ARTIK POU ÉTIDYÉ 48
Kontinyé byen réfléchi lò sa rèd pou to rété fidèl
« Kontinyé byen réfléchi annan tout sitiasyon » (2 TIM. 4:5).
KANTIK 123 Fidèlement soumis à l’ordre théocratique
KOUTWÉY ASOU SA NOU KÉ WÈ a
1. Kisa sa lé di « kontinyé byen réfléchi » ? (2 Timothée 4:5).
LÒ SÈRTEN bagaj ka rivé nou é ka dékourajé nou, sa pouvé fè nou pédi nou fidélité pou Jéova ké so òrganizasyon. Kisa nou pouvé fè annan sa kalité sitiasyon-yan ? Nou divèt kontinyé byen réfléchi, nou pa divèt dronmi. A sa ki ké idé nou tchenbé rèd annan lafwa (li 2 Timothée 4:5). Nou divèt rété kalm, gardé nou lidé byen klè, é éséyé wè bagaj-ya kou Jéova ka wè yé. Si nou ka fè sa, nou pa ké lésé sa nou ka rousanti anpéché nou byen réfléchi.
2. Kisa nou ké wè annan sa artik-a ?
2 Annan artik nou fin wè-a, nou palé di trwa problèm nou pouvé jwenn andèrò asanblé-a. Annan sa artik-a, nou ké wè trwa problèm ki pouvé rivé nou annan asanblé-a : 1) lò, pou nou, roun frè ouben roun sò fè nou roun bagaj ki pa jis, 2) lò Jéova ka rouprann nou é 3) lò nou pa ka rivé asèpté chanjman ki ka fèt annan òrganizasyon-an. Lò nou annan sa kalité sitiasyon-yan, kouman nou pouvé kontinyé byen réfléchi épi kontinyé soutni Jéova ké so òrganizasyon ?
LÒ, POU NOU, ROUN FRÈ OUBEN ROUN SÒ FÈ NOU ROUN BAGAJ KI PA JIS
3. Kouman nou pouvé réyaji si, pou nou, roun frè ouben roun sò fè nou roun bagaj ki pa jis ?
3 Ès sa ja rivé to pansé ki roun frè ouben roun sò fè to roun bagaj ki pa jis, pitèt menm a té roun frè ki té gen rèsponsabilité, roun ansyen parèkzanp ? A pa lé frè-a té lé fè to lapenn (Rom. 3:23 ; Jacq. 3:2). Mé sa i fè-a kasé to dé bra. Pitèt afòrs to té ka sonjé sa bagaj-a, to pa menm rivé dronmi. Pitèt menm to jis doumandé to kò : « Si roun frè pouvé aji konsa, ès a vréman òrganizasyon Bondjé-a » ? A konsa Satan té ké lé nou réyaji (2 Cor. 2:11). Si nou ka réfléchi konsa, sa pouvé fè nou lésé Jéova ké so òrganizasyon. Donk, si pou nou, roun frè ouben roun sò fè nou roun bagaj ki pa jis, kouman nou pouvé kontinyé byen réfléchi épi pa gen pyès mové lidé ki danjéré pou nou ?
4. Kouman Jozèf kontinyé byen réfléchi lò yé té ka fè li méchansté, é kisa so èkzanp ka anprann nou ? (Genèse 50:19-21).
4 Pa rété faché. Lò Jozèf té sa roun jennjan, so frè fè li méchansté. Yé té rayi l’ é i jis gen roun ran annan yé ki té lé tchwé l’ (Gen. 37:4, 18-22). Finalman, yé vandé l’. I divini roun èsklav. A konsa i tonbé annan roun patché éprèv pannan apéprè trèz lannen. I té pouvé doumandé so kò si Jéova té kontan l’ vré, é i té pouvé krè ki Jéova té anbandonnen l’ lò i té bézwen li. Mé Jozèf pa faché. Pasé i fè sa, i kontinyé byen réfléchi. I rété kalm. Lò i té pouvé vanjé so kò asou so frè, i pa fè l’. I pito aji ké lanmou ké yé é i pardonnen yé (Gen. 45:4, 5). Jozèf aji konsa paské i té ka byen réfléchi. I pa té ka sonjé so problèm rounso, i té ka sonjé tousa Jéova té prévwè (li Genèse 50:19-21).Kisa sa ka anprann nou ? Si yé ka fè to méchansté, pa faché ké Jéova, é pa di annan to tchò ki i anbandonnen to. Réfléchi asou tousa i ka fè pou idé to tchenbé. Anplis di sa, sonjé ki « lanmou ka kouvri roun patché péché » épi pardonnen sa-ya ki fè to lapenn (1 Pierre 4:8).
