1-2. Èspliké annan ki sitiasyon sèrten prensip annan Labib-a pouvé divini pi enpòrtan pou nou.

 JOU maryaj-a, mouché ké madanm lamaryé ka kouté roun diskour roun ansyen ka fè asou prensip yé divèt swiv aprézan. A pa prémyé fwa yé ka tandé sa prensip-ya. Mé aprézan, sa vèrsé-ya ka divini pi enpòrtan pou yé. Poukisa ? Paské kou yé maryé aprézan, sa vèrsé-ya ka tonbé annan yé jarden.

² A menm bagaj-a lò roun mouché ké so madanm ka vin gen timoun. Pannan plizyèr lannen, pitèt yé tandé plizyèr diskour asou zafè lévé timoun. Mé aprézan, sa konsèy-ya ka divini pi enpòrtan pou yé. Yé ké divèt lévé yépa timoun. A pa ti rèsponsabilité ! A vré, lò sèrten bagaj ka chanjé annan nou lavi, nou ka wè prensip nou té ja konnèt annan Labib-a, rounòt fason. A pou sa, sèrvitèr Jéova-ya ka li so Paròl ‘pannan tout yé lavi’, kou rwa-ya an Israyèl té gen pou fè l’, é yé ka pran tan réfléchi asou l’ (Deut. 17:19).

3. Kisa nou ké wè annan sa artik-a ?

³ Papa ké manman, zòt gen roun annan pi gran lònò roun krétyen pouvé gen : anprann zòt timoun konnèt Jéova. Mé sa zòt divèt fè, a pa anprann yé bagaj asou Bondjé rounso. Zòt gen pou idé yé kontan Bondjé ké tout yé tchò. Kouman zòt ké rivé fè sa ? Annan sa artik-a, nou ké wè kat prensip ki annan Labib-a ki ké idé papa  ké manman-yan (2 Tim. 3:16). Nou ké wè osi ki bénédiksyon plizyèr papa ké manman krétyen ka jwenn paské yé ka apliké konsèy ki annan Labib-a.

4. Bay roun prémyé prensip ki pouvé idé papa ké manman-yan idé yé timoun kontan Jéova ké tout yé tchò (Jacques 1:5).

⁴ Prémyé prensip : Chaché wè sa Jéova ka di zòt fè. Doumandé Jéova bay zòt sajès zòt bézwen pou idé zòt timoun kontan li (li Jacques 1:5). Si i gen roun moun ki pouvé bay zòt konsèy, a byen Jéova. Annou wè dé rézon pou sa. Prémyèrman, a li ki gen plis èspéryans annan zafè lévé timoun (Ps. 36:9). É dézyèmman, konsèy i ka bay toujou ka mennen bénédiksyon (Is. 48:17).

5. a) Kisa òrganizasyon Jéova-a ka bay pou idé papa ké manman-yan ? b) Lò to gadé vidéyo-a, kisa to anprann asou fason frè ké sò Amorim lévé yé timoun ?

⁵ Jéova ka sèrvi so Paròl ké so òrganizasyon pou bay zòt roun patché konsèy ki ké idé zòt anprann zòt timoun kontan l’ (Mat. 24:45). Parèkzanp, zòt pouvé jwenn roun patché konsèy annan artik « De l’aide pour les familles » ki té ka parèt annan journal Réveillez-vous !. Aprézan, sa artik-ya asou nou sit. Anplis di sa, i gen roun patché vidéyo osi asou jw.org ki pouvé idé papa ké manman-yan apliké konsèy Jéova ka bay pou lévé yé timoun * (Prov. 2:4-6).

