gen o mwen roun mouché ki té annan sanédren-an ki divini so disip, ké « roun patché prèt » osi (Actes 6:7 ; Mat. 27:57-60 ; Marc 15:43). Jòdla osi, roun patché moun pa ka lésé anyen fè yé tonbé. Poukisa ? Pas yé konnèt é yé kontan lavérité-a nou ka jwenn annan Labib-a. Labib-a ka di : « A pa ti lapè sa-ya ki kontan to lalwa ganyen ; anyen pa pouvé fè yé tonbé » (Ps. 119:165).