5. Kouman Miqueas kontinyé byen réfléchi lò yé té ké di ki yé té ka fè li méchansté ?
5 Annou wè sa ki rivé Miqueas b, roun ansyen ki ka rété an Amérik di Sid. I ka sonjé roun tan yé té ké di plizyèr ansyen té lé fè li méchansté. I ka di : « A té prémyé kou mo té ka santi mo kò konsa. Mo té pè. Lannwit, mo pa té ka rivé dronmi, é mo té ka pléré, paské mo pa té savé sa pou mo té fè. » Magré sa, Miqueas kontinyé byen réfléchi, épi i fè tousa i té pouvé pou kontrolé sa i té ka rousanti. I priyè souvan. I doumandé Jéova bay li so lèspri sen, ké fòrs pou i té pouvé tchenbé. I té ka chaché osi annan nou piblikasyon pou trapé bagaj ki té ké pouvé idé li. Kisa sa ka anprann nou ? Si to ka pansé ki roun frè ouben roun sò ka fè to roun méchansté, rété kalm, épi éséyé kontrolé mové bagaj to té ké pouvé rousanti. Pitèt to pa vréman savé poukisa sa moun-an palé konsa ouben aji konsa ké to. Donk, palé pou Jéova. Épi doumandé li idé to wè bagaj-ya kou moun-an ka wè yé. Si to ka fè sa, sa ké idé to asèpté ki frè-a ouben sò-a pa té lé fè to lapenn, é sa ké idé to pardonnen li (Prov. 19:11). Pa bliyé ki Jéova wè sa ki pasé, i savé sa to ka rousanti é i ké bay to fòrs pou to tchenbé (2 Chron. 16:9 ; Eccl. 5:8).
LÒ JÉOVA KA ROUPRANN NOU
6. Poukisa sa enpòrtan pou nou konprann ki Jéova ka korijé nou paské i kontan nou ? (Hébreux 12:5, 6, 11).
6 Lò yé ka rouprann nou, sa pouvé fè nou lapenn menm. Mé, si a sa sèlman nou ka wè, pitèt nou ké koumansé pansé ki sa yé fè pa té jis, ki yé pa té divèt rouprann nou ouben ki yé té tro rèd ké nou. Sa pouvé anpéché nou wè roun bagaj ki enpòrtan : si Jéova ka korijé nou, a paské i kontan nou (li Hébreux 12:5, 6, 11). Si nou ka lésé sa nou ka rousanti koumandé nou, Satan ké profité pou ataké nou. I pa lé nou kouté lò Jéova ka rouprann nou, é pi mové ankò, i lé nou lésé Jéova ké asanblé-a piti piti. Si Jéova rouprann to, kouman to pouvé kontinyé byen réfléchi ?
Pyèr asèpté konsèy ké disiplin i rousouvwè ké imilité ; sa pèrmèt li pi itil pou Jéova (gadé paragraf 7).
7. a) Kou nou ka wè l’ asou zimaj-a, kouman Jéova sèrvi Pyèr apré i asèpté disiplin-an ? b) Kisa èkzanp Pyèr ka anprann to ?
7 Asèpté Jéova rouprann to, é fè chanjman to divèt fè. A pa rounsèl kou Jézi korijé Pyèr douvan ròt apot-ya (Marc 8:33 ; Luc 22:31-34). Pyèr té divèt byen jennen ! Mé i pa janmen lésé Jézi. I asèpté disiplin-an é i éséyé pa roufè menm fot-ya. Apré sa, Jéova rékonpansé Pyèr pas i té fidèl é i bay li gro rèsponsabilité annan asanblé-a (Jean 21:15-17 ; Actes 10:24-33 ; 1 Pierre 1:1). Kisa èkzanp Pyèr ka anprann nou ? Nou ka anprann ki, si nou pa ka mété nou lidé asou zafè jennen-an akoz di disiplin-an, si nou ka asèpté yé korijé nou, é si nou ka fè chanjman nou divèt fè, nou ké jwenn roun patché bénédiksyon é ròt-ya osi. Anplis di sa, nou ké pi itil ankò pou Jéova ké pou nou frè ké sò-ya.
