ARTIK POU ÉTIDYÉ 47
KANTIK 103 Bèrjé-ya, roun kado di Bondjé
Nou frè-ya, ès zòt ka fè tousa zòt pouvé pou zòt divini ansyen ?
« Si roun wonm anvi divini roun rèsponsab é ka fè tousa ki fo pou sa, a roun bèl bagaj i lé fè » (1 TIM. 3:1).
SA NOU KÉ ANPRANN
Nou ké wè ki bèl kalité èspirityèl roun frè ki lé divini ansyen divèt gen.
1-2. Ki « bèl bagaj » roun ansyen ka fè ?
SI TO asistan, to dèt ja travay pou gen bèl kalité èspirityèl roun ansyen divèt gen. Ès to anvi divini ansyen pou idé to frè ké sò ankò plis ? (1 Tim. 3:1).
2 Kisa roun ansyen ka fè ? Roun ansyen ka pran douvan annan zafè prédikasyon-an. I ka travay rèd pou ankourajé so frè ké sò é pou ansényé yé. É ké sa i ka di ké sa i ka fè, i ka idé yé fè yé lafwa vin pi fò. Donk, nou ka konprann poukisa Labib ka di ki sa wonm-yan sa dé « kado » (Éph. 4:8).
3. Kouman roun frè pouvé divini ansyen ? (1 Timothée 3:1-7 ; Tite 1:5-9).
3 Kouman to pouvé divini ansyen ? Roun frè pa ka divini ansyen sèlman parapòrta sa i konnèt fè. A pa kou lò to ka chaché roun travay. Byen souvan, si to konnèt fè travay-a kou patron-an ka doumandé l’, i ké bay to travay-a. Parkont, roun frè pa ké divini ansyen jis paské i konnèt préché ké ansényé. I divèt gen osi kalité èspirityèl-ya roun ansyen divèt gen yé ka palé annan 1 Timothée 3:1-7 ké Tite 1:5-9 (li). Donk, sa artik-a ké palé di sa bèl kalité-ya. Nou ké wè kouman roun frè pouvé gen roun bon répitasyon annan asanblé-a ké dèrò di asanblé-a, kouman i pouvé sa roun chèf ki ka byen dirijé so fanmi é nou ké wè kisa ki pouvé idé l’ pou i toujou paré travay rèd pou asanblé-a.
ROUN BON RÉPITASYON
4. Lò yé ka di ki roun ansyen divèt « drèt annan tout so zafè », kisa sa lé di ?
4 Pou to divini ansyen, a pou to ‘drèt annan tout to zafè’. Sa lé di ki to divèt gen roun bon répitasyon annan asanblé-a paské to gen roun bon konpòrtman é pyès moun pa pouvé akizé to di fè roun mové bagaj. Anplis di sa, « a pou moun ki pa annan asanblé-a di bon bagaj » asou to. Menmsi moun ki pa Témwen ka malpalé to akoz di sa to ka krè, anyen pa divèt fè yé douté ki to sa roun bon moun é ki to onèt (Dan. 6:4, 5). Doumandé to kò : « Ki a annan asanblé-a, ki a dèrò di asanblé-a, ès mo gen roun bon répitasyon ? »
5. Kisa ki ké montré ki to sa roun moun ki « kontan sa ki bon » ?
5 Si to « kontan sa ki bon » to ké chaché wè bèl kalité ròt-ya gen é to ké félisité yé pou sa. To ké kontan fè bon bagaj pou yé osi é to ké menm fè plis ki sa to divèt fè (1 Thess. 2:8). Poukisa sa enpòrtan ki roun ansyen « kontan sa ki bon » ? Paské si i konsa, i ké pran tan okipé di brébi-ya épi fè sa i gen pou fè annan asanblé-a (1 Pierre 5:1-3). Menmsi i ké fè sakrifis, sa sakrifis-ya pa ké anyen òbò lajwa i ké jwenn pas i ka travay rèd pou ròt-ya (Actes 20:35).
