ARTIK POU ÉTIDYÉ 45
Jéova ka idé nou kontinyé préché
« Yé ké savé ki roun profèt té la an mitan yé » (ÉZÉCH. 2:5).
KANTIK 67 « Préché paròl Bondjé-a »
KOUTWÉY ASOU SA NOU KÉ WÈ a
1. Kisa nou savé nou ké jwenn, mé di kisa nou pouvé sir ?
NOU savé ki roun ran moun ké éséyé anpéché nou préché. Dimen sa ké pitèt rivé vin pi rèd ankò (Dan. 11:44 ; 2 Tim 3:12 ; Rév. 16:21). Mé nou sir ki Jéova ké idé nou. Poukisa ? Paské Jéova toujou idé so sèrvitèr pou yé fè travay i té ka bay yé fè-a, menm si sa travay-a té pouvé rèd. Annou pran roun èkzanp ki ka montré nou sa. Nou ké wè plizyèr bagaj ki rivé profèt Ézékyèl ki préché pou Jwif-ya yé té mennen Babilòn.
2. Ézékyèl té divèt préché pou jwif-ya ki té Babilòn. Kisa Jéova di asou yé, é kisa nou ké wè annan sa artik-a ? (Ézéchiel 2:3-6).
2 Pou ki kalité moun Ézékyèl té divèt préché ? Jéova di ki sa moun-yan ‘té tounen yé do bay li’ é ki ‘yé tèt té rèd’. I di ki yé té kou « pikan » é yé té kou « èskòrpyon », paské yé té ka fè moun méchansté é yé té danjéré. A pou sa Jéova di Ézékyèl plizyèr fwa : « A pa pou to pè ! » (li Ézéchiel 2:3-6). Si Ézékyèl rivé préché kou Bondjé té doumandé li fè, a paské 1) a Jéova ki té voyé li, 2) so lèspri bay li fòrs i té bézwen-an, é 3) so paròl fè so lafwa vin pi fò. Kouman sa trwa bagaj-ya idé Ézékyèl é kouman yé ka idé nou jòdla ?
A JÉOVA KI TÉ KA VOYÉ ÉZÉKYÈL
3. Ki paròl divèt bay Ézékyèl fòrs, é kouman Jéova fè li konprann ki i té ké soutni li ?
3 Jéova di Ézékyèl : « Mo ka voyé to » (Ézéch. 2:3, 4). Sa paròl-ya divèt bay Ézékyèl fòrs. Poukisa ? Paské i dèt sonjé ki a près menm bagaj-ya Jéova té di lò i chwazi Moyiz ké Izayi pou yé divini so profèt (Ex. 3:10 ; Is. 6:8). I té savé osi ki Jéova té idé sa dé profèt-ya fè bagaj ki té rèd. Donk lò Jéova di li dé fwa : « Mo ka voyé to », profèt-a té blijé gen konfyans ki Jéova té ké soutni li. Anplis di sa, nou ka jwenn sa paròl-ya plizyèr fwa annan liv Ézéchiel : « Jéova palé pou mo » (Ézéch. 3:16 ). É plizyèr fwa i ékri : « Jéova palé pou mo ankò » (Ézéch. 6:1). Ézékyèl té sir ki a té Jéova ki té voyé li. Épi osi, kou i té sa pitit roun prèt, so papa dèt di li ki Jéova toujou promèt so profèt-ya ki i té ké soutni yé. Jéova té di Izaak, Jakòb ké Jérémi : « Mo la ké to » (Gen. 26:24 ; 28:15 ; Jér. 1:8).
