ARTIK POU ÉTIDYÉ 45
KANTIK 138 Yé chivé blan tèlman bèl
Kisa sa plizyèr mouché ki té gen lafwa di anvan yé mouri, ka anprann nou ?
« Ès a pa granmoun-yan ki gen sajès, épi ès a pa lò to viv lontan entélijans-a ka vini ? » (JOB 12:12).
SA NOU KÉ ANPRANN
Lò nou ka obéyi Jéova, nou ka rousouvwè bénédiksyon dipi jòdla é dimen nou ké gen lavi pou tout-tan.
1. Poukisa nou pouvé anprann bokou bagaj grasa granmoun-yan ?
NOU tout bézwen konsèy pou nou pran bon désizyon. Byen souvan nou pouvé trapé sa konsèy-ya lò nou k’alé wè ansyen-yan ouben krétyen ki gen èspéryans. Si sa frè ké sò-ya lontan pi gran pasé nou, nou pa divèt pansé ki yé konsèy pa itil pou nou jòdla. Jéova lé nou alé wè granmoun-yan pou nou anprann bagaj ké yé. Poukisa ? Kou yé la dipi pi lontan, yé té gen plis tan pou yé gen èspéryans, sajès ké entélijans (Job 12:12).
2. Kisa nou ké wè annan sa artik-a ?
2 Annan lépòk Labib-a, Jéova sèrvi plizyèr granmoun pou gidé ké ankourajé so sèrvitèr. Parèkzanp, annou palé di Moyiz, David ké apot Jan. Sa mouché-ya pa viv annan menm lépòk-a é yé pa fè menm bagaj-ya. Roun tibi tan anvan yé mouri, yé bay moun ki té pi jenn bèl ti konsèy. Yé chak di kouman sa enpòrtan di obéyi Bondjé. É Jéova fè sa ki fo pou nou gen sa paròl-ya jòdla. Donk, ki nou jenn ki nou granmoun, si nou ka rouwè sa konsèy-ya sa ké bon pou nou (Rom. 15:4 ; 2 Tim. 3:16). Annan sa artik-a, nou ké wè dèrnyé paròl sa mouché-ya di anvan yé mouri, épi nou ké wè sa sa ka anprann nou.
« TO KÉ RÉTÉ LONTAN »
3. Kisa Moyiz fè pou Jéova ké so pèp ?
3 Moyiz travay rèd pou Jéova pannan tout so lavi. I té sa roun profèt, roun jij, roun chèf larmé é roun istoryen. Donk, i rivé gen roun patché èspéryans. I idé nasyon Israyèl-a ki té èsklav, soti Éjip, é i wè roun patché mirak ké so pròp wéy. Jéova fè li ékri senk prémyé liv-ya annan Labib, i ékri Psaume 90, é pitèt Psaume 91. A pitèt li osi ki ékri liv Job-a.
4. Kimoun Moyiz ankourajé, é poukisa ?
4 Roun tibi tan anvan i mouri, lò Moyiz té gen 120 lannen, i fè tout Israyélit-ya vini pou fè yé sonjé sa yé té viv ké sa yé té wè. Roun ran annan yé, lò yé té jenn té wè Jéova fè roun patché mirak, é yé té wè kouman Jéova té pini Éjipsyen-yan (Ex. 7:3, 4). Bondjé té louvri lanmè Rouj-a, yé té janbé l’, é yé té wè Bondjé kayakaya larmé Faraon-an (Ex. 14:29-31). Annan dézèr-a, yé té wè kouman Bondjé protéjé yé é okipé di yé (Deut. 8:3, 4). Aprézan, kou yé té paré pou antré annan péyi Bondjé té promèt yé-a, Moyiz té lé ankourajé yé roun dèrnyé kou a.
5. Grasa sa Moyiz di annan Deutéronome 30:19, 20, di kisa Israyélit-ya té pouvé sir ?
5 Kisa Moyiz di ? (li Deutéronome 30:19, 20). I fè Israyélit-ya sonjé ki yé té ké gen roun patché bénédiksyon titalò. Grasa bénédiksyon Bondjé-a, yé té ké pouvé rété lontan annan péyi Jéova té promèt yé-a. É a té roun péyi ki té bèl toubonnman ké bon latè ! Men sa Moyiz di asou sa péyi-a : « Roun péyi koté i gen vil zòt pa konstrwi ki gran é ki bèl, koté i gen kaz plen ké tout kalité bon bagaj zòt pa ranmasé, pi zòt pa fouyé, pyé rézen ké zoliv zòt pa planté » (Deut. 6:10, 11).
