ARTIK POU ÉTIDYÉ 21
Liv Révélation-an : sa i ka di asou sa ki ké rivé to dimen
« Anmèn ! Vini, Sényèr Jézi » (RÉV. 22:20).
KANTIK 142 Annou tchenbé nou lèspérans byen fò
KOUTWÉY ASOU SA NOU KÉ WÈ *
1. Ki désizyon enpòrtan tout moun divèt pran ?
JÒDLA, tout moun gen roun chwa enpòrtan pou fè : ès yé ké rékonnèt ki a Jéova ki sa Souvéren-an, sa-la ki gen drwa dirijé inivèr-a, ouben ès yé ké maché ké so lèlmi ki mové, Satan Djab-a ? A sèlman dé chwa yé gen. A sa désizyon-an ki ké fè si yé ké viv pou tout-tan (Mat. 25:31-33, 46). Pannan « gran tribilasyon-an », sa-ya ki ka adoré Jéova ké fidélité ké rousouvwè roun mark pou di ki yé ké rété vivan (Rév. 7:14 ; Ézéch. 9:4, 6). Mé sa-ya ki ké gen mark bèt féròs-a, yé menm yé ké mouri (Rév. 14:9-11).
2. a) Kisa Hébreux 10:35-39 ka ankourajé nou fè ? b) Poukisa liv Révélation-an enpòrtan pou nou ?
2 (Li Hébreux 10:35-39.) Si to désidé soutni Jéova, to pran bon désizyon-an. Aprézan, to dèt anvi idé ròt-ya pran sa menm désizyon-an. Pou fè sa, to pouvé sèrvi enfòrmasyon nou ka trouvé annan liv Révélation-an pou idé yé. Sa bèl liv-a ka di nou sa ki ké rivé sa-ya ki kont Jéova é i ka montré osi ki bèl bénédiksyon sa-ya ki ka soutni so dominasyon ké fidélité ké trapé. Sa enpòrtan pou nou étidyé sa ansèyman-yan, paské sa ké idé nou pi désidé adoré Jéova ankò. Anplis di sa, nou ké pouvé sèrvi sa nou anprann pou idé ròt moun désidé adoré Jéova é kontinyé sèrvi l’.
3. Ki késyon nou ké réponn annan sa artik-a ?
3 Annan sa artik-a, nou ké réponn sa dé késyon-yan : Ki bénédiksyon sa-ya ki ka soutni dominasyon Bondjé ké rousouvwè ? É kisa ki ké rivé sa-ya ki ka désidé maché ké bèt féròs-a ki rouj ?
KISA KI KÉ RIVÉ SA-YA KI FIDÈL ?
4. Ki group Jan ka wè òbò Jézi annan syèl-a ?
4 Annan roun vizyon, Jan ka wè dé group ki ka soutni dominasyon Jéova é ki ka rousouvwè lavi pou tout-tan. Annan prémyé group-a, i gen 144 000 krétyen wen ké lèspri sen (Rév. 7:4). Bondjé ka pran yé annan moun asou latè-a pou yé fè roun gouvèrnman, roun rwayonm, ké Jézi annan syèl-a. Yé ka dirijé latè-a ké li (Rév. 5:9, 10 ; 14:3, 4). Jan ka wè yé dibout òbò Jézi, asou montangn Syon-an annan syèl-a (Rév. 14:1).
5. Kisa ki ké rivé krétyen wen-yan ki asou latè-a titalò ?
5 Dipi lépòk apot-ya jik jòdla, Bondjé chwazi plizyèr milyé krétyen pou yé fè parti di 144 000-ya (Luc 12:32 ; Rom. 8:17). Mé Jan ka anprann ki a sèlman déztrwa krétyen wen ki ké asou latè-a pannan dèrnyé jou-ya. Anvan gran tribilasyon-an koumansé, yé ké rousouvwè dèrnyé « so »-a ki ké montré ki Jéova ka asèpté yé (Rév. 7:2, 3 ; 12:17). Apré sa, pannan gran tribilasyon-an, Bondjé ké pran sa group-a pou yé alé jwenn annan syèl-a larèstan 144 000-ya ki ja mouri fidèl. Yé ké dirijé ansanm ké Jézi annan rwayonm Bondjé-a (Mat. 24:31 ; Rév. 5:9, 10).
