I té gen roun ti antré douvan Sen-an é a la yé té ka pasé pou antré annan Tanp-a. Anvan 2023, Traduction du monde nouveau-a té ka di ki longèr sa ti antré-a té ka fè 20 koudé (a té larjèr Tanp-a) é so rotò té ka fè 120 koudé (2 Chron. 3:4). Ròt tradiksyon ka di osi ki so rotò té ka fè « 120 koudé ». Sa té ké lé di ki a té ké roun tour ki té ké fè 53 mèt !

Mé Traduction du monde nouveau-a ki soti an 2023 ka di ki rotò sa ti antré-a té ka « fè 20 koudé », sa lé di apéprè 9 mèt a. Annou wè poukisa sa chanjé.

Annan 1 Rois 6:3 yé pa ka palé di rotò sa ti antré-a. Annan sa vèrsé-a, Jérémi ka bay longèr antré-a, i ka palé di konmyen mèt i ka fè douvan jik dèyè, mé i pa ka palé di so rotò. Épi annan chapit 7-a, i ka di bagaj asou plizyèr parti di Tanp-a. Parèkzanp, i ka palé di dé kolonn ki fèt ké kwiv ki té douvan ti antré-a. I ka palé osi di bésin ki fèt ké métal yé fonn yé té ka aplé lanmè épi di dis kabouré-ya (1 Rois 7:15-37). Si rotò ti antré-a té ka fè plis pasé 50 mèt é té ka dépasé larèstan Tanp-a, poukisa Jérémi pa di anyen asou sa ? Épi plizyèr syèk pita, sèrten istoryen jwif ékri pou di ki ti antré-a pa té pi ròt pasé larèstan tanp Salomon-an.

Èspésyalis-ya ka pansé ki mir Tanp-a pa té asé gro pou ti antré-a fè 120 koudé. Tan-lontan, lò yé té ka konstrwi roun gro bagaj ké ròch ouben ké brik, kou lapòt tanp-ya an Éjip, anba yé té ka fè l’ larj é laro yé té ka fè l’ pi piti. Mé a pa konsa yé fè tanp Salomon-an. Èspésyalis-ya ka pansé ki mir Tanp-a té pès di 6 koudé, sa lé di 2,7 mèt. Roun istoryen yé ka aplé Théodore Busink ka di ki lò to ka gadé mir Tanp-a, ti antré-a pa té pouvé fè 120 koudé.

Lò yé kopyé sa ki marké annan 2 Chroniques 3:4, pitèt yé fè roun fot. Menmsi i gen tèks tan-lontan koté yé mété « 120 » annan sa vèrsé-a, annan ròt tèks kou Codex Alexandrinus yé ékri o 5^è syèk ké Codex Ambrosianus yé ékri o 6^è syèk, yé mété « 20 koudé ». Poukisa nou pouvé pansé ki roun moun ki té ka roukopyé Labib pitèt ékri « 120 » pasé i ékri « 20 koudé » ? Paské annan lang ébré-a « san » ké « koudé » ka sanblé bokou. Donk, pitèt i ékri « san » pasé i ékri « koudé ».

A vré, menmsi nou kontan savé sa kalité bagaj-ya é ki nou lé imajiné tanp Salomon-an kou i té fika, sa ki pi enpòrtan, a sa sa Tanp-a ka réprézanté : gran tanp èspirityèl-a. A pa dé mèrsi nou ka di Jéova mèrsi pas i envité nou adoré l’ annan sa tanp-a ! (Héb. 9:11-14 ; Rév. 3:12 ; 7:9-17).