6. Kouman to pouvé montré ki to « kontan rousouvwè moun » ? (Hébreux 13:2, 16 ; gadé zimaj-a osi).
6 To ka montré ki to « kontan rousouvwè moun » lò to ka fè bon bagaj pou ròt-ya, menm sa-ya to pa tèlman pròch ké yé (1 Pierre 4:9). Roun liv ki ka èspliké bagaj asou Labib ka di ki roun moun ki kontan rousouvwè toujou divèt lésé so kaz — ké so tchò — gran louvri pou moun i pa konnèt. Doumandé to kò : « Ès ròt-ya ka di ki mo kontan rousouvwè moun ? » (li Hébreux 13:2, 16). Roun mouché ki kontan rousouvwè moun ka aji ké bonté ké tout moun. Parèkzanp, ké maléré-ya, frè-ya ki ka vin fè diskour annan so asanblé ké ròt moun ki ka travay rèd pou ankourajé frè ké sò-ya, kou rèsponsab sirkonskripsyon-yan (Gen. 18:2-8 ; Prov. 3:27 ; Luc 14:13, 14 ; Actes 16:15 ; Rom. 12:13).
Roun frè ké so madanm ki kontan rousouvwè ka rousouvwè rèsponsab sirkonskripsyon-an ké so madanm annan yé kaz (gadé paragraf 6).
7. Kisa ka montré ki roun ansyen pa « kontan soumaké » ?
7 Pa « kontan soumaké. » Sa lé di ki soumaké ké tousa to gen, a pa sa ki pi enpòrtan annan to lavi. Ki to rich ki to maléré, to ka mété Rwayonm-an an prémyé annan to lavi (Mat. 6:33). To ka sèrvi to fòrs, to tan ké tousa to gen pou adoré Jéova, pran swen di to fanmi ké travay pou asanblé-a (Mat. 6:24 ; 1 Jean 2:15-17). Doumandé to kò : « Ki enpòrtans soumaké-a gen pou mo ? Ès mo kontan ké sa mo bézwen pou mo viv ? Ouben ès mo toujou lé gen plis soumaké ké plis bagaj ? » (1 Tim. 6:6, 17-19).
8. Kouman to pouvé montré ki to konnèt ‘kontrolé to kò’ ?
8 Si to konnèt ‘kontrolé to kò’, to ké rézonab annan tousa to ka fè. Sa lé di ki to pa ka ni bwè ni manjé tròp, to ka véyé pou fason to ka penyen ké abiyé toujou korèk é to ka byen chwazi fason to ka anmizé. To pa ka swiv tout dèrnyé lanmòd ka soti é to pa ka fè kou moun ki annan sa monn-an (Luc 21:34 ; Jacq. 4:4). To konnèt kontrolé to kò, to ka rété kalm menm lò ròt moun pa janti ké to. Anplis di sa, to pa sa roun « tafyatò » é moun pa ka di ki to kontan bwè. Doumandé to kò : « Ès fason mo ka viv ka montré ki mo rézonab annan sa mo gen labitid fè é ki mo konnèt kontrolé mo kò ? »
9. Kisa roun moun ki ka « pran tan réfléchi » é ki « byen òrganizé » ka fè ?
9 Annan chak sitiasyon to ka « pran tan réfléchi » asou sa prensip-ya ki annan Labib. Kou to ka fè sa, to ka rivé konprann bagaj-ya pi byen é to ka pran bon désizyon. To pa ka kouri pran désizyon san to pa gen tout enfòrmasyon to bézwen pou pran sa désizyon-an (Prov. 18:13). Konsa, lò to ka pran désizyon, to rézonab é to désizyon ka apiyé asou sa Jéova ka di. Si to « byen òrganizé », to ka fè to zafè byen é to toujou ka rèspèkté lèr yé ka bay to. Tout moun savé to sa roun frè yé pouvé fè konfyans é to ka fè tousa ansyen-yan ka doumandé to fè. Si to ka travay pou to gen sa bèl kalité-ya nou fin wè annan sa parti-a, to ké gen roun bon répitasyon. Annou wè aprézan sa roun ansyen divèt fè lò i chèf roun fanmi.
