1. Kisa nou divèt konprann si nou lé anprann kontan étidyé profési-ya ki annan Labib-a ?

 BEN, nou ja palé annan ròt artik-a, ka di : « Mo kontan étidyé profési-ya ki annan Labib-a bokou ». Ès to kontan sa to menm osi ? Ouben ès to ka pansé ki yé tro rèd pou konprann ? Lò to ka étidyé yé pitèt menm sa ka fatigé to. Mé, pitèt to pouvé chanjé lidé si to ka konprann pi byen poukisa Jéova fè moun ékri profési annan so Paròl.

2. Kisa nou ké wè annan sa artik-a ?

² Annan sa artik-a, nou ké wè poukisa nou divèt pran tan gadé profési-ya ki annan Labib-a, mé osi kouman nou divèt étidyé yé. Apré sa, nou ké wè dé profési annan liv Daniel ; nou ké wè poukisa yé itil pou nou jòdla.

3. Kisa nou divèt fè pou nou konprann profési-ya ki annan Labib-a ?

³ Pou nou konprann profési-ya ki annan Labib-a, nou divèt doumandé roun moun idé nou. Imajiné sa : To ka vizité roun koté to pa konnèt, mé to gen roun zanmi la ké to ki byen konnèt sa koté-a li menm. I savé èkzaktéman ki koté zòt fika épi ki koté chak chimen ka mennen. To divèt byen kontan i asèpté vini ké to. Menm fason-an, Jéova kou sa zanmi-a ki ka idé nou, i byen savé sa dimen ké poté. Donk, pou nou konprann profési-ya, a ké imilité nou divèt doumandé li idé nou (Dan. 2:28 ; 2 Pierre 1:19, 20).

4. Poukisa Jéova fè moun ékri profési annan so Paròl ? (Jérémie 29:11 ; gadé zimaj-a osi).

 ⁴ Kou tout papa ké manman ki kontan yé timoun, Jéova lé so timoun gen roun bèl lavi dimen (li Jérémie 29:11). Parkont, Jéova li menm pouvé di sa dimen ké poté san i pa jen tronpé so kò. I fè moun ékri profési annan so Paròl pou nou savé ki bagaj enpòrtan ké fèt dimen (Is. 46:10). Profési-ya ki annan Labib-a, a roun bèl kado nou Papa ki annan syèl-a fè nou. Mé kouman to pouvé sir ki sa Labib-a ka di ké réyalizé ?

5. Kisa èkzanp Max pouvé anprann jennjan-yan ?

⁵ Lò yé lékòl, nou jennjan-yan souvan an mitan moun ki pa gen bokou rèspè pou Labib-a ouben menm pa ka rèspèkté l’ pyès. Fason sa moun-yan ka aji ké sa yé ka di, pouvé fè nou jennjan-yan douté. Roun frè yé ka aplé Max ka di : « Lò mo té jennjan, mo koumansé gen dout. Mo té ka doumandé mo kò si mo papa ké mo manman té ka anprann mo vré rélijyon-an é si Labib-a té ka vréman vini di Bondjé. » Kisa so manman ké so papa fè ? I ka di : « Yé rété kalm, menm si mo savé ki yé té enkyèt. » Papa ké manman Max sèrvi Labib-a pou réponn so késyon. É Max li menm, kisa i fè ? I ka èspliké : « Mo menm, mo étidyé profési-ya ki annan Labib-a é mo palé di sa mo té ka anprann ké ròt jennjan annan asanblé-a. » Kouman sa idé l’ ? I ka di : « Sa pèrmèt mo sir ki Labib-a ka vini di Bondjé ! »

6. Si to gen dout, kisa to divèt fè, é poukisa ?

⁶ Si, kou Max, to ka koumansé douté ki Labib-a ka di lavérité, pa ronté. Parkont, pa rété la san to pa fè anyen. Zafè douté-a, a kou larouy. Si i ka ataké roun bagaj ki gen bokou valò é nou pa ka fè anyen pou sa, i ka riské manjé l’. Si « larouy » koumansé ataké to lafwa, a pou to tiré l’ lanmenm. Pou fè sa, doumandé to kò : « Ès mo ka krè sa Labib-a ka di asou sa dimen ké poté ? » Si to pa sir, étidyé profési-ya annan Labib-a ki ja fèt. Annou wè kouman to pouvé fè sa.

