ISTWÈ MO LAVI
« Mo té lé travay rèd pou Jéova »
NOU té fin wè roun group moun ki té ka rété bò d’ vilaj Granbori, o Sirinam, ofon danbwa-a. Nou di yé ovwè épi nou monté annan roun kannon asou larivyè Tapanahoni. Pita, lò nou té ka pasé plizyèr so, motèr-a frapé roun ròch. Kannon-an plonjé anba dlo-a, é nou tout té anba dlo. Mo tchò té ka bat fò. Sa té ka fè plizyèr lannen mo té ka pran kannon pou fè sèrvis sirkonskripsyon-an, mé mo pa menm té konnèt najé !
Anvan mo di zòt sa ki pasé apré sa, bay mo rakonté zòt kouman mo koumansé sèrvis a plen tan-an.
Mo fèt an 1942 asou bèl zilé Curaçao. Mo papa té ka soti Sirinam, é i té vini Curaçao pou trapé roun travay. Plizyèr lannen anvan mo fèt, mo papa batizé Témwen Jéova. I té annan prémyé Témwen Jéova-ya asou zilé-a a. Chak simenn, i té ka étidyé Labib-a ké nou, so timoun, menm si nou pa té mòl ké li. Lò mo té gen 14 an, tout mo fanmi déménajé Sirinam pou mo papa té pouvé okipé di so manman ki té vin granmoun.
BON ZANMI IDÉ MO
O Sirinam, mo divini zanmi ké jennjan annan mo asanblé ki té ka sèrvi Jéova ké bon balan. Yé té roun tibi pi vyé pasé mo é yé té pyonyé pèrmanan. Lò yé té ka rakonté sa ki té rivé yé annan prédikasyon-an, yé vizaj té ka kléré fòrs yé té kontan. Lò réinyon-yan té fini, nou té gen labitid palé di Labib-a. Détan, nou té k’alé dèrò, anba zétwèl-ya, pou nou palé. Sa zanmi-ya idé mo konprann sa mo té lé fè annan mo lavi : travay rèd pou Jéova. Donk, mo batizé lò mo té gen 16 an. Épi lò mo té gen 18 an, mo divini pyonyé pèrmanan.
MO KA ANPRANN PLIZYÈR BAGAJ ENPÒRTAN
Lò mo té pyonyé Paramaribo.
Sèrvis pyonyé-a anprann mo roun patché bagaj ki sèrvi mo pannan tout mo lavi annan sèrvis a plen tan-an. Roun prémyé bagaj mo anprann parèkzanp, a ki fòrmé ròt-ya, a roun bagaj ki enpòrtan. Lò mo koumansé sèrvis pyonyé-a, roun misyonèr, Willem van Seijl b, idé mo. I anprann mo bokou bagaj asou fason to divèt fè to travay annan asanblé-a. A sa lépòk-a, mo pa té savé ki mo té byen bézwen sa fòrmasyon-an. Roun lannen apré sa, mo divini pyonyé èspésyal é pita mo okipé di plizyèr ti group ki té ka rété ofon danbwa-a. Mo byen kontan plizyèr frè, kou Willem, pran tan fòrmé mo lò mo té bézwen ! Dipi sa jou-a, mo ka éséyé fè kou yé, mo ka fòrmé ròt-ya.
Dézyèm bagaj mo anprann, a ki lò to lavi senp é to byen òrganizé, a roun bon bagaj. Dipi mwa-a té ka koumansé, mo ké pyonyé èspésyal-a ki té ansanm ké mo, nou té ka fè lis bagaj nou té ké bézwen pou mwa-a. Apré sa, roun di nou dé té k’alé annan kapital-a, ki té lwen, pou fè komisyon-yan. Pou nou pa té manké anyen jiktan mwa-a té fini, nou té divèt panga fason nou té ka dépansé soumaké òrganizasyon-an té ka bay nou chak mwa ké provizyon nou té gen. Kou nou té an mitan danbwa-a, i pa té gen bokou moun. Donk si nou té ka manké roun bagaj, a pa pyès moun ki té ké pouvé idé nou. Mo sir ki kou, lò mo té jenn, mo anprann gen roun lavi ki senp ké byen òrganizé sa idé mo mété tout mo lidé asou mo sèrvis pou Jéova pannan tout mo lavi.