A POU TO SA ROUN BON CHÈF FANMI
10. Kouman roun mouché ka « byen dirijé so pròp fanmi » ?
10 Si to maryé é to lé divini ansyen, to fanmi osi divèt gen roun bon répitasyon. Donk, a pou to ‘byen dirijé to pròp fanmi’. To divèt pran swen di to fanmi ké bokou lanmou é to divèt pran désizyon ki bon pou li. Chak simenn, to divèt étidyé ké to fanmi, alé annan réinyon-yan ké yé é idé yé fè tousa yé pouvé pou préché. Poukisa sa enpòrtan ? Enben, men sa apot Pòl ka èspliké : « Si roun wonm pa pouvé dirijé so pròp fanmi, kouman i ké pouvé pran swen di asanblé Bondjé-a ? » (1 Tim. 3:5).
11-12. Poukisa konpòrtman fanmi roun frè enpòrtan si i lé divini ansyen ? (gadé zimaj-a osi).
11 Si to gen timoun ki pòkò gen 18 lannen, a pou to fè yé « obéyi épi maché drèt ». To divèt lévé yé épi ansényé yé ké bokou lanmou. Asiré, kou tout timoun, to timoun kontan ari ké jwé. Mé a pou to anprann yé obéyi to osi, rèspèkté ròt moun épi gen roun bon konpòrtman. Anplis di sa, to divèt fè tousa to pouvé pou to idé yé gen roun lanmityé ké Jéova ki fò, swiv prensip-ya ki annan Labib annan yé lavi épi fè progrè pou yé batizé.
12 « Ki gen timoun ki krwayan é ki pa gen répitasyon moun ka mennen roun vyé lavi é ki pa lé kouté. » Si roun timoun ki ka rété annan kaz so papa ké so manman é ki batizé ouben k’alé pou batizé, ka fè roun péché ki grav, ès so papa pouvé divini ansyen ? Si sa papa-a pa fè sa ki fo pou byen lévé so timoun é pou korijé yé lò i té divèt fè l’, pitèt i pòkò paré pou divini ansyen (gadé La Tour de Garde 15 òktòb 1996, p. 21, § 6-7).
Chèf fanmi-ya ka anprann yé timoun fè bagaj pou Jéova ké pou asanblé-a (gadé paragraf 11).
TRAVAY RÈD POU ASANBLÉ-A
13. Kisa ké montré ki to « rézonab » é ki to « tèt pa […] dou » ?
13 Frè-ya ki ka montré ki yé gen bèl kalité roun krétyen divèt gen, gen bokou valò annan asanblé-a. Roun moun ki « rézonab » ka travay rèd pou i rété byen ké ròt-ya é pou ròt-ya rété byen ké yé konpanyen. Anplis di sa, i ka kouté lò moun ka palé épi i ka éséyé konprann fason yé ka réfléchi. Parèkzanp, si près tout ansyen-yan dakò pou pran roun désizyon ki k’alé ké sa Labib ka di, ès to ké soutni sa désizyon-an menmsi i pa k’alé annan to sans ? Lò to « tèt pa […] dou » sa lé di ki to pa ka oblijé ròt moun fè kou to lé. To ka konprann ki sa enpòrtan pou to kouté konsèy ròt-ya (Gen. 13:8, 9 ; Prov. 15:22). To pa ka « chaché lévé blo ké moun » é to pa sa « roun moun ka kòlè vit ». Pasé to rèd ké ròt moun ouben to briga ké yé, to janti ké yé. To ka travay pou to fè lapè ké ròt-ya menmsi sa pa fasil (Jacq. 3:17, 18). To paròl ki dous pouvé kalmé ròt moun, menm sa-ya ki pa dakò ké Témwen-yan (Juges 8:1-3 ; Prov. 20:3 ; 25:15 ; Mat. 5:23, 24).
14. Poukisa roun ansyen pa divèt sa « roun moun ki fin batizé », é kouman i ka montré ki i « fidèl » ?
14 Roun frè ki gen kalité èspirityèl-ya roun ansyen divèt gen « pa [...] sa roun moun ki fin batizé ». Menmsi to pa blijé batizé dipi roun patché lannen pou to divini ansyen, sa ka pran tan pou to fè to lanmityé ké Jéova vin pi fò é pou to sèrvi sa ki annan Labib pou to pran bon désizyon. Anvan to divini ansyen, to divèt montré ki, kou Jézi, to ka fè to kò toupiti é to ka pran pasyans, to ka antann Jéova bay to roun rèsponsabilité annan asanblé-a (Mat. 20:23 ; Phil. 2:5-8). Anplis di sa, si to ka kontinyé kouté sa Jéova ka di annan Labib é si to ka swiv sa so òrganizasyon ka di, to ké montré ki to « fidèl » (1 Tim. 4:15).
