ARTIK POU ÉTIDYÉ 20
Liv Révélation-an : sa i ka di asou sa ki ké rivé tout lèlmi Bondjé
« Paròl-ya ki ka vini di démon-yan fè rwa-ya sanblé annan roun koté yé ka aplé an ébré Armagédon » (RÉV. 16:16).
KANTIK 150 Cherche Dieu pour être délivré
KOUTWÉY ASOU SA NOU KÉ WÈ *
1. Kimoun ki ka ataké pèp Bondjé-a ?
LIV Révélation-an ka di nou ki rwayonm Bondjé-a ka dirijé annan syèl-a, é ki yé mété Satan dèrò di syèl-a (Rév. 12:1-9). A pou sa i gen lapè annan syèl-a, mé sa mennen roun patché problèm pou nou. Dipi sa jou-a, Satan kòlè é i ka ataké sa-ya ki ka sèrvi Jéova ké fidélité asou latè-a (Rév. 12:12, 15, 17).
2. Kisa ki ké idé nou rété fidèl ?
2 Kouman nou pouvé rété fidèl menm si Djab-a ka ataké nou ? (Rév. 13:10). Si nou savé sa ki ké rivé titalò, sa ké idé nou rété fidèl. Parèkzanp, annan liv Révélation-an, apot Jan ka palé di roun ran bénédiksyon nou ké gen titalò. Roun annan bon nouvèl-ya i ka di, a ki tout lèlmi Bondjé ké disparèt nèt. Annou wè aprézan kouman liv Révélation-an ka palé di sa lèlmi-ya é di sa ki ké rivé yé.
YÉ KA PALÉ DI LÈLMI BONDJÉ « KÉ SENBÒL »
3. Ki senbòl liv Révélation-an ka sèrvi pou palé di lèlmi Bondjé ?
3 Dipi prémyé vèrsé liv Révélation-an, nou ka anprann ki « a ké senbòl » yé ka montré nou vizyon-yan ki annan sa liv-a (Rév. 1:1). Parèkzanp, i ka palé di plizyèr bèt féròs ki ka réprézanté lèlmi Bondjé. I gen ‘roun bèt féròs ki ka soti annan lanmè-a’ ki gen « dis kòrn ké sèt tèt » (Rév. 13:1). Apré sa bèt féròs-a, i gen ‘rounòt bèt féròs ki ka monté di latè-a’. Sa bèt féròs-a ka palé kou roun dragon é i ka fè « difé soti di syèl-a pou tonbé asou latè-a » (Rév. 13:11-13). Apré sa, Jan ka wè rounòt bèt féròs ankò, « roun bèt féròs rouj », é a roun fanm ki ka kouché ké tout wonm ki asiz asou l’. Sa trwa bèt féròs-ya ka réprézanté lèlmi Jéova ki ka briga ké li ké so rwayonm dipi nanninannan. Donk, sa enpòrtan pou nou savé kimoun yé sa vréman (Rév. 17:1, 3).
KAT GRO PAPA BÈT
Yé ka « soti di lanmè-a » (Dan. 7:1-8, 15-17). Yé ka réprézanté gouvèrnman-yan ki aji asou lavi sèrvitèr Bondjé-ya dipi lépòk Danyèl (gadé paragraf 4, 7).
4-5. Kouman Daniel 7:15-17 ka idé nou konprann ki lèlmi di Jéova sa bèt-ya ka réprézanté ?
4 Pou nou rivé savé kimoun lèlmi Jéova sa, nou divèt konprann senbòl liv Révélation-an ka sèrvi pou palé di yé. Pi bon fason pou konprann sa, a lò to ka lésé Labib-a èspliké li menm sa i lé di. Plizyèr senbòl ki annan liv Révélation-an ja èspliké annan ròt liv di Labib-a. Parèkzanp, profèt Danyèl fè roun rèv koté i wè « kat gro papa bèt féròs » ki té ka « soti di lanmè-a » (Dan. 7:1-3). É i ka di nou ki sa kat bèt-ya ka réprézanté kat « rwa », sa lé di kat gouvèrnman (li Daniel 7:15-17). Sa ka idé nou konprann ki bèt féròs-ya ki annan liv Révélation-an divèt ka réprézanté pwisans politik osi.
