ARTIK POU ÉTIDYÉ 40
KANTIK 30 Mon Ami, mon Dieu, mon Père
Jéova « ka géri sa-ya yé tchò krazé »
« I ka géri sa-ya yé tchò krazé, i ka pansé yé bobo » (PS. 147:3).
SA NOU KÉ ANPRANN
Jéova ka vréman gadé pou sa-ya yé tchò krazé. Sa artik-a ké montré nou kouman i ka soulajé nou lò nou ka soufri, é kouman, grasa li, nou pouvé konsolé ròt-ya.
1. Kisa Jéova ka rousanti pou so sèrvitèr-ya ?
JÉOVA ka wè tousa ki ka rivé so sèrvitèr. I ka wè lò nou tchò kontan é lò nou tris (Ps. 37:18). Mé i ka wè osi ki magré nou tchò ka fè nou mal, nou ka fè tousa nou pouvé pou nou adoré l’, é sa ka fè l’ plézi ! I vréman lé idé nou é konsolé nou.
2. Kisa Jéova ka fè pou sa-ya yé tchò krazé, é kisa nou divèt fè pou nou profité di sa i ka fè pou idé nou ?
2 Psaume 147:3 ka di ki Jéova ka ‘pansé bobo’ sa-ya yé tchò krazé. Donk, dapré sa vèrsé-a, Jéova ka pran tan swanyé sa-ya yé tchò krazé. Mé kisa nou divèt fè pou nou profité di tousa i ka fè pou swanyé nou ? Annou pran roun èkzanp. Roun bon dòktèr pouvé fè bokou bagaj pou roun moun ki blésé. Mé pou moun-an byen profité di sa dòktèr-a ka fè pou li, a pou i byen swiv sa i ka di li fè. Annan sa artik-a, nou ké wè sa Jéova fè moun ékri annan so Paròl pou sa-ya yé tchò krazé é nou ké wè kouman nou pouvé swiv konsèy i ka bay nou ké bokou lanmou.
JÉOVA KA DI NOU KI NOU GEN VALÒ POU LI
3. Poukisa roun patché moun ka pansé ki yé pa gen pyès valò ?
3 Malérèzman, jòdla, roun patché moun pa kontan ròt-ya, é akoz di sa, yé pouvé malmennen yé ouben fè yé krè ki yé pa gen pyès valò. Men sa roun sò yé ka aplé Helen a ka di : « Mo lévé annan roun fanmi koté mo paran pa té kontan mo. Mo papa té vyolan, é touléjou i té ka di nou ki nou pa té vo anyen. » Ès a sa ki rivé to osi ? Ès yé malmennen to ouben fè to santi ki to pa gen pyès valò ? Si a sa, sa pitèt rèd pou to krè ki roun moun pouvé vréman gadé pou to.
4. Dapré Psaume 34:18, di kisa Jéova lé nou sir ?
4 Menmsi yé malmennen to, to pouvé sir ki Jéova kontan to é ki to gen valò pou li. I « pròch di sa-ya yé tchò krazé » (li Psaume 34:18). Si to « dékourajé », sonjé ki Jéova wè bèl bagaj annan to tchò é i fè to vini òbò li (Jean 6:44). I toujou paré pou idé to pas to gen valò pou li.
5. Kisa fason Jézi trété sa-ya yé té ka méprizé ka anprann nou ?
5 Si nou ka gadé èkzanp Jézi, nou ké pouvé pi byen konprann sa Jéova ka rousanti pou nou. Lò Jézi té asou latè-a, i gadé pou sa-ya yé té ka méprizé é i té janti ké yé (Mat. 9:9-12). Lò roun madanm ki té gen roun maladi ki té grav manyen so lenj pas i té lé géri, Jézi konsolé l’ é i félisité l’ pas i té gen lafwa (Marc 5:25-34). Jézi ka imité so Papa di roun fason ki parfè (Jean 14:9). Donk, to pouvé sir ki to gen bokou valò pou Jéova, é ki i ka wè to bèl kalité, to lafwa, ké to lanmou pou li.
