ARTIK POU ÉTIDYÉ 47
Pa lésé anyen séparé to di Jéova !
« Mo ka fè to konfyans, o Jéova ! » (PS. 31:14).
KANTIK 122 Soyons fermes, inébranlables !
KOUTWÉY ASOU SA NOU KÉ WÈ a
1. Kouman nou savé ki Jéova lé vin pròch ké nou ?
JÉOVA ka ankourajé nou vin pròch ké li (Jacq. 4:8). I lé sa nou Bondjé, nou Papa ké nou Zanmi. I ka réponn nou lò nou ka priyè l’ é i ka idé nou lò nou ka jwenn problèm. É gras a so òrganizasyon, i ka ansényé nou é i ka protéjé nou. Mé kisa nou divèt fè pou nou vin pi pròch ké li ?
2. Kouman nou pouvé vin pròch ké Jéova ?
2 Nou pouvé vin pròch ké Jéova lò nou ka priyè l’, lò nou ka li so Paròl é lò nou ka pran tan réfléchi asou l’. Si nou ka fè sa, nou ké gen plis lanmou ké plis rékonésans pou li. Anplis di sa, nou ké anvi obéyi l’ épi louwé l’. A byen sa i mérité (Rév. 4:11). Pi nou ké anprann konnèt li pi nou ké fè l’ konfyans, é pi nou ké mété nou konfyans annan òrganizasyon i mété pou idé nou-a.
3. a) Kouman Djab-a ka éséyé séparé nou di Jéova ? b) Kisa ki ké idé nou pa janmen lésé nou Bondjé ké so òrganizasyon ? (Psaume 31:13, 14).
3 Mé Djab-a ka éséyé séparé nou di Jéova, èspésyalman lò nou ka jwenn problèm. Kouman i ka fè sa ? Piti piti i ka éséyé fè nou arété fè Jéova ké so òrganizasyon konfyans. Mé nou pouvé tchenbé. Si nou lafwa annan Jéova fò é si nou pa ka lésé anyen anpéché nou kontinyé fè li konfyans, nou pa ké anbandonnen l’ é nou pa ké anbandonnen so òrganizasyon non plis (li Psaume 31:13, 14).
4. Kisa nou ké wè annan sa artik-a ?
4 Annan sa artik-a, nou ké palé di trwa sitiasyon ki pouvé fè nou arété fè Jéova ké so òrganizasyon konfyans. Nou ké wè kouman sa sitiasyon-yan pouvé séparé nou di Jéova é kouman nou pouvé baré Satan.
LÒ NOU KA JWENN PROBLÈM
5. Kouman éprèv nou ka jwenn pouvé fè nou piti piti arété fè Jéova ké so òrganizasyon konfyans ?
5 Détan nou ka jwenn problèm. Parèkzanp, nou fanmi pouvé éséyé baré nou chimen ouben nou pouvé pédi nou travay. Kouman sa éprèv-ya pouvé fè nou piti piti arété fè òrganizasyon Jéova-a konfyans épi séparé nou di Jéova ? Lò nou annan roun problèm épi i pa ka fini, sa pouvé dékourajé nou bokou. Satan ka profité di sa pou fè nou krè ki Jéova pa kontan nou. I lé fè nou krè ki a Jéova ouben so òrganizasyon ki ka fè si nou ka soufri. A sa i fè ké roun ran Israyélit an Éjip. O koumansman, yé té sir ki Jéova té chwazi Moyiz ké Aaron pou libéré yé (Ex. 4:29-31). Mé lò Faraon fè yé wè plis mizè ankò, yé di ki a té yé fot. Men sa yé di yé : « Akoz di zòt Faraon ké so sèrvitèr rayi nou, é zòt mété roun zépé annan yé lanmen pou yé tchwé nou » (Ex. 5:19-21). Yé akizé sa dé sèrvitèr Bondjé-ya ki té fidèl. Sa byen domaj ! Si sa ka fè roun ti moman to ka tchenbé annan roun problèm, kouman to pouvé kontinyé fè Jéova ké so òrganizasyon konfyans ?