7. Ki bon èkzanp Danyèl ka bay nou ? (Daniel 12:10 ; gadé zimaj-a osi).

⁷ Pou nou savé kouman nou divèt étidyé profési-ya ki annan Labib-a, annou wè èkzanp Danyèl. I té ka étidyé ké bon mantalité-a, sa lé di pou konnèt lavérité. Anplis di sa, i té gen imilité. I té savé ki Jéova té ké idé l’ konprann profési-ya si i té ka rété pròch ké li é si i té ka kontinyé rèspèkté so prensip ki pròp (Dan. 2:27, 28 ; li Daniel 12:10). É i montré ki i té gen imilité, i toujou konté asou Jéova pou i idé li (Dan. 2:18). Pou fini, i té ka pran tan byen étidyé. I té ka fè réchèrch annan liv Labib-a i té gen annan so lépòk (Jér. 25:11, 12 ; Dan. 9:2). Kouman to pouvé imité l’ ?

8. Poukisa roun ran moun ka étidyé profési-ya ki annan Labib-a, mé nou menm, kisa nou divèt fè ?

 ⁸ Réfléchi asou sa ki ka pousé to étidyé profési-ya. Ès to ka étidyé profési-ya paské to vréman lé konnèt lavérité-a ? Si a sa, Jéova ké béni éfòr to ka fè (Jean 4:23, 24 ; 14:16, 17). Pou ki ròt bagaj roun moun té ké pouvé lé étidyé profési-ya ki annan Labib-a ? Roun ran ka fè l’ pou trapé prèv ki Labib-a pa ka vini di Bondjé. Lò yé ka fè sa, yé ka pèrmèt yé kò désidé yé menm sa ki bon ké sa ki mové, épi viv kou yé lé. Mé nou divèt étidyé pou bon rézon-yan. Mé ès a sa sèlman ? Non. Pou nou rivé konprann profési-ya ki annan Labib-a, i gen roun kalité nou divèt gen osi.

9. Ki kalité nou blijé gen pou nou konprann profési-ya ki annan Labib-a ?

⁹ A pou to gen imilité. Jéova ka promèt idé sa-ya ki gen imilité (Jacq. 4:6). Si nou lé konprann profési-ya ki annan Labib-a, a pou nou doumandé li idé nou. Nou divèt rékonnèt osi ki nou bézwen èsklav fidèl ké avizé-a idé nou. A li Jéova ka itilizé pou bay nou manjé èspirityèl-a nou bézwen o bon moman (Luc 12:42). Jéova sa roun Bondjé ki pa kontan dézòrd. Donk sa nòrmal si a sa èsklav-a rounso i ka sèrvi pou idé nou konprann vérité-ya ki annan so Paròl (1 Cor. 14:33 ; Éph. 4:4-6).

10. Kisa èkzanp Esther ka anprann to ?

¹⁰ Pran tan byen étidyé. Koumansé ké roun profési to kontan, épi fè réchèrch asou li. Annou palé di Esther nou ja palé annan ròt artik-a. I té lé anprann plis bagaj asou profési-ya ki té ka anonsé ki Mési-a té ké rivé. I ka èspliké : « Lò mo té gen 15 lannen, mo koumansé chaché prèv ki yé té byen ékri sa profési-ya anvan lépòk Jézi. » Sa i li asou roulo lanmè Mòrt-a fè li sir di sa. I ka di : « Yé ékri roun ran annan sa roulo-ya anvan lépòk Jézi. Donk, sa profési-ya blijé vini di Bondjé. » I ka di osi : « Mo rouli sa enfòrmasyon-yan plizyèr fwa pou mo té pouvé rivé konprann yé. » Mé i kontan i fè tout sa éfòr-ya. Kou i pran tan étidyé plizyèr profési, i ka di : « Mo randé mo kò kont mo menm ki sa Labib-a ka di, vré. »

11. Poukisa sa bon pou nou vérifyé nou menm ki sa Labib-a ka di, vré ?

¹¹ Lò nou ka konprann kouman roun ran profési annan Labib-a réyalizé, sa ka pèrmèt nou fè Jéova plis konfyans é nou sir ki i toujou ka fè nou maché asou bon chimen-an. Anplis di sa, lò nou ka wè sa sa profési-ya ka di pou dimen, nou ka rété pozitif kèlkéswa éprèv nou ka jwenn. Aprézan, annou wè dé profési Danyèl ékri é ki ka fèt jòdla. Si nou ka konprann yé, sa ké pèrmèt nou pran bon désizyon.

