1. Poukisa to kontan moun ki ka pran pasyans ?

 NOU tout nou kontan moun ki gen pasyans. Nou ka rèspèkté sa-ya ki konnèt antann roun bagaj san yé pa nèrvé. Nou kontan lò ròt-ya ka pran pasyans ké nou lò nou ka fè bagaj ki pa bon. Nou byen kontan moun-an ki étidyé Labib-a ké nou pran pasyans ké nou ; roun patché annan nou pa té ka rivé konprann, asèpté ouben apliké sèrten bagaj annan Labib-a. É pi enpòrtan-an, nou byen kontan Jéova pran pasyans ké nou (Rom. 2:4).

2. Annan ki sitiasyon sa pitèt rèd pou nou gen pasyans ?

² Nou kontan lò ròt-ya ka pran pasyans. Mé ès détan nou menm nou ka trouvé sa rèd pou nou pran pasyans ? Parèkzanp, ès sa rèd pou nou rété kalm lò nou annan roun anboutéyaj, èspésyalman si nou an rétar ? Ès nou pa ka rivé tchenbé nou kò lò roun moun ka nèrvé nou ? Ouben ès détan sa rèd pou nou kontinyé antann jiktan monn nouvo Jéova promèt nou-a rivé ? Ès to té ké lé gen plis pasyans ? Annan sa artik-a, nou ké wè kisa sa lé di gen pasyans, poukisa sa enpòrtan toubonnman pou nou gen pasyans, é kouman nou pouvé gen plis pasyans.

3. Kouman roun moun ki gen pasyans ka réyaji lò yé ka provoké l’ ?

³ Annou wè kat fason roun moun pouvé montré i gen pasyans. Prémyèrman, roun moun ki gen pasyans pa ka kouri faché. I ka fè éfòr pou i rété kalm lò i èstrésé ouben lò roun moun ka provoké li, é i pa ka randé kou pou kou. Prémyé fwa nou ka wè « pa ka kouri faché » annan Labib-a, a pou palé di Jéova. Nou ka trouvé sa annan Exode 34:6, koté yé ka di ki i sa roun « Bondjé ki plen ké pityé  ké tandrès, i pa ka kouri faché, i plen ké lanmou fidèl é i toujou ka di lavérité ».

4. Kouman roun moun ki gen pasyans ka réyaji lò i divèt antann ?

⁴ Dézyèmman, roun moun ki gen pasyans, a roun moun ki konnèt antann jantiman. Si roun bagaj ka pran plis tan ki sa i té prévwè, i ka fè éfòr pou i pa nèrvé é pou i pa kòlè (Mat. 18:26, 27). I gen roun patché sitiasyon koté nou divèt antann jantiman. Parèkzanp, lò roun moun ka palé, nou divèt pran tan kouté li san nou pa koupé so paròl (Job 36:2). Nou pouvé bézwen pasyans osi pou idé roun étidyan pou i konprann roun bagaj annan Labib-a ouben pou i lésé roun vyé labitid.

5. Ki ròt bagaj roun moun ki gen pasyans ka fè ?

⁵ Trwazyèmman, roun moun ki gen pasyans pa ka kouri fè bagaj-ya. A vré, annan sèrten sitiasyon, a pou nou réyaji vit. Mé lò roun moun ki gen pasyans gen roun bagaj enpòrtan pou fè, i pa ka kouri alé fè bagaj-a vitman présé san i pa réfléchi. I ka pran tan òrganizé so kò. Apré sa, i ka pran tan i gen pou pran-an, pou fè so travay.

