1-2. Ki problèm bokou Témwen Jéova ka jwenn ?

APOT Pòl ankourajé Timoté fè tousa i té pouvé annan prédikasyon-an. É a sa tout krétyen divèt fè osi (2 Tim. 4:5). Nou tout nou lé fè tousa nou pouvé annan sèrvis pou Bondjé, mé sa pa toujou fasil. Bokou annan nou frè ké sò divèt gen bokou kouraj pou yé préché (2 Tim. 4:2). Sonjé parèkzanp, sa-ya ki ka rété koté yé ka défann nou adoré Bondjé kou nou lé. Chak kou yé ka palé di sa yé ka krè yé ka riské alé lajòl !

² Sèrvitèr Jéova-ya ka jwenn tout kalité problèm ki pouvé dékourajé yé. Roun patché divèt travay bokou pou bay yé fanmi manjé. Yé té ké byen lé préché plis mé lò simenn-an fini, yé pa gen pyès fòrs ankò. Ròt ankò pa pouvé fè gran kichoz paské yé gen roun maladi ki grav ouben paské laj ka rantré. Détan, roun ran pa menm pouvé soti di yé kaz. Rounòt ran ka soufri toulong paské yé ka santi yé initil. Men sa roun sò yé ka aplé Marie * ka di : « Mo divèt travay rèd tèlman pou mo kontrolé sa mo ka santi lò mo dékourajé ki, apré sa, mo las. Apré sa, mo konsyans ka bat mo paské mo pa gen bokou fòrs ni bokou tan pou préché ankò. »

3. Kisa nou ké wè annan sa artik-a ?

³ Kèlkéswa problèm nou ka jwenn, Jéova pouvé bay nou fòrs pou nou kontinyé fè tousa nou pouvé pou fè so volonté. A sa nou ké wè annan sa artik-a. Mé pou koumansé, annou nou wè kouman i bay Pòl ké Timoté fòrs pou yé té pouvé kontinyé préché menm si yé té ka jwenn roun patché problèm.

4. Ki problèm Pòl jwenn ?

⁴ Pòl jwenn roun patché traka. Sonjé sa : yé bay li kou, yé voyé ròch asou li pou tchwé l’ é yé mété l’ lajòl ! (2 Cor. 11:23-25). I pa té ronté di ki détan i té divèt briga paské i té dékourajé (Rom. 7:18, 19, 24). É i té gen roun « pikan annan so lachè » é i té lé Bondjé tiré sa ! (2 Cor. 12:7, 8).

5. Magré tout problèm Pòl jwenn, kisa i rivé fè ?

⁵ Jéova bay Pòl fòrs pou i kontinyé préché magré tout so problèm i jwenn. Annou palé di tousa i rivé fè. Parèkzanp, lò i té prizonyé annan roun kaz a Ròm, i défann bon nouvèl-a ké bokou balan douvan chèf jwif-ya é pitèt osi douvan grotchap (Actes 28:17 ; Phil. 4:21, 22). I préché osi pou roun patché sòlda Romen ké tout sa-ya ki té ka vini wè l’ (Actes 28:30, 31 ; Phil. 1:13). Pannan sa lépòk-a, i ékri plizyèr lèt ki itil pou krétyen-yan jis jòdla. Anplis di sa, gras a so èkzanp, frè ké sò annan asanblé Ròm ‘roupran fòrs é yé té gen plis kouraj pou di Paròl Bondjé-a san yé pa pè’ (Phil. 1:14). Menm si Pòl pa té pouvé fè tousa i té lé, i toujou té ka fè tousa i té pouvé annan so sitiasyon. É sa fè « bon nouvèl-a vansé » (Phil. 1:12).