4. Ki paròl divèt bay Ézékyèl fòrs ?
4 Kouman près tout Israyélit-ya té ké réyaji lò Ézékyèl té ké préché pou yé ? Jéova di : « Pèp Israyèl-a ké réfizé kouté to, paské yé pa lé kouté mo » (Ézéch. 3:7). Lò yé té ka réfizé kouté Ézékyèl, a Jéova yé té ka réfizé kouté. Sa paròl-ya rasiré Ézékyèl : i pa té mal fè so travay ! Jéova rasiré Ézékyèl osi pou rounòt bagaj : lò jijman i té anonsé-a té ké fèt, moun-yan té ké « savé ki roun profèt té la an mitan yé » (Ézéch. 2:5 ; 33:33). Nou pouvé sir ki sa paròl-ya bay Ézékyèl fòrs i té bézwen-an pou kontinyé fè so travay profèt.
A JÉOVA KI KA VOYÉ NOU
Kou Ézékyèl, détan nou ka jwenn moun ki pa mélé ké nou, ouben ki lé baré nou chimen, mé nou savé ki Jéova la ké nou (gadé paragraf 5-6).
5. Dapré Isaïe 44:8, kisa ki ka bay nou fòrs ?
5 Nou menm osi, kou nou savé ki a Jéova ki ka voyé nou, sa ka bay nou fòrs. Jéova ka bay nou valò, i ka aplé nou ‘so témwen’ (Is. 43:10). A pa ti lònò i ka bay nou ! Menm fason Jéova di Ézékyèl : « A pa pou to pè ! », Jéova ka di nou : « A pa pou zòt pè ». Poukisa nou pa bézwen pè nou lèlmi ? Paské, kou Ézékyèl, a Jéova ki ka voyé nou é i ka protéjé nou (li Isaïe 44:8).
6. a) Kisa Jéova ka di nou pou nou sir ki i ka soutni nou ? b) Kisa ki ka rasiré nou é ka bay nou fòrs ?
6 Jéova ka promèt nou ki i ké soutni nou. Parèkzanp, anvan Jéova di : « Zòt sa mo témwen », i di : « Lò to ké janbé dlo-ya, mo ké la ké to, é flèv-ya pa ké kouvri to. Lò to ké maché an mitan difé, i pa ké boulé to, é flanm difé-ya pa ké rousi to lapo » (Is. 43:2). Lò nou ka préché nou pouvé jwenn problèm ki pouvé kouvri nou kou gro dlo ouben ki rèd kousidiré a difé. Mé gras a Jéova, nou ka kontinyé préché (Is. 41:13). Kou annan lépòk Ézékyèl, jòdla, bokou moun pa lé kouté nou mésaj. Mé nou pa ka bliyé ki menm si yé pa lé kouté nou, sa pa lé di ki nou pa adòk pou préché. Sa ka bay nou fòrs lò nou ka sonjé ki Jéova kontan lò nou ka kontinyé préché so mésaj ké fidélité. Apot Pòl di : « Yé chak ké gen yépa rékonpans dapré travay yé fè-a » (1 Cor. 3:8 ; 4:1, 2). Roun sò ki pyonyé dipi lontan ka di : « Mo tchò kontan paské mo savé ki sa Jéova ka rékonpansé, a éfòr nou ka fè. »
LÈSPRI BONDJÉ BAY ÉZÉKYÈL FÒRS I TÉ BÉZWEN-AN
Annan roun vizyon, Ézékyèl ka wè char Jéova-a ki annan syèl-a ; sa ka fè li plis sir ankò ki Jéova ké idé li kontinyé préché (gadé paragraf 7).
7. Chak kou Ézékyèl té ka réfléchi asou vizyon i té wè-a, kisa sa té ka fè l’ ? (gadé zimaj-a anlè prémyé paj-a).
7 Ézékyèl wè kouman lèspri sen Bondjé-a pwisan. Annan roun vizyon, i wè lèspri sen-an aji asou zanj-ya ki pwisan é asou gro papa rou char-a ki annan syèl-a (Ézéch. 1:20, 21). Kouman Ézékyèl réyaji ? I ékri sa ki rivé li : « Lò mo wè l’, mo tonbé atè, mo tèt kroubé. » Afòrs Ézékyèl rété èstébékwé, i tonbé atè (Ézéch. 1:28). Pita, chak kou Ézékyèl sonjé sa vizyon-an, sa dèt fè li plis sir ki gras a lèspri Bondjé i té pouvé kontinyé préché.