6. Kisa to pouvé fè si to ka pansé ki to pa gen valò ?
6 Kisa to pouvé fè si to ka pansé ki to pa gen valò ? Li é pran tan réfléchi asou vèrsé annan Labib ki ka montré ki to gen valò pou Jéova b (Ps. 94:19). Si to pa rivé fè roun bagaj to té prévwè, ouben si to dékourajé paské to pa ka rivé fè tousa ròt-ya ka fè, a pa pou to rèd ké to kò. Jéova pa ka janmen doumandé to fè plis ki sa to pouvé fè (Ps. 103:13, 14). É si yé maltrété to, ouben si yé fòrsé to fè mové bagaj sèksyèl, a pa pou to krè ki a di to fot. Pa janmen di ki to té ka mérité yé fè to sa ! Sonjé ki pou Jéova, a sa-ya ki ka fè mové bagaj ki koupab, a pa sa-ya ki soufri anba yé lanmen (1 Pierre 3:12). Sandra, yé maltrété lò i té toupiti, ka di : « A souvan mo ka doumandé Jéova idé mo wè mo kò kou li menm ka wè mo. »
7. Kouman nou pouvé sèrvi sa ki rivé nou ?
7 Pa janmen bliyé ki Jéova pouvé itilizé to pou idé ròt moun. Sonjé lònò i ka bay to : to pouvé travay ansanm ké li lò to ka préché (1 Cor. 3:9). Sa ki rivé to pouvé idé to pi byen konprann sa ròt-ya ki ka soufri ka rousanti. To pouvé idé yé bokou. A sa ki rivé Helen nou ja palé anvan. Yé idé l’ é aprézan, i pouvé idé ròt moun. Men sa i ka di : « Anvan, mo té ka pansé ki mo té sa roun “initil”, mé Jéova fè mo santi ki i kontan mo é i ka itilizé mo pou idé ròt-ya. » Jòdla, Helen pyonyé pèrmanan é so tchò kontan.
JÉOVA LÉ NOU ASÈPTÉ I PARDONNEN NOU
8. Dapré Isaïe 1:18, di kisa nou pouvé sir ?
8 Roun ran Témwen Jéova ka soufri toujou lò yé ka sonjé péché yé fè, ki a anvan, ki a apré yé batizé. Mé Jéova bay ranson-an paské i kontan nou bokou. É i lé nou asèpté so kado. I ka di nou ki nou pouvé sir ki si nou ka « ranjé tout bagaj c » ké li, i pa ké tchenbé kont di nou péché ankò (li Isaïe 1:18). Nou ka di Jéova mèrsi pas i pa ka sonjé péché nou fè anvan. Parkont, i pa ké janmen bliyé bon bagaj nou fè (Ps. 103:9, 12 ; Héb. 6:10).
9. Poukisa nou divèt mété nou lidé asou sa nou ka fè jòdla ké asou sa Bondjé ka promèt nou pou dimen ?
9 Si to ka soufri toujou akoz di bagaj to fè anvan, mété to lidé asou sa to ka fè jòdla é asou sa Jéova ka promèt to pou dimen. Annou palé di apot Pòl. A pa ti pèrsékité i té pèrsékité krétyen-yan é i té ka rigrété sa i té fè. Mé i té savé ki Jéova té pardonnen li (1 Tim. 1:12-15). Ès i té ka kontinyé sonjé péché i té fè anvan ? Nou pouvé pansé ki i pa té ka fè sa, menm fason i pa té ka mété so lidé asou sa i té fè anvan i divini krétyen (Phil. 3:4-8, 13-15). Parkont, i té ka préché ké bon balan, é i té ka gadé douvan. Kou Pòl, to pa pouvé chanjé sa to fè. Mé jòdla, to pouvé bay Jéova lònò annan to sitiasyon épi sonjé bèl bagaj i ka promèt to pou dimen !
10. Kisa nou pouvé fè si nou fè moun soufri anvan ?
10 É si to tris paské to fè bagaj ki fè roun ran moun soufri ? Fè tousa to pouvé pou ranjé bagaj-ya ké yé. Parèkzanp, pou koumansé, doumandé yé pardon ké tout to tchò (2 Cor. 7:11). Anplis di sa, doumandé Jéova idé sa-ya ki ka soufri akoz di sa to fè. I pouvé idé to ké sa-ya to fè soufri pou zòt pouvé tchenbé rèd é pou zòt viré gen lapè annan zòt tchò.
