1. Kisa Jéova ka ankourajé so sèrvitèr-ya fè ? (gadé zimaj-a osi).

 POU kimoun nou pouvé alé palé lò nou bézwen roun moun konsolé nou ké gidé nou ? Nou tout konnèt répons-a. Nou pouvé priyè Jéova. É a li ki ka doumandé nou fè sa. I lé nou priyè souvan, « tout-tan » (1 Thess. 5:17). Nou pouvé palé ké li san problèm é doumandé li idé nou pou tout bagaj annan nou lavi (Prov. 3:5, 6). É lò Jéova ka bay bon bagaj i toujou ka bay roun lo ké roun patché, a pou sa i pa bay nou pyès limit pou nou priyè l’.

2. Kisa nou ké wè annan sa artik-a ?

² Lapriyè, a roun kado ki gen bokou valò pou nou. Mé ké tousa nou gen pou fè, détan sa pa fasil pou nou trapé tan pou nou priyè. Pitèt nou ka santi osi ki nou bézwen amélyoré fason nou ka priyè. Érèzman, nou ka jwenn roun patché ankourajman ké roun patché konsèy asou sa annan Labib-a. Annan sa artik-a, nou ké sèrvi èkzanp Jézi pou nou wè kouman nou pouvé pran tan pou nou priyè. Nou ké wè osi senk bagaj enpòrtan nou pouvé fè pou nou vin pi vayan annan fason nou ka priyè.

3. Kisa Jézi té savé asou fason Jéova ka wè lapriyè ?

³ Jézi té savé ki nou lapriyè gen bokou valò pou Jéova. Lontan anvan i vini asou latè-a, i té wè so Papa réponn lapriyè wonm ké fanm ki té fidèl. Parèkzanp Jézi té òbò so Papa lò i wè li réponn lapriyè Ann, David, Éli ké ròt sèrvitèr fidèl (1 Sam. 1:10, 11, 20 ; 1 Rois 19:4-6 ;  Ps. 32:5). A pou sa i ankourajé so disip priyè souvan épi ké lafwa (Mat. 7:7-11).

4. Kisa fason Jézi priyè ka anprann nou ?

⁴ Jézi bay so disip roun bon èkzanp : pannan tout so lavi asou latè-a i priyè souvan. Mé kou i té souvan okipé é i té toujou gen bokou moun ké li, i té divèt chwazi roun moman pou i té pouvé priyè (Marc 6:31, 45, 46). Roun jou, i lévé bònò pou i té pouvé priyè li rounso (Marc 1:35). Sa rivé li priyè tout lannwit pou i té pran roun désizyon enpòrtan (Luc 6:12, 13). É lannwit anvan i mouri, i priyè plizyèr fwa jis anvan i fè sa ki té pi rèd annan so misyon asou latè-a (Mat. 26:39, 42, 44).

5. Kouman nou pouvé imité Jézi ?

⁵ Èkzanp Jézi ka anprann nou ki menm si nou gen bokou bagaj pou fè, nou divèt pran tan pou nou priyè. Pitèt nou ké divèt lévé pi bònò ouben alé dronmi roun ti moso pita. Si nou ka fè sa, nou ké montré Jéova ki kado i fè nou-a gen valò pou nou. Jis jòdla, roun sò yé ka aplé Lynne ka sonjé sa i rousanti lò i anprann ki i té pouvé palé pou Jéova : « Lò mo anprann ki mo té pouvé priyè Jéova lò mo té lé, sa idé mo wè li kou mo pi bon zanmi. É sa bay mo anvi amélyoré fason mo ka priyè. » Kou Lynne, nou menm osi nou lé vin pi vayan annan fason nou ka priyè. Donk annou wè senk bagaj enpòrtan nou pouvé fè.