Trwazyèm bagaj mo anprann, a ki sa enpòrtan di ansényé moun-yan annan yé lang. Dipi mo toupiti, mo ka palé olandè, anglé, papyamennto ké sranan tongo (ouben « sranan ») roun lang tout moun ka palé o Sirinam. Mé mo wè ki moun-yan ki té ka rété annan danbwa-a té ka réyaji pi byen lò nou té ka bay yé bon nouvèl-a annan yé lang. Sa té rèd pou mo anprann roun ran lang, parèkzanp saramaka. Mé menm si sa té rèd, mo byen kontan mo fè l’. Lannen apré lannen, mo té pouvé palé ké plizanplis moun paské mo té ka palé yé lang.
Détan, sa rivé mo ronté annan sèrten sitiasyon. Roun jou mo té lé doumandé roun madanm ki té ka étidyé Labib-a é ki té ka palé saramaka si i té gen mal vant toujou. Pasé mo di sa, mo doumandé li si i té ansent ! Madanm-an té blijé jennen. Magré sa, mo toujou fè tousa mo té pouvé pou palé ké moun-yan annan yé lang.
MO KA ASÈPTÉ RÒT RÈSPONSABILITÉ
An 1970, mo divini rèsponsab sirkonskripsyon. Sa lannen-an, mo alé fè roun diskour pou roun patché group frè ké sò ki té ka rété lwen an mitan danbwa. Pannan sa diskour-a, mo té divèt montré djapozitiv. Tit sa diskour-a, a té « Une visite au siège mondial des Témoins de Jéhovah ». Pou nou té rivé annan sa vilaj-ya, mo ké plizyèr frè, nou té divèt pran kannon. Nou té ka mennen roun group élèktrojenn, roun gro bidon lésans, plizyèr lanp chis ké tousa nou té bézwen pou montré djapozitiv-ya. Apré sa, nou té divèt kontinyé maché annan danbwa épi charyé tousa nou té mennen jiktan nou té rivé koté mo té ké fè diskour-a ! Sa mo ka plis sonjé, a kouman frè ké sò-ya té kontan lò yé té ka wè sa djapozitiv-ya. Mo té kontan idé yé konnèt Jéova ké parti so òrganizasyon ki asou latè-a pi byen. Lò mo wè kouman frè ké sò-ya té
ka vin pròch ké Jéova, mo té byen kontan mo té travay rèd konsa.ROUN KÒRD KI NATÉ KÉ TRWA BRANCH FIL
Mo ké Ethel, jou nou maryé, an sèptanm 1971.
Menm si mo té wè ki pou fè travay mo té ka fè-a, sa té pi fasil si mo té ka rété mo rounso, mo té lé maryé kanmenm. Mo priyè Jéova, mo doumandé l’ roun bagaj èspésyal. Mo doumandé li idé mo trouvé roun madanm ki té ké rivé tchenbé annan sèrvis a plen tan-an anba danbwa é ki té ké kontan sa sèrvis-a. Apéprè roun lannen pita, mo té ka frékanté Ethel, roun pyonyé èspésyal ki té paré travay rèd pou Jéova menm si sa pa té fasil pou li. Dipi i té toupiti, i té ka admiré apot Pòl. I té lé fè kou li. I té lé travay rèd annan prédikasyon-an. Nou maryé an sèptanm 1971, é nou kontinyé sèrvis sirkonskripsyon-an ansanm.