6-7. a) Ki ròt group Jan ka wè apré sa, é kisa nou ka anprann asou li ? b) Ki nou gen èspwar viv annan syèl-a, ki nou gen èspwar viv asou latè-a, poukisa nou tout pouvé présé wè sa ki marké annan Révélation chapit 7-a fèt ?
6 Apré i wè sa group krétyen wen-yan annan syèl-a, Jan ka wè « roun patché moun ». Yé pa kou 144 000-ya. To pa pouvé konté yé (Rév. 7:9, 10). Men sa Jan ka anprann asou yé : « A sa-ya ki soti annan gran tribilasyon-an, é yé lavé yé gran ròb é yé fè yé vin blan annan disan Timouton-an » (Rév. 7:14). Sa granfoul-a ké janbé gran tribilasyon-an, yé ké kontinyé viv asou latè-a é yé ké gen roun patché bèl bénédiksyon (Ps. 37:9-11, 27-29 ; Prov. 2:21, 22 ; Rév. 7:16, 17).
7 Ki Bondjé chwazi nou pou nou viv annan syèl-a ouben ki nou gen pou rété asou latè-a, ès nou ka wè nou kò ka viv sa Révélation chapit 7-a ka palé ? A sa nou divèt fè. A pa ti bèl sa ké bèl pou sa dé group-ya ki ka adoré Jéova. Nou ké kontan toubonnman paské nou chwazi soutni so dominasyon ! Aprézan, annou wè sa liv Révélation-an ka anprann nou ankò asou gran tribilasyon-an (Mat. 24:21).
KISA KI KÉ RIVÉ SA-YA KI KONT BONDJÉ ?
8. Ké kisa gran tribilasyon-an ké koumansé, é kouman près tout moun ké réyaji ?
8 Kou nou wè l’ annan artik nou li anvan-an, titalò gouvèrnman-yan ké ataké Gran Babilòn-an, sa lé di tout fo rélijyon-yan yé tout ansanm (Rév. 17:16, 17). A ké koumansman gran tribilasyon-an. Ès roun patché moun ké kouri adoré Jéova ? Non ! Révélation chapit 6 ka di ki a sa moman-an, sa-ya ki pa ka adoré Jéova ké pito chaché protèksyon òbò sistèm politik ké komèrsyal-ya. Labib-a ka di ki yé kou montangn. Kou yé pa ké soutni so rwayonm, Jéova ké wè yé kou so lèlmi (Luc 11:23 ; Rév. 6:15-17).
9. Pannan gran tribilasyon-an, kouman pèp Jéova-a ké montré ki i diféran, é kisa ki ké rivé l’ ?
9 Pannan gran tribilasyon-an, tout moun ké wè ki sa-ya ki ka adoré Jéova ké fidélité diféran. A ké toujou yé rounso ki ké adoré Jéova é ki pa ké asèpté soutni « bèt féròs-a » (Rév. 13:14-17). Akoz di sa, sa-ya ki kont Bondjé ké kòlè toubonnman. Atò, plizyèr nasyon ki ké mété yé kò ansanm ké ataké pèp Bondjé-a toupatou asou latè-a. Labib-a ka aplé sa : atak Gòg ki soti Magòg (Ézéch. 38:14-16).
10. Kou nou ka wè l’ annan Révélation 19:19-21, kisa Jéova ké fè sa-ya ki ké ataké so pèp ?
10 Kouman Jéova ké réyaji lò yé ké ataké so pèp ? I ka di nou : « Mo kòlè ké pété » (Ézéch. 38:18, 21-23). Révélation chapit 19 ka di nou sa ki ké rivé apré sa : Jéova ké voyé so Pitit pou protéjé so pèp é pou kayakaya so lèlmi. « Larmé-ya annan syèl-a », sa lé di zanj-ya ki fidèl ké 144 000-ya, ké briga ansanm ké Jézi kont Gòg ki soti Magòg (Rév. 17:14 ; 19:11-15). Kouman sa lagèr-a ké fini ? Tout moun ké tout òrganizasyon ki kont Jéova ké disparèt (li Révélation 19:19-21).