8-9. a) Kouman lòrd Jéova bay Ézékyèl aji asou li ? b) Kisa Jéova fè pou bay Ézékyèl plis fòrs ankò pou i préché annan so téritwar ki pa té fasil ?
8 Jéova di Ézékyèl : « Pitit wonm-an, dibout pou mo palé ké to. » Sa lòrd-a, ké lèspri sen Bondjé, bay Ézékyèl fòrs i té bézwen pou lévé asou so dé pyé. Men sa i ékri : « Lèspri Bondjé antré anlè mo é i fè mo dibout asou mo dé pyé » (Ézéch. 2:1, 2). Pita é pannan tout tan i préché, « lanmen » Bondjé, sa lé di lèspri sen Bondjé-a, gidé li (Ézéch. 3:22 ; 8:1 ; 33:22 ; 37:1 ; 40:1). Sa lèspri-a bay li fòrs pou travay i té divèt fè-a : préché pou sa-ya ‘yé tèt té rèd’ ké sa-ya ‘yé tchò pa té lé kouté’ (Ézéch. 3:7). Jéova di Ézékyèl : « Mo fè to vizaj vin rèd kou yépa, é mo fè to fron vin rèd kou yépa. Mo fè to fron vin kou roun djanman, pi rèd pasé silèks. […] A pa pou to pè yé, é a pa pou yé vizaj fè to pè » (Ézéch. 3:8, 9). A kousidiré Jéova té ka di Ézékyèl : « Pa lésé sa pèp-a ké so tèt rèd dékourajé to. Mo ké bay to fòrs. »
9 Apré sa, lèspri Bondjé-a mennen Ézékyèl koté i té divèt préché. Ézékyèl ékri : « Pwisans Jéova-a aji fò asou mo ». Sa pran profèt-a roun simenn pou i anprann é pou i konprann mésaj i té divèt préché-a (Ézéch. 3:14, 15). Épi Jéova fè li alé annan roun koté, épi « lèspri antré anlè [l’] » (Ézéch. 3:23, 24). Ézékyèl té paré pou koumansé préché.
LÈSPRI BONDJÉ KA BAY NOU FÒRS
Kou Ézékyèl, kisa ki ka idé nou jòdla pou nou kontinyé préché ? (gadé paragraf 10).
10. Kisa nou bézwen pou nou rivé préché, é poukisa ?
10 Kisa nou bézwen pou nou rivé préché ? Sonjé sa ki rivé Ézékyèl. Anvan i koumansé préché, lèspri Bondjé bay li fòrs i té bézwen-an. Jòdla, a menm bagaj-a, a gras a lèspri sen Bondjé rounso nou pouvé préché. Poukisa ? Paské Satan ka briga ké nou pou fè nou arété préché (Rév. 12:17). Bokou moun ka pansé ki Satan tro fò pou nou ganyen asou li. Mé lò nou ka préché, a ganyen nou ka ganyen asou li (Rév. 12:9-11). Kouman ? Lò nou ka préché nou ka montré ki Satan pa ka fè nou pè. Chak kou nou ka préché, i ka pédi. Donk, lò nou ka wè ki nou ka rivé préché magré tousa nou lèlmi ka fè pou baré nou chimen, kisa sa ka montré nou ? Sa ka montré nou ki Jéova ka bay nou fòrs gras a so lèspri sen é ki nou ka fè l’ plézi (Mat. 5:10-12 ; 1 Pierre 4:14).
