1-2. Poukisa nou divèt pran tan gadé liv Révélation-an ?

 ÈS ROUN moun ja envité to gadé so albòm foto ? Pi to ka gadé foto-ya pi to ka wè moun to pa konnèt. Épi men to ka tonbé asou roun foto é to ka pran tan gadé l’ pi byen. Poukisa ? Paské to asou sa foto-a ! To ka byen gadé l’ épi to ka éséyé sonjé kitan ké ki koté yé pran sa foto-a. É to ka éséyé rékonnèt ròt-ya ki asou foto-a osi. Pou to, sa foto-a, a pa nenpòrt ki foto.

² Liv Révélation-an, a kou sa foto-a pou o mwen dé rézon. Prémyèrman, a pou nou yé ékri sa liv-a. Annan prémyé vèrsé-a, nou ka li : « Révélasyon Bondjé bay Jézi Kris, pou i montré so èsklav-ya sa ki pou rivé titalò » (Rév. 1:1). Donk sa ki marké annan sa liv-a, a pa pou nenpòrt kimoun, a pou nou, nou ki ka adoré Bondjé. É nou pa étoné di wè ki sèrvitèr Bondjé-ya ka partisipé annan réyalizasyon sa profési-ya — donk a kousidiré nou ka wè nou kò asou foto-a !

3-4. a) Dapré liv Révélation-an, annan ki lépòk sa profési-ya té gen pou fèt ? b) Kou nou ka viv annan lépòk « jou Sényèr-a », kisa sa divèt bay nou anvi fè ?

³ Dézyèm rézon ki divèt fè nou pran tan gadé profési-ya ki annan liv Révélation-an, a parapòrta lépòk sa profési-ya divèt fèt. Apot Jan èspliké annan ki lépòk sa té divèt fèt. I di : « Annan roun vizyon, mo rivé annan lépòk jou Sényèr-a » (Rév. 1:10). Lò Jan ékri sa an 96 di  nou lépòk, « jou Sényèr-a » té lwen toujou (Mat. 25:14, 19 ; Luc 19:12). Dapré profési-ya ki annan Labib-a, sa jou-a koumansé an 1914, lò Jézi divini Rwa annan syèl-a. A dipi sa lannen-an tout profési ki annan liv Révélation-an, ki ka konsèrné pèp Bondjé-a, koumansé réyalizé. Wi, nou annan lépòk « jou Sényèr-a » !

⁴ Kou a nou ki ka viv annan sa lépòk-a, a nou ki divèt byen gadé konsèy ki plen ké lanmou nou ka jwenn annan Révélation 1:3 : « Byenéré sa-la ki ka li paròl sa profési-a tou fò é sa-ya ki ka tandé paròl sa profési-a épi ka tchenbé kont di sa ki marké annan l’, paské tan-an Bondjé prévwè pròch rivé. » Sa vèrsé-a ka di nou « li paròl sa profési-a tou fò » ké « tandé paròl sa profési-a », épi « tchenbé kont di sa ki marké annan l’ » osi. Mé di ki paròl nou divèt tchenbé kont ? Annou wè déztrwa annan yé.

5. Kisa Jézi byen savé é poukisa nou divèt swiv tout so konsèy ?

⁵ Dipi prémyé chapit liv Révélation-an, nou ka konprann ki Jézi byen savé sa ki ka pasé annan asanblé krétyen-yan (Rév. 1:12-16, 20 ; 2:1). Mésaj i voyé pou sèt asanblé-ya ki té an Aziminèr ka byen montré sa. Annan sa mésaj-ya, i bay krétyen-yan annan 1^é syèk-a (é an menm tan tout sa ki ka adoré Jéova jòdla) déztrwa konsèy asou plizyèr sitiasyon pou yé té adoré Jéova kou i lé. Kisa sa ka anprann nou ? Jézi byen savé si nou lanmityé ké Jéova fò. I ka gadé nou pou protéjé nou, é i pa gen anyen i pa ka wè. I savé sa nou divèt fè pou nou kontinyé fè Jéova plézi. Aprézan, annou wè plizyèr konsèy i bay.

6. a) Dapré Révélation 2:3, 4, ki problèm asanblé Éfèz té gen ? b) Kisa sa ka anprann nou ?