6. Kouman roun papa ka wè konsèy òrganizasyon Jéova-a ka bay li ké so madanm ?

⁶ Bokou papa ké manman di kouman yé gen rékonésans pou sa Jéova ka bay yé gras a so òrganizasyon pou idé yé. Joe, roun papa, ka di : « Lévé trwa timoun annan lavérité, a pa roun ti travay. Mo ké mo madanm, nou toujou ka priyè Jéova pou i idé nou. É souvan, nou ka trouvé ki roun artik ouben roun vidéyo ka soti jiskont lò nou bézwen pou idé nou jéré roun sitiasyon èspésyal. Chaché wè sa Jéova ka di nou fè, sa toujou idé nou. » Joe ké so madanm  ka wè ki sa artik-ya ké sa vidéyo-ya, ka idé yé timoun vini pi pròch ké Jéova.

7. Poukisa papa ké manman-yan divèt byen gadé ki èkzanp yé ka bay ? (Romains 2:21).

⁷ Dézyèm prensip : Bay roun bon èkzanp. Timoun-yan ka byen gadé sa yé papa ké yé manman ka fè, é souvan, yé ka imité yé. Pa gen pyès papa ni manman ki parfè (Rom. 3:23). Mé papa ké manman-yan divèt bay yé timoun pi bon èkzanp yé pouvé bay (li Romains 2:21). Men sa roun papa di asou timoun-yan : « Yé kou zéponj ki ka bwè tout bagaj. » I ka di ankò : « Yé ké di nou si nou èkzanp pa k’alé ké sa nou ka chaché anprann yé. » Donk, si nou lé nou timoun kontan Jéova, a pou yé wè ki nou lanmou pou li fò.

8-9. Kisa to anprann ké sa Andrew ké Emma di ?

⁸ Papa ké manman-yan pouvé fè roun patché bagaj pou anprann yé timoun kontan Jéova. Andrew, roun frè ki gen 17 lannen, ka sonjé : « Mo papa ké mo manman toujou di mo kouman sa té enpòrtan pou mo priyè. Chak jou aswè, papa té ka priyè ké mo, menm si mo té ja priyè mo tousèl. Mo papa ké mo manman té ka toujou di nou : “Zòt pouvé palé ké Jéova lò zòt lé.” A pou sa, lapriyè divini enpòrtan pou mo. Donk aprézan, sa fasil pou mo priyè Jéova é pou mo wè l’ kou roun Papa ki plen ké lanmou. » Zòt, papa ké manman-yan, pa janmen bliyé ki zòt lanmou pou Jéova pouvé idé zòt timoun kontan Jéova osi.

⁹ Annou gadé èkzanp Emma osi. So papa lésé fanmi-a, é i lésé roun patché dèt pou so manman. Emma ka di : « Souvan, manman té ka djoubaté ké zafè soumaké-a, mé i toujou té ka palé di fason Jéova té ka pran swen di so sèrvitèr, é di fason i ka bay yé sa yé bézwen. É asou fason i té ka viv so lavi, mo té ka wè ki i té ka krè sa i té ka di. Manman té ka apliké sa i té ka anprann nou annan so lavi. » Kisa sa ka anprann nou ? Menm lò sa rèd, papa ké manman-yan pouvé bay yé timoun roun bèl èkzanp (Gal. 6:9).

10. Kitan bokou papa ké manman Israyélit té pouvé palé di Jéova ké yé timoun ? (Deutéronome 6:6, 7).

¹⁰ Trwazyèm prensip : Palé ké zòt timoun souvan. Jéova té doumandé Israyélit-ya palé ké yé timoun di li souvan (li Deutéronome 6:6, 7). Sa papa ké manman-yan té gen bokou okazyon pannan tout lajournen-an pou palé ké yé timoun é fè yé kontan Jéova ké tout yé tchò. Parèkzanp, pitèt roun papa té ka pasé roun patché lèr ka planté ouben ka rékòlté ké so ti bolonm. É pitèt manman-an té ka pasé près tout lajournen ka fè lakoutir, ka tisé ouben ka fè ròt bagaj annan kaz-a ké so tifi. Toupannan yé té ka travay ansanm, papa, manman ké timoun té pouvé palé di roun patché bagaj enpòrtan. Parèkzanp, yé té pouvé di kouman Jéova té bon é kouman i té ka idé fanmi-a.