6. Kisa èkzanp Abakouk ka anprann nou asou fason nou divèt tchenbé lò nou ka jwenn problèm ? (Habacuc 3:17-19).
6 Priyè Jéova pou di li sa to ka rousanti é pou doumandé li idé to. Profèt Abakouk jwenn roun patché problèm. Mé i gen roun moman i doumandé so kò si Jéova té ka gadé pou li. I priyè Jéova pou di li sa i té gen asou so tchò. I doumandé li : « Jik kitan, o Jéova, mo ké divèt rélé pou to vini sové mo san to pa tandé ? […] Poukisa to ka pèrmèt moun dominé ròt moun ké méchansté ? » (Hab. 1:2, 3). Jéova réponn lapriyè so sèrvitèr ki té fidèl é ki té sensèr (Hab. 2:2, 3). Apré Abakouk réfléchi asou sa Jéova té fè pou sové so pèp, so tchò viré kontan. Aprézan, i té sir ki so Bondjé té ka gadé pou li é ki i té ké idé l’ tchenbé annan nenpòrt ki éprèv (li Habacuc 3:17-19). Kisa sa ka anprann nou ? Lò to annan roun éprèv, priyè Jéova é di li sa to ka rousanti. Apré sa, doumandé li idé to. To pouvé sir ki i ké bay to fòrs to bézwen-an pou tchenbé. É lo té ké wè i ka idé to, to lafwa ké vin pi fò.
7. Kisa fanmi Shirley éséyé fè li krè, é kisa ki idé l’ kontinyé fè Jéova konfyans ?
7 Kontinyé fè bagaj ki ka idé to rété pròch ké Jéova. A sa ki idé Shirley b, roun sò ki ka rété an Papouasie-Nouvelle-Guinée, rété dibout lò i jwenn éprèv. So fanmi té maléré é détan sa té rèd pou yé jwenn manjé. Roun moun annan so fanmi éséyé fè li arété fè Jéova konfyans. I di li : « To ka di ki lèspri sen Bondjé ka idé to, mé koté to ka wè i ka idé to ? To fanmi toujou maléré ! To ka pédi to tan ka préché ! » Men sa Shirley ka rékonnèt : « Lò i di sa, mo doumandé mo kò : “Ès Bondjé ka gadé pou nou vré ?” Lanmenm, mo priyè Jéova pou di li tousa mo té gen asou mo tchò é mo kontinyé li Labib-a ké piblikasyon-yan, mo kontinyé préché épi alé annan réinyon-yan. » Shirley pa pran tan pou randé so kò kont ki Jéova té ka pran swen di so fanmi. Yé té gen asé pou manjé é yé té kontan. I ka di : « Pou mo, a té répons Jéova pou mo lapriyè » (1 Tim. 6:6-8). Si to menm osi to ka kontinyé fè bagaj ki ka idé to rété pròch ké Jéova, pyès éprèv ni pyès dout pa ké séparé to di li.
LÒ YÉ KA PÉRSÉKITÉ FRÈ-YA KI GEN RÈSPONSABILITÉ
8. Kisa ki pouvé rivé frè-ya ki gen rèsponsabilité annan òrganizasyon Jéova-a ?
8 Annan laradyo, latélé, journal-a ouben asou rézo sosyal-ya, nou lèlmi pa ka arété manti asou frè-ya ki gen rèsponsabilité annan òrganizasyon Jéova-a, ouben yé ka bay fo enfòrmasyon asou yé osi (Ps. 31:13). Yé ka arété roun ran annan yé é yé ka mennen yé douvan lalwa. Krétyen-yan annan 1é syèk-a viv sa kalité sitiasyon-an lò yé akizé Pòl épi yé arété l’. Kouman sa krétyen-yan réyaji ?
9. Kouman roun ran krétyen aji ké Pòl lò i té lajòl ?
9 Roun ran krétyen arété soutni Pòl lò i té lajòl Ròm (2 Tim. 1:8, 15). Poukisa ? Ès yé té ronté paské moun té ka wè Pòl kou roun bandi ? (2 Tim. 2:8, 9). Ouben ès yé té pè yé pèrsékité yé osi ? Menm si nou pa savé poukisa yé fè sa, imajiné kisa Pòl divèt rousanti. I té sipòrté roun patché éprèv é i té menm riské so lavi pou yé ! (Actes 20:18-21). Annou pa janmen sanblé ké sa-ya ki lésé Pòl lò i té plis bézwen yé idé l’. Kisa nou divèt sonjé lò yé ka pèrsékité frè-ya ki gen rèsponsabilité ?
10. Kisa nou divèt sonjé lò yé ka pèrsékité frè-ya ki gen rèsponsabilité, é poukisa ?
10 Sonjé poukisa yé ka pèrsékité nou é kimoun ki dèyè sa pèrsékisyon-yan. Men sa 2 Timothée 3:12 ka èspliké : « Tout sa ki lé kontinyé adoré Bondjé ké fidélité é kontinyé swiv Jézi Kris, yé ké pèrsékité yé osi » Donk annou pa rété èstébékwé lò Satan ka fè moun pèrsékité frè-ya ki gen rèsponsabilité. Sa i lé, a fè yé arété adoré Jéova ké fidélité épi fè nou pè (1 Pierre 5:8).