⁶ (Li Révélation 2:3, 4.) Annou pa pédi lanmou nou té gen o koumansman pou Jéova. Mésaj Jézi bay frè ké sò-ya ki té Éfèz ka montré ki yé té ka kontinyé tchenbé é ki yé té ka kontinyé adoré Jéova menm si yé té ka jwenn roun patché problèm. Magré sa, yé té pédi lanmou yé té gen o koumansman. Donk yé té divèt viré gen sa lanmou-a. Si yé pa té ka fè sa, fason yé té ka adoré Jéova pa té ké fè l’ plézi ankò. A menm bagaj-a pou nou jòdla. Nou divèt fè plis ki tchenbé. Nou divèt tchenbé pou bon rézon-yan. A pa sèlman sa nou ka fè ki gen valò pou Jéova, mé sa ki enpòrtan pou li osi, a poukisa nou ka fè sa. Sa enpòrtan pou li paské i lé ki a nou lanmou ké nou rékonésans pou li ki ka fè nou adoré l’ (Prov. 16:2 ; Marc 12:29, 30).

7. a) Kou Jézi ka di l’ annan Révélation 3:1-3, ki problèm asanblé Sard té gen ? b) Kisa nou divèt fè ?

⁷ (Li Révélation 3:1-3.) Annou pa dronmi. Asanblé Sard té gen rounòt problèm. Menm si yé té fè bokou bagaj pou Jéova tan-lontan, yé té moli. A pou sa Jézi di yé « lévé ». Kisa sa ka anprann nou ? A vré, Jéova pa ké bliyé sa nou fè pou li, mé a pa pou sa nou divèt pansé ki nou ja fè asé (Héb. 6:10). Menm si jòdla nou pa pouvé fè tousa nou lé kou anvan, nou divèt toujou gen bokou bagaj pou fè annan « travay Sényèr-a » é nou pa divèt dronmi jiktan lafen-an rivé (1 Cor. 15:58 ; Mat. 24:13 ; Marc 13:33).

8. Kisa sa Jézi di krétyen-yan ki té Laodisé ka anprann nou ? (Révélation 3:15-17)

 ⁸ (Li Révélation 3:15-17.) Annou adoré Jéova ké balan é ké tout nou tchò. Mésaj Jézi voyé pou krétyen-yan ki té Laodisé té ka montré rounòt problèm ankò. Yé té ka adoré Jéova, mé yé té « tyèd ». Kou yé té lanben, Jézi di ki yé té « maléré » é ki ‘moun té gen pityé pou yé lò yé té ka wè yé’. Donk yé té divèt adoré Jéova ké balan (Rév. 3:19). Kisa sa ka anprann nou ? Si nou pa gen menm balan kou anvan, nou divèt chaché gen plis rékonésans pou tousa Jéova ké so òrganizasyon ka bay nou (Rév. 3:18). A pa pou nou travay rèd pou nou gen roun bèl ti lavi annan sa monn-an épi nou pa ka mété Jéova an prémyé annan nou lavi ankò.

9. Kou nou ka wè l’ annan sa Jézi di pou krétyen-yan ki té Pèrgam ké Tiyatir, ki danjé nou divèt panga ?

⁹ Annou pa kouté sa apòsta-ya ka di. Jézi babyé roun ran ki té Pèrgam paské yé té ka mété dézòrd annan asanblé-a é yé té ka soutni apòsta-ya (Rév. 2:14-16). Parkont, i félisité sa-ya ki té Tiyatir paské yé té rété lwen di « bagaj Satan ki fon », é i ankourajé yé « byen gardé » lavérité-a (Rév. 2:24-26). Frè ké sò-ya annan sa dé asanblé-ya ki té lésé fo ansèyman bloublou yé, té divèt répanti. Kisa sa ka anprann nou ? Nou pa divèt kouté pyès ansèyman ki pa k’alé ké sa Jéova ka pansé. Apòsta-ya « kontan Bondjé swadizan », mé ‘yé pa lé kouté l’’ (2 Tim. 3:5). Si nou ka pran tan byen étidyé Labib-a, sa ké pi fasil pou nou wè si roun ansèyman pa vré é pou nou vòltijé sa (2 Tim. 3:14-17 ; Jude 3, 4).