APRÉ LAGÈR-A, ROUN MARYAJ
11. A ki moman ki pi enpòrtan annan liv Révélation-an ?
11 Imajiné kouman tout moun asou latè-a ké kontan, lò tout lèlmi Jéova pa ké la ankò ! Sa ké bèl toubonnman ! Lò Gran Babilòn-an ké tonbé, tout moun annan syèl-a ké rélé afòrs yé kontan. Mé i gen rounòt bagaj ki ké fè yé tchò pi kontan ankò (Rév. 19:1-3). A moman-an ki pi enpòrtan annan liv Révélation-an : « maryaj Timouton-an » (Rév. 19:6-9).
12. Dapré Révélation 21:1, 2, kitan maryaj Timouton-an ké fèt ?
12 Kitan maryaj Timouton-an ké fèt ? Tout 144 000-ya ké annan syèl-a jis anvan lagèr Armagédon-an koumansé. Pourtan, a pa a sa moman-an maryaj-a ké fèt (li Révélation 21:1, 2). I ké fèt apré Armagédon, lò i pa ké gen pyès lèlmi Bondjé ankò (Ps. 45:3, 4, 13-17).
13. Kisa ki ké koumansé ké maryaj Timouton-an ?
13 Kisa ki ké koumansé ké maryaj Timouton-an ? Menm fason roun maryaj ka mété roun mouché ké roun madanm ansanm, sa maryaj-a ké mété Jézi Kris, Rwa-a, ké 144 000-ya, sa lé di « lamaryé », ansanm. A la Jézi ké 144 000-ya ké koumansé dirijé pannan 1 000 lannen (Rév. 20:6).
ROUN VIL KI BÈL TOUBONNMAN, KI KÉ FÉ TO TRAPÉ ROUN PATCHÉ BÉNÉDIKSYON
Annan Révélation chapit 21, Jan di ki i wè Nouvo Jérizalèm-an, roun vil ki sa roun senbòl, « òbò Bondjé, ka désann di syèl-a ». Pannan 1000 lannen-yan, i ké fè tout sa ki ka obéyi Bondjé jwenn roun patché bénédiksyon (gadé paragraf 14-16).
14-15. Ké kisa Révélation chapit 21 ka konparé 144 000-ya ? (gadé zimaj-a anlè prémyé paj-a).
14 Annan Révélation chapit 21, yé ka konparé 144 000-ya ké roun vil ki bèl toubonnman. Yé ka aplé sa vil-a « Nouvo Jérizalèm » (Rév. 21:2, 9). Fondasyon sa vil-a, a 12 ròch, é asou sa ròch-ya, i gen « 12 non, non 12 apot Timouton-an » ki marké. Poukisa sa té entérésan pou Jan ? Paské i wè so non marké asou roun di sa ròch-ya. Men roun bèl privilèj ! (Rév. 21:10-14 ; Éph. 2:20).
15 Sa vil-a pa ka sanblé pyès ròt vil. I gen roun gran lari fèt ké lò, so 12 lapòt, a pèrl, miray-ya ké fondasyon-yan plen ké ròch ki gen bokou valò é a roun karé parfè (Rév. 21:15-21). Mé yé té ké di ki i gen roun bagaj ki pa la. A sa Jan ka di : « Mo pa wè pyès tanp annan vil-a, paské Jéova Bondjé Tou-pwisan-an sa so tanp, é Timouton-an osi. É i pa bézwen ni solèy ni lalin pou kléré l’, paské laglwar Bondjé ka kléré l’ é so lanp, a Timouton-an » (Rév. 21:22, 23). Sa-ya ki ka fè parti di Nouvo Jérizalèm-an ké pouvé alé bò d’ Jéova dirèktéman. Donk yé pa ké bézwen tanp ankò (Rév. 22:3, 4). Anplis di sa, yé ké adoré Jéova anba dirèksyon Jézi, ki ja Gran Prèt annan syèl-a (Héb. 7:27). A pou sa yé ka di ki a Jéova ké Jézi ki sa tanp-a annan sa vil-a.
Kimoun ki ké profité di tout bénédiksyon flèv-a ké pyébwa-ya ka réprézanté ? (gadé paragraf 16-17).