6. Kouman roun moun ki gen pasyans ka réyaji lò i ka jwenn éprèv ?

⁶ Katriyèmman, roun moun ki gen pasyans ka fè éfòr pou i sipòrté éprèv-ya san i pa plenn so kò. A roun bagaj ki pròch ké andirans-a. Lò nou ka jwenn roun éprèv, sa bon pou nou louvri nou tchò pou roun zanmi, épi di li franchman sa nou ka rousanti. Mé roun moun ki gen pasyans ké sonjé osi bon bagaj ki ka rivé li annan so lavi, é i ké fè sa i pouvé pou i kontinyé adoré Jéova ké tchò kontan (Col. 1:11). Nou ki ka sèrvi Jéova, nou divèt gen pasyans annan tout sa domenn-yan. Poukisa ? Annou wè déztrwa rézon.

7. Dapré Jacques 5:7, 8, poukisa sa enpòrtan pou nou gen pasyans ? (gadé zimaj-a osi).

⁷ Sa enpòrtan pou nou gen pasyans si nou lé gen lavi pou tout-tan-an. Kou sèrvitèr Jéova-ya tan-lontan, nou divèt antann ké pasyans i fè so promès réyalizé (Héb. 6:11, 12). Labib-a ka di ki nou annan menm sitiasyon ké roun moun ki ka travay latè (li Jacques 5:7, 8). Roun moun ki ka travay latè divèt travay rèd. I divèt sonmen, apré sa, i divèt rozé. Mé i pa savé kitan èkzaktéman plant-ya ké pousé. Atò, i ka antann, i ka pran pasyans, mé i sir ki roun jou, i ké rékòlté. Menm fason-an, nou ka mété tout nou fòrs annan travay Bondjé ka bay nou fè menm si ‘nou pa savé ki jou nou Sényèr ka vini’ (Mat. 24:42). Nou ka antann, nou ka pran pasyans, é nou sir ki lò moman-an ké rivé, Jéova ké réyalizé tout so promès. Si nou pa gen pasyans ankò, nou ka riské las antann, é nou ka riské lésé Jéova piti piti. Nou ka riské osi koumansé kouri dèyè bagaj nou ka pansé ki ké fè nou tchò kontan lanmenm. Mé si nou ka kontinyé gen pasyans, nou ké tchenbé jiska lafen é nou ké sové (Mich. 7:7 ; Mat. 24:13).

8. Kouman pasyans-a pouvé idé nou rété byen ké ròt-ya ? (Colossiens 3:12, 13).

⁸ Pasyans-a ka pèrmèt nou tonbé dakò ké ròt-ya. Si nou gen pasyans, nou ké byen kouté yé (Jacq. 1:19). Nou ké fè éfòr osi pou nou rété byen ké yé. Lò nou ké èstrésé, nou pa ké réyaji tro vit, é nou pa ké di bagaj ki pa janti. É lò roun moun ké fè nou lapenn, nou pa ké kouri faché. Pasé nou randé kou pou kou, nou ké ‘kontinyé sipòrté nou konpanyen ké pardonnen nou konpanyen ké tout nou tchò’ (li Colossiens 3:12, 13).

9. Poukisa lò nou gen pasyans sa ka pèrmèt nou pran pi bon désizyon ? (Proverbes 21:5).

⁹ Si nou gen pasyans, nou ké pran pi bon désizyon osi. Pasé nou aji vitman ouben san nou pa réfléchi, nou ké pran tan chaché tout posibilité nou gen, épi chwazi sa-la ki pi bon (li Proverbes 21:5). Annou pran roun èkzanp. Nou ka chaché roun travay. Si nou pa gen pasyans, pitèt nou ké anvi asèpté prémyé travay yé ké bay nou, menm si nou ka riské gen mwens tan pou adoré Jéova. Parkont, si nou gen pasyans, nou ké pran tan réfléchi asou plizyèr bagaj, parèkzanp, konmyen tan nou ké pran pou nou alé travay, konmyen lèr nou ké divèt travay, é kouman sa travay-a ké aji asou nou fanmi ké asou nou lanmityé ké Jéova. Donk, pasyans-a pouvé anpéché nou pran roun mové désizyon.