10. Kisa sa Jézi di pou asanblé Pèrgam ké Tiyatir ka anprann nou ankò ?

¹⁰ Annou pa ni asèpté ni fè pyès kalité péché sèksyèl. I té gen rounòt problèm ankò annan asanblé Pèrgam ké Tiyatir. Jézi babyé roun ran annan sa asanblé-ya paské yé té ka asèpté moun fè péché sèksyèl (Rév. 2:14, 20). Kisa sa ka anprann nou ? Si nou pa ka rété pròp annan sa zafè-a, nou pa divèt krè ki Jéova ké fronmen wéy asou sa paské nou ka adoré l’ dipi lontan ouben paské nou gen plizyèr rèsponsabilité annan asanblé-a (1 Sam. 15:22 ; 1 Pierre 2:16). É i ka doumandé nou kontinyé rèspèkté so  prensip ki rot, menm si sa di monn-an ka désann toubonnman (Éph. 6:11-13).

11. Kisa nou anprann jik aprézan ? (gadé osi ti karé-a «  Sa sa ka anprann nou »).

¹¹ Kisa nou anprann jik aprézan ? Nou anprann ki nou divèt vérifyé si nou ka adoré Jéova kou i lé. Si nou ka fè roun bagaj i pa kontan, nou divèt chanjé sa lanmenm (Rév. 2:5, 16 ; 3:3, 16). Annou palé aprézan di rounòt bagaj Jézi di annan mésaj i voyé pou asanblé-ya ki té an Aziminèr.

12. Poukisa nou divèt pran tan gadé sa Jézi di pou krétyen-yan ki té Smirn ké Filadèlfi ? (Révélation 2:10).

¹² Annou wè aprézan sa Jézi di pou krétyen-yan ki té Smirn ké Filadèlfi. I èspliké yé ki yé pa té divèt pè moun pèrsékité yé, paské si yé té ka rété fidèl, Jéova té ké rékonpansé yé (li Révélation 2:10 ; 3:10). Kisa sa ka anprann nou ? Nou menm osi, yé ké pèrsékité nou é nou ké divèt paré pou tchenbé (Mat. 24:9, 13 ; 2 Cor. 12:10). Poukisa nou pa divèt bliyé sa ?

13-14. Kisa ki ka rivé pèp Bondjé-a akoz di sa ki rivé dapré Révélation chapit 12 ?

¹³ Liv Révélation-an té ka di ki yé té ké pèrsékité sèrvitèr Bondjé-ya annan « lépòk jou Sényèr-a », sa lé di annan nou lépòk. Révélation chapit 12 té ka di ki roun lagèr té ké pété annan syèl-a jis apré Jézi divini rwa. Michèl, sa lé di Jézi, ké so zanj té ké briga ké Satan ké so démon-yan (Rév. 12:7, 8). Lèlmi Bondjé té ké pédi é Bondjé té ké jité yé asou latè-a. É latè-a ké tout moun ki asou l’ té ké soufri bokou (Rév. 12:9, 12). Mé kisa ki té ké rivé sèrvitèr Bondjé-ya akoz di sa ?

¹⁴ Kou Satan pa té ké pouvé alé annan syèl-a ankò, i té ké kòlè dèyè krétyen wen-yan. Poukisa ? Paské a yé ki té ké réprézanté rwayonm Bondjé-a asou latè-a é ki té ké « divèt bay témwanyaj asou Jézi » (Rév. 12:17 ; 2 Cor. 5:20 ; Éph. 6:19, 20). Kouman sa profési-a réyalizé ?

15. Kimoun ka réprézanté « dé témwen »-yan yé ka palé annan Révélation chapit 11, é kisa ki rivé yé ?

¹⁵ Satan fè lèlmi Bondjé ataké wit frè-ya ki té wen é ki té ka dirijé travay prédikasyon-an. Sa frè-ya ki té gen gran rèsponsabilité annan òrganizasyon-an, a yé ki té sa « dé témwen »-yan ki, dapré Révélation, té ké mouri * (Rév. 11:3, 7-11). An 1918, yé manti asou sa frè-ya,  é yé mété yé lajòl pou lontan. A kousidiré yé té « tchwé » travay sa krétyen wen-yan.

16. a) Ki bagaj étonan rivé an 1919 ? b) Kisa Satan ka fè dipi 1919 ?