11. Kitan èspésyalman papa ké manman-yan pouvé palé ké yé timoun ?

¹¹ Jòdla, lavi-a pa kou anvan. Annan bokou péyi, papa, manman ké timoun pa pouvé pasé bokou tan ansanm pannan lajournen-an. Souvan, papa ké manman-yan ka travay, épi timoun-yan lékòl. Donk, si papa ké manman-yan lé palé ké yé timoun, yé divèt chaché  okazyon pou fè sa (Éph. 5:15, 16 ; Phil. 1:10). Lò to ka étidyé ké to fanmi, a roun bèl okazyon pou fè sa. Roun jenn frè yé ka aplé Alexander ka di : « Mo papa toujou ka òrganizé so kò pou nou pa raté étid ké fanmi-a, pa menm rounsèl jou. I pa ka lésé anyen anpéché nou pasé sa moman-an ansanm. É lò nou fin étidyé, nou ka kontinyé palé. »

12. Kisa roun chèf fanmi divèt sonjé parapòrta étid i ka fè ké so fanmi ?

¹² Si to sa roun chèf fanmi, kisa to pouvé fè pou to timoun pran plézi annan étid fanmi-a ? Parèkzanp, to pouvé étidyé nouvo piblikasyon-an Viv ké tchò kontan pou tout-tan ! ké yé. Lò zòt ké fè sa, sa ké pèrmèt zòt pran bèl ti kozé. Anplis di sa, sa to lé, a ki to timoun di to sa yé ka rousanti é sa ki ka fè yé enkyèt. Alòr, pa profité di sa moman-an pou kritiké yé ouben pou babyé yé. Épi, éséyé pa nèrvé si to timoun ka di roun bagaj ki pa k’alé ké sa Labib-a ka di. Pasé to fè sa, a pou to kontan tandé yé di to franchman sa yé ka pansé, é a pou to ankourajé yé di tousa yé ka rousanti. Ès a pa sèlman lò to ké savé sa to timoun gen annan yé tchò ki to ké pouvé gidé yé ?

13. Annan ki ròt okazyon papa ké manman-yan pouvé idé yé timoun vin pròch ké Jéova ?

¹³ Papa ké manman, chaché okazyon pannan lajournen pou idé zòt timoun vini pi pròch ké Jéova. Zòt pa bézwen antann lò zòt asiz ka étidyé Labib-a pou fè yé réfléchi asou lanmou i gen pou nou. Men sa roun manman yé ka aplé Lisa ka di : « Nou idé nou timoun réfléchi asou Jéova ké kréyasyon-an. Parèkzanp, lò nou chyen té ka fè yé ari, nou té ka profité pou fè yé wè ki nou Kréyatèr gen roun patché bèl kalité, i kontan ari, i kontan lavi é a sa menm kalité-ya i bay nou. »

14. Poukisa sa enpòrtan pou papa ké manman-yan idé yé timoun byen chwazi yé zanmi ? (Proverbes 13:20).

¹⁴ Katriyèm prensip : Idé zòt timoun chwazi bon zanmi. Paròl Bondjé-a ka  byen di ki nou zanmi ka aji asou nou. Yé pouvé fè nou fè bon bagaj ouben mové bagaj (li Proverbes 13:20). Papa ké manman, ès zòt savé kimoun ki sa zanmi zòt timoun ? Ès zòt ja pasé tan ké yé ? Kisa zòt pouvé fè pou idé zòt timoun trapé zanmi ki kontan Jéova ? (1 Cor. 15:33). Zòt pouvé envité krétyen ki gen roun bèl lanmityé ké Jéova, pou yé pasé roun ti tan ké zòt ké zòt timoun osi (Ps. 119:63).

