• « Pou mo, a té kousidiré mo mari té tronpé mo alé viré. »

• « Pou mo, i té mété mo bas menm, mo té ka di an mo tchò ki mo pa té jòlòt é mo té ka santi ki mo pa té gen pyès valò. »

• « Mo pa té pouvé palé di sa ké pyès moun. Mo té ka soufri mo rounso. »

• « A té kousidiré Jéova pa té mélé ké mo. »

Men sa plizyèr madanm di. É sa ka montré kouman roun madanm ka soufri lò so mari ka gadé pòrnografi. É si i ka séré dipi plizyèr mwa ouben dipi plizyèr lannen pou i fè sa, sa pouvé rèd pou madanm-an fè li konfyans ankò. Men sa roun madanm doumandé so kò parapòrta so mari: « Kimoun i sa vréman ? Ès i gen ròt bagaj i ka séré pou mo ? »

Sa artik-a fèt pou madanm yé mari ka gadé pòrnografi a. I ka bay prensip ki annan Labib-a ki ké konsolé yé, ki ké fè yé sir ki Jéova la ké yé, ki ké idé yé rété pròch di li é ki ké bay yé lapè annan yé tchò b.

To pa pouvé vérifyé tousa to mari ka fè, mé i gen bagaj to pouvé fè pou to arété enkyété to kò. Annou wè sa to pouvé fè.

Pa di ki a di to fot. Roun madanm pouvé pansé ki si so mari ka gadé pòrnografi, a di so fot osi. Alice c té ka pansé ki a li ki té divèt gen roun problèm. I té ka doumandé so kò : « Poukisa mo mari préféré gadé ròt fanm ? » Roun ran madanm ka pansé ki a akoz di yé konpòrtman si sitiasyon-an ka vin pi mové. Danielle ka di : « Mo koumansé doumandé mo kò si a pa té paské mo té égri é ki mo té ka kòlè souvan ki mo maryaj té ka pran dlo. »

Si a sa to ka rousanti, sonjé ki pou Jéova, to pa rèsponsab di sa to mari ka fè. A sa Jacques 1:14 ka byen montré. Nou ka li : « Chak moun ka mété yé kò anba éprèv lò yé ka lésé yé pròp anvi mennen yé ké tanté yé » (Rom. 14:12 ; Phil. 2:12). Pou Jéova,  a pa di to fot ; o kontrèr, to fidélité gen valò pou li (2 Chron. 16:9).

Si roun mouché ka gadé pòrnografi, a pa paské so madanm gen roun problèm. Plizyèr èspésyalis montré ki pòrnografi-a ka fè roun mouché gen anvi sèksyèl ki tèlman fò ki pyès madanm pa pouvé bay li sa i anvi.

Pa enkyété to kò tròp. Catherine èspliké ki i pa té ka arété sonjé problèm so mari té gen ké pòrnografi-a é ki sa té ka anpéché li viv. Frances, li menm, di : « Lò mo pa savé koté mo mari fika, mo angwasé. Tout lajournen, a pa ti enkyèt mo enkyèt. » Ròt madanm di ki yé jennen pou mouri lò yé ansanm ké frè ouben sò ki pitèt savé ki yé mari gen sa problèm-an. Ròt madanm ankò ka di kouman yé ka santi yé tousèl ké yé kò paské yé ka pansé ki pyès moun pa ka konprann yé sitiasyon.

Si to ka rousanti sa, sa nòrmal. Mé, si to ka pasé tout to tan ka sonjé sa bagaj-ya, to ké pi enkyèt ankò. Pasé to fè sa, éséyé mété to lidé asou to lanmityé ké Jéova. Sa ké bay to plis fòrs (Ps. 62:2 ; Éph. 6:10).

Sa ké pitèt idé to si to ka li é si to ka pran tan réfléchi asou èkzanp madanm annan Labib-a ki té enkyèt menm, mé ki trapé konsolasyon lò yé priyè Jéova. A pa tout tan i tiré yé problèm, mé i bay yé so lapè. Parèkzanp, Ann « té tris pou mouri » akoz di so sitiasyon. Mé apré i priyè Jéova pannan « roun bon moman », i viré gen lapè annan so tchò, menm si i pa té savé kouman so sitiasyon té ké chanjé (1 Sam. 1:10, 12, 18 ; 2 Cor. 1:3, 4).

Doumandé ansyen-yan annan to asanblé idé to. Yé pouvé sa « kou roun koté pou séré lò i gen van, roun koté pou séré lò i gen gro lapli » (Is. 32:2). Yé ké pitèt menm di to ki sò to pouvé alé wè pou i konsolé to é pou to palé ké li franchman (Prov. 17:17).

Ès to pouvé idé to mari arété gadé pòrnografi ? Pitèt. Labib-a ka di nou ki pou réglé roun problèm ouben pou ganyen asou roun lèlmi ki fò, « dé pi bon pasé rounsèl » (Eccl. 4:9-12). Plizyèr èspésyalis ka di ki lò roun mouché ké so madanm ka briga ansanm  pou roun annan yé arété gadé pòrnografi é pou yé viré fè yé konpanyen konfyans, souvan sa ka byen maché.

