ARTIK POU ÉTIDYÉ 36
Poté sa to divèt poté épi jité larèstan
« Annou jité tout fardo […] épi annou kouri lakours yé mété douvan nou-a san nou pa janmen fébli » (HÉB. 12:1).
KANTIK 33 « Jette ton fadeau sur Jéhovah »
KOUTWÉY ASOU SA NOU KÉ WÈ a
1. Dapré Hébreux 12:1, kisa nou divèt fè pou nou fini nou lakours krétyen-an ?
LABIB-A ka di ki lavi roun krétyen, a kou roun lakours. Krétyen-yan ki ka rivé fini sa lakours-a ka rousouvwè roun rékonpans : a lavi pou tout-tan (2 Tim. 4:7, 8). Donk nou divèt fè bokou éfòr pou nou kontinyé kouri paské nou vréman tou pròch fini sa lakours-a. Apot Pòl ki ganyen lakours krétyen-an di nou sa ki té ké pèrmèt nou ganyen l’ nou menm osi. I di nou « jité tout fardo » épi « kouri lakours yé mété douvan nou-a san nou pa janmen fébli » (li Hébreux 12:1).
2. Kisa sa lé di « jité tout fardo » ?
2 Lò Pòl di nou « jité tout fardo », ès i té lé di ki krétyen-yan pa gen pyès charj pou yé poté ? Non. I té lé di ki nou divèt jité tout fardo nou pa bézwen poté. Sa kalité fardo-ya pouvé anpéché nou kouri épi fatigé nou. Pou nou rivé tchenbé, a pou nou wè vitman ki fardo nou ka poté épi jité yé lanmenm. Mé an menm tan nou pa lé jité sa nou blijé poté. Sinon, nou ka riské pédi sa lakours-a (2 Tim. 2:5). Annou palé di déztrwa annan sa fardo-ya.
3. a) Dapré Galates 6:5, kisa nou chak nou divèt poté ? b) Kisa nou ké wè annan sa artik-a, é poukisa ?
3 (Li Galates 6:5.) Pòl èspliké ki nou oblijé ‘poté noupa charj’. Isi-a, i té ka palé di sa Bondjé lé nou chak nou fè é ki pyès moun pa pouvé fè pou nou. Annan sa artik-a, nou ké wè a kisa ki ‘noupa charj’ é kouman nou pouvé poté li. Nou ké palé osi di plizyèr fardo nou pitèt ka poté alòr ki nou pa bézwen poté yé. É nou ké wè sa nou divèt fè pou nou jité yé. Si nou ka poté noupa charj é nou ka jité tout fardo nou pa bézwen poté, sa ké pèrmèt nou rivé annan bout nou lakours krétyen-an.
CHARJ NOU DIVÈT POTÉ
Poté noupa charj sa lé di rèspèkté vé nou fè-a lò nou promèt Jéova adoré l’ pou tout-tan, fè sa nou divèt fè pou nou fanmi épi asèpté konsékans désizyon nou pran (gadé paragraf 4-9).
4. Nou promèt Jéova adoré li pou tout-tan é a pa roun fardo si nou ka rèspèkté sa. Poukisa ? (gadé zimaj-a osi).
4 Nou promèt Jéova adoré li pou tout-tan. Jou-a nou bay Jéova nou lavi, nou promèt li adoré l’ épi fè so volonté. Nou divèt rèspèkté sa promès-a. A roun gro rèsponsabilité mé a pa roun fardo. Poukisa ? Paské Jéova fè nou pou nou fè so volonté (Rév. 4:11). I mété anvi konnèt li épi adoré li annan nou tchò é i fè nou kou li menm. Sa ka pèrmèt nou vin pi pròch ké li épi pran plézi fè so volonté (Ps. 40:8). Anplis di sa, lò nou ka fè so volonté é nou ka swiv so Pitit, sa ka « konsolé » nou (Mat. 11:28-30).
(gadé paragraf 4-5)
5. Kisa ki pouvé idé nou rèspèkté promès nou fè Jéova ? (1 Jean 5:3).
5 Kisa ki pouvé idé to poté sa charj-a ? Dé bagaj. Prémyé bagaj-a : kontinyé fè to lanmou pou Jéova vin pi fò. Pou fè sa, pran tan réfléchi asou tout bèl bagaj i fè, i ka fè é i ké fè pou to. Pi to lanmou pou li ké vin fò, pi sa ké fasil pou to obéyi l’ (li 1 Jean 5:3). Dézyèm bagaj-a : imité Jézi. I rivé fè volonté Jéova paské i té ka doumandé li idé li é i pa té ka bliyé rékonpans i té ké gen-an (Héb. 5:7 ; 12:2). Kou Jézi, doumandé Jéova bay to fòrs é pa janmen bliyé èspwar lavi pou tout-tan-an. Si to ka fè to lanmou pou li vin pi fò é si to ka imité so Pitit, to ké rivé rèspèkté promès to fè li-a.