¹⁶ Révélation chapit 11 té ka di osi ki « dé témwen »-yan té ké rouviv roun ti moso tan apré. Sa profési-a fèt roun fason ki vréman étonan pa menm roun lannen apré yé mété sa frè-ya lajòl. An mars 1919, yé libéré sa frè-ya é pita, yé di ki yé té inosan. Lanmenm, frè-ya roukoumansé pran douvan annan travay prédikasyon-an. Mé a pa pou sa Satan arété ataké pèp Bondjé-a. É dipi sa jou-a, i ka vidé « roun flèv » pèrsékisyon asou yé (Rév. 12:15). « A la [nou chak] bézwen andirans ké lafwa » (Rév. 13:10).

17. Ki soulajman yé pa té ka antann pèp Bondjé rousouvwè, toupannan Satan té ka ataké yé ?

¹⁷ Révélation chapit 12 té ka di ki sèrvitèr Bondjé-ya té ké wè roun soulajman rivé di roun koté yé pa té ka antann. A té ké kousidiré ‘latè-a té ka valé flèv’ pèrsékisyon-yan (Rév. 12:16). É a sa menm ki rivé. Détan, sèrten parti di monn Satan-an ki pi rézonab, kou sa-ya ki ka fè moun rèspèkté lalwa ké lajistis, idé sèrvitèr Bondjé-ya. Yé ganyen plizyèr prosè plizyèr fwa, é sa pèrmèt yé gen plis libèrté. Kouman yé sèrvi sa libèrté-a ? Yé sèrvi sa tan-an pou fè travay Jéova té bay yé-a (1 Cor. 16:9). Sa travay-a, a kisa ?

18. Ki mésaj enpòrtan krétyen-yan divèt préché anvan lafen-an rivé ?

¹⁸ Jézi di ki so disip té ké préché « bon nouvèl di Rwayonm-an [...] asou tout latè-a » anvan lafen-an rivé (Mat. 24:14). Lò yé ka préché, roun zanj, ouben pito roun group zanj, ka idé yé. Labib-a ka di ki i gen roun « bon nouvèl étèrnèl pou di tout moun ki ka rété asou latè-a, é pou tout nasyon, ti nasyon kou gran nasyon, é pou tout lang, é pou tout pèp » (Rév. 14:6).

19. Ki ròt mésaj sa-ya ki kontan Jéova divèt préché ?

¹⁹ A pa bon nouvèl Rwayonm-an rounso pèp Bondjé-a divèt di. Yé divèt  soutni travay zanj-ya ka fè osi. Yé ka palé di sa travay-a annan Révélation chapit 8 jiska 10. Sa zanj-ya ka anonsé plizyèr malò ki divèt tonbé asou sa-ya ki pa lé asèpté rwayonm Bondjé-a. Donk Témwen Jéova-ya ka di roun mésaj ki kou « lagrèl » ké « difé » é ki ka èspliké jijman Bondjé-a kont chak parti monn Satan-an (Rév. 8:7, 13). Moun-yan bézwen savé ki lafen-an pròch, konsa yé ké pouvé fè chanjman annan yé lavi é rété vivan lò kòlè Jéova ké pété (Soph. 2:2, 3). Pourtan, moun-yan pa kontan tandé sa mésaj-a. Donk nou bézwen kouraj pou préché sa mésaj-a. Pannan gran tribilasyon-an, dèrnyé mésaj jijman nou ké gen pou bay ké pi dirèk ankò (Rév. 16:21).

20. Kisa nou ké wè annan dé artik-ya ki ka vin dèyè-a ?

²⁰ Nou divèt tchenbé kont di « paròl sa profési-a » paské réyalizasyon sa profési-a ka konsèrné nou (Rév. 1:3). Mé kisa ki ké bay nou fòrs pou kontinyé tchenbé annan pèrsékisyon-yan é kontinyé préché sa mésaj-ya ké kouraj ? Dé bagaj ké bay nou fòrs : pran tan gadé sa liv Révélation-an ka di asou lèlmi Bondjé épi réfléchi asou bèl bénédiksyon nou ké gen si nou ka rété fidèl. A sa nou ké wè annan dé artik-ya ki ka vin dèyè-a.