8-9. a) Lò yé tiré so rèsponsabilité ansyen, kisa Bernardo rousanti o koumansman ? b) Kisa ki idé Bernardo chanjé fason i té ka réfléchi-a ?
8 Annou palé di sa ki rivé Bernardo, roun frè ki ka rété o Mozanbik. I pédi so rèsponsabilité ansyen. Pou koumansé, kisa Bernardo rousanti ? I ka di : « Mo té faché, paské mo pa té kontan disiplin yé té bay mo-a. » Épi osi, i té pè sa ròt-ya annan asanblé-a té ké di. I ka rékonnèt : « Sa pran mo plizyèr mwa pou mo wè mo sitiasyon kou mo té divèt wè l’, é pou mo roufè Jéova ké so òrganizasyon konfyans. »
9 Kisa ki idé Bernardo chanjé fason i té ka wè bagaj-ya ? Men sa i ka di : « Lò mo té ansyen, mo té ka pran Hébreux 12:7 pou idé ròt-ya wè disiplin-an kou Jéova ka wè l’. Mé mo di annan mo tchò : “Kimoun ki bézwen apliké sa vèrsé-a ? Tout sèrvitèr Jéova, é mo menm osi mo annan !” » Apré sa, Bernardo chanjé déztrwa bagaj pou i fè Jéova ké so òrganizasyon plis konfyans. I pasé plis tan ka li Labib-a, é i pran tan byen réfléchi asou sa i té ka li-a. Menm si i té pè sa frè ké sò-ya té ka pansé di li toujou, i kontinyé préché ké yé, é i kontinyé bay répons pannan réinyon asanblé-a. Finalman, Bernardo roudivini ansyen. Si, kou Bernardo, Jéova rouprann to, asèpté disiplin-an épi fè chanjman to divèt fè menm si to jennen c (Prov. 8:33 ; 22:4). Si to ka fè sa, to pouvé sir ki Jéova ké rékonpansé to fidélité pou li ké so òrganizasyon.
LÒ NOU PA KA RIVÉ ASÈPTÉ CHANJMAN KI KA FÈT ANNAN ÒRGANIZASYON-AN
10. Ki chanjman pitèt fè roun ran mouché israyélit pédi yé fidélité ?
10 Lò chanjman ka fèt annan òrganizasyon Jéova-a, sa pouvé rèd pou nou rété fidèl. Si nou pa panga, nou pouvé lésé sa séparé nou di Jéova. Parèkzanp, annou gadé kouman bagaj-ya chanjé pou roun ran Israyélit lò yé vin gen Lalwa Bondjé té bay Moyiz. Anvan Jéova bay Lalwa-a, a chèf fanmi-ya ki té prèt pou yé fanmi. A yé ki té ka fè yé lotèl é yé té ka fè sakrifis pou Jéova pou yé fanmi (Gen. 8:20, 21 ; 12:7 ; 26:25 ; 35:1, 6, 7 ; Job 1:5). Mé lò Lalwa-a rivé, chèf fanmi-ya pa té gen drwa fè sa ankò. Jéova té chwazi prèt annan fanmi Aaron : a yé ki té pou fè sakrifis-ya aprézan. Apré sa chanjman-an, si roun chèf fanmi ki pa té roun pitit di pitit Aaron té ka désidé fè travay roun prèt, yé té pouvé tchwé l’ d (Lév. 17:3-6, 8, 9). Ès a sa chanjman-an ki fè Koré, Datan, Abiram ké 250 chèf-ya tounen yé do bay Moyiz ké Aaron ? (Nomb. 16:1-3). Nou pa savé si a pou sa yé fè sa. Mé nou savé ki yé pa rété fidèl douvan Jéova. Si sa rèd pou to rété fidèl akoz di roun chanjman ki ka fèt annan òrganizasyon Jéova-a, kisa to pouvé fè ?
Lò yé doumandé Kéyatit-ya chanjé travay yé té ka fè, yé asèpté : roun ran divini chantèr, ròt véyé lapòt vil-a, épi ròt ankò travay anna kaz-ya koté yé té ka mété provizyon-yan (gadé paragraf 11).