11. Kisa sa ki rivé Jonas ka anprann nou ? (gadé zimaj-a osi).
11 Sèrvi sa to fè ki pa bon pou to vin miyò, é lésé Jéova itilizé to kou i lé. Sonjé profèt Jonas. Jéova té doumandé l’ alé Niniv, mé a pa sa i fè, i alé rounòt koté. Mé so Bondjé korijé l’ é Jonas sèrvi sa i té fè ki pa té bon pou i vin miyò (Jon. 1:1-4, 15-17 ; 2:7-10). Kanta Jéova li menm, i pa arété fè so profèt konfyans. I roubay li lokazyon alé Niniv. Sa maré-a, Jonas obéyi lanmenm. I té ka rigrété sa i té fè mé sa pa anpéché l’ asèpté fè sa Jéova té ka di li fè (Jon. 3:1-3).
Roun gro poson valé Jonas, mé Jéova sové l’ é i roudoumandé l’ alé Niniv pou préché so mésaj (gadé paragraf 11).
JÉOVA KA BAY NOU SO LÈSPRI SEN POU KONSOLÉ NOU
12. Lò roun malò ka tonbé asou nou, kisa nou divèt fè pou Jéova bay nou so lapè ? (Philippiens 4:6, 7).
12 Lò roun malò ka tonbé anlè nou, Jéova ka konsolé nou ké so lèspri sen. Ron ké Carol, ki pédi yé pitit pas i tchwé so kò, ka di : « A pa prémyé fwa nou té gen gro problèm, mé sa-la té pi rèd pasé yé tout. Souvan, nou pa té ka dronmi lannwit, donk nou té ka priyè Jéova é nou té ka rousanti lapè Pòl ka palé annan Philippiens 4:6, 7 » (li). Si to tchò krazé akoz di roun bagaj ki rivé to, byen di Jéova sa to ka rousanti. É to pouvé palé ké li lò to lé é kantité tan to lé (Ps. 86:3 ; 88:1). Doumandé li so lèspri sen toulong, i ké toujou kouté to (Luc 11:9-13).
13. Kouman lèspri sen Jéova-a pouvé idé to kontinyé sèrvi l’ é rété fidèl ? (Éphésiens 3:16).
13 Ès roun bagaj ki té rèd fè to pédi to fòrs ? Si a sa, lèspri sen pouvé bay to fòrs pou to kontinyé sèrvi Jéova é pou to rété fidèl (li Éphésiens 3:16). Annou gadé sa roun sò yé ka aplé Flora di. Li ké so mari té misyonèr. Malérèzman, so mari tronpé l’ é yé divòrsé. Men sa i ka di : « Kou i té trayi mo, mo té tris toubonnman é a sa rounso mo té ka sonjé. Mo doumandé Jéova so lèspri sen pou mo kontinyé sèrvi l’, é menmsi o koumansman mo té krè ki sa pa té posib, i bay mo sa mo té bézwen pou mo té géri. » Flora sir ki Jéova idé l’ fè li plis konfyans é ki i ké idé l’ annan tout éprèv i ké jwenn. I ka di : « Mo wè ki Psaume 119:32 vré. Sa vèrsé-a ka di : “Mo ké présé swiv to koumannman, pas to ka bay mo roun tchò ki paré pou kouté.” »
14. Kouman nou pouvé lésé lèspri Bondjé idé nou ?
14 Lò to ka priyè Jéova pou doumandé l’ so lèspri sen, kisa to pouvé fè dèyè sa ? Fè bagaj ki ké idé to rousouvwè plis lèspri sen. Parèkzanp, alé annan réinyon-yan é alé préché. Li Paròl Jéova-a chak jou. Sa ké idé to réfléchi asou fason i ka pansé (Phil. 4:8, 9). Lò to ka li Labib, réfléchi asou istwè moun ki jwenn problèm, épi gadé kouman Jéova idé yé tchenbé. A sa Sandra nou palé anvan-an fè lò i té gen bokou problèm annan so lavi. I ka di : « Istwè Jozèf ka ankourajé mo bokou. I pa lésé ni éprèv-ya, ni sa ki rivé l’ ki pa té jis fè so lanmityé ké Jéova fébli » (Gen. 39:21-23).