6. Dapré Révélation 4:10, 11, kisa Jéova mérité rousouvwè ?

⁶ Louwé Jéova. Annan roun vizyon, apot Jan wè 24 ansyen annan syèl-a ka adoré Jéova. Yé té ka louwé Bondjé é yé té ka di ki i « mérité […] rousouvwè laglwar ké lònò ké pwisans » (li Révélation 4:10, 11). I gen roun patché bagaj ki ka fè zanj fidèl-ya osi louwé Jéova é bay li lònò. Yé annan syèl-a ké li é yé anprann konnèt li byen. Yé ka wè so bèl kalité annan sa i ka fè. É Lò yé ka wè kouman Jéova ka aji, sa ka pousé yé louwé li (Job 38:4-7).

7. Pou ki bagaj nou pouvé louwé Jéova ?

 ⁷ Nou menm osi nou lé louwé Jéova lò nou ka priyè : nou lé di li sa nou kontan ké li. Lò to ka li é lò to ka étidyé Labib-a, éséyé wè bèl kalité Jéova gen. Kilès annan sa kalité-ya to pi kontan ? (Job 37:23 ; Rom. 11:33). Apré sa, di Jéova poukisa to kontan sa kalité-ya. Nou pouvé louwé Jéova osi pou sa i ka fè pou nou ké sa i ka fè pou tout nou frè ké sò-ya. I toujou ka pran swen di nou é i toujou ka protéjé nou (1 Sam. 1:27 ; 2:1, 2).

8. Pou ki bagaj nou pouvé di Jéova mèrsi ? (1 Thessaloniciens 5:18).

⁸ Di Jéova mèrsi. Nou pa ké janmen fini di Jéova mèrsi pou tousa i ka bay nou (li 1 Thessaloniciens 5:18). Nou pouvé di li mèrsi pou tout bon bagaj nou gen paské « tout bèl bagaj [...] ka soti di laro », sa lé di ki a li ki ka bay nou sa (Jacq. 1:17). Parèkzanp, nou pouvé di li mèrsi pou latè-a ki bèl toubonnman, pou tout bèl bagaj i kréyé, pou lavi i ka bay nou, pou nou fanmi, nou zanmi é pou bèl èspwar i ka bay nou. É a pa pou nou bliyé di li mèrsi paské i ka pèrmèt nou sa so zanmi.

9. Poukisa nou ké pitèt divèt fè roun éfòr èspésyal pou nou kontinyé chaché gen rékonésans pou tousa Jéova fè pou nou ?

⁹ Pitèt nou ké bézwen fè roun éfòr èspésyal pou nou sonjé pou ki bagaj nou menm nou divèt di Jéova mèrsi. Poukisa ? Paské nou ka viv annan roun monn koté moun-yan pa kontan di mèrsi. Pasé yé chaché kouman yé pouvé di mèrsi pou sa yé gen, moun-yan ka chaché kouman yé pouvé gen sa yé lé. Si nou ka lésé yé détenn asou nou, pitèt nou ké fè yenki doumandé bagaj annan nou lapriyè. Pou sa pa rivé nou, annou kontinyé chaché gen rékonésans épi di Jéova mèrsi pou tousa i fè pou nou (Luc 6:45).

10. Kouman rékonésans-a idé roun sò tchenbé ? (gadé zimaj-a osi).

¹⁰ Si nou abitchwé gen rékonésans, sa pouvé idé nou tchenbé lò nou annan problèm. Sa ki rivé Kyung-sook ka byen montré sa. Nou ka jwenn so istwè annan La Tour de Garde 15 janvyé 2015. Yé wè ki i té gen roun kansèr annan so poumon ki té ja byen avansé. Men sa i ka di : « Sa mété mo atè nèt ! A té kousidiré mo té pédi tout bagaj. É mo té pè. » Kisa ki idé li tchenbé ? I ka di ki touléjou, anvan i alé dronmi, i té ka alé asou so téras laro so twa é i té ka priyè tou fò. I té ka di Bondjé mèrsi pou senk bagaj pou sa jou-a. Sa idé li mwens pè é sa pousé li montré so lanmou pou Jéova. I wè kouman Jéova ka idé so sèrvitèr-ya  ki fidèl lò yé annan roun sitiasyon ki difisil. É i randé so kò kont ki nou gen plis bénédiksyon pasé nou gen problèm annan nou lavi. Kou Kyung-sook, nou gen roun patché rézon pou nou di Jéova mèrsi menm si nou an mitan roun problèm. Lò nou ka priyè pou di li mèrsi, sa pouvé idé nou tchenbé épi rété kalm.

