1. Kouman Bondjé bay so sèrvitèr tan-lontan fòrs ?

 SOUVAN, Labib-a ka palé di moun ki té fidèl ké Jéova, kou moun ki fò. Mé menm si Labib-a ka di ki roun ran té fò toubonnman, a pa tout tan yé té ka santi ki yé té fò. Parèkzanp, détan David santi i té « fò kou roun montangn », mé annan ròt sitiasyon, i « pran pè » (Ps. 30:7). Kanta Sanson, lò lèspri Bondjé té ka aji asou li, i té fò toubonnman, mé i té savé ki si a pa té Bondjé ki té ka bay li sa fòrs-a, i ‘té ké vin fèb é i té ké kou tout ròt wonm-yan’ (Juges 14:5, 6 ; 16:17). Si sa moun tan-lontan té fò, a sèlman paské Jéova té ka bay yé fòrs.

2. Poukisa apot Pòl di ki i té fèb é an menm tan i té fò ? (2 Corinthiens 12:9, 10).

² Apot Pòl osi té savé ki i té ka dépann di fòrs Jéova ka bay (li 2 Corinthiens 12:9, 10). Pòl té gen problèm lasanté (Gal. 4:13, 14). Anplis di sa, détan, sa té rèd pou i té fè sa ki té bon (Rom. 7:18, 19). É sa rivé li enkyété so kò bokou, i jis té pè sa dimen té ké poté (2 Cor. 1:8, 9). Pourtan, lò i té fèb, i té ka vin fò. Kisa sa lé di ? Jéova té ka bay li fòrs i té bézwen-an. Jéova té ka fè l’ vin fò.

3. Ki késyon nou ké wè annan sa artik-a ?

³ Jéova ka promèt nou bay nou fòrs nou menm osi (1 Pierre 5:10). Mé nou pa pouvé krè ki nou ké gen sa fòrs-a si nou pa ka fè anyen pou i bay nou l’. Annou pran roun èkzanp : Roun motèr pouvé bay roun loto pwisans i bézwen pou vansé. Mé,  si moun-an ki ka roulé loto-a lé alé roun koté, i divèt pijé asou aksélératèr-a. Menm fason-an, Jéova paré pou bay nou fòrs nou bézwen-an, mé pou nou rousouvwè sa fòrs-a, i gen bagaj nou divèt fè. Atò, kisa Jéova ka sèrvi pou bay nou fòrs ? É kisa nou divèt fè pou i bay nou sa fòrs-a ? Pou nou réponn sa késyon-yan, annou wè kouman Jéova bay trwa moun annan Labib-a fòrs : profèt Jonas, Mari (manman Jézi) ké apot Pòl. Nou ké wè osi ki Jéova ka fè menm bagaj-a jòdla pou bay so sèrvitèr fòrs.

4. Kouman nou pouvé gen fòrs Jéova ka bay ?

⁴ Pou Jéova bay nou fòrs, a pou nou priyè l’. Pou réponn nou lapriyè, i ké bay nou « pwisans-a ki ka dépasé pwisans ki nòrmal-a » (2 Cor. 4:7). Nou pouvé pran fòrs osi lò nou ka li é lò nou ka réfléchi asou so Paròl (Ps. 86:11). Mésaj i ka bay nou annan Labib-a, « pwisan » (Héb. 4:12). Si to ka priyè é si to ka li Labib-a, i ké bay to fòrs pou to tchenbé, pou to kontinyé gen tchò kontan ouben pou to fè roun travay yé bay to fè ki difisil. Gadé kouman Jéova bay profèt Jonas fòrs.

5. Poukisa profèt Jonas té bézwen fòrs ?

⁵ Jonas té bézwen fòrs. Kou i té pè alé koté Jéova té voyé l’, i monté asou roun bato épi i alé rounòt koté. Akoz di sa, i manké mouri annan roun gran tanpèt épi akoz di li tout ékipaj-a manké mouri osi. Apré sa, yé jité l’ annan lanmè-a épi i rivé annan roun koté tout moun té ké pè : annan vant roun gro poson. Dapré to, kisa i rousanti ? Ès i di an so tchò ki i té ké mouri la ? Ès i pansé ki Jéova té fin ké li ? Nou pa savé sa i di an so tchò mé i té divèt enkyèt pou mouri.