11. Kisa èkzanp roun ran Kéyatit ka anprann nou ?
11 Fè tousa to pouvé pou soutni chanjman ki ka fèt annan òrganizasyon-an. Lò pèp-a té ka maché annan dézèr-a, Lévit-ya ki té ka fè parti di fanmi Kéyatit-ya, té gen roun travay èspésyal pou fè. Chak fwa Israélit-ya té ka soti roun koté pou alé rounòt koté, roun ran Kéyatit té ka poté arch Alyans-a, é a yé ki té ka louvri chimen-an pou tout pèp-a (Nomb. 3:29, 31 ; 10:33 ; Jos. 3:2-4). Men roun bèl lònò ! Mé bagaj-ya chanjé lò Israélit-ya rivé annan Péyi Bondjé té promèt yé-a. Yé pa té bézwen monté désann ké Arch-a souvan ankò. A pou sa, lò Salomon divini rwa, roun ran Kéyatit divini chantèr, ròt té ka véyé lapòt vil-a é ròt ankò té ka okipé di kaz-ya koté yé té ka mété provizyon-yan (1 Chron. 6:31-33 ; 26:1, 24). I pa marké pyès koté annan Labib-a ki Kéyatit-ya plenn yé kò, ouben ki yé doumandé roun travay pi enpòrtan parapòrta sa yé té fè anvan. Kisa sa ka anprann nou ? To divèt soutni chanjman ki ka fèt annan òrganizasyon Jéova-a ké tout to tchò, menm lò menm lò sa chanjman-yan ka blijé to chanjé labitid to gen. A pou to kontan tout travay yé pouvé bay to fè. Sonjé ki to travay, a pa sa ki ka fè to gen valò douvan Jéova. Sa ki ka fè Jéova plézi, a to obéyisans, pasé pyès travay to pouvé fè (1 Sam. 15:22).
12. Kisa Zaina rousanti lò yé doumandé l’ lésé Bétèl-a ?
12 Annou palé di èkzanp Zaina, roun sò ki ka rété o Mwayennoryan ki pédi roun privilèj i té kontan bokou. Apré sò-a travay o Bétèl pannan pasé 23 lannen, yé doumandé l’ divini pyonyé èspésyal. Men sa i ka di : « Lò yé di mo sa, mo dé bra té kasé. Pou mo, mo té kou roun initil aprézan, é a toulong mo té la ka doumandé mo kò kisa mo té fè ki pa té bon. » Malérèzman, roun ran frè ké sò annan so asanblé fè li plis lapenn ankò lò yé di li : « Si to té ka byen travay annan Bétèl-a, to té ké laba toujou. » Pannan roun tan, tèlman Zaina té déprimé, i té ka pléré chak lannwit. Mé i di : « Mo pa janmen lésé mo kò alé ka douté di òrganizasyon-an ouben doumandé mo kò si Jéova kontan mo. » Kouman Zaina rivé kontinyé byen réfléchi ?
13. Kisa Zaina fè pou i pa tchenbé mové bagaj asou so tchò ?
13 Zaina rivé pa rété asou mové bagaj i té gen asou so tchò. Kouman i rivé fè sa ? I li plizyèr artik annan nou piblikasyon ki té ka palé di so sitiasyon. Artik « Vous pouvez vaincre le découragement ! », ki annan La Tour de Garde 1é févriyé 2001, idé l’ bokou. Sa artik-a ka èspliké kouman Mark, sa-la ki ékri lévanjil-a, pitèt rousanti menm bagaj-ya lò i té divèt chanjé sa i té ka fè. Men sa Zaina ka sonjé : « Èkzanp Mark té kou roun rémèd pou idé mo lò mo té dékourajé. » Épi osi, Zaina rété pròch di so zanmi. I pa rété annan so kwen, é i pa plenn so kò non plis. I konprann ki lèspri Jéova ka aji asou sa-ya ki ka pran désizyon annan so òrganizasyon é ki frè-ya ki rèsponsab té ka gadé pou li. Mé i konprann osi ki òrganizasyon Bondjé-a divèt fè sa ki pi bon pou travay Jéova fèt.