11. Poukisa disip Jézi té bézwen kouraj apré Jézi routounen annan syèl-a ?

¹¹ Doumandé Jéova bay to kouraj pou to préché. Anvan i routounen annan syèl-a, Jézi fè so disip sonjé ki yé té divèt bay roun témwanyaj asou li « annan Jérizalèm, annan tout Jidé ké Samari, é jik annan koté ki pi lwen asou latè-a » (Actes 1:8 ; Luc 24:46-48). Mé roun ti moso tan apré, chèf rélijyé jwif-ya arété apot Pyèr ké Jan, é yé mennen yé douvan Sanédren-an. Yé di yé arété préché é yé jis ménasé yé (Actes 4:18, 21). Kouman sa mouché-ya ki té fidèl réyaji ?

12. Dapré Actes 4:29, 31, kisa disip-ya fè ?

¹² Lò chèf rélijyé jwif-ya ménasé yé, Pyèr ké Jan réponn : « A zòt ki pou di si, pou Bondjé, sa bon pou nou kouté zòt pasé nou kouté Bondjé. Mé nou menm, nou pa pouvé arété palé di sa nou wè ké sa nou tandé » (Actes 4:19, 20). Lò yé libéré Pyèr ké Jan, yé ké ròt disip-ya priyè Jéova é yé di li ki yé té lé fè so volonté. Yé doumandé li : « Pèrmèt to èsklav-ya kontinyé di to paròl san nou pa pè menm. » Jéova réponn yé lapriyè ki té ka soti di yé tchò (li Actes 4:29, 31).

13. Kisa èkzanp Jin-hyuk ka anprann nou ?

¹³ Nou pouvé imité disip-ya annan 1^é syèk-a si nou ka kontinyé préché menm lò gouvèrnman-an koté nou fika ka défann nou fè l’. Annou palé di Jin-hyuk, roun frè yé mété lajòl paské i pa té lé fè sèrvis militèr-a. Lò i té lajòl, yé doumandé li okipé di roun ran prizonyé yé té fronmen yé rounso. Mé i pa té gen drwa palé yé di Labib-a. Lò i té pou palé ké yé, a té sèlman parapòrta sa yé té bézwen. Alòr, i doumandé Jéova bay li kouraj pou i té pouvé préché chak kou i té ké pouvé fè l’ é pou i idé li panga lò i té ké fè l’ (Actes 5:29). I ka di : « Jéova réponn mo lapriyè, i bay mo kouraj ké sajès. A konsa mo rivé étidyé Labib-a ké roun patché prizonyé douvan lapòt yé sélil pannan senk minit. Épi lannwit, mo té ka ékri lèt pou bay yé landimen-an. » Kou Jin-hyuk, nou pouvé sir ki Jéova ké idé nou préché, é a pa pou nou pè doumandé li bay nou kouraj ké sajès.

14. Kisa ki ké bay nou fòrs si nou ka jwenn problèm ? (Psaume 37:3, 5).

¹⁴ Doumandé Jéova idé to tchenbé lò to annan problèm. Roun patché annan nou ka soufri paské nou malad ouben akoz di sa nou ka rousanti annan nou tchò, paské nou pédi roun moun nou kontan, nou gen problèm annan nou fanmi, akoz di pèrsékisyon-an, ouben ròt problèm ankò. É anplis di sa, pandémi ké lagèr ka fè ki sa ankò pi difisil pou sipòrté sa problèm-yan. Kisa to pouvé fè atò ? Louvri to tchò pou Jéova, di li annan ki sitiasyon to fika,  kou to té ké fè l’ ké roun zanmi. É to pouvé sir ki Jéova « ké idé to » (li Psaume 37:3, 5).