5 Mé annou fouyé ankò plis é annou wè kouman Labib-a ka idé nou konprann ankò pi byen senbòl ki annan liv Révélation-an. Annou koumansé ké bèt féròs-ya é annou réponn sa késyon-yan : Kimoun yé ka réprézanté ? Kisa ki ké rivé yé ? É pou fini, kisa sa lé di pou nou ?
YÉ KA DI NOU A KIMOUN KI LÈLMI BONDJÉ
BÈT FÉRÒS-A KI GEN SÈT TÈT
I ka « soti annan lanmè-a » é i gen sèt tèt, dis kòrn ké dis kouròn (Rév. 13:1-4). I ka réprézanté tout pwisans politik-ya ki dirijé moun-yan jik jòdla. So sèt tèt ka réprézanté sèt pwisans mondyal ki aji asou lavi sèrvitèr Bondjé-ya (gadé paragraf 6-8).
6. Kisa bèt féròs-a ki gen sèt tèt ki annan Révélation 13:1-4 ka réprézanté ?
6 Kisa bèt féròs-a ki gen sèt tèt ka réprézanté ? (li Révélation 13:1-4). Nou ka wè ki sa bèt féròs-a ka sanblé roun tig, i gen pat roun lous, djòl roun lyon ké dis kòrn. Kat bèt-ya ki annan Daniel chapit 7-a gen roun di sa bagaj-ya. Mé an Révélation chapit 13, a rounsèl bèt ki gen tout sa bagaj-ya. Donk sa bèt féròs-a pa ka réprézanté roun gouvèrnman rounso ouben rounsèl pwisans mondyal. Apré sa, yé ka di ki yé bay li « pouvwar asou tout ti nasyon, tout pèp tout lang ké tout nasyon ». Donk, i gen plis pouvwar pasé rounsèl gouvèrnman (Rév. 13:7). Donk, tousa ka montré nou ki sa bèt féròs-a dèt ka réprézanté tout pwisans politik-ya ki dirijé asou latè-a jik aprézan * (Eccl. 8:9).
7. Kisa sèt tèt-ya asou bèt féròs-a ka réprézanté ?
7 Kisa sèt tèt-ya asou bèt féròs-a ka réprézanté ? Révélation chapit 17 ka idé nou trouvé répons sa késyon-an paské i ka palé di sa bèt féròs-a. Nou ka li annan Révélation 17:10 : « A sèt rwa : senk tonbé, roun dibout toujou, é ròt-a pòkò rivé ; mé lò i ké rivé, i divèt rété roun tibi tan rounso. » Annan tout pwisans politik Satan sèrvi, yé ka réprézanté sèt annan yé kou dé « tèt » paské yé té gen ouben yé gen bokou pouvwar toujou. Sa pwisans mondyal-ya aji, ouben ka aji bokou toujou asou pèp Bondjé-a. Lò Jan rousouvwè vizyon liv Révélation-an, senk annan sa pwisans-ya té ja tonbé : Éjip, Asiri, Babilòn, Anpir médopèrs ké Lagrès. Sizyèm pwisans mondyal-a, a té Ròm, é i té ka dirijé toujou. Mé ki gouvèrnman té ké sa sétyèm ké dèrnyé « tèt-a » ?
8. Ki pwisans politik sétyèm tèt bèt féròs-a ka réprézanté ?
8 Ki pwisans mondyal ka dirijé pannan dèrnyé jou-ya épi dipi koumansman « jou Sényèr-a » ? (Rév. 1:10). A dé gouvèrnman ki fò é ki ka travay ansanm : Anglétèr-a ké Étazini-ya, sa lé di pwisans anglé ké amériken-an. Nou pouvé di ki a li ki sa sétyèm tèt bèt féròs-a Révélation 13:1-4 ka palé.
ROUN BÈT FÉRÒS KI GEN DÉ KÒRN KOU ROUN TIMOUTON
I ka « monté di latè-a » é i ka palé « kou roun dragon ». Yé ka aplé l’ osi « fo profèt-a », paské i ka ‘fè difé soti di syèl-a pou tonbé asou latè-a’ é i ka fè ròt gran mirak (Rév. 13:11-15 ; 16:13 ; 19:20). Bèt féròs-a ki gen dé kòrn kou roun ti-mouton ka réprézanté Pwisans anglé ké amériken-an. Yé ka aplé l’ « fo profèt-a » paské i ka bloublou moun-yan asou latè-a é i ka di yé « fè roun zimaj di bèt féròs-a » ki gen sèt tèt (gadé paragraf 9).