12. Kisa pyé-ya ki fèt ké « fè ansanm ké latè gra » ka réprézanté ? (Daniel 2:41-43).

¹² (Li Daniel 2:41-43.) Rwa Nabikodonozòr fè roun rèv Danyèl èspliké li. I wè  roun èstati. So pyé té fèt ké « fè ansanm ké latè gra ». Lò nou ka konparé sa profési-a ké ròt profési annan liv Daniel ké liv Révélation-an, nou ka konprann ki pyé èstati-a ka réprézanté pwisans anglé ké amériken-an, sa lé di pi gran pwisans-a ki ka dirijé jòdla. Lò i palé di sa pwisans-a Danyèl di ki ‘roun parti té ké fò é roun parti té ké frajil’. Poukisa ‘roun parti té ké frajil’ ? Paské latè gra, sa lé di pèp-a, ka anpéché l’ aji roun fason ki rèd, kou fè-a b.

13. Ki bagaj enpòrtan profési-a nou ka étidyé ka pèrmèt nou konprann ?

¹³ Fason Danyèl palé di èstati-a, èspésyalman di so pyé, ka anprann nou roun patché bagaj enpòrtan. Prémyèrman, pwisans anglé ké amériken-an montré plizyèr fwa ki i pwisan. Parèkzanp i té annan sa-ya ki ganyen Prémyé ké Dézyèm Lagèr mondyal-a. Mé, i vin fèb é i ka kontinyé vin pi fèb paské moun-yan annan sa koté-ya ka briga ké yé konpanyen épi ké gouvèrnman-an. Dézyèmman, lò rwayonm Bondjé-a ké krazé tout gouvèrnman-yan, sa pwisans-a ké la toujou ; pyès ròt pwisans pa gen pou vini apré li. Menm si détan ròt nasyon ka briga ké li, yé pa ké ranplasé l’. Nou savé sa paské « ròch »-a ki ka réprézanté rwayonm Bondjé-a ké kayakaya pyé èstati-a, ki ka réprézanté alyans anglé ké amériken-an (Dan. 2:34, 35, 44, 45).

14. Poukisa nou ka di ki si nou ka konprann profési-a asou èstati-a ké pyé-ya ki fèt ké fè ké latè gra-a, sa ké pèrmèt nou pran bon désizyon ?

¹⁴ Ès to sir ki to pouvé krè profési-a asou èstati-a ké pyé-ya ki fèt ké fè ké latè gra ? Si to sir di sa, sa ké aji asou fason to ka désidé itilizé to lavi. Kou to savé ki sa monn-an ké fini titalò, to pa ké chaché gen roun patché soumaké pou to an sékirité (Luc 12:16-21 ; 1 Jean 2:15-17). Si to ka konprann sa profési-a, to ké konprann osi ki sa enpòrtan pou to préché é pou to ansényé moun-yan (Mat. 6:33 ; 28:18-20). Donk doumandé to kò : « Ès sa mo ka désidé fè annan mo lavi ka montré ki mo sir ki rwayonm Bondjé-a ké fini ké tout gouvèrnman-yan asou latè-a titalò ? »

15. « Rwa di Nòr »-a ké « rwa di Sid »-a, a kimoun jòdla ? (Daniel 11:40).

¹⁵ (Li Daniel 11:40.) Daniel chapit 11 ka palé di dé rwa, sa lé di dé pwisans politik ki ka briga pou yé dirijé monn-an. Lò nou ka konparé sa profési-a ké ròt profési annan Labib-a, nou ka konprann ki « rwa di Nòr »-a, a Larisi ké tout so asosyé, épi « rwa di Sid »-a, a pwisans anglé ké amériken-an c.