6. Dapré 2 Corinthiens 12:9, 10, kisa ki idé Pòl kontinyé préché ?

⁶ Pòl té byen savé ki, si i té ka rivé préché kou i té ka fè-a, a pa té gras a so pròp fòrs mé a té gras a fòrs Jéova té ka bay li. I di ki « toupannan [i té] fèb [i té] ka vréman wè » pwisans Bondjé (li 2 Corinthiens 12:9, 10). Jéova sèrvi so lèspri sen pou bay Pòl fòrs, a sa ki pèrmèt li préché ké tout so fòrs, menm si yé té ka pèrsékité l’, menm si yé mété l’ lajòl é magré ròt problèm ankò.

7. Ki problèm Timoté jwenn ki té ké pouvé anpéché l’ préché ?

⁷ Menm si Timoté té pi jenn pasé Pòl, li menm osi té bézwen Bondjé bay li fòrs pou i té pouvé préché. I alé ké Pòl annan plizyèr gran vwayaj misyonèr. Anplis di sa, Pòl té doumandé l’ fè plizyèr vwayaj ankò pou ankourajé asanblé-ya (1 Cor. 4:17). Pitèt, a pa tout-tan i té ka santi i té pouvé fè travay Pòl té ka bay li fè-a. A divèt pou sa Pòl di li : « A pa pou pyès  moun méprizé to paské to jenn » (1 Tim. 4:12). Pannan sa menm lépòk-a, Timoté li menm osi té gen roun « pikan annan so lachè » paské « i té ka malad souvan » (1 Tim. 5:23). Mé i té savé ki, gras a lèspri sen, i té ké gen fòrs pou préché é pou sèrvi so frè-ya (2 Tim. 1:7).

8. Kouman Jéova ka fè so sèrvitèr vin pi fò ?

⁸ Jòdla, Jéova ka bay so sèrvitèr « pwisans ki ka dépasé pwisans ki nòrmal-a » pou yé pouvé kontinyé fè so volonté ké fidélité (2 Cor. 4:7). Annou wè kat bagaj Jéova ka fè pou fè nou vin pi fò é pou idé nou rété fidèl : lapriyè, Labib-a, nou frè ké sò-ya ké prédikasyon-an.

9. Poukisa sa enpòrtan pou nou priyè ?

⁹ Lapriyè ka bay nou plis fòrs. Annan Éphésiens 6:18, Pòl ka ankourajé nou priyè « annan tout sitiasyon ». Jéova ké réponn nou é ké bay nou fòrs. Jonnie, ki ka rété Bolivi, wè kouman Jéova idé l’ lò i jwenn plizyèr problèm. So papa, so manman ké so madanm, yé toulétrwa trapé roun maladi grav. Sa té rèd pou li pran swen di yé toulétrwa an menm tan. So manman mouri é so madanm ké so papa pran tan pou géri. Jonnie ka sonjé : « Lò sitiasyon-an té ka vin rèd menm, sa ki toujou idé mo, a lò mo té ka priyè Jéova é mo té ka di li sa mo té gen asou mo tchò. » Jéova bay li fòrs pou tchenbé. Ronald, roun ansyen ki ka rété Bolivi osi, anprann ki so manman té gen roun kansèr. Roun mwa apré sa, i mouri. Kisa ki idé l’ tchenbé ? I ka di : « Lò mo ka priyè, mo pouvé di Jéova tousa mo gen asou mo tchò. Mo savé ki i ka konprann mo pi byen pasé pyès moun é menm pi byen pasé mo menm. » Détan, nou pouvé santi ki nou pa pouvé tchenbé é sa ka rivé ki nou pa savé sa pou nou di annan nou lapriyè. Mé Jéova ka ankourajé nou priyè l’ menm si nou pa savé kouman pou nou di sa nou ka rousanti ké sa nou ka pansé (Rom. 8:26, 27).