JÉOVA KA SÈRVI NOU FRÈ KÉ SÒ-YA POU KONSOLÉ NOU
15. Kimoun ki pouvé konsolé nou, é kouman yé pouvé fè l’ ? (gadé zimaj-a osi).
15 Lò nou ka soufri, nou frè ké sò-ya pouvé divini « roun sours ki ka bay gran konsolasyon » (Col. 4:11). Jéova ka sèrvi yé pou montré nou ki i kontan nou. Yé pouvé pran tan kouté nou lò nou ka louvri nou tchò pou yé ouben rété la ké nou pou konsolé nou. Yé pouvé li roun vèrsé annan Labib d ouben priyè ké nou pou rasiré nou (Rom. 15:4). Yé pouvé fè nou sonjé kouman Jéova ka wè nou sitiasyon é sa ka idé nou kontinyé tchenbé. É yé pouvé fè ròt bagaj pou idé nou osi. Parèkzanp, yé pouvé fè manjé pou nou lò nou pa ka santi nou kò byen.
Lò to gen zanmi ki gen èspéryans é ki to pouvé fè konfyans, yé pouvé konsolé to épi soutni to (gadé paragraf 15).
16. Si nou lé nou frè ké sò-ya idé nou, détan, kisa nou ké divèt fè ?
16 Détan, nou ké divèt doumandé nou frè ké sò-ya idé nou. Yé kontan nou é yé lé soutni nou (Prov. 17:17). Mé sa pa lé di ki yé savé sa nou ka rousanti ouben sa nou bézwen (Prov. 14:10). Si to tchò krazé, pa ézité palé ké roun bon zanmi épi di l’ sa to ka rousanti. Di li sa i pouvé fè pou i idé to. To pouvé palé ké roun ouben dé ansyen to kontan osi. I gen sò ki trapé soulajman lò yé alé palé ké rounòt sò ki gen èspéryans.
17. Kisa ki pouvé anpéché nou rousouvwè ankourajman, é kisa nou pouvé fè pou sa ?
17 Pa rété annan to kwen. Détan, lò nou tchò ka fè nou mal, nou pa anvi wè pyès moun. Anplis di sa, pitèt nou frè ké sò-ya pa ké konprann nou ouben yé ké di bagaj ki ké fè nou lapenn (Jacq. 3:2). Mé pa rété asou sa. Jéova ka sèrvi to frè ké sò-ya pou ankourajé to. Roun ansyen yé ka aplé Gavin é ki ka fè déprésyon ka di : « Souvan, mo pa lé wè mo zanmi. » Mé i pa ka rété asou sa é kou i ka pasé tan ké so frè ké sò, sa ka idé l’. Men sa roun sò yé ka aplé Amy ka di li menm : « Akoz di sa mo viv, sa rèd pou mo fè ròt-ya konfyans. Mé mo ka anprann kontan mo frè ké sò é fè yé konfyans kou Jéova ka fè l’. Mo savé ki sa ka fè l’ plézi é sa ka fè mo tchò kontan mo menm osi. »
ANNOU PRAN KOURAJ : JÉOVA KA PROMÈT KI I KÉ GÉRI NOU
18. Di kisa nou pouvé sir pou dimen, é kisa nou divèt fè dipi aprézan ?
18 Nou pouvé sir ki dimen, lavi-a ké bèl. Wi, Jéova ké tiré tout maladi é nou tchò pa ké fè nou mal ankò (Rév. 21:3, 4). A sa moman-an, sa ki ka fè nou soufri jòdla « pa ké vin annan nou tchò pou troumanté nou » ankò (Is. 65:17). Mé kou nou wè l’, Jéova ‘ka pansé nou bobo’ dipi aprézan. Donk, fè tousa to pouvé pou to profité di tousa Jéova ka fè pou konsolé nou ké soulajé nou. A pou to sir ki ‘i ka pran swen di to’ (1 Pierre 5:7).
KANTIK 7 Jéova, to sa mo fòrs
a Yé chanjé déztrwa non.
b Gadé karé-a « To gen valò pou Jéova ».
c Pou « ranjé tout bagaj » ké Jéova, nou divèt doumandé l’ pardon épi arété fè sa ki pa bon pou nou montré l’ ki nou répanti. Si nou fè roun péché ki grav, nou divèt doumandé ansyen-yan annan asanblé-a idé nou osi (Jacq. 5:14, 15).
d Parèkzanp, gadé vèrsé-ya annan liv Versets pour la vie chrétienne annan parti « Inquiétudes » ké « Réconfort ; consolation ».