11. Kisa lèspri Bondjé ké pèrmèt nou fè, é kisa nou divèt fè pou nou kontinyé rousouvwè sa lèspri sen-an ?
11 Ki ròt bagaj nou ka anprann lò nou ka sonjé ki Jéova bay Ézékyèl fòrs i té bézwen-an pou i préché ? Lèspri Bondjé pouvé bay nou fòrs nou bézwen pou nou tchenbé annan nenpòrt ki éprèv (2 Cor. 4:7-9). Atò, kisa nou divèt fè pou nou kontinyé rousouvwè sa lèspri sen-an ? Nou divèt priyè pou sa toulong é nou divèt sir ki Jéova ké tandé nou lapriyè. Men sa Jézi ansényé nou : « Kontinyé doumandé […]. Kontinyé chaché […]. Kontinyé konyen […]. » A pou nou sir ki Jéova ké « bay sa-ya ki ka doumandé l’ lèspri sen » (Luc 11:9, 13 ; Actes 1:14 ; 2:4).
PARÒL BONDJÉ-A FÈ LAFWA ÉZÉKYÈL VIN PI FÒ
12. Dapré Ézéchiel 2:9 – 3:3, koté roulo-a té ka soti é kisa i té gen annan l’ ?
12 Lèspri Bondjé bay Ézékyèl kouraj i té bézwen pou i préché. Anplis di sa, paròl Bondjé-a fè so lafwa vin pi fò. Annan roun vizyon, Ézékyèl wè roun lanmen ki té ka tchenbé roun roulo (li Ézéchiel 2:9 – 3:3). Ki koté roulo-a té ka soti ? Kisa i té gen annan l’ ? Kouman i fè lafwa Ézékyèl vin pi fò ? Roulo-a té ka vini di tronn Bondjé-a. Pitèt a roun annan kat zanj-ya Ézékyèl té wè anvan Jéova sèrvi pou bay li roulo-a. (Ézéch. 1:8 ; 10:7, 20). Annan roulo-a, i té gen paròl Bondjé-a. A té roun mésaj jijman Ézékyèl té divèt bay prizonyé-ya ki té tounen yé do bay Jéova. Sa mésaj-a té long (Ézéch. 2:7). I té ékri douvan ké dèyè roulo-a.
13. Kisa Jéova doumandé Ézékyèl fè ké roulo-a é poukisa Ézékyèl trouvé ki i té dous ?
13 Jéova doumandé so profèt manjé roulo-a pou i ‘plen so vant’ ké li. Ézékyèl obéyi, i manjé tout roulo-a. Kisa sa parti annan vizyon-an té lé di ? Ézékyèl té divèt byen konprann mésaj i té gen pou bay-a. I té divèt krè annan sa mésaj-a pou sa bay li balan pou i préché l’. Apré sa, roun bagaj i pa té ka antann rivé. Ézékyèl wè ki roulo-a té « dous kou myèl » (Ézéch. 3:3). Poukisa ? Paské pou Ézékyèl, réprézanté Jéova, a té roun bèl lònò. Sa èspéryans-a té « dous », agréyab (Ps. 19:8-11). I té kontan Jéova té chwazi li pou i té sa so profèt, paské sa té ka montré ki i té ka fè li plézi.
14. Kisa ki idé Ézékyèl pou i té paré pou préché ?
14 Pita, Jéova di Ézékyèl : « Kouté tousa mo ké di to épi tchenbé sa annan to tchò » (Ézéch. 3:10). I té ka doumandé Ézékyèl tchenbé sa ki té ékri asou roulo-a annan so tèt épi réfléchi asou l’. Konsa, so lafwa vin pi fò é i té ké gen roun mésaj pwisan pou bay jwif-ya ki té prizonyé Babilòn (Ézéch. 3:11). Ké mésaj Bondjé-a asou so tchò ké asou so bouch, i té ké paré pou koumansé préché épi kontinyé fè l’ jiska lafen (gadé Psaume 19:14).