15. Kouman papa ké manman-yan pouvé idé yé timoun gen bon zanmi ?

¹⁵ Annou wè èkzanp roun papa yé ka aplé Tony. I ka èspliké sa li ké so madanm fè pou idé yé timoun trouvé bon zanmi. Men sa i ka di : « Pannan lontan, mo ké mo madanm, nou envité roun patché frè ké sò diféran, piti kou gran, annan nou kaz. Nou té ka manjé ansanm, é yé té ka vini partisipé annan nou étid ké fanmi-a. A roun bon fason pou anprann konnèt sa-ya ki kontan Jéova é ki ka adoré l’ ké tchò kontan. Nou rousouvwè rèsponsab sirkonskripsyon, misyonèr ké ròt ankò. Nou timoun anprann bokou bagaj gras a sa sa frè ké sò-ya té ka rakonté. Yé wè bèl balan yé té gen, é kouman yé té ka travay rèd pou Jéova. Tousa bay yé anvi vin pròch ké Jéova. » Papa ké manman, fè tousa zòt pouvé pou idé zòt timoun gen bon zanmi !

16. Kisa zòt pa divèt bliyé si zòt timoun ka di zòt ki i pa lé adoré Jéova ?

¹⁶ É si aprézan, magré tousa zòt fè, roun annan zòt timoun ka di ki i pa lé adoré Jéova ? A pa pou zòt di ki zòt pa té sa roun bon manman ouben roun bon papa. Jéova bay nou tout libèrté di chwazi si nou ké adoré l’, ouben si nou pa ké adoré l’. Si to timoun désidé lésé Jéova, pa pédi èspwar ki roun jou i ké routounen. Sonjé istwè pitit ki té pédi-a (Luc 15:11-19, 22-24). Menm si sa jennjan-an fè roun patché bagaj ki té mové, pou fini, i routounen. Sèrten  pouvé di : « Wi, mé a roun istwè. Ès sa pouvé vréman rivé ? » Wi, sa pouvé rivé ! Anfèt, a sa ki rivé roun jennjan yé ka aplé Élie.

17. Kouman èkzanp Élie ka ankourajé to ?

¹⁷ Men sa Élie ka di asou so papa ké so manman : « Yé fè tousa yé té pouvé pou idé mo kontan Jéova ké so Paròl Labib-a. Mé lò mo té gen apéprè 15 an, mo koumansé chanjé chimen. » Élie koumansé fè mové bagaj dèyè do so papa ké so manman. Yé éséyé idé li rété pròch di Jéova, mé i pa té lé kouté yé. I lésé kaz-a, épi i koumansé mennen roun vyé lavi. Mé magré sa, détan, i té ka palé di Labib-a ké roun di so zanmi. Men sa i ka di : « Pi mo té ka palé di Jéova ké mo zanmi, pi mo té ka sonjé Jéova. Piti piti, grenn lavérité-a mo manman ké mo papa té planté annan mo tchò koumansé pousé. » Finalman, Élie rouvini annan lavérité-a *. A pa ti kontan so papa ké so manman té divèt kontan paské yé fè tousa yé té pouvé pou anprann li kontan Jéova dipi i té toupiti ! (2 Tim. 3:14, 15).

18. Kisa to ka pansé di papa ké manman-yan ki ka travay rèd pou idé yé timoun kontan Jéova ?

¹⁸ Papa ké manman, zòt gen roun bèl lònò : zòt pouvé lévé nouvo jénérasyon di sa-ya ki ka adoré Jéova (Ps. 78:4-6). Sa travay-a pa fasil, é nou ka félisité zòt pou tout éfòr zòt ka fè pou idé zòt timoun. Kontinyé fè tousa zòt pouvé pou idé zòt timoun kontan Jéova é pou lévé yé soulon prensip ké avèrtisman i ka bay (Éph. 6:4). Si zòt ka fè sa, zòt pouvé sir ki nou Papa ki annan syèl-a ki plen ké lanmou ké kontan.