15. Ès roun ansyen oblijé sa roun mèt dòkò annan zafè fè diskour ? Èspliké.
15 Labib ka byen di ki roun ansyen divèt « konnèt ansényé ». Ès sa lé di ki to divèt sa roun mèt dòkò annan zafè fè diskour ? Non. Menmsi roun patché ansyen pa dòkò annan zafè fè diskour, yé ka byen ansényé ròt-ya lò yé ka préché é lò yé ka ankourajé yé frè ké sò (gadé 1 Corinthiens 12:28, 29 ké Éphésiens 4:11). Kèlkéswa sa to ja konnèt fè, a pou to travay pou to vin pi vayan annan zafè ansényé. Kouman to pouvé fè sa ?
16. Kouman to pouvé vin pi vayan annan zafè ansényé ? (gadé zimaj-a osi).
16 « Rété byen maré ké paròl fidèl-a. » Pou to ansényé pi byen, sèrvi Paròl Bondjé-a lò to ka ansényé é lò to ka bay konsèy. Pran tan byen étidyé Labib ké nou piblikasyon (Prov. 15:28 ; 16:23). Pran tan byen gadé kouman nou piblikasyon ka èspliké vèrsé-ya. É lò to ka ansényé, fè tousa to pouvé pou to touché tchò sa-ya ki ka kouté to. Anplis di sa, pou to vin pi vayan, doumandé ansyen ki gen èspéryans bay to konsèy épi fè sa yé ka di to fè (1 Tim. 5:17). Épi roun ansyen divèt sa roun moun ki konnèt « ankourajé » so frè ké sò. Détan, i divèt bay yé konsèy ouben menm « korijé » yé. Annan tout sitiasyon-yan, i divèt janti. Si to dous, si to janti é si to ka sèrvi Paròl Bondjé lò to ka ansényé, to ké vayan paské to ké fè kou Jézi, gran Ansényan-an (Mat. 11:28-30 ; 2 Tim. 2:24).
Roun asistan ka profité di èspéryans roun ansyen pou i anprann kouman i pouvé sèrvi Labib pou ansényé. Sa menm asistan-an ka répété roun diskour douvan roun mirwè (gadé paragraf 16).
KONTINYÉ FÈ TOUSA TO POUVÉ
17. a) Kouman roun asistan pouvé kontinyé fè tousa i pouvé pou i divini ansyen ? b) Lò ansyen-yan ka gadé pou wè si roun asistan pouvé divini ansyen, kisa yé divèt sonjé ? (gadé karé-a « A pou zòt rézonab lò zòt ka gadé pou wè si roun asistan pouvé divini ansyen »).
17 Nou fin wè tout kalité èspirityèl roun ansyen divèt gen. Pitèt roun ran asistan ké pansé ki yé pa ké janmen rivé gen tout sa kalité-ya. Mé pa bliyé ki ni Jéova ni so òrganizasyon pa ka doumandé to sa roun moun ki parfè (1 Pierre 2:21). Anplis di sa, lèspri sen Jéova, pwisans-a ki fò toubonnman, ké idé to gen sa kalité-ya (Phil. 2:13). Ès i gen roun bagaj to té ké kontan fè pi byen ? Si a sa, priyè pou sa, fè réchèrch é doumandé roun ansyen bay to konsèy.
18. Kisa yé ka ankourajé tout asistan-yan fè ?
18 Tout frè-ya, ansyen-yan osi annan, divèt travay pou yé kontinyé gen kalité èspirityèl-ya nou fin wè annan sa artik-a (Phil. 3:16). Ès to asistan ? Kontinyé fè tousa to pouvé pou to divini ansyen ! Priyè Jéova pou i fòrmé to pou i itilizé to ankò plis annan so sèrvis ké annan asanblé-a (Is. 64:8). A pou Jéova vidé roun lapli bénédiksyon asou to pou tout éfòr to ka fè pou to divini ansyen !
KANTIK 101 Annou travay ansanm