JÉOVA KA FÈ NOU LAFWA VIN PI FÒ
15. Pou nou rivé kontinyé préché, kisa nou divèt ‘tchenbé annan nou tchò’ ?
15 Pou nou rivé kontinyé préché, nou osi nou divèt lésé paròl Bondjé-a kontinyé fè nou lafwa vin pi fò. Nou divèt tchenbé sa Jéova ka di nou annan nou tchò. Jòdla, Jéova ka palé ké nou gras a so Paròl Labib-a. Mé kisa nou divèt fè pou paròl Bondjé-a kontinyé aji asou fason nou ka réfléchi, asou sa nou ka rousanti ké asou sa nou anvi fè ?
16. Kisa nou divèt fè ké Paròl Bondjé-a é kouman nou pouvé byen konprann li ?
16 Lò nou ka manjé é lò nou ka dijéré manjé-a, nou kò ka vin pi fò. É lò nou ka étidyé Paròl Bondjé-a é lò nou ka réfléchi asou l’, nou lafwa ka vin pi fò. A sa léson-an Jéova lé nou anprann. I lé nou « plen [nou] vant » ké so Paròl. Sa lé di ki i lé ki nou byen konprann li. Pou fè sa, nou divèt priyè, li Labib-a épi pran tan réfléchi asou l’. Pou koumansé, a pou nou priyè pou fason Jéova ka pansé antré annan nou tchò. Apré sa, a pou nou li plizyèr vèrsé annan Labib-a. Épi pou fini, a pou nou pran tan pou réfléchi asou sa nou li-a. Kisa ki ké rivé ? Pi nou ké réfléchi asou Paròl Bondjé-a, pi nou ké konprann li é sa ké fè nou lafwa vin pi fò.
17. Poukisa sa enpòrtan pou nou réfléchi asou sa nou ka li annan Labib-a ?
17 Poukisa sa enpòrtan pou nou li Labib-a é pou nou pran tan réfléchi asou l’ ? Paské sa ka bay nou fòrs pou nou préché mésaj Rwayonm-an jòdla, épi titalò sa ké bay nou fòrs lò nou ké pitèt gen pou préché roun mésaj jijman ki ké fò menm ! Épi osi, lò nou ka pran tan réfléchi asou bèl kalité Jéova gen, sa ka fè nou vini pi pròch di li. A konsa nou ké rousanti roun bagaj ki « dous » ké agréyab : lajwa ké lapè annan nou tchò ! (Ps. 119:103).
NOU BYEN DÉSIDÉ TCHENBÉ
18. Kisa moun-yan ké divèt rékonnèt ?
18 Nou pa profèt kou Ézékyèl, mé nou byen désidé kontinyé préché mésaj Jéova-a ki annan so Paròl jiktan i désidé prédikasyon-an fini. Lò lèr-a ké rivé pou Bondjé jijé moun-yan, yé pa ké pouvé di ki Bondjé pa avèrti yé ouben ki i pa gadé pou yé (Ézéch. 3:19 ; 18:23). Yé ké pito gen pou rékonnèt ki mésaj nou ka préché-a ka vini di Bondjé.
19. Kisa ki ké bay nou fòrs pou nou kontinyé préché ?
19 Kisa ki ké bay nou fòrs pou nou kontinyé préché ? Sa menm trwa bagaj-ya ki idé Ézékyèl. Nou ka kontinyé préché paské nou savé ki a Jéova ki ka voyé nou, paské so lèspri ka bay nou fòrs nou bézwen-an, é paské paròl Bondjé-a ka fè nou lafwa vin pi fò. Kou nou savé ki Jéova òbò nou, annou byen désidé kontinyé préché é tchenbé « jouktan lafen-an rivé » ! (Mat. 24:13).
KANTIK 65 Va, progresse !
a Annan sa artik-a, nou ké wè trwa bagaj ki idé profèt Ézékyèl kontinyé travay prédikasyon Bondjé té bay li fè-a. Nou ké gadé kouman Jéova idé so profèt, é sa ké idé nou plis sir ankò ki Jéova ké idé nou préché.