16. Sèrvitèr Jéova-ya ki ka rété annan péyi « rwa di Nòr »-a ka dirijé ka jwenn ki problèm ?

¹⁶ I gen frè ké sò ki ka rété annan péyi « rwa di Nòr »-a ka dirijé. É sa rwa-a ka pèrsékité yé. Yé ka bat roun ran annan yé é yé ka mété yé lajòl akoz di yé lafwa. Mé pasé yé pè « rwa di Nòr »-a, yé lafwa ka vin pi fò. Poukisa ? Paské yé savé ki profési-ya ki annan liv Daniel-a té ka anonsé ki yé té ké pèrsékité pèp Bondjé-a d (Dan. 11:41). Lò nou savé sa, sa  pouvé idé nou kontinyé gen èspwar épi rété fidèl.

17. Sèrvitèr Jéova-ya ki ka rété annan péyi « rwa di Sid »-a ka dirijé ka jwenn ki problèm ?

¹⁷ Tan-lontan, « rwa di Sid »-a pèrsékité sèrvitèr Jéova-ya osi. Parèkzanp, pannan Prémyé ké Dézyèm Lagèr mondyal-ya, yé mété plizyèr frè ké sò lajòl paské yé pa té ka mélé annan lapolitik épi yé mété roun ran timoun Témwen Jéova dèrò di yé lékòl pou sa osi. Mé dipi plizyèr lannen, sèrvitèr Jéova-ya ki ka rété annan péyi sa rwa-a ka dirijé, ka jwenn ròt kalité éprèv. Parèkzanp, annan roun kanpagn élèktoral, roun krétyen pouvé anvi soutni roun parti politik ouben roun kandida pasé rounòt. Pitèt i pa ké alé voté pou roun kandida mé ès i pa ké pran parti annan so tèt ? Sa vréman enpòrtan pou nou pa mélé annan lapolitik. Donk annou fè atansyon pou nou pa pran parti ni annan sa nou ka fè, ni annan nou tèt, ni annan nou tchò ! (Jean 15:18, 19 ; 18:36).

18. Lò nou ka wè ki « rwa di Nòr »-a ké so lèlmi ka briga, kisa sa ka fè nou ? (gadé zimaj-a osi).

 ¹⁸ Lò sa-ya ki pa gen lafwa annan profési-ya ki annan Labib-a ka wè « rwa di Sid »-a « briga » ké « rwa di Nòr »-a, sa pouvé fè yé enkyèt bokou (Dan. 11:40, nòt). Sa dé rwa-ya gen sa yé ka aplé armes nucléaires ki pouvé tchwé tousa i gen asou latè-a. Mé nou savé ki Jéova pa ké lésé yé fè sa (Is. 45:18). Donk nou pa enkyèt lò nou ka wè ki « rwa di Nòr »-a ké « rwa di Sid »-a ka briga. Sa pito ka fè nou lafwa vin pi fò. Sa ka montré ki sa sistèm-an pròch fini.

19. Lò nou pa savé kouman roun profési ké fèt, kisa nou divèt di nou kò ?

¹⁹ Nou pa savé kouman roun ran profési ké réyalizé. A pa tout tan profèt Danyèl li menm té ka konprann sa i té ka ékri (Dan. 12:8, 9). Mé a pa paské nou pa savé èkzaktéman kouman roun profési ké fèt, ki i pa ké fèt. Nou pouvé sir ki Jéova ké di nou o bon moman sa nou divèt savé, kou i fè l’ tan-lontan (Amos 3:7).

20. a) Ki bèl profési nou ké wè fèt titalò ? b) Kisa nou divèt kontinyé fè ?

²⁰ Lò yé ké di « Lapè ké sékirité ! », pwisans politik-ya annan sa monn-an ké ataké fo rélijyon-an é yé ké krazé l’ (1 Thess. 5:3 ; Rév. 17:16, 17). Apré sa, yé ké ataké sèrvitèr Jéova-ya (Ézéch. 38:18, 19). Sa ké mennen nou dirèktéman annan lagèr Armagédon-an (Rév. 16:14, 16). Nou pouvé sir ki sa ké fèt titalò. An atandan, annou kontinyé byen gadé profési-ya ki annan Labib-a é annou ankourajé ròt-ya fè menm bagaj-a pou nou montré nou Papa ki annan syèl-a é ki kontan nou, ki nou gen rékonésans.