6. Poukisa Jéova pèrmèt plizyèr nasyon ganyen Israyélit-ya ?
6 Moyiz avèrti Israyélit-ya osi. Si yé té lé kontinyé viv annan sa bèl péyi-a, yé té divèt obéyi koumannman Jéova-ya. A ké tout so tchò Moyiz di yé « chwazi lavi ». Yé té ké montré ki yé té chwazi lavi si yé té ka kouté Jéova épi « rété maré ké li ». Malérèzman, Israyélit-ya pa kouté. A pou sa, finalman, Jéova pèrmèt Asiryen-yan é, pita, Babilonyen-yan ganyen yé épi mennen yé alé annan yé péyi (2 Rois 17:6-8, 13, 14 ; 2 Chron. 36:15-17, 20).
7. Kisa sa Moyiz di ka anprann nou ? (gadé zimaj-a osi).
7 Kisa nou pouvé anprann ? Si nou ka obéyi Jéova nou ké viv pou tout-tan. Menm fason Israyélit-ya té paré pou antré annan péyi Jéova té promèt yé-a, nou tou pròch antré annan monn nouvo-a, koté nou ké wè latè-a divini roun paradi (Is. 35:1 ; Luc 23:43). Djab-a ké so démon pa ké la ankò (Rév. 20:2, 3). Fo rélijyon-yan ki ka di roun patché manti asou Bondjé pa ké la ankò (Rév. 17:16). Gouvèrnman-yan ki ka malmennen moun-yan pa ké la ankò (Rév. 19:19, 20). Jéova pa ké lésé pyès moun mété pyès dézòrd annan paradi-a (Ps. 37:10, 11). Tout moun ké viv ansanm ansanm annan lapè, paské tout koté asou latè-a, moun-yan ké kouté lalwa Jéova ki jis. Anplis di sa, yé ké kontan yé konpanyen é yé ké fè konfyans (Is. 11:9). Nou présé wè sa bèl bagaj-ya ! Mé a pa sa rounso. Si nou ka obéyi Jéova, a pa déztrwa syèk rounso nou ké viv annan paradi-a, nou ké viv pou tout-tan ! (Ps. 37:29 ; Jean 3:16).
Si nou ka obéyi Jéova, nou pa ké viv annan paradi-a asou latè-a pou déztrwa syèk rounso, mé pou tou-tan ! (gadé paragraf 7).
8. Kisa promès lavi pou tout-tan-an idé roun misyonèr fè ? (Jude 20, 21).
8 Si nou ka kontinyé mété nou lidé asou èspérans lavi pou tout-tan-an, nou ké byen désidé toujou rété fidèl kèlkéswa éprèv nou ka jwenn (li Jude 20, 21). Épi osi, sa promès-a pouvé idé nou briga ké nou défo. Roun misyonèr ki ka rété an Afrik é ki té ka briga ké roun défo i té gen ka di : « Lò mo sonjé ki mo té pouvé pédi lavi pou tout-tan, mo té ankò pi désidé briga ké sa défo-a, épi sipliyé Jéova ké tout mo fòrs. Jéova idé mo é mo rivé fin ké sa problèm-an. »
« TOUSA TO KÉ FÈ KÉ BYEN MACHÉ »
9. Ki problèm David jwenn annan so lavi ?
9 David té sa roun bon rwa. A té osi roun moun ki té ka jwé lanmizik, roun moun ki té ka ékri powenm, ki té ka fè lagèr é ki té profèt. Épi i jwenn roun patché problèm. Pannan plizyèr lannen, i séré so kò pas rwa Sayil ki té jalou té ka éséyé tchwé l’. Lò i divini rwa, so pitit Absalon éséyé divini rwa an so plas, donk i té divèt chapé pou i sové so lavi. I jwenn problèm, épi i i fè mové bagaj osi. Mé magré tousa, David rété fidèl jistan i mouri. Pou Jéova, i té sa ‘roun moun ki té ka aji soulon so volonté’. Atò, a pou nou kouté konsèy David bay ! (Actes 13:22 ; 1 Rois 15:5).
10. Poukisa David bay so pitit Salomon konsèy anvan i divini rwa ?
10 Annou wè parèkzanp, konsèy David bay so pitit Salomon ki divini rwa apré li. Jéova chwazi Salomon pou konstrwi roun tanp koté moun-yan té ké pouvé adoré li (1 Chron. 22:5). Mé sa té ké rèd é i té ké bézwen Jéova idé l’ gidé pèp-a. Donk, kisa David té ké di li ? Annou wè sa.