16. Di ki bénédiksyon tout moun asou latè-a ké pouvé profité pannan 1 000 lannen-yan ?
16 Krétyen wen-yan tou kontan lò yé ka sonjé sa vil-a. Mé sa-ya ki gen èspwar viv asou latè-a divèt chaché konnèt sa vil-a osi. Pannan 1 000 lannen-yan, Nouvo Jérizalèm-an ké pèrmèt yé jwenn roun patché bénédiksyon. Jan ka wè sa bénédiksyon-yan koulé kou roun flèv, « flèv dlo lavi-a ». É asou dé bò sa flèv-a, i gen « pyébwa ki ka bay lavi » é yé fèy, a « pou géri nasyon-yan » (Rév. 22:1, 2). Tout moun ki ké viv asou latè-a ké pouvé profité di tout sa bénédiksyon-yan. Piti piti, tout moun ki ka obéyi Jéova ké divini parfè. I pa ké gen maladi ankò, ni doulèr, ni pyès moun ka pléré pas yé tris. (Rév. 21:3-5).
17. Kimoun ki ké profité di tout bénédiksyon nou ké jwenn pannan 1 000 lannen-yan ? (Révélation 20:11-13).
17 Kimoun ki ké profité di sa bèl bénédiksyon-yan ? Pou koumansé, granfoul-a, sa lé di sa-ya ki ké janbé Armagédon, épi osi tout timoun ki ké fèt annan monn nouvo-a. Mé Révélation chapit 20 ka di osi ki moun mouri-ya ké résisité (li Révélation 20:11-13). Kimoun ki ké résisité ? « Moun ki jis », sa lé di sa-ya ki sèrvi Jéova ké fidélité, ké « moun ki pa jis », sa lé di sa-ya ki pa té vréman gen lokazyon anprann konnèt Jéova (Actes 24:15 ; Jean 5:28, 29). Ès sa lé di ki tout moun ké résisité asou latè-a pannan 1 000 lannen-yan ? Non. Sa-ya ki réfizé adoré Jéova pa ké résisité. Bondjé bay yé roun chans, yé pa asèpté l’ é yé byen montré ki yé pa mérité viv annan paradi-a (Mat. 25:46 ; 2 Thess. 1:9 ; Rév. 17:8 ; 20:15).
DÈRNYÉ ÉPRÈV-A
18. Tout moun ké « roukoumansé viv » lò 1 000 lannen-yan ké bout, kisa sa lé di ?
18 Lò 1 000 lannen-yan ké bout, tout moun ké parfè. Péché Adan bay nou-a pa ké aji asou pyès moun ankò (Rom. 5:12). Malédiksyon ki té anlè nou akoz di sa péché-a ké fini nèt. Donk, lò 1 000 lannen-yan ké bout, tout moun ké « roukoumansé viv », sa lé di ki tout moun ké parfè (Rév. 20:5).
19. Poukisa i ké gen roun dèrnyé éprèv ?
19 Nou savé ki Jézi, ki té sa roun moun parfè, tchenbé magré tousa Satan fè pou anpéché li rété fidèl. Mé, é sa-ya ki ké divini parfè : ès yé ké rété fidèl si Djab-a ka ataké yé ? Chak moun ké pouvé montré so fidélité lò Jéova ké libéré Satan lò 1 000 lannen-yan ké bout (Rév. 20:7). Sa-ya ki ké rété fidèl pannan dèrnyé éprèv-a ké rousouvwè lavi pou tout-tan-an é yé ké profité di vré libèrté-a (Rom. 8:21). É sa-ya ki ké tounen yé do bay Jéova ké mouri pou tout-tan, ansanm ké Satan ké so démon-yan (Rév. 20:8-10).
20. Kisa to ka rousanti apré tousa nou fin wè annan liv Révélation-an ?
20 Kisa to ka rousanti apré tousa nou fin wè annan liv Révélation-an ? Ès to pa kontan wè to kò ka viv sa profési-ya ? Ès sa pa ka bay to anvi envité tout moun vini adoré Jéova ansanm ké nou ? (Rév. 22:17). Aprézan nou fin palé di sa ki ké rivé titalò, nou présé viv sa bagaj-ya, é kou Jan, nou ka di : « Anmèn ! Vini, Sényèr Jézi » (Rév. 22:20).
KANTIK 27 La révélation des fils de Dieu
[Nòt]
^ § 5 Annan sa dèrnyé artik-a asou liv Révélation-an, nou ké wè ki sa-ya ki ké rété fidèl douvan Jéova ké jwenn roun patché bèl bénédiksyon dimen, mé sa-ya ki pa lé asèpté Jéova dirijé yé ké disparèt.