10. Kouman roun krétyen pouvé gen plis pasyans épi kontinyé gen pasyans ?

¹⁰ Priyè pou to gen plis pasyans. Pasyans-a, a roun annan kalité frwi lèspri sen ka bay (Gal. 5:22, 23). Donk, nou pouvé doumandé Jéova bay nou so lèspri é idé nou gen sa kalité-a. Si roun sitiasyon ka fè ki sa rèd pou nou pran pasyans, annou « kontinyé doumandé » lèspri sen pou nou gen sa kalité-a (Luc 11:9, 13). Nou pouvé priyè Jéova osi pou doumandé li idé nou wè bagaj-ya kou i ka wè yé. É apré sa, nou divèt fè sa nou pouvé pou nou gen plis pasyans touléjou. Pi nou ké priyè pou nou gen plis pasyans é pi nou ké fè éfòr pou nou gen pasyans, pi  sa kalité-a ké vin fò annan nou tchò, é i ké fè parti di nou pèrsonalité.

11-12. Poukisa nou pouvé di ki Jéova pasyan ?

¹¹ Réfléchi asou èkzanp moun annan Labib-a ki pran pasyans. Labib-a ka palé di roun patché moun ki té gen pasyans. Si nou ka réfléchi asou yé èkzanp, nou pouvé anprann kouman nou pouvé gen pasyans. Mé pou koumansé, annou wè pi gran èkzanp moun ki gen pasyans : Jéova.

¹² Annan jarden Édèn-an, Satan sali non Jéova-a ; i ataké so répitasyon, i fè moun krè ki fason i ka dirijé-a pa jis é ki i pa gen lanmou. Pasé Jéova détrwi Satan lanmenm, i pran pasyans, i kontrolé so kò ; i té savé ki sa té ké pran tan pou i montré ki a so dominasyon ki pi bon. Dipi sa jou-a, i ka sipòrté tout vyé bagaj moun ka di asou li. Anplis di sa, i ka pran pasyans pou plis moun gen posibilité gen lavi pou tout-tan (2 Pierre 3:9, 15). Sa ka pèrmèt milyon moun anprann konnèt li. Si nou pa ka bliyé tout bénédiksyon nou ka jwenn paské Jéova ka pran pasyans ké nou, sa ké pi fasil pou nou antann jou-a i désidé pou fini ké sa sistèm-an.

13. Kisa ki ka montré ki, lò Jézi té asou latè-a, i imité parfètman èkzanp so Papa annan zafè gen pasyans ? (gadé zimaj-a osi).

¹³ Jézi ka imité èkzanp so Papa annan zafè gen pasyans parfètman. I montré i té gen pasyans lò i té asou latè-a. A pa tout tan sa té fasil pou li. Parèkzanp, lò èskrib-ya ké farizyen-yan té ka fè ipokrit, sa dèt té rèd pou li rété pasyan (Jean 8:25-27). Mé kou so Papa, i pa té ka kouri faché. I pa té ka randé kou pou kou lò yé té ka jouré li ouben lò yé té  ka provoké l’ (1 Pierre 2:23). É i té ka tchenbé anba éprèv san i pa plenn so kò. Donk, sa pa ka étoné nou, lò Labib-a ka ankourajé nou « byen réfléchi asou èkzanp sa-la ki sipòrté sa kantité paròl méchan-yan moun péchèr voyé anlè l’ » (Héb. 12:2, 3). Gras a Jéova, nou menm osi, nou ké pouvé tchenbé annan nenpòrt ki kalité éprèv.