10. Dapré Hébreux 4:12, poukisa sa enpòrtan konsa pou nou li Labib-a ké pran tan réfléchi asou sa nou ka li ?

¹⁰ Labib-a ka bay nou fòrs. Kou Pòl, nou pouvé pran fòrs ké konsolasyon annan Labib-a (Rom. 15:4). Lò nou ka li Paròl Bondjé-a é lò nou ka pran tan réfléchi asou sa nou ka li-a, Jéova pouvé idé nou gras a so lèspri pou nou pouvé konprann pi byen kouman sa pouvé idé nou annan noupa sitiasyon (li Hébreux 4:12). Ronald, nou ja palé anvan ka di : « Érézman mo té gen labitid li Labib-a touléjou oswè. Mo ka pran tan réfléchi bokou asou bèl kalité Jéova gen ké asou fason i ka pran swen di so sèrvitèr. A konsa mo ka roupran fòrs. »

11. Kouman Labib-a idé roun sò ki pédi so mari ?

¹¹ Lò nou ka pran tan réfléchi asou Paròl Bondjé-a, sa pouvé idé nou annan fason nou ka wè nou sitiasyon. A sa roun sò ki pédi so mari konprann. Roun ansyen di li ki sa té ké bon pou li rouli liv Jòb. A sa i fè. Lò i koumansé, i té gen tandans ka kritiké Jòb. I té ka byen wè so kò di li : « A kouman Jòb, a to problèm rounso to ka sonjé ! » Mé finalman, i randé so kò kont ki i té fè apéprè menm bagaj-a. Sa idé l’ chanjé fason i té ka wè so sitiasyon é piti piti, sa bay li fòrs pou sipòrté lapenn i té gen-an.

12. Kouman Jéova ka sèrvi nou frè ké sò-ya pou bay nou fòrs ?

 ¹² Nou frè ké nou sò-ya ka bay nou fòrs. Jéova ka bay nou fòrs osi gras a nou frè ké nou sò-ya. Pòl ékri ki a pa ti anvi i té anvi wè so frè ké sò-ya ki té Ròm pou i té pouvé ankourajé yé, é pou yé menm té pouvé ankourajé l’ (Rom. 1:11, 12). Marie nou ja palé anvan, kontan li menm osi lò frè ké sò-ya la ké li. I ka di : « Jéova ka bay mo fòrs gras a frè ké sò-ya ki détan pa konnèt ki problèm mo gen. Détan, yé ka di mo roun bagaj ki ka ankourajé mo ouben yé ka voyé mo roun ti kart é a sa menm mo bézwen. Sa ka idé mo osi lò mo ka palé ké sò ki pasé anba menm problèm ki mo é sa ka idé mo lò mo ka wè kouman yé fè. Épi i gen ansyen-yan ki ka fè mo sonjé souvan ki yé kontan mo annan asanblé-a. »

13. Kouman nou pouvé bay nou konpanyen fòrs lò nou k’alé annan réinyon-yan ?

¹³ Roun annan pi bon koté nou pouvé ankourajé nou konpanyen a lò nou k’alé annan réinyon-yan. Lò to k’alé annan réinyon-yan, to pouvé éséyé bay to frè ké sò fòrs lò to ka di yé kouman to kontan yé é kouman to kontan sa yé ka fè. Parèkzanp, roun jou anvan réinyon-an koumansé, men sa roun ansyen yé ka aplé Peter di roun sò so mari pa Témwen : « To pa savé kouman sa ka bay mo fòrs lò mo ka wè to la ! Sa ka fè mo plézi lò mo ka wè to sis timoun toujou byen abiyé é yé préparé yé répons. » Sa manman-an té tèlman touché i réponn ké dlo an so wéy : « Mo té tèlman bézwen tandé sa jòdla ! »

14. Kouman prédikasyon-an ka idé nou ?

¹⁴ Prédikasyon-an ka bay nou fòrs. Ki moun-yan kouté nou ouben ki yé pa kouté nou, lò nou ka palé di vérité ki annan Labib-a pou ròt-ya, sa ka bay nou fòrs (Prov. 11:25). Roun sò yé ka aplé Stacy wè ki prédikasyon-an pouvé vréman bay nou fòrs. Yé té èskominyé roun moun annan so fanmi. So dé bra té kasé é i pa té pouvé arété doumandé so kò : « Ès mo té pouvé fè plis pou idé l’ ? » A sa rounso i té gen annan so lèspri. Kisa ki idé l’ tchenbé magré sa sitiasyon ki té rèd menm ? Prédikasyon-an ! Lò i té ka préché, i té ka sonjé ròt-ya an prémyé é i té ka sonjé sa i té pouvé fè pou yé. I ka di : « A sa lépòk-a, Jéova fè mo roun bèl kado. Mo étidyé Labib-a ké roun madanm ki té ka vansé vit. Sa ankourajé mo bokou. Sa ki idé mo pi bokou, a prédikasyon-an. »