Lò Pòl té lajòl, Onézifòr idé li, i pa té pè. Menm fason-an jòdla, kou nou ka wè l’ asou zimaj-a, nou frè ké sò-ya ka soutni yé frè ké sò ki lajòl (gadé paragraf 11-12).
11. Kisa èkzanp Onézifòr ka anprann nou ? (2 Timothée 1:16-18).
11 Kontinyé soutni to frè, é pa anbandonnen yé (li 2 Timothée 1:16-18). Kou nou wè l’, roun ran krétyen lésé Pòl lò i té lajòl. Onézifòr li menm ‘so chenn pa fè li ronté’. I alé chaché Pòl é lò i jwenn li, i fè tousa i té pouvé pou idé li gen sa i té bézwen. I jis riské so lavi lò i fè sa. Kisa sa ka anprann nou ? Annou pa janmen lésé zafè pè moun anpéché nou aji. Sa pa divèt anpéché nou soutni nou frè yé ka pèrsékité. Annou défann yé é annou idé yé (Prov. 17:17). Yé bézwen nou kontan yé é nou soutni yé.
12. Kisa nou frè ké sò-ya ki Larisi ka anprann nou ?
12 Gadé kouman nou frè ké sò-ya Larisi ka idé yé frè ké sò ki lajòl. Lò yé prosè ka koumansé, roun patché annan yé ka alé o tribinal pou soutni yé. Kisa sa ka anprann nou ? Lò yé ka arété frè-ya ki gen rèsponsabilité ouben lò yé ka manti anlè yé ouben lò yé ka pèrsékité yé, a pa pou to pè. Priyè pou yé, idé yé fanmi é chaché ròt fason pou to idé yé gen sa yé bézwen (Actes 12:5 ; 2 Cor. 1:10, 11).
LÒ YÉ KA KRITIKÉ NOU
13. Lò ròt-ya ka kritiké nou, kouman sa pouvé fè nou arété fè Jéova ké so òrganizasyon konfyans ?
13 Détan, nou fanmi, nou kolèg travay, ouben nou kanmarad lékòl ka kritiké nou paské nou ka préché ouben paské nou ka rèspèkté sa Jéova ka di asou sa ki bon ké sa ki mové annan nou lavi (1 Pierre 4:4). Roun ran ka di nou : « To, mo kontan to, mé to rélijyon awa. Pou mo, a roun bagaj tan lontan, é zòt tro rèd. » Ròt ankò pa ka konprann fason nou ka aji ké sa-ya ki èskominyé é détan yé ka di nou : « É to ka di ki to kontan to konpanyen swadizan ? » Lò moun-yan ka di nou sa, pitèt nou pouvé koumansé douté. Pitèt nou pouvé doumandé nou kò : « Ès Jéova ka doumandé mo tròp bagaj ? Ès sa so òrganizasyon ka doumandé mo fè tro rèd ? » Si sa ka rivé to pozé to kò sa kalité késyon-yan, kisa to pouvé fè pou to rété pròch di Jéova ké di so òrganizasyon ?
Jòb pa kouté lò so zanmi swadizan té ka manti é té ka kritiké l’. I té byen désidé rété fidèl (gadé paragraf 14).
14. Kouman nou divèt réyaji lò yé ka kritiké nou paské nou ka rèspèkté prensip Jéova-ya ? (Psaume 119:50-52).
14 A pou to byen désidé rèspèkté sa Jéova ka di asou sa ki bon ké sa ki mové. Jòb té ka rèspèkté sa Jéova ka di asou sa ki bon ké sa ki mové menm si yé té ka kritiké li pou sa. Menm roun di so zanmi swadizan éséyé fè li krè ki menm si i té ka fè bon bagaj, Bondjé pa té mélé ké sa (Job 4:17, 18 ; 22:3). Mé Jòb pa kouté sa kalité manti-a. I té savé ki prensip Jéova-ya bon é i té byen désidé obéyi. I pa lésé moun-yan détenn asou li é i rété fidèl (Job 27:5, 6). Kisa sa ka anprann nou ? Panga pou sa ròt-ya ka di pa fè to krè ki prensip Jéova-ya pa bon. Sonjé sa ki rivé to annan to lavi. Ès to pa wè plizyèr fwa ké to pròp wéy ki lò to swiv prensip Jéova-ya annan to lavi, sa té bon pou to ? A pou to toujou byen désidé fè tousa to pouvé pou soutni òrganizasyon-an ki ka défann sa bèl prensip-ya ! Konsa, pyès vyé paròl pa ké janmen séparé to di Jéova (li Psaume 119:50-52).