14. Ki bon èkzanp Abraam ka bay nou annan zafè gen pasyans ? (Hébreux 6:15 ; gadé zimaj-a osi).

¹⁴ Ès sa ka fè lontan to ka antann jou Jéova-a rivé ? Si a sa, pitèt to pè to pa viv asé lontan pou to wè sa jou-a. Kisa ki pouvé idé to kontinyé antann épi pran pasyans ? Annou wè èkzanp Abraam. I té gen 75 lannen é i pa té gen timoun lò Jéova promèt li : « Mo ké fè to divini roun gran nasyon » (Gen. 12:1-4). Ès Abraam wè sa promès-a fèt ? Pa konplètman. Vennsenk lannen apré i janbé larivyè Éfrat, Jéova fè roun mirak pou i fè roun timoun, Izaak. É 60 lannen pita, so pitit fè pitit : Ézayu ké Jakòb (li Hébreux 6:15). Mé i pa janmen wè pitit di so pitit divini roun gran nasyon épi pran Péyi Bondjé té promèt yé-a. Mé sa mouché-a ki té fidèl rété zanmi ké so Kréyatèr pannan tout so lavi (Jacq. 2:23). Imajiné kouman tchò Abraam ké kontan lò i ké résisité, é lò i ké anprann ki Bondjé béni tout nasyon-yan paské i té gen lafwa é paské i pran pasyans ! (Gen. 22:18). Kisa sa ka anprann nou ? Pitèt nou pa ké wè tout promès Jéova fèt jòdla. Mé, si, kou Abraam, nou ka pran pasyans, nou pouvé sir ki Jéova ké rékonpansé nou dipi aprézan. É i ké  rékonpansé nou ankò plis annan monn nouvo i promèt nou-a (Marc 10:29, 30).

15. Asou ki bagaj nou pouvé pran tan étidyé nou rounso ?

¹⁵ Labib-a ka palé di roun patché ròt moun ki montré ki yé té gen pasyans b (Jacq. 5:10). A té ké roun bon bagaj si to té ka pran tan gadé yé èkzanp lò to ka étidyé to rounso. To pouvé gadé èkzanp David. Lò Bondjé chwazi li pou i divini rwa, i té jenn, mé i antann roun patché lannen anvan i divini rwa. Ouben èkzanp Siméyon ké Ann. Yé sèrvi Jéova ké fidélité toupannan yé té ka antann Mési-a (Luc 2:25, 36-38). Lò to ka étidyé sa èkzanp-ya, chaché répons sa késyon-yan : « Kisa ki pitèt idé sa moun-an gen pasyans ? Ki bénédiksyon i trapé ? Kouman mo pouvé imité l’ ? » To pouvé anprann osi roun patché bagaj ké èkzanp moun annan Labib-a ki pa pran pasyans (1 Sam. 13:8-14). Doumandé to kò : « Poukisa yé pa té gen pasyans ? Ki problèm yé trapé akoz di sa ? »

16. Ki bénédiksyon nou ka jwenn lò nou gen pasyans ?

¹⁶ Sonjé bénédiksyon nou ka jwenn lò nou gen pasyans. Lò nou ka pran pasyans, nou tchò kontan é nou pi kalm. Souvan, nou lasanté pi bon é nou pi byen annan nou tèt. Nou pi byen ké ròt-ya. É nou ka pèrmèt tout moun annan nou asanblé rété ansanm ansanm. Parèkzanp, si nou pa ka kouri faché lò roun moun ka nèrvé nou, nou ka évité sitiasyon-an vin pi grav (Ps. 37:8, nòt ; Prov. 14:29). Mé pi enpòrtan-an, lò nou ka pran pasyans, nou ka imité nou Papa ki annan syèl-a é nou ka vin pi pròch ké li.

17. Kisa nou divèt byen désidé fè ?

¹⁷ Pasyans-a, a vréman roun bèl kalité ki ka pèrmèt nou jwenn roun patché bénédiksyon. A pa tout tan sa fasil pou nou gen pasyans, mé, gras a Jéova, nou pouvé kontinyé travay pou nou gen sa kalité-a. É toupannan nou ka antann monn nouvo-a, nou pouvé sir ki « wéy Jéova-a ka protéjé sa-ya ki ka krenn li, sa-ya ki ka konté asou so lanmou fidèl » (Ps. 33:18). Donk, a pou nou byen désidé kontinyé abiyé ké pasyans !