6. Poukisa nou divèt fè sa nou gen pou fè pou nou fanmi ? (gadé zimaj-a osi).
6 Rèsponsabilité nou gen annan nou fanmi. Nou ki annan lakours krétyen-an, nou divèt kontan Jéova ké Jézi plis pasé nou fanmi (Mat. 10:37). Mé sa pa lé di ki nou pouvé néglijé nou rèsponsabilité annan nou fanmi kousidiré yé té ka anpéché nou fè Bondjé ké Kris plézi. O kontrèr, pou nou fè yé plézi nou divèt fè sa nou gen pou fè pou nou fanmi (1 Tim. 5:4, 8). Si nou ka fè sa, nou tchò ké plis kontan. Sa nòrmal paské Jéova savé ki tchò tout moun kontan annan roun fanmi lò mouché ké madanm kontan é ka rèspèkté yé konpanyen, lò papa ké manman kontan yé timoun é ka byen lévé yé, é lò timoun-yan ka obéyi yé papa ké yé manman (Éph. 5:33 ; 6:1, 4).
(gadé paragraf 6-7)
7. Ki to sa roun mouché ouben roun madanm maryé, ki to sa roun manman roun papa ouben roun timoun, kouman to pouvé fè sa to divèt fè pou to fanmi ?
7 Kisa ki pouvé idé to poté sa charj-a ? Ki to sa roun mouché ouben roun madanm maryé, ki to sa roun papa, roun manman ouben roun timoun, a pou to tchenbé kont di sajès Labib-a pasé to fè kou to ka pansé, kou yé anprann to fè ouben pasé to fè sa sa-ya ki èspésyalis swadizan ka di (Prov. 24:3, 4). Pou fè sa, sèrvi nou piblikasyon ki ka apiyé asou Labib-a. Annan sa piblikasyon-yan to ka trapé bon konsèy é yé ka èspliké to kouman to pouvé swiv prensip-ya ki annan Labib-a. Parèkzanp, annan parti-a « De l’aide pour les familles b », to ké jwenn plizyèr konsèy asou problèm mouché ké madanm ka jwenn, asou problèm papa ké manman ké jennjan-yan ka jwenn jòdla. Menm si roun ran annan to fanmi pa ka apliké prensip-ya ki annan Labib-a, to menm, a pou to byen désidé apliké yé. To fanmi ké trapé roun patché bénédiksyon é Jéova ké béni to (1 Pierre 3:1, 2).
8. Lò nou ka pran roun désizyon, ki rèsponsabilité nou gen ?
8 Asèpté konsékans désizyon nou ka pran. Jéova bay nou libèrté di chwazi é i lé nou pran désizyon ki ké bon pou nou. Mé si nou pa ka pran bon désizyon, i pa ké anpéché konsékans sa désizyon-yan tonbé anlè nou (Gal. 6:7, 8). Donk lò nou ka pran désizyon ki pa bon, lò nou ka di ouben nou ka fè roun bagaj ki pa bon, a pou nou asèpté konsékans sa désizyon-yan ka mennen. Souvan, lò nou fè roun bagaj ki pa bon nou konsyans ka bat nou. Mé si nou savé ki Jéova lé nou asèpté konsékans sa nou ka fè ké désizyon nou ka pran, sa pouvé pousé nou konfésé nou péché, ranjé sitiasyon-an épi pa roukoumansé. Sa ké pèrmèt nou rété annan lakours pou gen lavi pou tout-tan-an.
(gadé paragraf 8-9)
9. Kisa to pouvé fè si to pa pran roun bon désizyon ? (gadé zimaj-a osi).
9 Kisa ki pouvé idé to poté sa charj-a ? Si to pa pouvé rouvini asou roun désizyon to pran, asèpté to sitiasyon. Dlo tonbé pa ka ranmasé. Alòr pa gaspiyé to tan ni to fòrs ka éséyé montré ki a to ki té gen rézon ouben ka akizé ròt-ya pou sa to fè. Pasé to fè sa, rékonnèt ki sa to fè-a pa bon é éséyé profité di sa ki pi bon annan to sitiasyon. Si to konsyans ka bat to akoz di roun péché to fè, priyè Jéova ké imilité pou konfésé to péché é doumandé li pardonnen to (Ps. 25:11 ; 51:3, 4). Doumandé sa-ya to fè lapenn pardon é si sa nésésèr, doumandé ansyen-yan idé to (Jacq. 5:14, 15). Sèrvi sa to fè ki pa bon pou to vin miyò é éséyé pa roukoumansé. Konsa, to ké pouvé sir ki Jéova ké aji ké mizérikòrd ké to é i ké idé to (Ps. 103:8-13).