14. Ki chanjman annan òrganizasyon-an Vlado pa té ka rivé asèpté, é kisa ki idé li ?
14 Vlado, roun ansyen ki gen 73 lannen é ki ka rété Slovéni, pa té ka rivé asèpté chanjman ki fèt lò yé mété so asanblé ké rounòt asanblé ansanm, é lò yé désidé fronmen sal di Rwayonm-an koté i té gen labitid alé. Men sa i ka di : « Mo pa té ka konprann poukisa roun bèl sal di Rwayonm konsa té divèt fronmen. Mo té gen lapenn bokou paské nou té fin fè travo annan sa lasal-a. Mo ka travay bwa é a mo menm ki té fè plizyèr mèb annan lasal-a. Épi osi, kou yé té mété dé asanblé ansanm, i té gen roun patché chanjman pou fè ki pa té fasil pou nou ki ja gen laj… ». Kisa ki idé Vlado pou i soutni sa chanjman-yan ? Men sa i ka di : « Lò to ka adapté to kò ké chanjman òrganizasyon Jéova-a ka fè, sa toujou ka mennen bénédiksyon. Sa ka préparé nou pou pi gran chanjman ankò ki ké fèt titalò. » Ès yé mété to asanblé ansanm ké rounòt asanblé, ouben ès yé doumandé to chanjé sa to té ka fè ? Ès sa rèd pou to ? Si a sa ki ka rivé to, a pou to sir ki Jéova ka konprann sa to ka rousanti. Si to ka soutni sa chanjman-yan é si to ka kontinyé rété fidèl douvan Jéova ké òrganizasyon i ka sèrvi-a, to ké trapé bénédiksyon (Ps. 18:25).
KONTINYÉ BYEN RÉFLÉCHI ANNAN TOUT SITIASYON
15. Ki problèm pouvé rivé annan asanblé-a, é kouman nou pouvé kontinyé byen réfléchi annan sa sitiasyon-yan ?
15 Kou lafen sa monn-an ka vin plizanpli pròch, nou ké trapé problèm annan asanblé-a. Akoz di sa, sa pouvé rèd pou nou rété fidèl douvan Jéova. Donk, nou divèt kontinyé byen réfléchi. Si yé té ké di roun frè ouben roun sò fè to roun bagaj ki pa jis, pa lésé sa fè to divini yèg. Si Jéova rouprann to, a vré to ké jennen, mé pa rété asou sa, asèpté disiplin-an épi fè chanjman to divèt fè. É lò òrganizasyon-an ka fè chanjman ki ka blijé to chanjé fason to té ka fè, a pou to asèpté yé ké tout to tchò épi obéyi.
16. Kisa to pouvé fè pou to pa arété fè Jéova ké so òrganizasyon konfyans ?
16 To pouvé kontinyé fè Jéova ké so òrganizasyon konfyans lò sa rèd pou to rété fidèl. Mé pou to fè sa, to divèt kontinyé byen réfléchi, sa lé di rété kalm, gardé to lidé byen klè épi wè bagaj-ya kou Jéova ka wè yé. Chaché enfòrmasyon asou sèrvitèr Jéova annan Labib-a ki rivé tchenbé annan menm kalité sitiasyon-yan, épi byen réfléchi asou yé èkzanp. Priyè Jéova pou i idé to. É pa rété annan to kwen ; rété pròch ké to frè ké sò-ya. Atò, kèlkéswa sa ki rivé, Satan pa ké janmen rivé séparé to ni di Jéova, ni di so òrganizasyon (Jacq. 4:7).
KANTIK 126 « Rété byen dibout, tchenbé rèd, divini vayan »
a Sèrten bagaj ki ka rivé nou pouvé fè nou pédi nou fidélité pou Jéova ké so òrganizasyon, èspésyalman lò a problèm nou ka jwenn annan asanblé-a menm. Annan sa artik-a, nou ké wè trwa problèm nou pouvé jwenn ké sa nou pouvé fè pou rété fidèl douvan Jéova ké so òrganizasyon.
b Yé chanjé déztrwa non.
c To pouvé jwenn plis enfòrmasyon annan artik « Pouvez-vous de nouveau exercer des responsabilités ? » annan La Tour de Garde 15 out 2009, p. 30.
d Lalwa té ka di ki si roun chèf fanmi té lé tchwé roun zannimo pou manjé l’, i té divèt mennen zannimo-a annan tanp-a. Parkont, lò chèf fanmi-a té ka rété lwen di tanp-a, yé pa té gen pou fè sa (Deut. 12:21).