9. Kisa bèt féròs-a ki gen « dé kòrn kou roun ti-mouton » ka réprézanté ?
9 Annan Révélation chapit 13, nou ka anprann ki sétyèm tèt-a, pwisans anglé ké amériken-an, ka aji osi kou roun bèt féròs ki gen « dé kòrn kou kòrn roun ti-mouton », mé ki « koumansé palé kou roun dragon ». Annan Révélation chapit 16 ké 19, yé ka aplé sa bèt féròs-a « fo profèt-a » (Rév. 16:13 ; 19:20). Sa bèt féròs-a « ka fè gran mirak, i jis ka fè difé soti di syèl-a pou tonbé asou latè-a douvan moun-yan » (Rév. 13:11-15). Danyèl ka palé di sa menm konpòrtman-an lò i ka di ki « a pa ti déga » pwisans anglé ké amériken-an té ké fè (Dan. 8:19, 23, 24, nòt). A sa menm ki rivé pannan Dézyèm Lagèr mondyal-a. Dé bonm-yan ki fè lagèr-a fini, a syantifik anglé ké syantifik amériken ki travay ansanm pou fè yé. A konsa pwisans anglé ké amériken-an « fè difé soti di syèl-a pou tonbé asou latè-a ».
ROUN BÈT FÉRÒS KI ROUJ
Roun pròstitiyé asiz asou sa bèt-a, a Gran Babilòn-an. Liv Révélation-an ka di ki sa bèt-a kou roun wityèm rwa (Rév. 17:3-6, 8, 11). Pou koumansé, pròstitiyé-a ka éséyé kontrolé bèt féròs-a, mé pita a sa bèt féròs-a ki ka kayakaya l’. Sa fanm-an ka réprézanté tout fo rélijyon-yan yé tout ansanm. I asiz asou roun bèt ki ka réprézanté Nations unies-ya. Nations unies-ya ka défann sistèm politik-a asou tout latè-a (gadé paragraf 10, 14-17).
10. Kisa ‘zimaj bèt féròs-a’ ka réprézanté ? (Révélation 13:14, 15 ; 17:3, 8, 11).
10 Apré sa, Jan ka wè rounòt bèt féròs. Sa-la ka sanblé bokou ké bèt féròs-a ki gen sèt tèt sòf ki i rouj. Liv Révélation-an ka di ki a ‘zimaj bèt féròs-a’ é osi « roun wityèm rwa * » (li Révélation 13:14, 15 ; 17:3, 8, 11). I ka bay roun ti détay, i ka di ki sa « rwa-a » ka parèt, apré sa, i ka disparèt, é pou fini, i ka viré parèt. É a sa menm ki rivé Organisation des Nations unies-a ki ka défann sistèm politik-a asou tout latè-a. Lò sa rwa-a parèt, yé té ka aplé l’ Société des Nations. Apré sa, i disparèt pannan Dézyèm Lagèr mondyal-a. Pita, i viré parèt kou nou konnèt li jòdla.
11. Kisa bèt féròs-ya annan liv Révélation-an ka fè, é poukisa nou pa bézwen pè ?
11 Bèt féròs-ya ki annan liv Révélation-an ka réprézanté pwisans politik-ya. Yé ka fè tout kalité bagaj pou ankourajé moun briga kont Jéova ké so pèp. Yé ka rasanblé « rwa-ya asou tout latè-a » pou lagèr Armagédon, sa lé di « gran jou Bondjé Tou-Pwisan-an » (Rév. 16:13, 14, 16). Mé nou pa gen pou pè anyen ni pésonn. Nou Bondjé, Jéova, ki fò ké réyaji vitman pou sové sa-ya ki ka soutni so dominasyon (Ézéch. 38:21-23).
12. Kisa ki ké rivé tout sa bèt féròs-ya ?
12 Kisa ki ké rivé tout sa bèt féròs-ya ? Men sa Révélation 19:20 ka réponn : « Yé tchenbé bèt féròs-a ké fo profèt-a ki fè mirak douvan li. A sa mirak-ya i sèrvi pou bloublou sa-ya ki rousouvwè mark bèt féròs-a, ké sa-ya ki ka adoré so zimaj. Yé jité yé toulédé tou vivan annan lak difé ké souf-a. » Donk toupannan yé ké dirijé toujou, Bondjé ké krazé sa gouvèrnman-yan, ki sa so lèlmi, pou tout-tan.