6. Dapré Jonas 2:1, 2, 7, kisa ki bay Jonas fòrs lò i té annan vant poson-an ?

⁶ Kisa Jonas fè pou Bondjé bay li fòrs toupannan i té tousèl annan vant roun poson ? Pou koumansé, i priyè (li Jonas 2:1, 2, 7). Menm si i té dézobéyi, i répanti é i té sir ki Jéova té ké kouté so lapriyè. I réfléchi osi asou plizyèr vèrsé annan Ékritir-ya. Kouman nou savé sa ? Annan so lapriyè ki annan Jonas chapit 2, i gen plizyèr mo ké èsprésyon nou ka trapé annan Psaumes-yan osi (parèkzanp, konparé Jonas 2:2, 5 ké Psaume 69:1 ; 86:7). Aparaman, Jonas té byen konnèt sa Psaumes-yan. Kou Jonas réfléchi asou sa tèks-ya, i vin sir ki Jéova té ké idé li. É a sa ki fèt, poson-an mennen l’ atè. Aprézan, i té gen kouraj pou fè sa Bondjé té voyé li fè (Jon. 2:10 – 3:4).

7-8. Kouman roun frè ki ka rété Taywann ka trapé fòrs lò i gen éprèv ?

⁷ Lò nou ka jwenn tout kalité éprèv, istwè Jonas pouvé idé nou bokou. Zhiming b, roun frè ki ka rété Taywann, gen gro problèm santé. Anplis di sa, kou i ka adoré Jéova, so fanmi ka chaché baré so chimen. Mé i ka pran fòrs lò i ka priyè é lò i ka étidyé Labib-a. I ka di : « Détan, lò problèm ka tonbé anlè mo konsa mo tèlman enkyèt ki mo pa pouvé étidyé. » Magré sa, Zhiming pa ka bat dèyè. I ka di : « Pou koumansé, mo ka priyè Jéova. Apré sa, mo ka mété mo ékoutèr épi mo ka kouté kantik. Détan, mo jis ka chanté dousman jiktan mo vin  kalm. Apré sa mo pouvé koumansé étidyé. »

⁸ Gadé kouman Zhiming rivé pran fòrs lò i étidyé li rounso. Apré roun gro opérasyon, so globules rouj vin bas menm. Roun enfirmyèr di li ki yé té ké divèt bay li disan. Mé jou-a anvan i opéré, Zhiming té li istwè roun sò ki té fè menm kalité opérasyon-an. É globules rouj sa sò-a té désann pi bas pasé sopa ; pourtan, i pa té asèpté pran disan é i té géri kanmenm. Sa témwanyaj-a bay Zhiming fòrs pou i rété fidèl.

9. Si roun éprèv ka las to, kisa to pouvé fè ? (gadé zimaj-ya osi).

⁹ Lò to annan roun éprèv, ès détan to ka santi to tro enkyèt pou to rivé priyè ? Ouben to tro fèb pou to étidyé ? Si a sa, pa bliyé ki Jéova ka byen konprann to sitiasyon. Donk, menm si to ka fè roun lapriyè ki tou senp, to pouvé sir i ké bay to èkzaktéman sa to bézwen (Éph. 3:20). Si to pa ka rivé li ké étidyé paské roun bagaj ka fè to soufri ouben ka fè ki to pa ka santi to kò byen, to pouvé éséyé kouté Labib-a ouben nou piblikasyon. Sa pouvé ankourajé to osi si to ka kouté roun chanté ouben roun kantik ouben gadé roun vidéyo asou jw.org. Jéova lé fè to vin fò, é a sa i ké fè si to ka priyè l’ é si to k’alé chaché so répons annan Labib-a é annan tout ròt bagaj i ka bay nou.

10. Kouman nou frè ké sò-ya ka bay nou fòrs ?

¹⁰ Jéova ka sèrvi nou frè ké sò-ya osi pou i bay nou fòrs. Lò nou ka jwenn roun éprèv ouben nou gen roun bagaj pou fè mé ki rèd, yé pouvé sa roun « sours ki ka bay gran konsolasyon » (Col. 4:10, 11). A annan « jou malò-ya » èspésyalman nou bézwen nou zanmi (Prov. 17:17). Lò nou ka santi nou fèb, nou frè ké sò-ya pouvé bay nou sa nou bézwen, yé pouvé konsolé nou é yé pouvé ankourajé nou kontinyé sèrvi Jéova ké fidélité. Annou wè kouman Mari,  manman Jézi, pran fòrs òbò ròt moun ki té ka adoré Bondjé.

