1. Poukisa nou tout bézwen sajès-a ki ka vini di Bondjé ? (Proverbes 4:7).

 SI SA ja rivé to gen roun désizyon enpòrtan pou pran, to dèt priyè pou doumandé Jéova sajès. É a roun bon bagaj to fè (Jacq. 1:5). Rwa Salomon ékri : « Sajès-a, a bagaj-a ki pi enpòrtan » (li Proverbes 4:7). Salomon pa té ka palé di nenpòrt ki kalité sajès ; i té ka palé di sajès Jéova ka bay (Prov. 2:6). Mé ès sa sajès-a pouvé idé nou lò nou ka jwenn problèm jòdla ? Wi ! A sa nou ké wè annan sa artik-a.

2. Bay roun fason nou pouvé gen plis sajès.

² Roun fason nou pouvé vréman gen plis sajès, a lò nou ka étidyé ké apliké sa dé mouché ki té gen bokou sajès di. Nou ké koumansé ké Salomon. Labib-a ka di ki « a pa ti sajès Bondjé bay Salomon, é i bay li bokou entélijans pou fè diférans ant sa ki bon ké sa ki mové » (1 Rois 4:29). Apré sa, nou ké palé di Jézi, a li ki té pi saj asou tout latè-a (Mat. 12:42). Men sa roun profési té ka di asou li : « Lèspri Jéova ké pozé asou li, lèspri sajès ké entélijans » (Is. 11:2).

3. Kisa nou ké wè annan sa artik-a ?

³ Bondjé bay Salomon ké Jézi roun patché sajès. A pou sa yé té pouvé bay konsèy ki itil pou nou jis jòdla. Annan sa artik-a, nou ké wè plizyèr konsèy yé bay ki ké idé nou kontinyé gen menm lidé ké Bondjé asou soumaké-a, travay-a ké nou menm.

4. Ki diférans i té gen ant Salomon ké Jézi ?

⁴ Salomon té rich pou mouri é i té ka viv annan roun bèl gran kaz (1 Rois 10:7, 14, 15). Parkont, Jézi pa té gen bokou bagaj ; parèkzanp, i pa té gen sopa kaz (Mat. 8:20). Mé yé toulédé té ka wè soumaké-a menm fason-an paské yé sajès té ka vini di menm moun-an : Jéova.

5. Kouman Salomon té ka wè soumaké-a ?

⁵ Salomon té ka rékonnèt ki « soumaké-a pouvé protéjé nou » (Eccl. 7:12). Lò nou gen soumaké nou pouvé achté sa nou bézwen pou viv é pitèt détan fè nou kò plézi. Mé tou rich Salomon té rich, i té ka konprann ki soumaké-a, a pa sa ki té pi enpòrtan. Parèkzanp, i ékri : « Roun bon répitasyon miyò pasé roun patché richès » (Prov. 22:1). Salomon wè osi ki moun-yan ki kontan soumaké pa jen gen asé (Eccl. 5:10, 12). Épi i di nou panga mété nou konfyans annan soumaké-a, paské kèlkéswa kantité soumaké nou gen, i pouvé disparèt rounsèl kou (Prov. 23:4, 5).

6. Kouman Jézi té ka wè bagaj matéryèl-ya ? (Matthieu 6:31-33).

⁶ Jézi té rézonab annan fason i té ka wè bagaj matéryèl-ya. Parèkzanp, i pran plézi manjé ké bwè (Luc 19:2, 6, 7). Roun jou, i fè roun mirak. I fè diven é a té pi bon kalité diven i té pouvé gen ; a té so prémyé mirak (Jean 2:10, 11). É jou-a i mouri, i té ka poté roun lenj ki té ka kouté chè menm (Jean 19:23, 24). Mé a pa sa ki té ka vini an prémyé annan so lavi. I di so disip : « Pyès moun pa pouvé travay kou roun èsklav pou dé mèt […]. Zòt pa pouvé travay kou roun èsklav pou Bondjé ké Soumaké-a an menm tan » (Mat. 6:24). É i di osi ki si nou ka chaché Rwayonm-an an prémyé, Jéova ké fè nou gen sa nou bézwen (li Matthieu 6:31-33).