13. Ki présyon gouvèrnman-yan ka mété asou krétyen-yan ?
13 Kisa sa lé di pou nou ? Paské nou krétyen, nou divèt gardé nou fidélité pou Bondjé ké so rwayonm (Jean 18:36). A pou sa, nou pa ka mélé ni pran parti annan lapolitik. Mé sa pouvé rèd pou nou pa mélé annan lapolitik paské gouvèrnman-yan lé nou soutni yé, ki annan sa nou ka di ki annan sa nou ka fè. Sa-ya ki ka asèpté fè sa, ka rousouvwè mark bèt féròs-a (Rév. 13:16, 17). Mé si roun krétyen ka rousouvwè sa mark-a, i ka pédi lanmityé Jéova é i ka pédi èspwar viv pou tout-tan osi (Rév. 14:9, 10 ; 20:4). A pou sa sa enpòrtan pou nou pa mélé annan lapolitik kèlkéswa présyon yé ka mété anlè nou !
MEN RONTÉ POU GRAN PRÒSTITYÉ-A
14. Dapré Révélation 17:3-5, ki ròt vizyon fè Jan rété èstébékwé ?
14 Jan ka di ki rounòt vizyon fè li « rété èstébékwé ». Kisa i wè ? Roun fanm té asiz asou bèt féròs-a ki rouj (Rév. 17:1, 2, 6). Yé ka aplé sa fanm-an « Gran Babilòn-an » é yé ka di ki i sa roun « gran pròstityé » ; i ka fè « péché sèksyèl » ké « rwa latè-a » (li Révélation 17:3-5).
15-16. « Gran Babilòn-an », a kimoun, é kouman nou savé sa ?
15 « Gran Babilòn-an », a kimoun ? Sa fanm-an pa pouvé réprézanté roun òrganizasyon politik paské liv Révélation-an ka di ki i ka fè péché sèksyèl ké rwa latè-a (Rév. 18:9). I asiz asou bèt féròs-a, sa lé di ki i ka éséyé kontrolé sa rwa-ya. Anplis di sa, i pa pouvé réprézanté sistèm komèrsyal-a annan monn Satan-an, paské yé ka di ki « moun-yan ki ka vandé asou latè-a » ka réprézanté sistèm komèrsyal-a (Rév. 18:11, 15, 16).
16 Détan, Labib-a ka sèrvi mo « pròstitisyon » ké « adiltèr » pou palé di sa-ya ki ka di ki yé ka sèrvi Bondjé, mé ki annan zafè idolatri, ouben ki zanmi ké monn-an (1 Chron. 5:25 ; Jacq. 4:4). Parkont, Labib-a ka di ki sa-ya ki ka adoré Bondjé ké fidélité, yé « vyèrj » (2 Cor. 11:2, nòt ; Rév. 14:4). Tan-lontan, Babilòn té sa mimisouk fo ladorasyon-an. Donk Gran Babilòn-an divèt ka réprézanté tout kalité fo ladorasyon. A sa ki ka pèrmèt nou di ki i ka réprézanté tout fo rélijyon-yan yé tout ansanm (Rév. 17:5, 18 ; gadé artik « Qu’est-ce que Babylone la Grande ? » asou jw.org).
17. Kisa ki ké rivé Gran Babilòn-an ?
17 Kisa ki ké rivé Gran Babilòn-an ? Nou ka li répons-a annan Révélation 17:16, 17 : « Kanta dis kòrn to wè-ya, ké bèt féròs-a, yé ké rayi fanm-an ki ka kouché ké tout wonm é yé ké kayakaya l’ é yé ké lésé l’ toutouni ; yé ké manjé so lachè yé ké boulé l’ nèt. Paské Bondjé mété annan yé tchò anvi fè so volonté. » Wi, Jéova ké fè nasyon-yan sèrvi bèt féròs-a ki rouj, sa lé di Nations unies-ya, pou yé ataké tout fo rélijyon-yan asou tout latè-a é krazé yé nèt. (Rév. 18:21-24).