Kou Ethel lévé annan roun fanmi ki pa té gen bokou bagaj, i té alèz annan sèrvis sirkonskripsyon-an anba danbwa. Parèkzanp, lò nou té k’alé wè asanblé ki té lwen anba danbwa, nou pa té ka mennen bokou bagaj. Nou té ka lavé nou lenj annan larivyè-a é a la nou té ka lavé osi. Épi osi, nou pran labitid manjé tousa yé té ka bay nou manjé : léza, piray ouben nenpòrt ki jibyé ouben poson yé té trapé. Lò nou pa té gen zasyèt, nou té ka sèrvi fèy bannann. Lò i pa té gen fourchèt, nou té ka pran nou dwèt. Mo ké Ethel, nou sir ki, kou nou fè sa sakrifis-ya ansanm annan sèrvis pou Jéova, sa pèrmèt nou divini roun kòrd ki naté ké trwa branch fil ké li (Eccl. 4:12). I pa gen pi bèl lavi pasé sa !
A pannan roun di sa vwayaj-ya sa mo ka rakonté o koumansman sa artik-a rivé nou. Nou té fin soti roun koté ki té lwen anba danbwa. Nou kannon té rété roun ti moman anba dlo épi i roumonté. Nou té gen nou jilé é, érèzman, nou pyès pa tonbé a dlo. Parkont, kannon-an té plen ké dlo.
Nou jité tout manjé nou té gen annan nou ganmèl é nou sèrvi sa pou tiré dlo ki té annan kannon-an.Kou nou té jité nou manjé, nou koumansé péché toupannan nou té ka désann larivyè-a. Mé nou pa té ka trapé anyen. Atò, nou priyè Jéova pou i bay nou manjé pou sa jou-a. Apré nou fin priyè, roun di nou lansé so zen épi i trapé roun poson ki té tèlman gro ki i té gen asé pou nou senk manjé plen nou vant sa jou aswè-a !
MARI, PAPA KÉ RÈSPONSAB SIRKONSKRIPSYON
Apré nou pasé senk lannen annan sèrvis sirkonskripsyon-an, mo ké Ethel nou rousouvwè roun bénédiksyon nou pa té ka antann : nou té ké gen roun timoun. Mo té kontan toubonnman menm si mo té ka doumandé mo kò kisa dimen té ké poté pou nou. Mo ké Ethel, nou té lé rété annan sèrvis a plen tan-an — si sa té posib. Nou prémyé pitit, Ethniël, fèt an 1976, é so ti frè, Giovanni, rivé dé lannen é dimi apré sa.
Mo la pou roun batenm annan larivyè Tapanahoni, bò di Godo Holo (annan lès Sirinam), an 1983.
Kou i pa té gen bokou rèsponsab sirkonskripsyon o Sirinam a sa lépòk-a, Bétèl-a òrganizé pou mo té kontinyé sèrvis sirkonskripsyon-an toupannan nou té ka lévé nou timoun. Lò timoun-yan té piti, yé té ka bay mo piti sirkonskripsyon. Nòrmalman sa té ka pèrmèt mo vizité sirkonskripsyon-an pannan plizyèr simenn annan mwa-a, épi larèstan mwa-a mo té pyonyé annan mo asanblé. Ethel ké tiboug-ya té ka vin ké mo lò asanblé-ya pa té lwen di nou koté. Parkont, lò mo té k’alé anba danbwa pou vizité asanblé-ya ouben pou fè asanblé sirkonskripsyon-yan, mo té k’alé mo rounso.
Lò mo té rèsponsab sirkonskripsyon, mo té ka pran kannon souvan pou alé wè asanblé-ya ki té lwen.