7. Ki bénédiksyon Daniel trapé paské i kontinyé wè soumaké-a kou Bondjé ka wè l’ ?

 ⁷ Roun patché frè ké sò jwenn bokou bénédiksyon paské yé apliké konsèy ki saj ki ka vini di Jéova asou fason nou divèt wè soumaké-a. Gadé èkzanp roun frè ki pa maryé yé ka aplé Daniel. I ka di : « Lò mo té jennjan, mo désidé ki sa ki té ké pi enpòrtan annan mo lavi, a sèrvi Jéova. » Kou i kontinyé gen roun lavi ki té senp, Daniel itilizé sa i té konnèt fè pou partisipé annan opérasyon pou poté sékour é pou travay annan Bétèl-a. I ka di ankò : « Franchman, mo pa janmen rigrété désizyon mo pran-an ! Sa vré, si a sa mo té lé, mo té ké pouvé gen roun patché soumaké. Mé mo pa té ké jen gen tout bon zanmi mo gen aprézan. Mo tchò pa té ké kontan kou aprézan paské mo ka mété sèrvis pou Jéova-a an prémyé annan mo lavi. Jéova bay mo lontan plis lajwa ki pyès kantité soumaké pa ké jen pouvé bay mo. » Èkzanp Daniel ka montré nou ki nou gen plis bénédiksyon lò sa ki ka konté pou nou, a pa soumaké mé a sèrvi Jéova.

8. Kouman nou savé ki Salomon té ka wè travay-a kou Bondjé ka wè l’ ? (Ecclésiaste 5:18, 19).

⁸ Salomon di ki lajwa nou gen lò nou ka travay rèd, a roun « kado di Bondjé » (li Ecclésiaste 5:18, 19). Men sa nou ka li annan Proverbes 14:23 : « Dipi roun moun ka travay rèd, i ka jwenn bénédiksyon. » Salomon té savé di kisa i té ka palé. A té roun moun ki té ka travay rèd ! I konstrwi kaz, i planté pyé rézen, é i fè jarden ké sistèm pou rozé yé. I konstrwi plizyèr vil osi (1 Rois 9:19 ; Eccl. 2:4-6). I travay rèd pou i fè tousa é sa dèt fè li plézi. Mé i té savé ki a pa sa rounso ki té ké fè so tchò kontan. I té ka fè bokou bagaj pou Jéova osi. Parèkzanp, i dirijé konstriksyon roun bèl tanp — sa projè-a pran sèt lannen ! (1 Rois 6:38 ; 9:1). Salomon fè roun patché bagaj, mé i konprann ki sa ki té pi enpòrtan-an, a té sèrvi Jéova. A pou sa i ékri : « Apré tousa mo fin di-a, men sa ki pi enpòrtan-an : A pou to gen lakrent pou vré Bondjé-a é a pou to obéyi so koumannman » (Eccl. 12:13).

9. Kouman Jézi té ka wè travay-a ?

⁹ Jézi té ka travay rèd. Lò i té jenn, i té sa roun charpantyé (Marc 6:3). So papa ké so manman, ki té gen plizyèr timoun pou bay manjé, té divèt kontan paské i té ka idé yé. É kou tousa Jézi té ka fè té parfè, moun té divèt ka fè latcho pou achté sa i té ka fè ! Jézi té dèt kontan sa i té ka fè. Mé menm si i té ka byen fè so travay, i té ka pran tan pou sèrvi Jéova (Jean 7:15). Pita, lò i koumansé préché a plen tan, i bay sa-ya ki té ka kouté li sa konsèy-a : « Pasé zòt travay pou roun manjé ki ka gaté, travay pou manjé-a ki la pou tout-tan » (Jean 6:27). É annan diskour i fè asou montangn-an, i di : « Ranmasé pito richès annan syèl-a » (Mat. 6:20).

10. Kisa ki pouvé divini roun problèm si nou ka travay byen ?

¹⁰ Nou divèt swiv konsèy Jéova ka bay nou pou nou wè travay-a kou i ka wè l’. Labib-a ka di krétyen-yan « travay rèd » é fè roun « bon travay »  (Éph. 4:28). Si nou onèt é si nou ka travay rèd, pitèt nou patron ké wè sa, é i ké pitèt di nou ki i kontan fason nou ka travay. Alòr pitèt nou ké asèpté travay plis paské nou ké di nou kò ki a konsa nou ké bay roun pi bon témwanyaj asou Témwen Jéova-ya. Mé si sa ka anpéché nou fè sa nou divèt fè pou nou fanmi ké pou Jéova, nou divèt fè roun bagaj pou nou viré mété sa ki pi enpòrtan-an douvan.

11. Kisa William anprann asou zafè rété rézonab annan travay-a ?

¹¹ William, roun jenn frè, travay pou roun ansyen ki té ka rivé lésé travay-a a so plas. Men sa i ka di asou li : « [Sa frè-a] sa roun bon èkzanp annan zafè rété rézonab annan travay-a. I ka travay rèd. É so kliyan kontan paské i ka fè roun bon travay. Mé lò so lajournen travay fini, i ka arété travay épi i ka sèrvi so tan ké so fòrs pou so fanmi ké pou Jéova. Mo pouvé di zòt ki mo pa janmen wè roun moun so tchò kontan konsa * ! »

12. a) Kisa ki ka montré ki o koumansman Salomon té ka wè so kò kou Jéova té ka wè li ? b) Kisa ki fè Salomon chanjé ?