11. Dapré 1 Rois 2:2, 3, ki konsèy David bay Salomon, é kouman sa i di fèt vré ? (gadé zimaj-a osi).
11 Kisa David di ? (li 1 Rois 2:2, 3). David di so pitit ki si i té ka obéyi Jéova, sa i té ké fè té ké maché. É pannan roun patché lannen, Jéova bay Salomon roun patché bagaj é i idé l’ bokou (1 Chron. 29:23-25). Salomon fè roun tanp ki té bèl toubonnman. I ékri plizyèr liv annan Labib é yé palé di li annan plizyèr liv. Tout moun té savé kouman i té saj é kouman i té rich (1 Rois 4:34). Mé kou so papa té di li, a sèlman si i té ka obéyi Jéova, sa i té ké fè té ké byen maché. Malérèzman, lò i vin vyé Salomon koumansé adoré ròt bondjé. Jéova pa té kontan sa é i arété bay Salomon sajès pou i dirijé pèp-a ké jistis (1 Rois 11:9, 10 ; 12:4).
Sa David di Salomon anvan i mouri ka anprann nou ki si nou ka obéyi Jéova, i ké bay nou sajès nou bézwen-an pou pran bon désizyon (gadé paragraf 11-12 b).
12. Kisa sa David di ka anprann nou ?
12 Kisa nou pouvé anprann ? Lò to ka obéyi, tousa to ka fè ka byen maché (Ps. 1:1-3). A vré, Jéova pa ka promèt bay nou richès ké laglwar Salomon té gen. Mé si nou ka obéyi l’, i ké bay nou sajès nou bézwen-an pou nou pran bon désizyon (Prov. 2:6, 7 ; Jacq. 1:5). So prensip pouvé idé nou annan zafè travay, lékòl, anmizman ké soumaké. Anplis di sa, si nou ka kouté l’ nou ké rété zanmi ké li é nou ké gen lavi pou tout-tan (Prov. 2:10, 11). Nou ké gen bon zanmi é nou fanmi ké viv ké tchò kontan.
13. Kisa Carmen fè pou i rivé annan so lavi ?
13 Carmen, ki ka rété o Mozanbik, té ka pansé ki pou i rivé annan so lavi i té divèt fè gran lékòl. Donk, i désidé alé linivèrsité pou divini architèk. I ka di : « Mo té kontan sa mo té ka anprann toubonnman, mé sa té ka pran bokou tan é mo té ka las. Mo té linivèrsité dipi sètèr é dimi bonmanten jis sizèr aswè. Kou mo pa té ka rivé alé annan réinyon-yan, mo lanmityé ké Jéova pran roun tap. Annan mo tchò mo té byen savé ki mo té ka éséyé travay pou dé mèt an menm tan » (Mat. 6:24). Carmen priyè épi i fè réchèrch annan nou piblikasyon. I ka di : « Mo manman ké plizyèr frè ki té gen èspéryans bay mo konsèy é apré sa, mo désidé lésé linivèrsité-a tonbé pou mo divini pyonyé pèrmanan. A pi bèl désizyon mo pran, mo pa ka rigrété anyen. »
14. Ki konsèy enpòrtan Moyiz ké David bay ?
14 Moyiz ké David té kontan Jéova é yé té savé ki sa té enpòrtan di obéyi l’. Annan sa yé di anvan yé mouri, yé ankourajé sa-ya ki té ka kouté yé rété maré ké Jéova yé Bondjé, kou yé menm té fè l’. Yé toulédé èspliké ki sa-ya ki ka lésé Jéova pa ka rété so zanmi é ki i pa ké rékonpansé yé. Yé konsèy bon pou nou jòdla osi. Plizyèr syèk pita, rounòt sèrvitèr Jéova montré ki sa enpòrtan di rété fidèl ké Bondjé.
« PA GEN ANYEN KI KA FÈ MO TCHÒ KONTAN PASÉ SA »
15. Kouman apot Jan vin gen bokou èspéryans ?
15 Jan té sa roun apot di Jézi é a té so bon zanmi menm (Mat. 10:2 ; Jean 19:26). I té la ké li lò i té ka préché é i wè l’ fè mirak, i rété ké li lò bagaj-ya té rèd. I té la lò yé tchwé l’ é i wè l’ lò Bondjé résisité l’. I wè asanblé krétyen-an grandi osi ; i viv asé lontan pou wè moun « préché [bon nouvèl-a] toupatou anba syèl-a » (Col. 1:23).
16. Kimoun ki profité é kimoun ki ka kontinyé profité di sa Jan ékri ?
16 Anvan Jan mouri, Bondjé bay li roun bèl lònò : i ékri liv Révélation-an (Rév. 1:1). I ékri roun Évanjil ké trwa lèt osi. So trwazyèm lèt, a té pou Gayis, roun frè i té kontan kousidiré a té so pròp pitit (3 Jean 1). É nou pouvé pansé ki Jan té ka wè roun patché ròt frè ké sò kou so pròp pitit. Jis jòdla, sa sa granmoun-an ékri ka kontinyé ankourajé disip Jézi-ya.