FARDO NOU DIVÈT JITÉ
10. Poukisa lò nou ka éséyé fè bagaj nou pa pouvé rivé fè a roun fardo ki lou ? (Galates 6:4).
10 Lò nou ka santi ki nou toujou divèt fè plis. Si nou ka konparé nou kò ké ròt-ya, nou pouvé santi ki nou toujou divèt fè plis é sa pouvé sa roun fardo pou nou (li Galates 6:4). Si nou toujou ka konparé nou kò ké ròt-ya, nou ka riské anvyé yé épi chaché dépasé yé (Gal. 5:26). Pou nou rivé fè kou yé, pitèt nou ké éséyé fè plis ki sa nou pouvé fè annan nou sitiasyon. É si « lò to ka antann roun bagaj lontan, to tchò ka vin malad », alé wè pou bagaj to pa pouvé rivé fè (Prov. 13:12). Sa pouvé fè nou pédi tout nou fòrs épi anpéché nou kouri nou lakours krétyen-an (Prov. 24:10).
11. Kisa ki ké anpéché to chaché fè bagaj to pa pouvé rivé fè ?
11 Kisa to pouvé fè pou to jité sa fardo-a ? Pa mété présyon anlè to pou fè plis ki sa Jéova ka doumandé to fè. I pa ké janmen doumandé to bay li sa to pa gen (2 Cor. 8:12). A pou to sir ki i pa ka konparé sa to ka fè ké sa ròt-ya ka fè (Mat. 25:20-23). A to sèrvis to ka fè ké tout to tchò, to fidélité ké to andirans ki gen valò pou li. A pou to rékonnèt to limit é a pou to asèpté ki akoz di to laj, to lasanté ouben to sitiasyon, i gen bagaj to pa pouvé fè ankò. Kou Barzilay, a pou to paré pou to réfizé sèrten rèsponsabilité si to pa gen fòrs pou sa ankò (2 Sam. 19:35, 36). É kou Moyiz, a pou to asèpté moun idé to épi a pou to asèpté bay ròt moun rèsponsabilité lò to divèt fè l’ (Ex. 18:21, 22). Si to ka rékonnèt to limit, sa ké anpéché to chaché fè bagaj to pa pouvé rivé fè é ki pouvé anpéché to gen fòrs pou kontinyé lakours pou gen lavi pou tout-tan.
12. Ès nou divèt poté rèsponsabilité mové désizyon ròt moun ka pran ?
12 Santi so kò koupab parapòrta mové désizyon ròt moun ka pran. Nou pa pouvé pran désizyon pou ròt-ya, é a pa tout tan nou pouvé protéjé yé pou yé pa trapé konsékans mové désizyon yé ka pran. Parèkzanp, papa ké manman-yan pouvé tris toubonnman lò yé tifi ouben yé tibolonm ka désidé arété adoré Jéova. Mé, lò papa ké manman-yan ka santi ki yé rèsponsab lò yé timoun ka pran roun mové désizyon, yé ka mété roun fardo asou yé zépol. Jéova pa lé yé poté sa fardo-a (Rom. 14:12).
13. Kisa papa ké manman pouvé fè lò yé timoun ka pran roun mové désizyon ?
13 Kisa to pouvé fè pou to jité sa fardo-a ? A pou to sonjé ki Jéova bay tout moun libèrté di chwazi. I ka pèrmèt nou chak désidé sa nou lé fè, parèkzanp désidé si nou ké adoré l’ ouben si nou pa ké adoré l’. I savé ki to pa sa roun manman ouben roun papa ki parfè ; sa i lé, a ki to fè tousa to pouvé. A to timoun pou poté rèsponsabilité désizyon i ka pran, a pa to pou pran l’ (Prov. 20:11). Mé, pitèt to pa ka rivé arété sonjé bagaj to pa byen fè lò to lévé to timoun. Si to annan sa sitiasyon-an, di Jéova sa to ka rousanti é doumandé li pardonnen to. I savé ki sa ki fèt, fèt. To pa pouvé chanjé anyen é i pa ka doumandé to anpéché to timoun rékòlté sa i sonmen. Sonjé ki si to timoun ka fè éfòr pou rouvini òbò Jéova, a ké tout so tchò i ké rousouvwè l’ (Luc 15:18-20).