¹² Lò Salomon té ka adoré Jéova kou i té divèt, i té ka wè so kò kou Jéova té ka wè li. Lò i té jennjan é ki sa pa té ka fè lontan i té rwa, i rékonnèt ki i pa té gen èspéryans é i doumandé Jéova gidé li (1 Rois 3:7-9). I té savé ki lò to ka krè to kò, a roun danjé. I ékri : « Òrgèy-a ka fè moun tonbé, é roun moun ki ka krè so kò ké fè roun mové bagaj » (Prov. 16:18). Pita, malérèzman, i arété swiv so pròp konsèy. I koumansé krè so kò é i arété obéyi lalwa Jéova. Parèkzanp, roun lalwa té ka di ki roun rwa an Israyèl pa té divèt « maryé ké  bokou madanm [...], pou i pa lésé so tchò pran mové chimen » (Deut. 17:17). Pourtan, Salomon pran 700 madanm ké 300 konkibin, é roun patché annan yé pa té ka adoré Bondjé (1 Rois 11:1-3). Pitèt i pansé ki i té ké pouvé « jéré » tout sa madanm-yan. Mé pita, i pran fè paské i lésé Jéova (1 Rois 11:9-13).

13. Ki èkzanp Jézi bay nou annan zafè gen imilité ?

¹³ Jézi toujou wè so kò kou so Papa té ka wè l’. Anvan i vini asou latè-a, i fè roun patché bèl bagaj annan so sèrvis pou Jéova. « A li i sèrvi pou kréyé tout ròt bagaj-ya annan syèl-a ké asou latè-a » (Col. 1:16). Lò Jézi batizé, i dèt sonjé tout bagaj i té fè ké so Papa (Mat. 3:16 ; Jean 17:5). Mé tout sa bagaj-ya pa fè li koumansé krè so kò. O kontrèr, i pa janmen fè ròt-ya santi ki i té pi rot ki yé. I di so disip ki i pa té vini asou latè-a « pou moun sèrvi l’, mé i vini pou sèrvi é pou bay so lavi pou péyé ranson-an an échanj di bokou moun » (Mat. 20:28). I di osi ki i pa té pouvé fè anyen di so pròp kò (Jean 5:19). Jézi té vréman gen imilité ! I lésé nou roun bèl èkzanp ki nou tout lé swiv.

14. Kisa sa Jézi di ka anprann nou asou zafè wè nou kò kou Bondjé ka wè nou ?

¹⁴ Jézi anprann so disip wè yé kò kou Bondjé ka wè yé. Roun jou, i di yé : « Chivé ki asou zòt tèt i ka konté yé tout » (Mat. 10:30). Sa Jézi di ka konsolé nou, èspésyalman si nou gen tandans ka pansé ki nou pa gen valò. Sa lé di ki nou Papa ki annan syèl-a ka gadé pou nou, é ki nou gen valò pou li. Si Jéova ka pèrmèt nou adoré l’ é si i ka pansé ki nou mérité viv pou tout-tan annan so monn nouvo, nou pa divèt pansé ki i ka tronpé so kò.

15. a) Kisa La Tour de Garde di nou asou fason nou divèt wè nou kò ? b) Kou nou ka wè l’ asou zimaj-ya, si nou ka bay nou kò tròp grad, ki bénédiksyon nou pa ké jwenn ?

¹⁵ I gen kenz lannen di sa, La Tour de Garde ankourajé nou wè nou kò kou  Bondjé ka wè nou. I té ka di : « Nou pa divèt krè nou kò tèlman ki nou ka divini fyèr ; mé an menm tan nou pa divèt pansé ki nou pa vo anyen. Pasé nou fè sa, nou divèt éséyé wè nou kò kou Bondjé ka wè nou. Sa lé di ki nou divèt konprann ki nou vayan annan sèrten bagaj épi annan ròt bagaj nou pa djè fò. Men sa roun sò di asou fason i ka wè bagaj-a : “Mo pa sa pi bon moun-an i gen ; mé mo pa sa roun djab non plis. Mo gen bon koté ké mové koté, kou tout moun *”. » Ès to ka wè poukisa a roun bon bagaj lò to ka wè to kò kou Bondjé ka wè to ?

16. Poukisa Jéova ka bay nou konsèy ki saj ?

¹⁶ Annan so Paròl, Jéova ka gidé nou ké sajès. Poukisa ? Paské i kontan nou é i lé nou tchò kontan (Is. 48:17, 18). Miyò désizyon nou pouvé pran, é sa-la ki ké vréman fè nou tchò kontan, a mété sèrvis pou Jéova an prémyé annan nou lavi. Sa ké évité nou tonbé annan menm problèm ké sa-ya ki ka mété yé lidé asou soumaké-a, yé travay ouben yé pròp kò. Donk, a pou nou byen désidé aji ké sajès épi fè Jéova plézi ! (Prov. 23:15).