11. Poukisa Mari té bézwen fòrs ?

¹¹ Mari té bézwen fòrs. Imajiné sa i dèt rousanti lò zanj Gabriyèl vini di li ki i té ké gen roun rèsponsabilité ki pa té fasil menm ! I pa té maryé ; pourtan i té ké tonbé ansent. I pa té jen fè pyès timoun, épi men yé ka doumandé li lévé timoun-an ki té pou divini Mési-a. É kouman i té ké èspliké so fiyansé, Jozèf, ki i té ansent alòr ki i pa té janmen kouché ké pyès mouché ? (Luc 1:26-33).

12. Dapré Luc 1:39-45, kouman Mari jwenn fòrs i té bézwen-an ?

¹² Kouman Mari trapé fòrs pou i té pouvé fè sa bagaj-a ki té rèd é ki té èspésyal ? I alé doumandé ròt sèrvitèr Jéova idé li. Parèkzanp, i doumandé zanj Gabriyèl plis enfòrmasyon asou sa i té gen pou fè (Luc 1:34). Roun ti moso tan apré, i alé wè Élizabèt, roun moun di so fanmi, jik « pa bò d’ montangn-yan », an Jida. Érèzman i fè sa vwayaj-a, menm si i té long ! Lò i rivé, Élizabèt louwé li é Bondjé fè li di roun bèl profési asou timoun-an i té ké gen (li Luc 1:39-45). Apré sa, Mari di ki Jéova té « sèrvi so bra pou aji ké fòrs » (Luc 1:46-51). Wi, Jéova té sèrvi zanj Gabriyèl ké Élizabèt pou bay li fòrs.

13. Ki bénédiksyon roun sò Bolivi trapé lò i doumandé frè ké sò idé li ?

¹³ Kou Mari, to menm osi to pouvé pran fòrs òbò ròt sèrvitèr Bondjé. Dasuri, roun sò ki ka rété Bolivi, té bézwen sa fòrs-a. Kou so papa té gen roun maladi grav é ki i té ké mouri, Dasuri té lé rété lopital òbò li près tout tan (1 Tim. 5:4). A pa tout tan sa té fasil. I ka di : « Souvan, mo té ka di, awa mo pa pouvé ankò ». Ès Dasuri doumandé moun idé li ? O koumansman, non. I ka èspliké : « Mo pa té lé déranjé frè ké sò-ya. Mo té ka di an mo tchò : “A Jéova ki ké idé mo.” Mé mo randé mo kò kont ki lò mo té ka rété mo rounso annan mo kwen, mo té ka éséyé réglé mo problèm mo rounso » (Prov. 18:1). Donk, Dasuri désidé ékri plizyèr frè ké sò pou èspliké yé so sitiasyon. I ka di : « Sa frè ké sò-ya bay mo tèlman fòrs, mo pa menm pouvé èspliké sa. Yé mennen manjé pou mo lò mo té lopital é yé pran vèrsé annan Labib-a ké mo, pou ankourajé mo. Lò nou savé ki nou pa tousèl, sa bèl toubonnman ! Nou annan gran fanmi Jéova-a. A roun fanmi ki toujou paré pou bay roun koudmen, pou pléré ké nou é pou idé nou tchenbé annan nou éprèv. »

14. Poukisa sa enpòrtan pou nou asèpté ansyen-yan idé nou ?

¹⁴ Jéova ka sèrvi ansyen-yan osi pou bay nou fòrs. I ka sèrvi sa frè-ya ki gen èspéryans pou bay nou fòrs é pou ankourajé nou (Is. 32:1, 2). Atò, lò to enkyèt, pa ézité alé wè ansyen-yan. É lò yé ka propozé to idé to, pa pè asèpté. Paské Jéova pouvé sèrvi yé pou fè to divini fò.

15. Ki bèl èspwar tout krétyen-yan gen ?

¹⁵ Èspwar nou gen ki ka apiyé asou Labib-a pouvé bay nou fòrs (Rom. 4:3, 18-20). Vré krétyen-yan gen èspwar viv pou tout-tan, swa annan paradi-a asou latè-a, swa annan rwayonm-an annan syèl-a. Sa èspwar-a ka bay nou fòrs pou nou tchenbé annan éprèv-ya, pou nou  préché bon nouvèl-a é pou nou fè sa nou divèt fè annan asanblé-a (1 Thess. 1:3). A sa èspwar-a ki bay apot Pòl fòrs.