15. Poukisa yé kritiké Brigitte ?
15 Annou wè sa ki rivé Brigitte, roun sò ki ka rété an End. I gen sa annan so fanmi ki té rèd ké li é ki té ka kritiké l’ pas i Témwen Jéova. Roun ti moso tan apré i batizé, an 1997, so mari, ki pa té Témwen, pédi so travay. Donk i désidé ki li, Brigitte ké yé tifi, yé té ké alé viv ké so papa ké so manman ki té ka rété annan rounòt vil. Mé a koumansé problèm-yan té ka koumansé. Kou so mari pa té gen travay, Brigitte té blijé pran roun travay a plen tan. Anplis di sa, si Brigitte té lé alé annan réinyon-yan, i té ké blijé fè 350 kilomèt. I pa té gen ròt asanblé pi pròch. Épi dèyè sa, fanmi so mari té ka éséyé baré so chimen akoz di so lafwa. Afòrs sitiasyon-an té vin rèd, Brigitte ké so fanmi té blijé déménajé ankò. Apré sa, rounsèl kou konsa, so mari mouri. Épi apré sa, a roun di so tifi ki mouri akoz di roun kansèr, i té gen 12 an sèlman. É sa ki pi mové, a ki roun ran moun annan so fanmi té ka di ki a té di so fot si tout sa bagaj-ya té rivé li. Yé té ka di ki si i pa té divini Témwen Jéova, pyès malò pa té ké rivé li. Magré sa, i kontinyé fè Jéova konfyans é i rété pròch ké so òrganizasyon.
16. Ki bénédiksyon Brigitte trapé paské i fè Jéova ké so òrganizasyon konfyans ?
16 Kou Brigitte té ka rété lwen di so asanblé, roun rèsponsab sirkonskripsyon ankourajé li préché òbò so kaz é fè réinyon-yan annan so kaz. O koumansman, i di annan so tchò ki sa té ké tro rèd pou li mé i swiv so konsèy kanmenm. I préché koté i té ka rété-a é i fè réinyon-yan annan so kaz. Anplis di sa, i pran swen di so tifi annan domenn èspirityèl-a. I té ka étidyé Labib-a ké yé chak simenn. Kisa sa bay ? I koumansé roun patché léson biblik, é plizyèr moun ki té ka étidyé Labib-a ké li batizé. An 2005, i divini pyonyé pèrmanan. Jéova rékonpansé l’ pas i fè li konfyans é i kontinyé soutni so òrganizasyon. So tifi ka adoré Jéova ké fidélité é aprézan i gen dé asanblé koté i ka rété-a. I sir ki Jéova bay li fòrs i té bézwen pou tchenbé magré problèm i té ka jwenn é pou sipòrté so fanmi ki té ka kritiké l’.
KONTINYÉ SOUTNI JÉOVA KÉ SO ÒRGANIZASYON
17. Kisa nou divèt byen désidé fè ?
17 Satan lé fè nou krè ki Jéova pa ka idé nou lò nou annan éprèv é ki, si nou ka soutni so òrganizasyon, nou lavi ké pi rèd ankò. I lé nou pè lò yé ka manti asou frè-ya ki gen rèsponsabilité ouben lò yé ka pèrsékité ouben yé ka mété yé lajòl. É i ka fè moun kritiké nou pou nou pa gen konfyans annan prensip Jéova-ya ni annan so òrganizasyon. Mé nou konnèt kouman i ka fè, i pa ka bloublou nou (2 Cor. 2:11). A pou to byen désidé pa kouté manti Satan ka di épi kontinyé soutni Jéova ké so òrganizasyon. Pa bliyé ki to Bondjé pa ké janmen lésé to (Ps. 28:7). Atò, pa lésé anyen séparé to di li ! (Rom. 8:35-39).
18. Kisa nou ké wè annan ròt artik-a ?
18 Annan sa artik-a, nou wè ki sèrten bagaj pouvé anpéché nou kontinyé fè Jéova ké so òrganizasyon konfyans. Mé défwa, i gen dé bagaj ki pouvé rivé annan asanblé-a ki pouvé anpéché nou kontinyé fè sa. Kouman nou divèt réyaji ? A sa nou ké wè annan ròt artik-a.
KANTIK 118 « Bay nou plis lafwa »