Nou gen plizyèr bagaj pou idé nou étidyé épi konprann Labib-a pi byen. Mé nou pa ka étidyé Labib-a sèlman pou nou gen plis konésans. Nou ka étidyé l’ an prémyé pou nou fè nou lanmou pou Jéova vin pi fò. Kou nou lé konprann so pèrsonalité pi byen, nou ka chaché pépit èspirityèl. Pou nou trouvé yé, annou doumandé nou kò : « Kisa sa vèrsé-ya annan Labib-a ka anprann mo asou Jéova ? »

Parèkzanp, nou pouvé anprann plis bagaj asou fason Jéova ka montré so lanmou, so sajès, so jistis ké so pwisans. Mé a pa sa kat kalité-ya rounso i gen. I gen roun patché ròt bèl kalité. Kisa nou divèt fè pou nou anprann plis bagaj asou sa kalité-ya ?

Annan Index des publications des Témoins de Jéhovah, annan parti « Jéhovah » épi apré « Qualités par nom », i gen pasé 50 kalité Jéova gen. Étidyé kalité-ya to ka wè lò to ka li Labib-a. (Si annan to lang, a Guide de recherche pour les Témoins de Jéhovah rounso i gen, gadé annan parti asou « Jéhovah Dieu », épi anba « Qualités de Jéhovah ».)