17. Dapré 3 Jean 4, kisa ka fè nou tchò kontan toubonnman ?
17 Kisa Jan ékri ? (li 3 Jean 4). Jan di ki so tchò té kontan lò i té ka wè so frè ké sò-ya obéyi Bondjé. Lò i ékri so trwazyèm lèt, moun té ka ansényé bagaj ki pa té vré é té ka mété dézòrd annan asanblé-a. Mé roun ran krétyen té ka kontinyé « maché annan lavérité-a ». Yé té ka obéyi Jéova é yé té ka « kontinyé obéyi so koumannman » (2 Jean 4, 6). Jan té kontan é Jéova té kontan osi (Prov. 27:11).
18. Kisa sa Jan di ka anprann nou ?
18 Kisa nou pouvé anprann ? Lò nou ka rété fidèl ké Jéova nou tchò kontan é nou ka fè tchò ròt moun kontan osi (1 Jean 5:3). Parèkzanp, nou kontan paské nou savé ki nou ka fè tchò Jéova kontan. Jéova li menm kontan lò i ka wè ki nou pa ka tonbé annan tantasyon sa monn-an é nou ka asèpté lavérité (Prov. 23:15). É ròt moun annan syèl-a kontan osi (Luc 15:10). Nou osi nou pouvé kontan lò nou ka wè nou frè ké sò ki ka rété fidèl èspésyalman lò yé ka jwenn problèm ké tantasyon (2 Thess. 1:4). Épi apré lagèr Armagédon, nou ké kontan pas nou montré ki nou té fidèl menm annan roun monn Satan té ka dirijé.
19. Poukisa tchò Rachel kontan lò i ka ansényé moun lavérité ? (gadé zimaj-a osi).
19 Nou tchò kontan èspésyalman lò nou ka ansényé moun-yan lavérité. Rachel, roun sò ki ka rété Sendomeng ka di ki anprann moun konnèt Bondjé, a roun bèl lònò pou li. I idé plizyèr moun koumansé adoré Jéova. I ka di : « Mo pa ka rivé èspliké kouman mo tchò kontan lò mo ka wè étidyan-yan ki ka koumansé kontan Jéova, é lò mo ka wè yé fè l’ konfyans ké tout yé tchò, épi chanjé sa yé divèt chanjé pou fè l’ plézi. Sa lajwa-a pi gran pasé tout éfòr ké tout sakrifis mo fè pou ansényé yé. »
Nou tchò kontan toubonnman lò nou ka anprann nou konpanyen kontan Jéova épi obéyi l’ (gadé paragraf 19).
ANNOU PROFITÉ DI TOUSA YÉ DI ANVAN YÉ MOURI
20. Poukisa nou pouvé di ki nou kou Moyiz, David ké Jan ?
20 Menmsi Moyiz, David ké Jan pa viv annan nou lépòk, nou ka sanblé yé annan plizyèr bagaj. Kou yé nou ka sèrvi vré Bondjé-a, kou yé nou ka priyè Jéova, nou ka fè li konfyans é nou ka doumandé li gidé nou. É kou yé, nou sir ki Jéova ka béni sa-ya ki ka obéyi l’.
21. Ki bénédiksyon sa-ya ki ka swiv konsèy granmoun kou Moyiz, David ké Jan ké trapé ?
21 Donk, annou kouté sa sa mouché-ya di anvan yé mouri : annou obéyi koumannman Jéova. Konsa, tousa nou ké fè ké byen maché. Nou ké « rété lontan », wi, nou ké viv pou tout-tan ! (Deut. 30:20). É nou tchò ké kontan pas nou ké fè nou Papa ki annan syèl-a, plézi. É kou i kontan nou, i ké rékonpansé nou lontan plis pasé sa nou pouvé imajiné ! (Éph. 3:20).
KANTIK 129 Gardons notre endurance
a Près tout Israyélit-ya ki wè Jéova fè mirak annan lanmè Rouj-a pa viv asé lontan pou antré annan Péyi i té promèt yé-a (Nomb. 14:22, 23). Jéova té di ki tout Israyélit-ya ki té gen 20 lannen ouben plis té ké mouri annan dézèr-a (Nomb. 14:29). Mé, Joziyé ké Kalèb ké ròt jennjan ki té soti annan ti nasyon Lévi-a rété vivan é yé wè Jéova tchenbé so promès lò Israyèl janbé Jourden-an pou antré Kanaan (Deut. 1:24-40).
b MEN SA NOU KA WÈ ASOU ZIMAJ-YA : A goch : David kouché asou so lit, i paré pou mouri. I ka bay so pitit Salomon so dèrnyé konsèy. A drèt : Annan roun Lékòl pou sèrvis pyonyé-a, frè ké sò ka rousouvwè ansèyman-an ki ka vini di Bondjé.