Si mo té lé byen fè travay yé té ka doumandé mo fè, mo té divèt byen òrganizé mo kò. Chak simenn mo té ka fè sa ki fo pou nou fanmi étidyé Labib-a ansanm. Lò mo pa té la, paské mo té k’alé wè asanblé ki té lwen, a Ethel ki té ka étidyé ké timoun-yan. Mé chak fwa sa té posib, nou té ka fè bagaj-ya ansanm. Mo ké Ethel, nou té ka òrganizé bagaj pou timoun-yan anmizé. Nou té ka jwé, ouben nou té ka soti. Souvan, mo té k’alé dronmi ta paské mo té ka préparé diskour ouben mo té ka préparé tousa mo té bézwen pou alé wè asanblé-ya. É Ethel té ka lévé bònò, kou fanm-an ki djòk annan Proverbes 31:15. I té ka préparé tout bagaj pou nou té pouvé pran nou tchenbé tchò ansanm épi li tèks pou koumansé lajournen-an anvan timoun-yan alé lékòl. Mo kontan toubonnman paské mo gen roun madanm ki pa pè fè sakrifis é ki toujou idé mo fè sa mo té gen pou fè annan mo sèrvis pou Jéova !
Nou travay rèd pou idé nou timoun kontan Jéova ké sèrvis a plen tan-an. Nou té lé yé chwazi sa karyèr-a. Nou pa té lé yé fè sa pou fè nou plézi, mé paské a yé menm ki té lé. Nou toujou montré yé kouman sèrvis a plen tan-an ka fè nou tchò kontan. Nou pa té ka di ki nou pa té gen problèm, mé nou té ka montré yé ki Jéova té ka soutni nou é ki i té ka béni nou fanmi. Nou té ka ranjé osi pou yé té toujou frékanté frè ké sò ki té ka mété Jéova an prémyé annan yé lavi.
Jéova toujou bay nou sa nou té bézwen pou viv. Kanta mo menm, mo fè sa mo té divèt fè. Lò mo pa té maryé é mo té pyonyé èspésyal anba danbwa, mo té anprann mété soumaké asou koté pou sa nou té ké bézwen achté. Mé détan, menm lò tout fanmi-a té ka fè sa i té pouvé, nou té ka manké sa nou té bézwen. Chak kou sa té ka rivé, nou té ka wè ki Jéova té ka idé nou. Parèkzanp, an 1986, lagèr pété o Sirinam. I fini an 1992. Pannan sa lépòk-a, sa té rèd pou nou jwenn sa nou té bézwen. Menm ti bagaj ki té tou senp. Magré sa, Jéova toujou bay nou sa nou té bézwen (Mat. 6:32).
MO KA RÉFLÉCHI ASOU MO LAVI
Koumansé a goch pou alé a drèt : Mo ké Ethel.
Nou prémyé pitit, Ethniël, ké so madanm, Natalie.
Nou pitit Giovanni ké so madanm, Christal.
Pannan tout nou lavi, Jéova pran swen di nou, i fè nou tchò kontan, é nou té kontan ké sa nou té gen. Nou timoun sa roun bèl kado. É a té roun lònò pou nou idé yé divini sèrvitèr Jéova. Nou byen kontan yé désidé sèrvi Jéova annan sèrvis a plen tan-an. Ethniël ké Giovanni, yé toulédé fè roun lékòl téokratik é jòdla yé ka sèrvi annan Bétèl Sirinam ansanm ké yé madanm.
Mo ké Ethel nou vin vyé, mé kou nou pyonyé èspésyal nou toujou gen bokou bagaj pou fè annan sèrvis pou Jéova. Tèlman nou okipé, jis jòdla mo pòkò pran tan anprann najé ! Mé mo pa ka rigrété anyen ! Lò mo ka réfléchi asou mo lavi, mo pouvé di ki lò mo désidé sèrvi Jéova annan sèrvis a plen tan-an lò mo té jenn, a pi bon désizyon mo té pouvé pran.
b Willem van Seijl ka rakonté so lavi annan artik « La réalité a dépassé mes attentes », annan Réveillez-vous ! 8 òktòb 1999.