14. Si nou konsyans ka bat nou tro bokou, a roun fardo nou divèt jité. Poukisa ?
14 Lò nou konsyans ka bat nou toulong. Lò nou fè roun péché, sa nòrmal si nou konsyans ka bat nou. Mé lò nou konsyans pa ka arété bat nou, a roun fardo pou nou. Nou pa gen pou poté l’ é nou divèt jité l’. Kouman nou pouvé savé si nou konsyans ka bat nou tro bokou ? Si nou ja konfésé nou péché, nou répanti é si nou ka fè tousa nou pouvé pou nou pa roufè menm péché-a, nou pouvé sir ki Jéova pardonnen nou (Actes 3:19). Jéova pa lé nou kontinyé santi nou kò koupab. I savé ki si nou konsyans ka bat nou tro bokou, sa pouvé mové pou nou (Ps. 31:10). Si nou ka lésé chagren-an plen nou tchò nou ka riské arété nou lakours krétyen-an (2 Cor. 2:7).
Si to répanti ké tout to tchò pou péché to fè, to pa divèt kontinyé sonjé yé paské Jéova li menm pa ka sonjé yé ankò (gadé paragraf 15).
15. Kisa ki pouvé idé to arété santi to kò koupab tròp ? (1 Jean 3:19, 20 ; gadé zimaj-a osi).
15 Kisa to pouvé fè pou to jité sa fardo-a ? Si to konsyans pa ka arété bat to é sa ka anpéché to viv, sonjé « vré pardon-an » Jéova ka pèrmèt nou gen (Ps. 130:4). Lò i pardonnen sa-ya ki répanti ké tout yé tchò, i ‘pa ka sonjé yé péché ankò’ (Jér. 31:34). Sa lé di ki i pa ka kontinyé sonjé péché to fè anvan. Donk si to ka pansé ki si to ka kontinyé wè mizè akoz di péché to fè, a paské i pa pardonnen to, a pa vré. É pa troumanté to kò si akoz di péché to fè anvan, to pa pouvé fè tousa to lé pou li jòdla. To pa divèt kontinyé sonjé péché to fè paské Jéova li menm pa ka sonjé yé ankò (li 1 Jean 3:19, 20).
KOURI POU TO GANYEN LAKOURS-A
16. Nou menm ki ka kouri lakours krétyen-an, kisa nou divèt byen konprann ?
16 Nou divèt kouri lakours krétyen-an ‘pou nou ganyen li’ (1 Cor. 9:24). Pou fè sa, nou divèt byen konprann ki i gen charj nou divèt poté é ki i gen fardo nou divèt jité. Annan sa artik-a, nou palé di déztrwa charj é déztrwa annan sa fardo-ya, mé i gen roun patché ròt bagaj ankò. Jézi di ki nou tchò té ké pouvé ‘divini lou afòrs nou manjé tròp, nou bwè tròp é akoz di traka lavi-a’ (Luc 21:34). Sa vèrsé-a ké ròt ankò pouvé idé to wè ki chanjman to divèt fè pou to kontinyé kouri lakours krétyen-an.
17. Poukisa nou pouvé sir ki nou pouvé ganyen lakours pou gen lavi pou tout-tan-an ?
17 Nou pouvé sir ki nou pouvé ganyen lakours pou gen lavi pou tout-tan-an. Poukisa ? Paské Jéova ké bay nou fòrs nou ké bézwen (Is. 40:29-31). Atò, pa janmen ralanti ! Imité apot Pòl ki fè tousa i té pouvé pou ganyen pri-a (Phil. 3:13, 14). Pyès moun pa pouvé kouri sa lakours-a pou to, mé gras a Jéova, to pouvé rivé. I pouvé idé to poté charj to gen pou poté épi jité tout fardo to pa gen pou poté (Ps. 68:19). Gras a li, to pouvé kouri lakours krétyen-an san to pa moli é to pouvé ganyen l’ !
KANTIK 65 Va, progresse !
a Sa artik-a ké idé nou kontinyé kouri annan lakours pou gen lavi pou tout-tan. Nou annan roun lakours é i gen sèrten charj nou divèt poté. Parèkzanp, nou promèt Bondjé ki nou ké adoré l’ pou tout-tan, nou divèt rèspèkté sa. Nou divèt okipé di nou fanmi épi lò nou ka pran roun désizyon, a pou nou asèpté konsékans-ya. Mé an menm tan, a pou nou débarasé nou kò di tout fardo nou pa bézwen poté é ki pouvé anpéché nou kouri. Annan sa artik-a nou ké palé di déztrwa annan sa fardo-ya.
b To pouvé trapé sa parti-a asou jw.org. Parèkzanp, pitèt mouché ké madanm maryé ké kontan artik « Comment témoigner du respect » épi « Comment se montrer reconnaissant » ; pitèt papa ké manman ké kontan artik « Enseigner à ses enfants à se servir d’un smartphone avec bon sens » é « Comment communiquer avec mon adolescent ? » ; é pitèt jennjan-yan ké kontan artik « Comment résister à la pression du groupe » é « Comment surmonter le sentiment de solitude ».