18. Kisa nou pa divèt fè si nou pa lé gen anyen ka wè ké Gran Babilòn-an ?
18 Kisa sa lé di pou nou : Nou toujou divèt bay nou Bondjé « roun ladorasyon ki pròp é ki pa gen pyès salté », kou i ka doumandé (Jacq. 1:27). Pou fè sa, nou pa janmen divèt lésé Gran Babilòn-an fè nou tonbé annan sa i ka fè : fo ansèyman, lafèt Bondjé pa kontan, tchenbwa ké konpòrtman malpròp. Anplis di sa, nou divèt kontinyé avèrti moun-yan, pou yé « soti annan li », pou yé pa koupab douvan Bondjé yé menm osi (Rév. 18:4).
BONDJÉ KA FIN KÉ SO PI GRAN LÈLMI
DRAGON-AN KOULÈR DIFÉ
I ka « bay bèt féròs-a » ki gen sèt tèt « pouvwar » (Rév. 12:3, 9, 13 ; 13:4 ; 20:2, 10). Yé ké jité Satan, pi gran lèlmi Jéova-a, annan roun gran trou san fon ; i ké rété la pannan 1 000 lannen. Apré sa, yé ké « jité l’ annan lak difé ké souf-a » (gadé paragraf 19-20).
19. « Gran dragon koulèr difé »-a, a kimoun ?
19 Liv Révélation-an ka palé osi di roun « gran dragon koulèr difé » (Rév. 12:3). Sa dragon-an ka briga ké Jézi ké so zanj (Rév. 12:7-9). I ka ataké pèp Bondjé-a. É a li ka bay bèt féròs-ya, sa lé di gouvèrnman-yan, pouvwar yé gen-an (Rév. 12:17 ; 13:4).Sa dragon-an, a kimoun ? A « sèrpan-an ki té la o koumansman, sa-la yé ka aplé Djab ké Satan » (Rév. 12:9 ; 20:2). A li ki ka kontrolé tout ròt lèlmi Jéova.
20. Kisa ki ké rivé dragon-an ?
20 Kisa ki ké rivé dragon-an ? Dapré Révélation 20:1-3, roun zanj ké jité Satan annan roun trou san fon. Sa ké kou roun lajòl pou li. I ké rété annan l’ pannan 1 000 lannen, é pannan sa tan-an, i pa ké pouvé bloublou pyès moun ankò. Pou fini, yé ké jité Satan ké so démon annan « lak difé ké souf-a » : sa lé di ki yé ké disparèt pou tout-tan (Rév. 20:10). Imajiné kouman lavi-a ké bèl toubonnman lò ni Satan ni so démon pa ké la ankò !
21. Apré tousa nou fin wè, poukisa nou tchò pouvé kontan ?
21 Sa artik-a idé nou konprann plizyèr senbòl annan liv Révélation-an. Nou wè a kimoun ki lèlmi Jéova, mé nou wè osi sa ki ké rivé yé. Ès sa pa ankourajan ? Kou Révélation 1:3 ka di l’, « byenéré sa-la ki ka li paròl sa profési-a tou fò é sa-ya ki ka tandé paròl sa profési-ya ! » Mé lò lèlmi Jéova pa ké la ankò, ki bénédiksyon moun-yan ki fidèl ké gen ? Nou ké palé di sa annan dèrnyé artik di sa séri-a.
KANTIK 23 Jéhovah commence à régner
^ § 5 Liv Révélation-an ka sèrvi senbòl pou montré a kimoun ki lèlmi Bondjé. É liv Daniel-a ka idé nou konprann sa sa senbòl-ya lé di. Annan sa artik-a, nou ké wè plizyèr profési ki ka sanblé annan sa dé liv-ya. Sa ké pèrmèt nou savé a kimoun ki lèlmi Bondjé. Apré sa, nou ké wè sa ki ké rivé yé.
^ § 6 Rounòt bagaj ka montré nou ki bèt féròs-a ki gen sèt tèt ka réprézanté tout pwisans politik-ya : i gen « dis kòrn ». Annan Labib-a, lò yé ka sèrvi chif dis-a, a souvan pou palé di sa ki konplè.
^ § 10 Zimaj bèt féròs-a pa kou prémyé bèt féròs-a ki gen sèt tèt, i pa gen « kouròn » asou so kòrn (Rév. 13:1). A paské i ka « vini di sèt » ròt rwa-ya, é ki a yé ki ka bay li pouvwar i gen-an. (Gadé artik « Qu’est-ce que la bête de couleur écarlate de l’Apocalypse chapitre 17 ? » asou jw.org.)