15. Kisa sa Marie di ka anprann nou ?

¹⁵ Roun ran frè ké sò ka trouvé ki, akoz di yé sitiasyon, yé pa pouvé fè gran kichoz annan prédikasyon-an. Si a sa to ka pansé, sonjé ki Jéova kontan lò to ka bay tousa to gen. Annou rouvin asou èkzanp Marie nou ja palé anvan. I déménajé pou alé préché annan roun koté yé té ka palé rounòt lang mé o koumansman, i pa té ka santi so kò itil. I ka di : « Sa mo té pouvé fè rounso, a té bay roun répons senp, li roun vèrsé ouben bay roun dépliyan. » Pou li, sa i té ka fè pa té djè vayan parapòrta sa-ya ki té ka byen palé lang-a. Mé i chanjé fason i té ka wè so sitiasyon. I konprann ki Jéova té pouvé itilizé l’ kanmenm. I ka di : « Vérité-ya ki annan Labib-a senp é yé pouvé chanjé lavi moun. »

16. Kisa ki pouvé bay sa-ya ki pa pouvé soti di yé kaz fòrs ?

 ¹⁶ Jéova kontan wè ki nou anvi préché menm si nou pa pouvé soti di nou kaz. I pouvé idé nou pou nou préché pou sa-ya ki ka okipé di nou ouben dòktèr ké enfirmyèr-ya. Si nou ka konparé sa nou pouvé fè jòdla ké sa nou té pouvé fè anvan, nou ka riské dékourajé. Mé si nou ka sonjé ki Jéova la pou idé nou, nou ké gen fòrs pou tchenbé anba nenpòrt ki éprèv, ké tchò kontan.

17. Dapré Ecclésiaste 11:6, poukisa nou divèt kontinyé préché menm si nou pa ka wè lanmenm sa sa ka bay ?

¹⁷ Annan tout grenn lavérité nou ka sonmen, nou pa savé kilès ki ké pran rasin é ki ké bay roun plant (li Ecclésiaste 11:6). Parèkzanp, Barbara, roun sò ki gen pasé 80 lannen, ka préché souvan ké téléfonn é ké lèt. Annan roun di so lèt, i mété La Tour de Garde 1^é mars 2014. Annan sa Tourdégard-a, i té gen roun artik, so tit a té : « Ce que Dieu a fait pour vous ». San i pa té savé, i voyé sa lèt-a pou roun mouché ké so madanm ki té èskominyé. Yé li journal-a é yé rouli l’ ankò. Mouché-a té ka santi kousidiré a té Jéova li menm ki té ka palé pou li. Yé toulédé roukoumansé alé annan réinyon-yan, é finalman apré pasé 27 lannen, yé roudivini Témwen Jéova. Sa divèt ankourajé ké bay Barbara fòrs toubonnman lò i wè kisa so lèt té bay !

18. Kisa nou divèt fè pou Jéova bay nou fòrs ?

¹⁸ Jéova pouvé sèrvi roun patché bagaj pou bay nou fòrs. I ka sèrvi lapriyè, Labib-a, nou frè ké nou sò-ya ké prédikasyon-an. Annou byen profité di tout sa bagaj-ya, konsa nou ké montré li ki nou sir ki i lé é ki i pouvé idé nou. É annou toujou konté asou nou Papa ki annan syèl-a ki kontan « montré so fòrs pou tout sa ki ka adoré li ké tout yé tchò » (2 Chron. 16:9).