Pou sa maché, sa enpòrtan pou to mari paré pou travay rèd é pou i lé arété gadé pòrnografi. Ès i sipliyé Jéova bay li fòrs, é ès i alé wè ansyen-yan pou yé idé li ? (2 Cor. 4:7 ; Jacq. 5:14, 15). Ès i désidé sa i divèt fè pou i pa tonbé annan tantasyon-an ? Parèkzanp, ès i désidé mété limit annan fason i ka sèrvi so aparèy élèktronik é ès i ka évité sitiasyon ki danjéré ? (Prov. 27:12). Ès i paré pou asèpté to idé l’ é ès i pa ka séré anyen pou to ? Si a sa, pitèt to ké pouvé idé li.

Annou wè kouman roun madanm ké so mouché, Felicia ké Ethan, ka fè. Ethan koumansé gadé pòrnografi lò i té piti. Mé Felicia ka pran pasyans ké li, i toujou paré pou kouté l’. Donk, lò Ethan anvi gadé pòrnografi, i pa pè palé pou so madanm di sa. I ka di : « Mo ka palé ké mo madanm franchman é mo pa ka séré anyen pou li. Ké tout so lanmou, i ka idé mo évité tantasyon-yan épi i ka doumandé mo souvan kouman sa k’alé. I ka idé mo osi mété limit annan fason mo ka sèrvi Entèrnèt. » Kou Ethan kontan pòrnografi, sa ka fè Felicia lapenn. Mé i ka di : « A pa paské mo ka soufri ouben paské mo kòlè sa pouvé idé li soti anba sa vyé bagaj-a. Lò nou fin palé di so problèm, a la i paré pou idé mo pou mo pa tris ankò. »

Sa kalité kozman-yan pouvé idé roun mouché arété gadé pòrnografi, mé sa pouvé idé so madanm osi viré fè li konfyans. Lò roun mouché pa ka séré anyen pou so madanm, lò i paré pou i di li ki problèm i gen, koté i ka alé ké sa i ka fè, sa pi fasil pou so madanm fè li konfyans.

Ès to ka pansé to pouvé idé to mari konsa ? Si a sa, zòt pouvé li sa artik-a ansanm épi palé di sa. To mari divèt gen òbjèktif fin ké pòrnografi-a épi idé to viré fè li konfyans. Pasé i nèrvé lò to ka di li ki to enkyèt, i divèt éséyé konprann to. To menm, to divèt gen òbjèktif ankourajé li fè éfòr é bay li posibilité pou to viré fè li konfyans. Zòt toulédé ké bézwen konprann kouman roun moun ka rivé tonbé annan pyèj pòrnografi-a é kouman i pouvé soti anba sa d.

Si to pè ki to ké to mari pa rivé palé jantiman di sa problèm-an, zòt pouvé doumandé  roun ansyen ki konnèt zòt byen vini idé zòt annan sa kozé-a. A pou to savé ki, menm apré to mari ké fin ké sa zafè pòrnografi-a, pitèt to ké bézwen bokou tan pou to viré fè li konfyans. Pran kouraj. Véyé tout ti bagaj ki ka montré ki sa k’alé pi byen annan zòt maryaj. Kontinyé gen èspwar ki, ké pasyans épi ké tan-an, zòt maryaj ké viré fò (Eccl. 7:8 ; 1 Cor. 13:4).

Si to mari ka viré gadé pòrnografi, ès sa lé di ki i pa répanti ouben ki i pa ké janmen rivé ? Nou pa pouvé di sa. Si a kou roun ladròg pou li, pitèt i ké divèt briga ké sa pannan tout so lavi pou i fin ké sa. I pouvé menm viré annan sa apré i arété pannan plizyèr lannen. Pou sa pa rivé li, i ké pitèt divèt pran dispozisyon ki pi rèd ankò. Parèkzanp, kontinyé swiv tousa i té désidé fè pou i pa gadé pòrnografi menm si i ka pansé ki i rivé fin ké sa (Prov. 28:14 ; Mat. 5:29 ; 1 Cor. 10:12). I ké divèt chanjé ‘mannyè i gen labitid réfléchi’ épi anprann « rayi sa ki mové », annan sa, i gen pòrnografi ké tout bagaj malpròp, kou parèkzanp sa yé ka aplé « masturbation » (Éph. 4:23 ; Ps. 97:10 ; Rom. 12:9). Ès i paré pou fè tout sa éfòr-ya ? Si i paré, pitèt i ké pouvé rivé fin ké sa nèt e.

Mé, kisa to pouvé fè si to mari pa lé briga ké sa problèm-an ? Pitèt a lapenn dèyè lapenn to ké gen, to ké kòlè é to ké santi ki i ka trayi to. É sa nòrmal. Mé lésé tout bagaj annan lanmen Jéova pou to gen lapè annan to tchò (1 Pierre 5:7). Kontinyé étidyé, priyè épi réfléchi asou sa to ka li pou to vin toujou pi pròch ké Jéova. To pouvé sir ki li menm osi ké vin pi pròch ké to. Kou Isaïe 57:15 ka di, i ka rété ké « sa-ya ki krazé é ki ka fè yé kò toupiti » é i ka « fè sa-ya ki ka fè yé kò toupiti, [...] rouviv ». Donk, fè tousa to pouvé pou kontinyé adoré Jéova ké fidélité. Doumandé ansyen-yan idé to. É kontinyé gen èspwar : pitèt dimen, to mari ké chanjé mantalité (Rom. 2:4 ; 2 Pierre 3:9).