16. Poukisa apot Pòl té bézwen fòrs ?

¹⁶ Pòl té bézwen fòrs. Annan dézyèm lèt i ékri pou Korentyen-yan, i di ki i té kou roun vaz fèt ké latè gra é ki té frajil. I té « anba tout kalité présyon », ‘i pa té savé sa pou i té fè’, yé ‘pèrsékité l’’ é ‘yé jité l’ atè’. I jis manké mouri (2 Cor. 4:8-10). A sa i rakonté lò i té ka fè so trwazyèm vwayaj misyonèr. I patékò savé sa, mé a koumansé i té ka koumansé soufri. Roun patché moun ataké l’, bato i pran-an chalviré, yé arété l’, é i jis fè lajòl.

17. Dapré 2 Corinthiens 4:16-18, kisa ki bay Pòl fòrs pou i tchenbé annan éprèv-ya ?

¹⁷ Pòl trapé fòrs pou i tchenbé paské so lidé té asou èspwar i té gen-an (li 2 Corinthiens 4:16-18). Menm si i té ka rékonnèt ki so kò té ka « vin plizanpli malad », i pa té ka lésé sa dékourajé l’. O kontrèr, i té lé kontinyé gadé douvan. Pou li, èspwar i té gen di viv annan syèl-a té « plizanpli gran » ; sa èspwar-a té gen tèlman valò pou li ki i té paré pou sipòrté nenpòrt ki problèm. Paské i té ka réfléchi asou sa èspwar-a, i té ka santi ki i té ka « vini pi nòv chak jou ».

18. Kouman Tihomir ké so fanmi ka pran fòrs annan èspwar yé gen-an ?

¹⁸ Tihomir, roun frè ki ka rété Bilgari, ka pran fòrs osi annan èspwar i gen-an. I gen plizyèr lannen di sa, so ti frè, Zdravko, mouri annan roun aksidan. Tihomir té tris menm. Souvan, li ké so fanmi ka imajiné jou-a Jéova ké résisité moun mouri-ya. I ka èspliké : « Parèkzanp, nou ka imajiné ki koté nou ké wè Zdravko, ki manjé nou ké préparé pou li, kimoun nou ké envité pou fè lafèt é sa nou  ké rakonté li asou dèrnyé jou-ya. » Paské Tihomir ké so fanmi ka mété yé lidé asou èspwar yé gen-an, sa ka bay yé fòrs pou tchenbé épi antann ké pasyans jou-a Jéova ké résisité Zdravko.

19. Kisa to pouvé fè pou èspwar to gen-an vin pi fò ? (gadé zimaj-a osi).

¹⁹ Kouman to pouvé fè èspwar to gen-an vini pi fò ? Parèkzanp, si to gen èspwar viv pou tout-tan asou latè-a, réfléchi asou sa Labib-a ka di asou paradi-a (Is. 25:8; 32:16-18). Imajiné to lavi annan monn nouvo-a. Imajiné to kò annan sa lépòk-a. Kimoun to ka wè ? Kisa to ka tandé ? Kisa to ka rousanti ? Pou idé to imajiné kouman paradi-a ké fika, gadé zimaj paradi-a annan nou piblikasyon ouben gadé vidéyo chanté, kou Le Monde Nouveau, Juste à Notre Porte ouben Imagine ce Jour. Si nou ka mété nou lidé asou èspwar monn nouvo-a, nou ké santi ki problèm nou gen « la pou roun ti moman é yé pa lou » (2 Cor. 4:17). Gras a èspwar Jéova ka bay to, i ké fè to divini fò.

20. Lò nou ka santi nou fèb kouman nou pouvé pran fòrs ?

²⁰ Lò nou ka santi nou fèb, ‘Bondjé ka bay nou fòrs’ (Ps. 108:13). Jéova fè sa ki fo pou to gen sa fòrs-a. Donk, lò to bézwen moun idé to pou fè roun bagaj, pou tchenbé annan roun éprèv ouben pou kontinyé gen tchò kontan, priyè l’ ké tout to tchò é chaché so répons lò to ka étidyé. Asèpté to frè ké sò-ya ankourajé to. É pou fini, kontinyé mété to lidé asou bèl èspwar to gen-an. Atò, to ké « trapé fòrs ké bokou pwisans gras a fòrs [Bondjé] ki plen ké laglwar, pou [to] tchenbé rèd ké pasyans épi ké lajwa » (Col. 1:11).