15. Kouman lapriyè pouvé idé nou « tchenbé rèd annan éprèv-ya » ? Bay roun èkzanp.

¹⁵ Si nou ka kontinyé priyè, sa ké idé nou « tchenbé rèd annan éprèv-ya » (Rom. 12:12). Jéova savé anba ki problèm so sèrvitèr-ya ka pasé ; « i ka tandé lò yé ka doumandé l’ idé yé » (Ps. 145:18, 19). Roun sò pyonyé yé ka aplé Kristie é ki gen 29 lannen, wè ki a vré. Rounsèl kou konsa i koumansé malad. Akoz di sa, i fè roun gro déprésyon. Apré sa, i anprann ki so manman té malad, é ki i té ké mouri. Kristie ka di : « Mo té ka sipliyé Jéova bay mo fòrs mo té bézwen chak jou. É mo té ka éséyé kontinyé swiv mo program pou adoré l’ : mo té ka kontinyé alé annan réinyon-yan épi étidyé mo rounso. » I ka di dèyè sa : « Lapriyè idé mo tchenbé lò bèt-a té rèd menm. Mo té savé ki Jéova té toujou la pou mo. É kou mo té savé sa, sa té ka idé mo santi mo kò pi byen. Menm si a pa lanmenm mo géri, Jéova réponn mo lapriyè. I pèrmèt mo gen lapè annan mo tchò. » Annou pa janmen bliyé ki « Jéova konnèt kouman pou i libéré sa-ya ki kontan li é ki annan éprèv » (2 Pierre 2:9).

16. Poukisa nou bézwen Jéova idé nou pou nou rivé tchenbé douvan tantasyon-an ?

¹⁶ Doumandé Jéova idé to pou to tchenbé douvan tantasyon-an. Kou nou pa parfè, a tout tan pou nou briga pou nou pa fè mové bagaj. Anplis di sa, Satan ka fè tousa i pouvé pou sa toujou pi rèd pou nou briga. Parèkzanp, i ka sèrvi anmizman ki pa pròp pou plen nou tèt ké vyé lidé, sa lé di dé lidé ki ka fè nou vin sal douvan Bondjé é ki pouvé fè  nou fè roun péché ki grav (Marc 7:21-23 ; Jacq. 1:14, 15).

17. Apré nou doumandé Jéova idé nou, kisa nou divèt fè pou nou tchenbé douvan tantasyon-an ? (gadé zimaj-a osi).

¹⁷ Si nou pa lé fè sa ki pa bon, nou bézwen Jéova idé nou. Annan lapriyè Jézi anprann so disip, men sa i di nou doumandé : « Pa fè nou antré an tantasyon, mé libéré nou di méchan-an » (Mat. 6:13). Jéova lé idé nou, mé a pou nou doumandé li idé nou. Apré sa, sa nou ka fè divèt alé annan menm sans ké nou lapriyè. Annou fè tousa nou pouvé pou nou pa li é pou nou pa kouté mové lidé ki ka kouri toupatou annan monn Satan-an (Ps. 97:10). Annou li ké étidyé Labib-a pou nou plen nou lèspri ké bon bagaj. Épi annou alé annan réinyon-yan é annou préché ; sa ké idé nou osi protéjé nou lèspri. Si nou ka fè sa, Jéova ka promèt nou ki nou pa ké tanté plis ki sa nou pouvé sipòrté (1 Cor. 10:12, 13).

18. Annan zafè lapriyè, kisa nou tout bézwen fè ?

¹⁸ Pou nou rété fidèl douvan Jéova pannan sa dèrnyé jou-ya ki rèd, nou tout bézwen priyè plis ki sa nou gen labitid priyè. Chak jou, chwazi roun moman pou to priyè Jéova ké tout to tchò. I lé to ‘di li tousa to gen ofon to tchò’ (Ps. 62:8). Louwé li é di li mèrsi pou tousa i ka fè. Doumandé li bay to kouraj pou to préché. Sipliyé l’ idé to lò to ka jwenn problèm é pou to tchenbé douvan tantasyon-yan. Pa lésé anyen ni pyès moun anpéché to priyè l’ souvan. Mé kouman Jéova ka réponn nou lapriyè ? Nou ké réponn sa késyon enpòrtan-an annan artik ki ka vin dèyè-a.